Kɛ́wɛɛ 21

Pɔli é Yeluzalɛmu

1Án ne ní Efɛzi Egilizi o cɛba olu fáa ɲɔ́ɔnnan mínngɛ, án ní ló kúun ŋo kɔ́ɔnnɔn, kɛ́ án ndée kɛ táa Kɔsi. O lúusɔgbɛ o, án ní sé Lodɛsi, kɛ bhɔ́ yé kɛ táa Patala. 2Án ní kúunmba lɔ́ sɔ́ɔ yénɔn, o tɛ́ɛ táala Fenisi mala o lɔ; án ní ló o kúun ŋo kɔ́ɔnnɔn kɛ́ táa. 3Án ní súnɲan Shipulu yamaan o la; án ndɛ́ɛ yamaan o yéla, wáa án ní o tó án móonwaanngɔɔ kɛ táa Sili yamaan o mánshaa fɛ. Kúun ŋó táa í lɔ́ Tili, kɛ mansɔɔ lwée mínnu tɛ́ɛ a kɔ́ɔnnɔn, o kákan kɛ́ yíi yénɔn lé.

4Án ní kaamɔɔndhye nɔ́lu sɔ́ɔ Tili, án ní tee wóonvyaa kɛ́ ni olu le. Ní Sɛ́nnɛnyanin ŋó yɛ Sébhaaya o lɔ, olu Pɔli ládhye kó a kɛ́nan táa Yeluzalɛmu. 5Án nɔ́ɔwoocɛ kée ŋóo i lafa mínngɛ, án ní án ɲɛ sháa o tá kɛ táa. Lánanbhaa olu bɛ́ɛ nan án myaashaa, ni i muso olu ní i dhyé ŋólu bɛ́ le, kɛ bhɔ́ ni án ne só ó kɔ́ɔnnɔn. Án ni án ngúnmɛɛn nɔkɛɛ kwɔ káan ŋo ka, kɛ Ala dɛ́li. 6O kwɔ́, án ní wɛɛ lwaau kɛ́la ɲɔ́ɔnɲɛn mínngɛ, án ní ló kúun ŋó kɔ́ɔnnɔn; ilee lúu i kwɔsɛɛ kɛ táa lúman.

7Wáa án neelu, án ní bhɔ́ Tili, kɛ táa Pitolemayisi; ó lee kɛ an ɲɛ́n jí ka ndáaman o lá ŋó le. Án ní táa o ywáa o bhádhye ŋólu twáa, kɛ tee kée ngɛ́ ni ile. 8O lúusɔgbɛ o, án ní táamankɛ, kɛ táa Sezale. Án ní táa sanmankanmɛɛ lásebhaa Filipu yɛ́ lú o man; lánanbhaa olu tɛ́ wɛ́ɛ cɛ wóonvyaa mínnu bhɔ́ Yeluzalɛmu, ale tɛ́ɛ o mɔɔn kéene, an ní ɲíin o bhóo lúman.#21.8 O kóman ó sɛ́wɛnin ŋé Kɛ́wɛɛ 6.1-6. 9Dhyémuso náannin tɛ́ɛ Filipu bhóo, olu tɛ́ mán cɛko kɛ bhá, olu tɛ́ɛ célaya kɛ́la.

10Án ní tee laman laman kɛ Filipu bhóo lúman; ló nɔ́ la, céla lɔ́ é nan kɛ bhɔ́ Zude; o tɔ́ɔ kó Agabusi. 11Oo nán án nzaala, kɛ́ Pɔli yɛ́ cɛ́siiyaa o tá kɛ a yɛ́ɛ sé ŋólu ní a yɛ́ɛ bhóo olu síli ni o le, kɛ fɔ kó: «Ní Sɛnnɛnyanin ŋó kó: ‹Cɛ́siiyaa míin ŋé mɔɔn mín ndá le, Yawudhyaa olu yáa o tii o myaan Yeluzalɛmu, kɛ́ a síli ɲán míin mán, kɛ ló síya gbɛ́ɛ olu bhóo.›»

12Án ní o kóman o myɛ́n mínngɛ, án né ní o ywáa o lánanbhaa olu bɛ́ɛ Pɔli dɛ́li kɛ mandhyaa kó a kɛ́nan táa Yeluzalɛmu. 13Pɔli é i yawi kó: «Mínnɛɛn le kósɔn áa kásila, kɛ né yóso o kasi? Ne, ne lɔ́bhyɛnin ŋé ke ii nzíli kɛ bhyáa kasola, wáman kɛ sayakɛ Yeluzalɛmu Mantii Ɛnza ndɔ́ɔ o kósɔn.» 14Án ní a yé mínngɛ óo Pɔli tɛ́ fɛ́ kɛ bhɔ́ a yɛ Yeluzalɛmu táa o miliya o ka, án mán táa o kóman o le ɲɛ́n mée. Án ngo: «Mantii o sao oo min né, o á kɛ́.»

Pɔli é Zaki fɛ yé Yeluzalɛmu

15Tee laman laman tínminnin ŋó kwɔ́, án ní án nɔ́bhyɛ kɛ táa Yeluzalɛmu. 16Sezale só o kaamɔɔndhye nɔ́luu táa án myáashaa. Ii táa ní án ne cɛ́ lɔ bhóo lúman, mín ndɔ́ɔ kó Minasɔn. Óo Shipuluka lé le; lánanbhaa lée ale kabiini wáatija. Án ngákan kɛ án ɲíin o cɛ o le bhóo lúman.

17Án ni sé Yeluzalɛmu mínngɛ, bhádhye ŋólu án nábhyɛ ní nisɔdhyaa le. 18O ló ŋó lúusɔgbɛ o, Pɔli é táa ni án ne Zaki fɛ yé; Egilizi o cɛba olu bɛ́ɛ nán. 19Pɔli é wɛ́ɛ mɔɔn ólu twáala mínngɛ, Ala é bháala kɛ́ ní ale ɲán mín man síya gbɛ́ɛ olu cɛ́man, aa ló o bɛ́ lɔ kée ngée kɛ o ɲánfɔ. 20Mɔɔn olu ó myɛ́n mínngɛ, ii Ala tando. O kwɔ́ ii fɔ́ a yɛ kó: «Mádhye ŋo, i mán a yé ni ŋan, Yawudhyaa wáa shɛ́ɛman né wɛ́ɛ sɔ́n Ɛnza nɔ́n yánun, i bɛ́ cɛsiinin ɲé Musa yɛ sɛliya o lé la. 21Mɔɔn lɔ́luu nan fɔ́ i yɛ kó Yawudhyaa mínnu síya gbɛ́ɛ olu cɛ́man, kó ile lée fɔ́ olu yɛ́, kó ii céla Musa yɛ laanan olu lábhyaa, kó i kɛ́nan i dhyé ŋólu labhɔ́ kɛ́ɛn lɔ́ bhée, kó i kɛ́nan Yawudhyaa olu yɛ laanan ŋo sí kɛ bhée. 22Án ngáa o kó o myaan díi? I yáa i nán ko o myɛ́n, síka tɛ́ o lɔ. 23O lɔ, án ngáa mín nvɔ́ i yɛ, ii o le kɛ dɔlɔun. Cɛ náannin é án njɛ́man yánun, olu wɛ́ɛ lákan ndá Ala yɛ. 24I táa i yɛ́ɛ sɛ́nnɛnya ni íle. Íle gbú á i bɛ́ kúnndisaa o bhɔ́, ké ii i kún ŋó dí. Ní o kɛ kɛ́, Yawudhyaa olu yáa lɔ́ ŋóo mɔɔn olu wɛ́ɛ ko óo ko fɔ́ í yɛ́ ko o lɔ, kó o sí tɛ́ tínɲan le. I yáa a lɔ́ ŋóo íle gbú é táamanla sɛliya o ká. 25Wáa síya gbɛ́ɛ mínnu tɛ wɛ́ɛ lá Ɛnza nan, án ní a latɛɛ kó i wɛ́ɛ soo mínnu fáa, kɛ jó olu sɔ, kɛ kɛ́ faanlɛɛ le, ii i yɛ́ɛ myaan o mán, i kɛ́nan yée o mín, i kɛ́nan jífasoo o lɔ́ɔ, i kɛ́nan káanngɛ.» 26O lúusɔgbɛ o, Pɔli é mɔɔn olu tá, aa í yɛ́ɛ sɛ́nnɛnya ni ile. Aa ló Ala bhatobhomba o lú o kɔɔnnɔn, kɛ sɛ́nnɛnyali wáati o káa i lafa wáati mín nɔn, kɛ o lɔ́sɔɔ, o wáati mín ngaa kɛ́ i bɛ tá faanlɛɛ o yáa ló ŋo le.

Pɔli lálɔ o Ala bhatobhomba o lú o kɔ́ɔnnɔn

27Tée wóonvyaa o tɛ́ kaa i láfa wáati min nɔn, Azi mala o Yawudhyaa olu Pɔli yé Ala bhatobhomba o lú o kɔ́ɔnnɔn. Ii yaman o lɔ́su; ii Pɔli myaan. 28Ii kɛ́ gbáa ŋo le kó: «Izalayɛlidhye ŋólu, áa nan! Cɛ míin nín ale lée i yáala lá ywáa bɛ́ lɔ kɛ mɔɔn olu kala, kɛ án ɲɛ́n síya o mánngboya, kɛ́ án ɲɛ́n sɛliya o mánngboya, óni kɛ ywáa Sɛ́nnɛnyanin míin mánngboya. Kwáalenin, a gbú o wɛ́ɛ Gɛlɛki lɔ́lu lálo Ala bhatobhomba o lú o kɔ́ɔnnɔn, kɛ ywáa sɛ́nnɛnyanin míin lánɔɔn.» 29Ii o fɔ le, kɛ mansɔɔ i tɛ wɛɛ ale ní Tolofimu Efɛzikacɛ o yé kéene só o kɔ́ɔnnɔn, i tɛ́ɛ i milila kó Pɔli wɛ́ɛ ló ni o le Ala bhatobhomba o lú o kɔ́ɔnnɔnlaa gbú o lɔ. 30Aa kɛ céne, só o bɛ́ɛ ɲáanmin. Mɔɔn olu tɛ́ɛ bwéela, kɛ bhɔ́ só o fán ŋó bɛ́ fɛ kɛ nan. Ii Pɔli myaan kɛ a sanmaan kɛ a lábhɔ Ala bhatobhomba o lú o kɔ́ɔnnɔn, kɛ́ Ala bhatobhomba o lá olu la túun.

31Kɛ i to Pɔli ɲíinan kó i kaa a fáa, kóman miin ŋé sé swáasi olu kúnndiiba o mán, kó Yeluzalɛmu só o wɛɛ ɲáanmin. 32O ywáaninngee ŋó lɔ swáasi olu kúnndiiba oo a yɛ swáasi o lɔ́lu tá, óni swáasikunndii lɔ́lu; kɛ bwée kɛ táa yaman o sáala. Yawudhyaa ólu swáasi olu kúnndiiba o yé ní a yɛ swáasi olu lé mínngɛ, ii Pɔli gbási o labhyaa. 33Swáasi olu kúnndiiba oo nán Pɔli myaan. Aa fɔ́ swáasi olu yɛ́ ko ii Pɔli síli nɛɛnyɔlɔkɔ fyáa la. Pɔli sílinin ŋó kwɔ́, aa ɲaankɛli kɛ́ kó Pɔli é yɛ́ ne lé, kó a wɛ́ɛ mínnɛɛn le kɛ? 34Yaman o bɛ́ɛ gbáa, wáa dɔ́ olu tɛ́ɛ mín nvɔla, óni tɔ́ olu ta o tɛ tɛ́ kéene. Swáasi olu kúnndiiba óo yé mínngɛ óo i tɛ́ kóman kée nzɔ́ɔla manngan o bhwóɲankoyoo ŋó bhóo, áa fɔ́ swáasi olu yɛ kó ii táa ni Pɔli le i yɛ ywáa o lɔ. 35Pɔli é táa sé sikaliye o mán mínngɛ, swáasi ólu Pɔli tá, yaman o fɛ́ɛya o kósɔn; 36kɛ mansɔɔ yaman tɛ́ɛ a kwɔ́, i bɛ́ tɛ́ɛ gbáanan kó: «A faa!»

Pɔli yɛ kóman o yaman o lɔ

37Pɔli ló ndɔ́ o swáasi olu yɛ ywáa o lɔ, aa fɔ swáasi olu kúnndiiba o yɛ kó: «Ní sé kɛ kóman ni íle á?» Swáasi olu kúnndiiba o a yawi kó: «Ii Gɛlɛkikan ŋó myɛ́nnan ŋán? 38Ezipukacɛ míin muluti yánun, kɛ táa ni mɔɔn mulutinin wáa náannin le wúla ó kɔ́ɔnnɔn, to a kɛnin man myɛ́n bha, íle tɛ́ tɛ́ o le a?» 39Pɔli é a yawi kó: «Née Yawudhyaa le lé, née Taasika le lé, Silisi yamaan o lɔ. Née só mín mɔɔn le, ó só o só nafamanba le lé. Mankoto, ní i mandhyaala le, a tó ni kóman yaman o yɛ.» 40Swáasi olu kúnndiiba o sɔ́n ké Pɔli á kóman. Pɔli é i lɔnin ndó bhó ŋó lona o sikaliye o ka, kɛ i bhóo láwii mɔɔn olu yɛ. Mɔɔn olu bɛ́ɛ i lúmandhye; Pɔli é kóman i fɛ Ebulukan ŋó lɔ.

Currently Selected:

Kɛ́wɛɛ 21: MXX

Highlight

Copy