मरकुस 2

लोकबा के मरीज काहीं नीक करब

(मत्ती 9:1-8; लूका 5:17-26)

1कइअक दिना के बाद यीसु पुनि कफरनहूम सहर म आएँ, अउर कुछ जने जानिगें कि यीसु घरय माहीं हें। 2उहाँ एतने मनई एकट्ठा होइगें कि दुअरा के लघे घलाय जघा नहीं रहिगे; अउर यीसु उनहीं परमातिमा के बचन सुनामँइ लागें। 3अउर कुछ जने एकठे लोकबा के मरीज काहीं, चार जने से खटिया समेत उठबाइके यीसु के लघे लइ आएँ। 4पय जब ऊँ पंचे भीड़ के कारन यीसु के लघे नहीं पहुँच पाएँ, तब उआ घर के खपरइल काहीं उतिनँइ लागें, जउने सउहें यीसु भीतर रहे हँय, अउर जब ऊँ पंचे ठाठ समेत उतिन चुकें, तब उआ मरीज काहीं खटिया समेत नीचे झुलाय दिहिन। 5यीसु, उनखे बिसुआस काहीं देखिके, उआ लोकबा के मरीज से कहिन, “हे बेटबा तोंहार पाप माफ होइगें।” 6तब मूसा के बिधान सिखामँइ बाले कइएक जने जउन उहाँ बइठ रहे हँय, ऊँ पंचे अपने-अपने मन म सोचँइ लागें, 7“इआ मनई काहे अइसा कहत हय? इआ त परमातिमा के बुराई करत हय! परमातिमा काहीं छोंड़िके अउर को पाप माफ कइ सकत हय?” 8यीसु हरबिन अपने आत्मा माहीं जान लिहिन, कि ऊँ पंचे अपने-अपने मन माहीं का सोचत हें, अउर उनसे कहिन, “तूँ पंचे अपने-अपने मन म इआ काहे सोचते हया? 9सरल का हय? का लोकबा के मरीज से इआ कहब तोंहार पाप माफ होइगें, इआ कि इआ कहब कि ‘उठा, आपन खटिया उठाइके चला फिरा’? 10पय जउने तूँ पंचे इआ जानिल्या, कि मनई के लड़िका काहीं धरती माहीं पाप माफ करँइ के घलाय अधिकार हय।” यीसु उआ लोकबा के मरीज से कहिन, 11“हम तोंहसे कहित हएन, कि उठा, आपन खटिया उठाइके अपने घर चले जा।” 12उआ उठा, अउर हरबिन खटिया उठाइके सगले मनइन के आँगे से निकरिके चला ग; इआ देखिके सगले जन अचरज मानिन, अउर परमातिमा के बड़ाई कइके कहँइ लागें, “हम पंचे अइसन कबहूँ नहीं देखेन।”

लेबी काहीं बोलाउब

(मत्ती 9:9-13; लूका 5:27-32)

13यीसु घर से निकरिके पुनि झील के किनारे गें, तबहिनय एकठे बड़ी भीड़ उनखे लघे आइगे, अउर यीसु उनहीं उपदेस देंइ लागें। 14यीसु जात समय हलफई के लड़िका लेबी काहीं चुंगी नाका माहीं बइठे देखिन, अउर उनसे कहिन, “हमरे पीछे चले आबा।” अउर लेबी उठिके यीसु के पीछे चल दिहिन।

15जब यीसु लेबी के घर माहीं खाना खाँइ बइठें, तब खुब चुंगी लेंइ बाले, अउर यहूदी लोग जिनहीं पापी कहत रहे हँय, ऊँ मनई, यीसु अउर उनखे चेलन के साथ खाना खाँइ बइठिगें; काहेकि ऊँ खुब जने रहे हँय, अउर सगले जन यीसु के पीछे आइगें तय। 16मूसा के बिधान सिखामँइ बाले, अउर फरीसी लोग इआ देखिके, कि यीसु, यहूदी लोग जिनहीं पापी कहत हें, उनखे अउर चुंगी लेंइ बालेन के साथ खाना खात हें, त उनखे चेलन से कहँइ लागें, “यीसु चुंगी लेंइ बालेन अउर पापी मनइन के साथ काहे खात-पिअत हें?” 17यीसु इआ बात काहीं सुनिके उनसे कहिन, “नीक-सूख मनइन काहीं बैद के जरूरत नहीं परय, बलकिन बिमारन काहीं बैद के जरूरत परत ही: जे कोऊ इआ सोचत हें, कि हम पापी नहिं आहेन उनहीं नहीं, बलकिन हम पापी लोगन काहीं बोलामँइ आएन हँय।”

उपासे रहँइ के बारे माहीं पूँछब

(मत्ती 9:14-17; लूका 5:33-39)

18यूहन्ना के चेला लोग अउर फरीसी लोग उपासे रहत रहे हँय; एसे ऊँ पंचे आइके यीसु से इआ कहिन, “यूहन्ना के चेला लोग अउर फरीसी लोगन के चेला लोग काहे उपासे रहत हें, पय अपना के चेला लोग उपासे नहीं रहँय?” 19यीसु उनसे कहिन, “जब तक दुलहा बरातिन के साथ म रहत हय, त का कउनव बरतिहा उपासे रहि सकत हें? नहीं, काहेकि जब तक दुलहा साथ माहीं हय, तब तक ऊँ पंचे उपासे नहीं रहि सकँय। 20पय एक दिना उआ समय अई, जब दुलहा बरातिन से अलग कीन जई, उआ समय ऊँ पंचे उपासे रइहँय।

21नबा ओन्हा के ठेगरी पुरान ओन्हा माहीं कोऊ नहीं लगाबय, काहेकि नबा धोए से सकिलके पुरान ओन्हा काहीं खींचिके फारि डारत हय। 22अउर नबा अंगूर के रस काहीं पुरान मसकन माहीं भरिके कोऊ नहीं धरय, काहेकि नबा अंगूर के रस पुरान मसकन काहीं फारि डारी, अउर अंगूर के रस अउर मसक दोनव खराब होइ जइहँय; एहिन से नबा अंगूर के रस नई मसकन माहीं भरा जात हय।”

यीसु पबित्र दिन के घलाय मालिक आहीं

(मत्ती 12:1-8; लूका 6:1-5)

23अइसन भ, कि यीसु पबित्र दिन काहीं खेतन के किनारे-किनारे जात रहे हँय, अउर उनखर चेला लोग चलतय-चलत गोहूँ के बाली टोरँइ लागें। 24तब फरीसी लोग यीसु से कहिन, “देखी; पबित्र दिन काहीं अपना के चेला लोग उआ काम काहे करत हें, जउन मूसा के बिधान के मुताबिक उचित नहिं आय?” 25यीसु उनसे कहिन, “का तूँ पंचे पबित्र सास्त्र माहीं इआ कबहूँ नहीं पढ़े आह्या, कि जब राजा दाऊद काहीं जरूरत परी, अउर जब ऊँ, अउर उनखर साथी भूँखे रहे हँय, तब ऊँ का किहिन तय? 26राजा दाऊद कइसन अबियातार महायाजक के समय माहीं, परमातिमा के घर माहीं जाइके भेंट चढ़ाई रोटिन काहीं खाइन, अउर अपने साथिन काहीं घलाय खबाइन, जबकि ऊँ रोटिन काहीं खाँय के अधिकार याजकन के अलाबा दुसरेन काहीं खाब मूसा के बिधान के खिलाफ रहा हय?” 27तब यीसु, फरीसी लोगन से कहिन, “पबित्र दिन मनई के खातिर बनाबा ग हय, मनई पबित्र दिन के खातिर नहीं बनाबा ग। 28इआ जानिल्या, कि मनई के लड़िका पबित्र दिन के घलाय प्रभू आहीं।”

Currently Selected:

मरकुस 2: bag

Highlight

Copy