Kɛ́wɛɛ 18

Pɔli é Kolɛnti

1O kwɔ́, Pɔli é bhɔ́ Atɛnin kɛ́ táa Kolɛnti. 2Aa Yawudhyaa cɛ lɔ́ sɔ́ɔ yé, mín ndɔ́ɔ kó Akilasi; Pɔnnga lé tɛ́ɛ o le. A nánnin ngwáa lé tɛ́ɛkɛ bhɔ́ Itali, ale ni a muso Pilisili, kɛ́ mansɔɔ mansacɛba Kolodi tɛ́ wɛ́ɛ fɔ kó Yawudhyaa olu bɛ́ a bhɔ́ Lomɛn só o kɔɔnnɔn. Pɔli é i gbɛ́nnɛn olu mán. 3I lo bɛ́ tɛ́ɛ bháala kée ŋó lo ngɛ́la mínngɛ, o lɔ Pɔli é tó ni ile, ii bháalakɛ kée né; i tɛ́ɛ fáanibho ŋo léelu lálaanan. 4Lɔ́nwɛɛnlilo ŋóo Lɔnwɛɛnlilo, Pɔli tɛ́ɛ táa sɛ́ɛbho ŋo lá, kɛ táa kóman ni Yawudhyaa olu ni Gɛlɛki olu lé, ké aa i miliya o yɛ́ɛman, kɛ́ sɔ́n Mantii o man.

5Wáa, Silasi ni Timote é nan kɛ bhɔ́ Masedwanin mínngɛ, Pɔli é a yɛ wáati o bɛ́ kɛ́ Ɛnza ɲɛ́n sáaninkan náse o lé la. A tɛ́ɛ fɔla Yawudhyaa olu yɛ kɛ a mangbɛya kó Ɛnza née Kílisi o lé. 6Wáa Yawudhyaa ólu i bá Pɔli yɛ kóman o lɔ, kɛ a nɛɛn. Pɔli é a yɛ déeke o láyuuyuu, kɛ fɔ́ i yɛ kó:#18.6 Pɔli é o kɛ́ kɛ yáa i la kó a táa i hákii tó i lɔ bhée. «Á yée o kɛ kɛ a gbúlu kúnnɔn, óo a gbúlu nɔn le le, ne ta sháa tɛ́ o lɔ bhée. Né kɛ́ɛ tɛ́ɛ síya gbɛ́ɛ olu fɛ́ yé.»

7Pɔli é bhɔ́ o ywáa o lɔ kɛ́ táa cɛ lɔ bhóo lúman, mín ndɔ́ɔ kó Titusi Yusitusi; Ala ɲɛ́nnzhaanɲɛnmɔɔn lée o le. A yɛ bhó ŋo tɛ́ɛ sɛ́ɛbho ŋo tɔ́ɔfɛ le. 8Sɛ́ɛbho ŋó kúnndii Kilipɔsi é lá Mantii o la, óni a yɛ bhónanmɔɔn olu bɛ́. Kolɛntika mínnu tɛ́ wɛ́ɛ Pɔli yɛ kóman o myɛ́n, olu shɛ́ɛman é lá Ɛnza nan; ii i bátize.

9Ló nɔ́ sú lɔ, Mantii oo fɔ Pɔli yɛ óyoo shoo lɔ kó: «I kɛ́nan sháan! Kóman, i kɛ́nan i lúmandhye. 10Kɛ́ mansɔɔ, née ní íle; mɔɔn sí táa i myaan kɛ́ koyoongɛ i la, kɛ́ mansɔɔ, ne yɛ́ mɔɔn olu á sháa só míin ngɔ́ɔnnɔn.» 11O lɔ, Pɔli é tó Kolɛnti, kɛ mɔɔn olu kala Ala sáaninkan ŋó la, fɔ sanɲin kée ni káa wɔ́ɔlɔ kɔ́ɔnnɔn.

Pɔli é Galiyɔn ɲankɔɔ

12Galiyɔn ndɛ́ɛ Akayi yamaantiiya o la wáati mínnɔn, ló nɔ la, Yawudhyaa olu bhyɛ kéeman, kɛ́ i wíi Pɔli kanman kɛ a myaan kɛ táa ni ale kítitɛɛlaa o lɔ́. 13I kó: «Cɛ míin é mɔɔn olu hákii o yɛ́ɛmanla, ké ii Ala bháto ɲan gbɛ́ɛ man, mín nín án ɲɛ́n sɛliya o tɛ́ bhyɛ́nan.» 14Sannin Pɔli á i lála ká kó a káa kóman o tá, Galiyɔn ngó Yawudhyaa olu man kó: «Ní a tɛ́ɛ kɛ óo cɛ míin ŋwɛ́ɛn kólɔ kɛ, mín ndɛ́ kɛ tá le, ní a wɛ́ɛ kóyoomba lɔ́ kɛ, ne tɛ́ɛnan nzíi kɛ álee Yawudhyaa olu yɛ kóman o lɔ́myɛn cɛ́ɛne. 15Wáa, áa ɲɔ́ɔnnzɔsɔla kóman kéene kósɔn, óni tɔ́ɔ lɔ́lu, óni a yɛ́ sɛliya o ká, álee gbúlu á o ɲanbhɔ, né kwɛ́nnin ndáa sɔ́n kɛ kɛ́ o kítitɛɛbhaa le.» 16Galiyɔn ŋé i lábhɔ kítitɛɛlaa o lɔ. 17Oo kɛ́ mínngɛ, i bɛ́ɛ Sɔsitɛnin myaan, o míin sɛ́ɛbho ŋó kúnndii o le, kɛ́ o gbási bhɛ́ɛbhɛɛ le, kítitɛɛlaa o ɲɛnnzhaafɛ; Galiyɔn yɛ́ɛ mán o yace yáanin fwɛ́ɛnnin né.

Pɔli kwɔ́sɛɛ o Antiyɔsi

18Pɔli é tó Kolɛnti kɛ́ wáatija ngɛ́, o kwɔ́, aa sháa o dɛ́li a bhádhye ŋólu fɛ; ale ní Pilisili ni Akilasi é ló kúun nɔ́ kɔɔnnɔn kɛ táa Sili yamaan o mánshaa fɛ. Wáa Pɔli tɛ́ wɛɛ lákan ndá Ala yɛ. O lɔ, aa a kún ŋo gbáan Sankele so ŋo kɔɔnnɔn, kɛ tó táala. 19Ii táa se Efɛzi mínngɛ, Pɔli é a táamanɲɔɔn olu tó o ywáa o lɔ́. Ale gbú é táa sɛ́ɛbho ŋo la, kɛ́ táa kóman ni Yawudhyaa olu lé. 20Ólu a dɛ́li ko aa tó ní ile kɛ́ wáati laman ngɛ. Wáa a mán sɔ́n. 21Aa sháa kófɔ i yɛ kɛ fɔ kó ni Ala kɛ sɔ́n, ne yáa ngwɔ́sɛɛ kɛ́nan a fɛ́ ya. O kwɔ́, aa kúun ŋo tá Efɛzi kɛ táa. 22Aa táa sé Sezale mínngɛ, aa bhɔ́ kɛ táa Yeluzalɛmu, kɛ táa Kílisi yɛ́ mɔɔn olu fó; o kwɔ́, aa táa Antiyɔsi. 23Aa tó Antiyɔsi, kɛ wáati dɔ́ɔnin ngɛ́ yénɔn. O kwɔ́, aa táa Galati mala o lɔ, óni Filizi mala o lɔ, só olu ní só olu cɛ, kɛ kaamɔɔndhye ŋólu fáan ló lánanya o mán.

Apolɔsi yɛ́ saaninkan ŋo Efɛzi óni Kolɛnti

24Ló nɔ la, o lɔ, Yawudhyaa cɛ lɔ́ é nán Efɛzi, a tɔ́ɔ tɛ́ɛ kó Apolɔsi; Alɛsandilika lé tɛ́ɛ ale. O cɛ o tɛ́ɛ kóman lɔ gbúnnunngbukɛ; a tɛ́ɛ sɛ́wɛ sɛ́nnɛnyanin ŋo kɔ́ɔnnɔn kóman ólu lɔ́ cɛ́ɛne. 25A kalanin ndɛ́ɛ Mantii o yɛ sháa o lɔ́ninya o la, a lɔ́janin ndɛ́ɛ o láse o la, óni kalanin o la cɛ́ɛne Ɛnza nda fa nvɛ, wáa o bɛ́ kwɔ a tɛ́ɛ Yaya bátizelikɛbhaa yɛ bátizeli o lɔ́ninya o le lɔ dɔlɔun. 26Aa kóman o lamyaan ni tɛ́ɛnga ne sɛ́ɛbho ŋo kɔ́ɔnnɔn. I wɛ́ɛnin ngwɔ́ a lɔ́myɛnan, Pilisili óni Akilasi é a tá, ii táa kée né, ólu a kíi a tɛ́ mán mín nɔ́ Ala tá sháa o lɔ, ii o fɔ́ a yɛ cɛ́ɛne.

27Apolɔsi tɛ́ɛ fɛ kɛ́ táa Akayi mala o lɔ. Bhádhye ŋólu a yóso lágbɛya ko aa táa; ii sɛ́wɛ lɔ kɛ kɛ́ bhyáashaa Akayi kaamɔɔndhye ŋolu saala, ko ii a myaan cɛ́ɛne. Aa sé yénɔn mínngɛ, mɔɔn mínnu é lá Ɛnza nan Ala yɛ nɛ́nmɛn o bháaka lɔ, aa olu dhyɛman cɛ́ɛne. 28Kɛ́ mansɔɔ a tɛ́ɛ fáan sɔ́ɔla Yawudhyaa olu ka kóman o lɔ yaman o cɛ́man; kɛ́ a ɲánfɔ i yɛ cɛ́ɛne, i tɛ tɛ́ kóman kaalaman nzɔ́ɔla kɛ a fɔ. A tɛ́ɛ kitabu o kóman o le tála kɛ yáa i la kó Ɛnza née Kílisi o lé.

Currently Selected:

Kɛ́wɛɛ 18: MXX

Highlight

Copy