Kɛ́wɛɛ 26

Pɔli é kóman mín nvɔ Agilipa ɲanla

1Agilipa é fɔ Pɔli yɛ kó: «Mín ngɛ́ kɛ́ i fɛ o fɔ.» Oo kɛ mínngɛ Pɔli é i bhóo láwii, tó kɛ a yɛ́ɛ mankala. 2«Mansacɛ Agilipa, né nisɔdhyaanin ɲé, kɛ mansɔɔ, né wɛɛ ɲɛ́ɛ yé ile ɲankɔɔ bí, kɛ a yáa i la oo Yawudhyaa olu wɛɛ kóman mínnu fɔ né mán kó o lɔ tɛ tínɲan le. 3Kɛ mansɔɔ í le á Yawudhyaa olu yɛ láanan olu bɛ́ lɔ, óni i yɛ sɔ́sɔli olu bɛ́. O le kósɔn, ni a ɲíinnan í fɛ, í yóso swáanya íi ngómankan ŋo lɔ́myɛn.

4Yawudhyaa olu bɛ́ a ɲóo o lɔ, kɛ ta ɲɛ́n dhyémuuya o man ɲɛ́n síya olu cɛ́man Yeluzalɛmu. 5Ii né lɔ́ kábiini wáatija, ii sé kɛ o tínɲan ladi, ní o kɛ dhyáa i yɛ, née ɲɛ́n dínɲan lɔ́tɛɛ o kɛ́ Falizɛnɲan o le lɔ, kɛ kéeɲan ni dínan o yɛ sɛliya o le. 6Binin, Ala é láheli mín ndá án myɛ́man olu yɛ, né wɛɛ ɲéesii o le mínngɛ, o le wɛɛ né láse kítitɛɛlaa o lɔ bí. 7Lúkɔɔn tá ni fyáa míin án ɲɛ́n síya o le, olu Ala bhátola sú ni tee, ní sɛwɛya le. O yéesii oo i yɛ: Ii fɛ kɛ o laheli o láfanin ɲé. O le kósɔn nva mansacɛ Agilipa, Yawudhyaa olu wɛɛ nan ni né le kítitɛɛlaa o lɔ! 8Mínnɛɛn le kósɔn a lanin ndɛ́ a la, oo Ala é sé kɛ sú olu lákuun?

9Né yɛ́ɛ gbu o tɛ́ wɛɛ la a la tínɲan in né, óo Ɛnza Nazalɛtika cɛ o, ngákan né kɛ o tɔ́ɔ o kɛlɛ ni nváan o bɛ́ le. 10Ní o le kɛ Yeluzalɛmu. Faanlɛɛɲansebhaa ólu kúnndii olu tɛ wɛɛ sé di né man, kɛ Ala mɔɔn olu bhyáa kasola, nó ŋé olu shɛ́ɛman bhyáa kasola, ní i ló ndɛ́ɛ fɔ kó kɛ mín nváa, i tɛ́ɛ o fáa, né tɛ́ɛ ndála lá o ka. 11Né tɛ́ɛ tínminnan sɛ́ɛbho ŋólu bɛ́ le la, ndɛ́ɛ gbɛ́ya lála i ka, kɛ fáan la i ka, ndɛ́ɛ fɛ kɛ fáan lá i ka kó ii fɔ kó ii sɛɛ mín ngɛla kó tínɲan tɛ́ o lɔ, mwɛnnɛn kóyoo o man i mán, ndɛ́ɛ táa ikwɔ le fɔ́ɔ so olu la yamaan gbɛ́ɛ lu lɔ kɛ táa gbɛ́yala le i ka.

12O bhóo o le man, ló nɔ la, ndɛ́ɛ táala Damasi, Faanlɛɛɲansebhaa ólu kúnndiiba ólu tɛ́ wɛɛ sé di né man, tó kɛ né bhyáashaa. 13Ndɛ́ɛ sháa o la wáati mín nɔn kɛ táa, tee o wɛɛ sé a kún njɛ́man wáati mín nɔn, nva mansacɛ Agilipa, ni kɛ́ɛnɲan lɔ yé yíila kɛ bhɔ́ sa ŋo lɔ, mín gbɛ́nin ndɛ́ɛ kɛ tinmin tee o yɛ́ɛ ka, kɛ o máan o a nan né ni ndáamanɲɔɔn olu lámiin. 14Án mbɛ́ɛ án mbé lúuman, tó née kómankan nɔ myɛ́n Yawudhyaa olu yɛ kan ŋo lɔ kó: ‹Sɔli, Sɔli, mínnɛɛn le kósɔn íi né tɔ́lɔla? Íi le óo nisi, min ŋe i kwɔ́se nasɛɲinnan a gbasi bisa ŋo man!› 15Ní a yawi kó: ‹Mantii o, íle yɛ́ɛtii é wé?› Mantii oo ɲáwi kó: ‹Né Ɛnza née wé, íi mín ndɔ́lɔla. 16Wáa í wíi, í lɔ í sé ŋo ka! Kɛ mansɔɔ ni ɲɛ́ɛ yáala í la le, ké íi kɛ ɲɛ́n bháalakɛdhye né óni nzɛ́ɛya le, ké íi fɔ mɔɔn olu yɛ kó í wɛɛ né yé, óni ngáa fé mínnu yáa í la, íi olu bɛ́ fɔ i yɛ. 17Né yáa í bwási Yawudhyaa olu ni síya gbɛ́ɛ olu mán, ní í bhyáashaanan mɔɔn mínnu mán. 18Ní i bhyáashaanan ké íi olu ɲán olu laka, ké ii bhɔ́ diwi o lɔ kɛ nan gbɛ lɔ, kɛ í bhɔ Sɔtaannan tá fáan o kɔɔ, kɛ nan Ala man, ké i kɛ lá né la, ké ii yuumu olu yafa o sɔɔ, óni kɛ síilaa sɔɔ ni Ala yɛ mɔɔn sɛ́nnɛnyanin ŋólu le.›#26.18 Án ni sé bhɔ́la a ɲánle ikwɔ: Ké ii yúumu yafa olu sɔɔ óni ké ii i yɛ cɛ́n o sɔɔ ni mɔɔn olu le mínnu wɛ́ɛ dɛ́nɛnya lánanya o lɔ ni né.

19Kɛ ta o ló ŋo le mán, nva mansacɛ Agilipa, née fé mín ɲé kɛ bhɔ́ sángboo o lɔ, né mán o sɔ́sɔ. 20Wáa ní o kóman olu láse Damasi só o le la o tún, óni Yeluzalɛmu só o la, óni Zude mala o bɛ́ lɔ, óni síya gbɛ́ɛ olu man, ní fɔ i yɛ ngó: ii i yɛ yúumu olu caanlɔngii, tó kɛ í ɲán to Ala man, kɛ kóbhɛɛ lu kɛ, míin a yáala óo i yɛ dínɲan lɔ́tɛɛ o wɛɛ yɛ́ɛman. 21O le kósɔn, Yawudhyaa olu nan né myaan Ala bhatobhomba o lú o kɔ́ɔnnɔn, i tɛ́ɛ fɛ kɛ né fáa. 22Wáa kɛ tá o ló ŋo mán kɛ́nan sé fɔ́ bí mán, Ala é né dhyɛman, née o le sɛ́ɛya ládila dhyémuu ní cɔ́ɔnba lu bɛ́ man. Céla olu mín nvɔ, óni Nvaa Musa é mín nvɔ, kó óo kó káa kɛ́ olu ka, né táa fósi fɔ bhée kɛ fala olu ka. 23Ii fɔ kó Kílisi o kaa tɔ́lɔya le myaan, a yáa kɛ mɔɔn jónan le kɛ kúun sú olu cɛ́man, kɛ sánmankanmɛɛ o láse Yawudhyaa olu ní síya gbɛ́ɛ olu mán, kɛ i bhɔ diwi lɔ.»

24Kɛ Pɔli tó o kóman olu lɔsɔɔ o la, kɛ́ yáa mɔɔn olu la kó ale man fósi kɛ, Fɛtusi é jaman kɛ fɔ kó: «Fa lée í lɔ Pɔli! Í yɛ lɔ́ninya shɛ́ɛman ŋó wɛɛ fa bhyáa í lɔ!» 25Wáa Pɔli é a yawi kó: «Fa tɛ́ nɔn, nva mansacɛ Fɛtusi, ni tínɲan kóman léelu lásela, óni mín ngáɲin kɔ́ɔ é mín nan. 26Mansacɛ Agilipa é o ko olu bɛ́ kɛlaman, ní o kóman olu fɔla a yɛ ní tɛ́ɛnga né, kɛ mansɔɔ né lánin ɲé a la óo áa o kó o bɛ lɔ́, kɛ mansɔɔ o kó olu mán kɛ lóonɔn. 27Í lánin ɲé céla olu la a, mansacɛ Agilipa? Ní a lɔ ŋóo i lánin ɲé i la!» 28Agilipa é fɔ Pɔli yɛ kó: «Pɔli, a wɛ́ɛ tɔ dɔ́ɔnin, ké íi né yɛ́ɛman, kɛ né kɛ lánanbhaa lé!» 29Pɔli é a yawi kó: «Aa kɛ kwáalenin maa, aa kɛ kwɔla bháa, né tɛ́ɛ fɛ, ni Ala kɛ sɔ́n, íle ni mɔɔn oo mɔɔn é nɔ́myɛnnan bí nin, ále a kɛ óyoo née tɛnmɛnnin, wáa né sílinin ɲé nɛɛnyɔlɔkɔ mínnan, i kɛ́nan á sili o la!»

30O fɔ́nin ŋo kwɔ, mansacɛ oo í wíi, óni yámaantii o, óni Belenisi, óni mɔɔn óo mɔɔn síinin ndɛ́ɛ ni ile, olu bɛ́ɛ i wíi. 31I bhɔ́tɔ o le, i tɛ́ɛ fɔla ɲɔɔnɲɛn kó: «Cɛ míin mán fósi kɛ, mín ŋé sé kɛla a fáakun né, wáman kɛ a bhyaa kasola.» 32Agilipa é fɔ Fɛtusi yɛ kó: «Ní cɛ míin ndɛ́ man fɔ, ko kɛ táa a yɛ kiti o tɛɛ Sezali kɛ́ɛnnan, án ndɛ́ɛ sé kɛ án móo kɛ́ a la.»

Currently Selected:

Kɛ́wɛɛ 26: MXX

Highlight

Copy