Kɛ́wɛɛ 17

Pɔli ní Silasi é Tesaloniki

1O kwɔ́ Pɔli ní Silasi é tinmin Anfipolisi óni Apoloni, ii sé Tesaloniki. Yawudhyaa olu yɛ sɛ́ɛbho ŋó tɛ́ɛ ywáa mín nɔn, 2Pɔli é ló o sɛ́ɛbho ŋo kɔ́ɔnnɔn yé, óyoo a tɛ́ɛ kɛla ɲán mín man, Lɔnwɛɛnlilo nzawa kɔɔnnɔn áa sɔ́sɔli kɛ ni ile, sɛ́wɛli olu tá sháa fɛ́. 3Pɔli é a ɲan fɔ i yɛ, óni aa a walawala i yɛ, kó míin nán kɛ Kílisi o le, kó o kákan ne kɛ tɔ́lɔ, tó kɛ kúun kɛ bhɔ́ saya o lɔ. Pɔli é fɔ kó: «Ní Ɛnza mín ngó fɔla a yɛ ni, o tɛ́ lɔgbɛɛ le, fɔ Kílisi o.» 4Yawudhyaa lɔ́luu yé mínngɛ kó o kóman o tínɲan le lé, ii lá Ɛnza nan kɛ fala Pɔli ní Silasi ká. Gɛlɛki Ala ɲɛ́nnzhaanmaa shɛ́ɛman ŋé lá Ɛnza nan, óni fáan tɛ́ɛ muso mínnu lɔ olu shɛ́ɛman. 5Wáa, ɲánngboya o tɛ́ɛ Yawudhyaa mínnu lɔ kɛ tínmin, olu mɔɔn lɔ́lu tá yaman o lɔ sɔ mɛɛ tɛ́ mínnu la, kɛ mɔɔn olu lákɔɔbhɔ tó kɛ i lamuluti só o kɔ́ɔnnɔn. Ii táa cɛ lɔ fɛ́ lúman o tɔ́ɔ kó Zasɔn, Pɔli ní Silasi ɲíin ndɔ́ɔ lɔ kɛ́ nan ni ile yaman o ɲankɔɔ. 6I man táa Pɔli ní Silasi sɔɔ yénɔn mínngɛ, ii Zasɔn ní bhádhye nɔ́lu myaan kɛ táa ní olu lé faanman ŋolu saala, kɛ́ fɔ́ kó: «Mɔɔn míinnu wɛ́ɛ dínɲan o ywáa bɛ́ ɲáan mín, kwáalenin ólu wɛ́ɛ se yánun. 7Zasɔn é i labhyɛ a bhóo lúman, wáa ii kó mínnu kɛ́la, o tɛ́ bhyɛ́nan ní mansacɛba Sezali yɛ sɛliya olu le, kɛ mansɔɔ i léelu kó mansacɛ gbɛ́ɛ e yé, kó o tɔ́ɔ ko Ɛnza.» 8O kóman o yaman óni faanman ŋolu bɛ́ hákii o ɲáanmin. 9Ɲɛnmɔɔn olu fɔ Zasɔn ní lánanbhaa ólu yɛ́ ko ii wɛ́ɛ mín nzala sɛliya o tá bhóoman, ii olu sala, o kwɔ ɲɛnmɔɔn olu i labhyaa.

Pɔli ni Silasi é Béle

10Sú o kwó mínngɛ, bhádhye ŋólu Pɔli ní Silasi látaa Béle. Ii sé mínngɛ, ii táa ló Yawudhyaa olu yɛ sɛ́ɛbho ŋo kɔ́ɔnnɔn. 11Béle Yawudhyaa olu tɛ́ɛ fisaa kɛ tinmin Tesalonikika olu ka. Ii sɔ́n kóman o mán ni yósobhɛɛ le. Pɔli ní Silasi tɛ́ɛ fé ŋóo fé nvɔla i yɛ, ilee gbúlu tɛ́ɛ o kóman óni sɛ́wɛ olu lála ɲɔ́ɔnman ló ŋóo ló, kɛ a mánfɛɛ ní tínɲan lée wé. 12O lɔ, Yawudhyaa olu shɛ́ɛman ŋé lá Ɛnza nan, Gɛlɛki olu cɛ́man, muso tɔ́ɔbhɔnin ŋo shɛ́ɛman é lá Ɛnza nan, óni cɛ shɛ́ɛman é lá Ɛnza nan. 13Wáa Tesaloniki Yawudhyaa olu a myɛ́n mínngɛ ko Pɔli ní Silasi é Ala saaninkan ŋo lásela ikwɔ Béle, i táa yénɔn ikwɔ, kɛ Beleka olu lamuluti ikwɔ, tó kɛ yaman o kɔ́ɔnnɔn múu. 14Bhádhye ŋólu o myɛ́n mínngɛ, o ywáaninngee ŋo lɔ ii táa Pɔli le kɔ́ɔyi la o la, wáa Silasi ni Timote é tó Béle. 15Mínnu bhyáa Pɔli ɲɛn kɛ táa a bhyáashaa Atɛnin. Olu sé ni ale só o kɔ́ɔnnɔn mínngɛ, olu kwɔ́sɛɛtɔ o, Pɔli é fɔ i yɛ́ kó ii táa fɔ Silasi ni Timote yɛ́, kó ii i lateeya jónan, kɛ́ nan a sɔɔ Atɛnin.

Pɔli é Atɛnin

16Kɛ́ Pɔli tó Silasi ni Timote mankɔɔn ŋo lá Atɛnin, áa lákɔɔsilikɛ kɛ́ yé oo Atɛnin nzó o fánin ŋé jó ólu la, óo a ní o tɔ́lɔ koyoongɛ. 17O lé kósɔn a tɛ́ɛ tóla kɛ́ táa sɛ́ɛbho ŋo kɔ́ɔnnɔn kɛ táa kóman ní Yawudhyaa olu le, óni síya gbɛ́ɛ mínnu Ala bhátola. O lé kósɔn ló ŋóo ló a tɛ́ɛ táala yaman o ládhyɛlaa o lɔ; ní a kɛ́ mɔɔn mínnu sɔ́ɔ yé, áa kóman ólu fɛ́. 18Lɔnikɛbhaa mínnu tɛ́ɛ Epikuli yɛ kaamɔɔndhye nu le, óni Sitoyisi kaamɔɔndhye nu le, oluu kóman lamyaan ni Pɔli le. Lɔ́lu kó: «kóman shɛ́ɛman ngɛ́bhaa míin ngó díi wɛ́!» Lɔ́lu kó: «Aa lóo aa Ala gbɛ́ɛ léelu tá kóman fɔla.» Ii o fɔ́ le, kɛ mansɔɔ Pɔli tɛ́ɛ Ɛnza ɲɛ́n Sanmankanmɛɛ o le lásela, kɛ sú olu kúun ngó o fɔ́.

19Ii táa Pɔli le só o kítitɛɛlaa o lɔ́, ywáa mín ndɔ́ɔ kó Aleyopazi, kɛ́ a manɲaankɛ kó: «I wɛ́ɛ nan ní Kaangwaa mín ne, an ni sé kɛ bhɔ́ o ɲan le á? 20Kɛ mansɔɔ án ni kóman mínnu myɛ́nnan nin, o bɛ́ɛ kóman kwáa le lé án ɲanla. O kósɔn, án ni fɛ́ ké ii o kó o lágbɛ án ɲɛn.» 21Tínɲan in ne, Atɛnin nzó kɔ́ɔnnɔn mɔɔn olu, óni lónan mínnu wɛ́ɛ nan i cɛ́man, olu tɛ́ɛ i tá wáati o fánmba o bɛ́ kɛ́la kómankwaa olu fɔ́ le la, óni kómankwaa lɔ́myɛn ŋo léelu lá.

22O lɔ, Pɔli é i wíi kɛ i lɔ́ yaman o cɛ́man kítitɛɛlaa o lɔ, tó kɛ fɔ kó: «Álee Atɛninnga olu, ne wɛ́ɛ a lákɔɔsi, kɛ yé óo sɔ́life ŋo kuu á gbɛ́ɛ a man kɛ tinmin. 23Kɛ́ mansɔɔ, ne yáalatɔ o, a yɛ só o kɔ́ɔnnɔn, née á yɛ sɔ́likɛlaa olu lákɔɔsi; yáanin née a yɛ sɔ́likɛlaa o lɔ́ yɛ́ɛ yé, a sɛwɛnin ɲé mínnga kó: ‹Ala mín nzúu lɔ́nin ndɛ́, o sɔlaa lée nín.› Áa mín mátola to á mán a lɔ, né wɛɛ nan o le lásela á mán. 24Ala mín ɲé dínɲan ní a kɔ́ɔnnɔnfe ŋolu bɛ lá, ale mín ŋé sángboo óni lúukolo o Mantii o le, Adamandhye ŋólu wɛ́ɛ Ala bhatobhomba mínnu lɔ i bhóo la, o tɛ́ kɛla olu la. 25A lo manko lo ndɛ́ a lá íkwɔ ké mɔɔn bhóo a bháalakɛ a yɛ, óyoo a manko lée fé nɔ́ la, kɛ a dhyɛman, kɛ mansɔɔ ale gbú lée ɲáanmanɲan o díla adamandhye ŋó bɛ́ mán, ɲáankii óni fé ŋó bɛ́. 26Aa síya olu bɛ́ lá kɛ́ bhɔ́ mɔɔn kée né lɔ, kɛ olu la síi lúukolo o ywáa o bɛ́ lɔ, aa wáati lu lándɛɛ, óni kɛ lá nzíi i kɛlaa olu la. 27Ala é o kɛ le, ké mɔɔn olu á a ywáaɲiin; kɛ a ywáaɲiin i kún nvɛ sáan i yáa a ye. Kɛ́ɛke a ywáa mán nja án nzí la. 28Kɛ́ mansɔɔ ‹Án ni ɲáanmanɲan la ale lé sɔ́ɔbu la, án ni án na máanmaanla, óni án ni ɲán mín mán.› Óyoo a yɛ tɛɛnnabhaa lɔ́luu fɔla ɲán mín man kó: ‹Án ni a dhyé néelu le.› 29Kwáalenin, ní án ni Ala dhyé nu le, o lɔ, án mánngan kɛ án mili kó Ala bhɔ́nin ŋé bhatofe ne la, mɔɔn olu wɛ́ɛ mín nálaa i bhóola ni sɛ́ɛn ŋólu ní wɛ́ɛgbɛ lu ni káwaguun nu la, kɛ kéeɲan ni i gbúlu tá miliya o le. 30Wáa kwáalenin, Ala tɛ́ o kólɔmɛɛya wáati o sí yacela bhée, wáa bí, Ala é fɔla mɔɔn olu bɛ́ yɛ ywáa bɛ́ lɔ ko ii díminsa. 31Kɛ́ mansɔɔ Ala wɛ́ɛ ló nɔ síi, o ló ŋó la, a yáa dínɲan bɛ́ ládhyɛnin ndá kíti tɛ́ɛ ni téeɲan le, a káa tinmin ale gbú yɛ mɔɔn bhɔ́nin ŋo le mán; ko míin a yáala ko aa sé kɛ lá o la, o lée ko a wɛɛ cɛ míin nákuun kɛ bhɔ́ su olu cɛ́man.»

32Wáa mɔɔn oluu sú olu kúunngo kóman o myɛ́n Pɔli lá lɔ́ mínngɛ, lɔ́luu i yɛ́ɛkɛ a man. Lɔ́luu fɔ́ ko: «Án ɲáan i lɔ́myɛn ló gbɛ́ɛ.» 33O lɔ Pɔli é bhɔ́ i cɛ́man kɛ táa. 34O bɛ́ kwɔ́, mɔɔn lɔ́luu lá Ɛnza nan, kɛ fála Pɔli ká: Denisi mín ŋe só o kítitɛɛbhaa o lɔ le, muso lɔ́, mín ndɔ́ɔ kó Damalisi, óni mɔɔn gbɛ́ɛlu.

Currently Selected:

Kɛ́wɛɛ 17: MXX

Highlight

Copy