Kɛ́wɛɛ 1

Ní Sɛnnɛnyanin ŋo mankɔɔn ŋo

1Nvá Teofili, né wɛ́ɛ kóman ɲɛ́n kitabu jónan ó kɔ́ɔnnɔn, Ɛnza ŋé ko mínnu kɛ lámyaan, kɛ́ mɔɔn ólu kala 2fɔ́ɔ kɛ táa sé a kɔ́ɔtalo ŋó mán kɛ táa sángboo o lɔ, ŋwɛ́ɛn o bɛ́ fɔ́ o kɔ́ɔnnɔn. Sannin áa yɛ́ɛ kɛ táa sángboo o lɔ, a tɛ́wɛɛ mɔɔn mínnu lɔ́tɔnmɔn kɛ i kɛ́ a yɛ́ céladhye ŋólu le, áa i sɛ́ɛmansɔɔ i yɛ́ Ní Sɛnnɛnyanin ŋo bháaka lɔ. 3Ɛnza ŋé tɔ́lɔya myáan fɔ kɛ sayakɛ, kɛ kúun, a ɲáanman ŋo i yɛ́ɛ yáa a yɛ céladhye ŋólu la ɲán shɛ́ɛman man, óni síɲan shɛ́ɛman nɔ́n tée bínaannin kɔ́ɔnnɔn. Aa tó ní ile kɛ Ala yɛ́ Mansaya o fɔ i yɛ.

4Ló nɔ́ la kɛ i tó lɔ́minkɛ o la ɲɔ́ɔnnvɛ, Ɛnza ŋé fɔ i yɛ kɛ a mangbɛya kó i kɛ́nan i ywáa jaɲan Yeluzalɛmu la, fá o láheli mín ndá i yɛ, íi tó yénɔn kɛ o mánkɔɔn. Ɛnza ŋé fɔ i yɛ ko: «Ne tɛ́wɛɛ o laheli o fɔ a yɛ. 5Tínɲan in ne Yaya é mɔɔn ólu bátize jí le lɔ́, wáa tée láman kɔɔnnɔn, a yáa bátize ni Ní Sɛnnɛnyanin ŋó la.»

Ɛnza ɲɛ́ɛ ko ó Sángboo ó lɔ

6Kaamɔɔndhye ŋólu ládhyɛnin ndɛ́ɛ Ɛnza ndɔ́ɔfɛ. Ii a mánɲaankɛ kó: «Mantii ó, i káa Izalayɛli yɛ́ mansaya o síi kókwaa kɛ́ o wáati o le lɔ a?» 7Ɛnza ŋé i yawi kó: «Fá o wáati mín nzíi, óni aa sán min nátɛɛ ni a gbú fáan o le, á tá fóyi tɛ́ o wáati o lɔ́ ŋo lɔ. 8Wáa Ní Sɛnnɛnyanin ŋó kɛ́ yíi a ká wáati mínnɔn, a yáa sébhaaya sɔ́ɔ óni kɛ kɛ́ ne sɛ́ɛya lu lé, kɛ́ lámyaan Yeluzalɛmu, óni Zude mála o bɛ́ lɔ, óni Samali mala o, fɔ́ kɛ táa sé lúukolo o lá ŋó la.»

9Ɛnza ŋé wɛɛ o kóman ólu fɔla mínngɛ, kɛ a yɛ kaamɔɔndhye ŋólu tó a mánfɛɛla, aa yɛ́ɛ sángboo o lɔ; sangawa lɔ é ló i cɛ kɛ a lóonaankɛ i mán. 10Kɛ́ Kaamɔɔndhye ŋólu ɲángbaannin ndó sángboo o lɔ a táa tɔ́ o le, cɛ déekegbɛtii fyáa é i yɛ́ɛ yáa i la. 11Kɛ fɔ i yɛ kó: «Álee Galileka olu, mínnɛɛn le kósɔn a lɔ́nin ɲé yánun kɛ sángboo ó mánfɛɛ? Ɛnza mín wɛ́ɛ yɛ́ɛ kɛ bhɔ́ a cɛ́man kɛ táa sángboo o lɔ nín, a kaa nán o ɲan kée ŋó mán óo yóo áa yé táala sángboo ó lɔ́ ɲan mín mán.»

Céladhye ŋólu yɛ́ ládhyɛli ó

12O lɔ kaamɔɔndhye olu ú i kwɔ́sɛɛ kɛ bhɔ́ Olivyetii o ka, o míin Yeluzalɛmu tɔ́ɔfɛ, aa kílokee nzí bhɔ́la, mɔɔn é sé mín ndáaman lɔ́nwɛɛnlilo ŋo la. 13Ii ló só o kɔ́ɔnnɔn mínngɛ, ii yɛ́ɛ sangaso o kɔ́ɔnnɔn saman i tɛɛ i ládhyɛ la ywáa mínnɔn. Piyɛli tɛ́ɛ yé, Yaya, óni Zaki óni Andele, Filipu, óni Tomasi, Batelemi óni Matiyu, Alife dhyénjɛ Zaki, Simɔn míin kíila kó Zelɔti#1.13 Zelɔti Zelɔti, o kɔ́ɔ tɔ́ɔko so ko o ŋa di mɔɔn min ɲɛn óni aa i cɛ síilaa lá. , óni Zudasi, Zaki dhyénjɛ. 14I bɛ́ ládhyɛnin ndɛ́ɛ ni miliya kéene, kɛ́ Ala dɛ́li; ní muso lɔ́lu le, Ɛnza ŋwóobhaa Mwɛnyamu, óni Ɛnza mádhyemannjɛ olu.

Matiasi é ta ɲán o mín man

15O wáati o lɔ, lánanbhaa ólu ládhyɛnin ndɛ́ɛ, i tɛ́ɛ mɔɔn kɛ́nmɛn ní mɔɔn mwáa nzí bhɔ́la. Piyɛli é i wíi kɛ i lɔ́ a bhádhye ŋólu cɛ́man kɛ fɔ́ kó: 16«Mádhye ŋólu, Ní Sɛnnɛnyanin ŋó tinmin Laula man kɛ́ kóman mínnu fɔ, fɔ́ o sɛ́wɛli Sɛ́nnɛnyanin ŋo tɛ́ɛ i lafa, a tɛ́wɛɛ kóman Zudasi tá sháa fɛ́, ale lée kɛ́ shaaɲɛnmyaa o le to mɔɔn olu Ɛnza myaan. 17Zudasi tɛ́ɛ án nɔ́ le lé, bháala míin kɛ́ɛfa an mán, o lɔ́ lée kɛ́ɛfa a mán. 18O kwɔ a yɛ wɛ́ɛ o, aa mín nzɔ́ɔ a yɛ kóyoo ŋó saa o le, ii o sá sɛɛn lá, aa i bé a kun ŋo ká kɛ a su o cé fɔ kɛ a noo o ɲɛ́nnzɛn. 19Yeluzalɛmu mɔɔn ólu o kóman ó myɛ́n, o le kósɔn íi sɛɛn o tɔ́ɔla i yɛ kán ŋo lɔ kó: Hakɛlidama, o kɔ́ɔ ó tɔ́ɔ kó: Yée sɛ́ɛn. 20Tínɲan in ne, a sɛ́wɛnin ŋé Zabulu olu kɔ́ɔnnɔn kó:

‹A yɛ bhó ŋó lɔ́koo ŋá tó,

óni mɔɔn sí kɛ́nan sí a lá.›#1.20 O kóman ó sɛ́wɛnin ŋé Zabulu 69.26.

A sɛ́wɛnin ɲé Zabulu o lɔ kó:

‹Mɔɔn gbɛ́ɛ a bhyaa a nɔ́n lɔ kɛ bháala ó kɛ́.›#1.20 O kóman ó sɛ́wɛnin ŋé Zabulu 109.8.

21-22O le kósɔn, an ngákan ne kɛ mɔɔn lɔ́ ta mín ndɛ́ɛ táa ni án ne wáati bɛ́ ke Mantii Ɛnza ŋé yamaan o lɔyaalala ni án ne, kɛ́ a ta mɔɔn olu bátize o mán, Yaya Bátizelikɛbhaa kwɔ́, fɔ́ɔ kɛ nan sé Ɛnza ɲɛɛ ló ŋo mán kɛ bhɔ́ án njɛ́man kɛ táa sángboo ó lɔ, cɛ míin wé án ne ni o yáa kɛ a kúunnin o sɛ́ɛya le.»

23Lánanbhaa olu mɔɔn fyáa yáa, Yusufu míin kíila kó Balisabasi, a tɔ́ɔ íkwɔ kó Yusitusi, óni Matiasi. 24O kwɔ́, lánanbhaa olu Ala dɛ́li kó: «Mantii ó, íle mín ŋán mɔɔn olu bɛ́ yóso lɔ́, í wɛ́ɛ mɔɔn mín ndá mɔɔn fyáa míin nɔ́n, o yáa an nán. 25Ké o á kɛ́ bháalakɛdhye né óni céladhye né, kɛ́ bhyáa Zudasi nɔ́n lɔ, kɛ mansɔɔ Zudasi wɛ́ɛ bhɔ́ céladhyeɲan ó la kɛ́ táa ywáa gbɛ́ɛ lɔ, a kákan kɛ táa ywáa mínnɔn.» 26Ii tátali kɛ, Matiasi lée tá; óo fála céladhye ndá ní kée ólu ká.

Currently Selected:

Kɛ́wɛɛ 1: MXX

Highlight

Copy