മത്തായി 13
13
ബെദെ ബിത്തുവ കദെ
1അയി നാള് ഏസ്സ് ബീ്ഡ്‌ലിന്ത് പ്‌റപട്ട് കഡാലര്‌ഗെ പോയി കുക്കാന്തിന്താന്. 2എഞ്ചോ ആള്‌ഗാള് ഏസ്സ് പട്ട്‌ക്ക് ബന്ത് കൊണ്ടിന്താദ്‌നാലെ ഏസ്സ് ഒന്റു തോണിക്ക് ഏ്റി അദ്‌ല് കുക്കാന്തിന്താന്. ആള്‌ഗാളൊട്ടുക്കു ഏ്ട്ടില് നിന്റിന്താര്. 3ഏസ്സ് അവാര്‌ക്ക് പല കാര്യഗാള്‌ന കദെ ദിന്‌സ്‌ല് സൊല്ലി കൊഡുത്താന്. അദ്‌ല് ഒന്റു കദെ ഇത്തേത്തെ ആയിന്ത്‌ദ്. <<ഒന്റു കാഡ്‌ഗാറാന് ബെദെ എ്ഡ്‌ത്ത് ബിത്ത്യ പോനാന്. 4അയാള് ബിത്ത്‌ഗാട്ടി ലേസ ബെദെ ബട്ടേക്ക് ബ്‌ന്ത്‌ദ്. അദ്‌ന പക്കിഗാള് ബന്ത് കൊത്തി തിന്റ് തള്ള്‌ട്ട്. 5അദ്‌ല് ലേസ ബെദെ അത്ത്‌റ മണ്ണില്ലാത്ത അറെ പട്ട്‌ക്ക് ബ്‌ന്ത്‌ദ്. അദ്‌ല് മണ്ണ് അദിഗ ഇല്ലത്താദ്‌നാലെ അയി ബെദെഗാള് സട്ടന മൊളേത്ത്‌ദ്. 6ആന ബേര് ഇ്റാഗ്യ മുഡ്യാത്തനാലെ നേര കഡാന്ത് ബെക്കെകാല് തട്ട്‌ഗാട്ട്യെല്ല അയി പയിര്‌ഗാള് ഉണാന്ത് തള്ള്‌ട്ട്. 7ലേസ ബെദെ മുള്ളു ഗുമ്പു പട്ട്‌ക്ക് ബ്‌ന്ത്‌ദ്. മുള്ളു സെ്ഡിഗാള് മൊളേത്ത് ബളാന്ത് നാറ്‌ന സപ്പ്‌സി തള്ള്‌ട്ട്. 8ബേ്റെ ബെദെഗാള് നല്ല മണ്ണ്‌ക്ക് ബ്‌ന്ത്‌ദ്. അദ് മൊളേത്ത് ബളാന്ത് അന്ന ബെ്ളേന്ത്‌ദ്. ബിത്ത്‌ന ബെദേന ബ്‌ഡ നൂറു, അറുവദ്, മുപ്പാദ് സലാഗെ അന്ന കെ്ഡേത്ത്‌ദ്. 9നാന് സൊല്ലുവാദ്‌ന കേ്ള്‌ക്ക്യ മനേസ്സിര്‌ക്ക്‌ന്റവാന് കേ്ള്‌ക്കുഡൊ.>>
കദെ സൊല്ലുവാദ്‌ക്കുള്ള കാര്യ
10അദ്‌ക്ക് പ്‌റ സൊല്ലുപഡി നഡാക്ക്‌ന്റവാര് ഏസ്സ് പട്ട്‌ക്ക് ബന്ത്: <<നീ എന്ത്‌ക്ക് എല്ലാ കാര്യഗാള്‌നാമ് അവാര്‌ക്ക് കദെ ദിന്‌സ്‌ല് സൊല്ലി കൊഡുക്കുവാദ്?>> എന്റ് കേ്ട്ടാര്.
11അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<സാമി ആളുവാദ്‌ന പറ്റി മറേന്ത്‌റ്‌ക്കുവ സത്ത്യ നിമാക്ക് ബെ്ളിപട്ട് കെ്ഡേത്ത്‌റ്‌ക്ക്‌ന്റ്. ആന അവാര്‌ക്ക് കെ്ഡേക്കാലെ. 12ഇര്‌ക്ക്‌ന്റവാന്‌ക്ക് ഇര്‌ക്കുവാദ്‌ന ബ്‌ഡ സാമി മൊത്തന കൊഡുക്കുവാന്. അവാന്‌ക്ക് അളാവുക്കു മീ്റി കെ്ഡേക്ക്‌മ്. ലേസ ഇര്‌ക്ക്‌ന്റവാന്‌ക്ക് അയി ഇര്‌ക്കുവാദ്‌ന ഗുഡി സാമി എ്ഡ്‌ത്ത് തള്ളുവാന്. 13നാന് എല്ലാ കാര്യഗാള്‌മ് അവാര്‌ക്ക് കദെ ദിന്‌സ്‌ല് സൊല്ലുവാദ് എന്ത്‌ക്കെന്റ് സൊന്ന:
അവാര് നോഡുനാല്‌മ് സൊക്കന കാണുവാദില്ലെ,
കേ്ള്‌ക്കുവദാനാല്‌മ് സൊക്കാന കേ്ള്‌ക്കുവാദ്‌മില്ലെ, നെപ്പ്‌കെ്ഡേസുവാദ്‌മില്ലെ.
14-15<നിമ്മ കാദ്‌ല് കേ്ട്ടാല്‌മ് കേ്ട്ടാല്‌മ് നിമാക്ക് നെപ്പ്‌കെ്ഡേക്കുവാദില്ലെ,
നിമ്മ കണ്ണ്‌ല് നോഡുനാല്‌മ് നോഡുനാല്‌മ് നിമ്മ കാണുവാദില്ലെ.
ഈ ആള്‌ഗാള് നെഞ്ച് മര നെഞ്ച് ആയിര്‌ക്ക്‌ന്റ്,
അവാര്‌ക്ക് കാദിന്താല്‌മ് അവാര് കേ്ള്‌ക്കുവാദില്ലെ,
അവാര് കണ്ണ് അഡേന്ത് തള്ള്‌ട്ട്,
അദ്‌നാലെ അവാര് കണ്ണ്‌ല് കാണാദേമ്
കാദ്‌ല് കേ്ള്‌ക്കാദേമ്
മനേസ്സ്‌ല് നെപ്പ്‌കെ്ഡേസാദേമ്
സാമിസാരി തിര്‌ഗാദേമ്, നാന് അവാര്‌ന തെ്ള്‌സാദേമ് ഇര്‌ക്ക്‌ന്റെ>#ഏസ്സയ്യാവു 6:9,10
എന്റ് ഏസ്സയ്യ സാമിദാസ് സൊന്നാദ് അദേപാസെ നഡാന്ത്‌ദ്. 16ആന നിമ്മ് കണ്ണ് കാണുവാദ്‌നാലേമ് നിമ്മ് കാദ് കേ്ള്‌ക്കുവാദ്‌നാലേമ് നിമ്മ ബാഗ്യകേ്ട്ടവാര്‌ത്തെ. 17എഞ്ചോ സാമിദാസ്‌ഗാള്‌മ് നേര്‌മെഗാറാര്‌മ് നിമ്മ കാണുവാദ്‌ന കാണ്യ ആസെപട്ടിന്താര്. ആന അവാര്‌ക്ക് കാണ്യ മുഡ്യാലെ. നിമ്മ കേ്ള്‌ക്കുവാദ്‌ന കേ്ള്‌ക്ക്യ ആസെപട്ടിന്താര്. ആന അവാര്‌ക്ക് കേ്ള്‌ക്ക്യ മുഡ്യാലെ എന്റ് നാന് സത്ത്യമായി നിമാക്ക് സൊന്റെ.>>
ബിത്ത്‌ന്റവാന് കദെ അര്‌ത്ത
18<<അദ്‌നാലെ ബെദെ ബിത്ത്‌ന്റവാന് കദേക്കിര്‌ക്കുവ അര്‌ത്തന കേ്ള്‌ന്. 19ഒരുത്താന് സാമി ആളുവാദ്‌ന പറ്റി സൊല്ലുവ സേദിന കേ്ട്ട് നെപ്പ്‌കെ്ഡേസാദെ ഇര്‌ക്കുവാദ് ബട്ടേക്ക് അലേന്ത ബെദേക്ക് സമ. സെയിത്താന് ബന്ത് അയാള് മനേസ്സ്‌ക്ക് ബിത്ത്‌ന ബെദേന എ്ഡ്‌ത്ത് തള്ള്‌ന്റാന്. 20അറെ പട്ട്‌ക്ക് ബ്‌ന്ത ബെദേന പാസെത്തെ സാമി സൊല്ലുസുലാക്കന കേ്ട്ട് പിര്യപിര്യാത്തോഡ തങ്കാരിക്ക്‌ന്റവാന്. 21എന്റാല്‌മ് ബേര് ഇല്ലത്താദ്‌നാലെ കേ്ട്ട സേദില് അയാള് അദിഗ കാല നെലെനില്ലമാട്ടാന്. അയി സേദിനാലെ കജട്ടാഗൊ കൊഡിമേഗൊ ബന്തദാന അയാള് സട്ടന പിന്ന്‌കാല് മെ്ട്ട്‌ന്റാന്. 22മുള്ളു ഗുമ്പു പട്ട്‌ക്ക് അലേന്ത ബെദെ അര്‌ത്ത മാഡുവാദ് സാമി സൊല്ലുസുലാക്കന കേ്ട്ട് തങ്കാരിക്ക്‌ന്റവാന്‌നത്തെ. എന്റാല്‌മ് ഈ ഉലഗാത്ത്‌ല് ബരുവ കജട്ടനജട്ടഗാള്‌മ് പണാസേമ് കേ്ട്ട സാമി സൊല്ലുസുലാക്കന നെജിക്കി ഉവഗര ഇല്ലത്താദ് മാഡ്‌ന്റ്. 23നല്ല മണ്ണ്‌ക്ക് അലേന്ത ബെദെ അര്‌ത്ത മാഡുവാദ് സാമി സൊല്ലുസുലാക്കന കേ്ട്ട് നെപ്പ്‌കെ്ഡേസ്‌ന്റവാന്‌നാത്തെ. അദ്‌നാലെ അവാര് തമാക്ക്‌മ് ബേ്റെ ആള്‌ഗാള്‌ക്ക്‌മ് ഉവഗരപഡുവാര്. പഗ്‌ദ്യാള്‌ഗാള് ലേസ താനെ ഉവഗരപഡുവാര്, ബേ്റെ പഗ്‌ദ്യാള് മൊത്തന ഉവഗരപഡുവാര്, ബേ്റെ പഗ്‌ദ്യാള്‌ഗാള് എത്ത്‌റാഗോ ഉവഗരപഡുവാര്.>>
കളേന പറ്റി സൊല്ലുവ കദെ
24ഏസ്സ് അവാര്‌ക്ക് ബേ്റെ ഒന്റു കദെ സൊല്ലി കൊഡുത്താന്: <<ഒന്റൊരുത്താന് തന്ന് കാഡ്‌ക്ക് നല്ല ബെദേന ബിത്ത്‌വാന്‌ക്ക് സമാത്തെ സാമി ആളുവ കാല. 25ആള്‌ഗാളൊട്ടുക്കു ഉറാങ്ക്‌ഗാട്ടി അയാള് പോട്ടിഗാറാന് ബന്ത് ഗോദിമ്പെന ബിത്ത്‌ന പട്ട്‌ക്ക് കളെനാമ് ബിത്തി തള്ളി പോനാന്. 26പയിര് ബളാന്ത് കദ്‌റ് കഡാക്കാട്ടി അദോഡൊപ്പ കളേമ് ബളാന്ത് ബന്താദ്‌ന കണ്ടാര്.
27അദുക്കുള അയി കാഡ്‌ഗാറാന് ഗിലാസഗാറാര് അയാള് പട്ട്‌ക്ക് ബന്ത്: <പണ്ണാഡി, നിന്ന് കാഡ്‌ക്ക് നല്ല ബെദേനല്ല ബിത്ത്‌നാദ്? പിന്നെ കളെ ഏദ്‌ലിന്ത് ബന്ത്‌ദ്?> എന്റ് കേ്ട്ടാര്.
28അദ്‌ക്ക് അയാള്: <ഇദ് പോട്ടിഗാറാന് ഗേന്താദ്‌ത്തെ> എന്റ് സൊന്നാന്.
അദുക്കുള അവാര് <എമ്മ പോയി കളേന പ്‌ഡിങ്കി തള്ള്യ നീ സമ്മദിക്ക്‌ന്റായ?> എന്റ് കേ്ട്ടാര്.
29അദ്‌ക്ക് അയാള്, <ബേ്ഡ, എന്ത്‌ക്കെന്റ് സൊന്ന കളേന പ്‌ഡ്‌ങ്ക്‌ഗാട്ടി ഗോദിമ്പെ മ്‌ണ്ടേമ് പ്‌ഡാങ്കി ബര്‌മ്. 30അദ്‌നാലെ ഗോദിമ്പെ മ്‌ണ്ടേമ് കളേമ് അറെ ഗളിഗെ മാട്ട്‌ക്ക് ബളാരുഡൊ. അറെഗളിഗേക്ക് നാന് അറെഗാറാര്‌ക്ക് മുദാല് കളേന പ്‌ഡിങ്കി കൂട്ടി സുട്ടു തള്ള്യ ഒന്റൊന്റു കെ്ട്ട് മാഡി കെ്ട്ട്യാമ്, ഗോദിമ്പെന അന്നാന ബെക്കുവ ബീ്ഡ്‌ക്ക് തുമ്പിസി ബെക്ക്യാമ് സൊല്ലുവെ> എന്റ് സൊന്നാന്.>>
കഡ്‌ഗ് ബെദെ കദെ
31പ്‌റ അയാള് ബേ്റെ ഒന്റു കദെ അവാര്‌ക്ക് സൊല്ലി കൊഡുത്താന്: <<സാമി ആളുവാദ് ഒന്റു കഡ്‌ഗ് ബെദേക്ക് സമ. അയി ബെദേന ഒന്റൊരുത്താന് എ്ഡ്‌ത്ത് തന്ന് കാഡ്‌ക്ക് അലേത്താന്. 32അദ് എല്ലാ ബെദേന ബ്‌ഡ സ്‌ന്നാദാനാല്‌മ് അദ് ബളാര്‌ഗാട്ടി എല്ലാ സെ്ഡിഗാള്‌ന ബ്‌ഡ ദൊഡ്ഡാദായി ബാന്‌ല പക്കിഗാള് ബന്ത് ഗൂഡു എ്ഡ്‌ക്കുവാദ്‌ക്ക് തഗ്‌ന്ത താറ്‌ഗാള് ബ്‌ഡുവ ഒന്റു കഡ്‌ഗ് മ്‌ണ്ടെ ആന്റ്.>>
പുളിമാവു കദെ
33ഏസ്സ് ബേ്റെ ഒന്റു കദെ ഗുഡി അവാര്‌ക്ക് സൊന്നാന്: <<സാമി ആളുവാദ് എന്നുവാദ് ഒന്റൊരുത്തി മൊത്തന മാവുന എ്ഡ്‌ത്ത് കലേസി അദ്‌ക്ക് ലേസ പുളിത്ത മാവുന സേത്തി അദൊട്ടുക്കു പുളിക്ക മാട്ട്‌ക്ക് ബെക്കുവ പാസെത്തെ.>>
34ഈ കാര്യഗാള്‌ന ഒട്ടുക്കു ഏസ്സ് കദെ ദിന്‌സ്‌ല് ആള്‌ഗാള്‌ക്ക് സൊല്ലി കൊഡുത്താന്. കദെ സൊല്ലാദെ അവാര്‌ക്ക് ഒന്റുനാമ് സൊല്ലി കൊഡുക്കാലെ.
35<<നാന് കദെ സൊല്ല്യ ബായി ത്‌റാക്കുവെ,
ഉലഗാന ദ്‌ട്ട്‌സ്‌നാദ്‌ലിന്ത് തെര്യാദിര്‌ക്കുവ കാര്യഗാള്‌ന നാന് സൊല്ലുവെ>>#സാമി പാട്ട് ബൊക്കു 78:2
എന്റ് സാമിദാസ് സൊന്ന കാര്യഗാള് നഡാക്ക്യ ബേ്ണ്ടി ഏസ്സ് ഇത്തെ ഗേന്താന്.
കളെ കദെ പൊറുളുന സൊല്ലി കൊഡുക്കുന്റാന്
36അദ്‌ക്ക് പ്‌റ ഏസ്സ് ആള്‌ഗാള്‌ന സൊല്ലി ബ്‌ട്ട്‌തള്ളി ബീ്ഡ്‌ക്ക് ബന്താന്. സൊല്ലുപഡി നഡാക്ക്‌ന്റവാര് അയാള് പട്ട്‌ക്ക് ബന്ത്: <<കാഡ്‌ല കളേന പറ്റി സൊന്ന കദെന എമാക്ക് അര്‌ത്ത മാഡി തരുഡോമെ>> എന്റ് സൊന്നാര്.
37അദ്‌ക്ക് ഏസ്സ് ഇത്തെ സൊന്നാന്: <<നല്ല ബെദേന ബിത്ത്‌ന്റവാന് എന്നുവാദ് മന്‌സാനായി പ്‌റാന്തവാന്, 38കാഡ് എന്നുവാദ് ഉലഗ, നല്ല ബെദെ എന്നുവാദ് സാമി ആള്‌ന്റവാര്‌ക്ക് പട്ടവാര്, കളെ എന്നുവാദ് സെയിത്താന്‌ക്ക് പട്ടവാര്. 39അദ്‌ന ബിത്ത്‌ന പോട്ടിഗാറാന് എന്നുവാദ് സെയിത്താന്, അറെ എന്നുവാദ് ഉലഗ കഡേസി നാള്, അറെഗാറാര് എന്നുവാദ് ദൂദാര്‌ഗാള്.
40കളേന കൂട്ടി തീക്കിക്കി സുട്ടു തള്ളുവ പാസെ ഉലഗ കഡേസി നാള് നഡാക്ക്‌മ്. 41മന്‌സാനായി പ്‌റാന്തവാന് തന്ന് ദൂദാര്‌ന ബ്‌ട്ട് താന് ആള്‌ന്റവാര് കൂട്ടാത്ത്‌ല് പാവ ഗേന്റവാര്‌നാമ് കെ്ട്ട കാര്യഗാള് ഗേന്റവാര്‌നാമ് ഒന്റുക്കു സേത്തുവാന്. 42പ്‌റ അയി ദൂദാര്‌ഗാള് അവാര്‌ന സൂളെ തീക്ക് ഇക്കുവാര്. അദ്‌ല് അവാര് കേ്യിന്ത്‌കൊണ്ടു പല്ല്‌ന ന്‌റ്‌ന്‌റ കഡിക്കുവാര്. 43അയി ഗളിഗേല് നേര്‌മെഗാറാര് തമ്മ് അപ്പാന് ആളുവ നാഡ്‌ല് നേരന പാസെ കത്തുവാര്. നാന് സൊല്ലുവാദ്‌ന കേ്ള്‌ക്ക്യ മനേസ്സിര്‌ക്ക്‌ന്റവാന് അദേപാസെ നഡാക്കുഡൊ.>>
മുദാല്‌ന ഒളുസി ബെത്ത കദെ
44<<സാമി ആളുവ നാഡ് എന്നുവാദ് കാഡ്‌ല് ഒളിസി ബെത്ത്‌റ്‌ക്കുവ മുദാല്‌ക്ക് സമാത്തെ. അദ്‌ന ഒരുത്താന് കണ്ട് മറിസിമ് അയി കാഡ്‌ക്ക് താനെ ഒളുസ്‌നാന്. അയാള് തനാക്ക് ബന്ത പിര്യാത്ത്‌ല് പോയി തനാക്കുള്ളാദ്‌ന ഒട്ടുക്കു ബിറ്റ് അയി കാഡ്‌ന ബാങ്ക്‌നാന്.>>
ബെലെപെറ്റ മുത്തു കദെ
45<<പിന്നേമ് സാമി ആളുവ കാല എന്നുവാദ് നല്ല മുത്തുന പരാക്കുവ ഒന്റു ഏവരഗാറാന്‌ക്ക് സമ. 46അയാള് ബെലെപെറ്റ ഒന്റു മുത്തുന കണ്ടപ്‌റ പോയി തനാക്കുള്ളാദ്‌ന ഒട്ടുക്കു ബിറ്റ് അദ്‌ന ബാങ്ക്‌നാന്.>>
ബലെ കദെ
47<<പിന്നേമ് സാമി ആളുവ കാല എന്നുവാദ് കഡാല്‌ക്ക് ഇക്കി എല്ലാ ദിന്‌സ് മീന് പ്‌ഡിക്കുവ ബലേക്ക് സമ. 48ബലെ തുമ്പുഗാട്ടി ബലെ ഇക്ക്‌ന്റവാര് ബലെന ഏട്ടിക്ക് ഏ്റ്‌സി കുക്കാന്തിന്ത് നല്ലാദ്‌ന ഒട്ടുക്കു സട്ടിക്ക് ഇക്കി മൊഡ്ഡുന ഒട്ടുക്കു തെ്റിന്ത് തള്ള്‌നാര്. 49ഇദേപാസെ താനെത്തെ ഉലഗ കഡേസിമ് നഡാക്ക്‌മ്. ദൂദാര് പ്‌റപട്ട് ബന്ത് നേര്‌മെഗാറാര് പട്ട്‌ലിന്ത് കേ്ഡ്‌ഗെ്ട്ടവാര്‌ന അലാക്ക പ്‌റ്‌ത്ത് 50അവാര്‌ന സൂളെ തീയിക്ക് ഇക്കുവാര്. അദ്‌ല് അവാര് കേ്യിന്ത്‌കൊണ്ടു പല്ല്‌ന ന്‌റ്‌ന്‌റ കഡിക്കുവാര്.>>
51<<ഇദെല്ല നെപ്പ്‌കെ്ഡേത്ത്‌ദ?>> എന്റ് കേ്ള്‌ക്കാട്ടി <<നെപ്പ്‌കെ്ഡേത്ത്‌ദ്>> എന്റ് അവാര് സൊന്നാര്.
52അയാള് അവാര്‌ക്ക്: <<അദ്‌നാലെ സാമി ആളുവാദ്‌ന പറ്റി പഡിക്കുവ ഒന്റൊന്റു ബേദബാത്ത്യനാമ്, തന്ന് ബീ്ഡ്‌ല് ബെത്ത്‌റ്‌ക്കുവ ബല്ലാത്ത്‌ലിന്ത് പുദ്യ സാമനഗാള്‌നാമ് പള്യ സാമനഗാള്‌നാമ് എ്ഡ്‌ത്ത് കൊഡുക്കുവ ഒന്റു ബീ്ഡ്‌ഗാറാന്‌ക്ക് സമാത്തെ>> എന്റ് സൊന്നാന്.
ഏസ്സ്‌ന തന്ന് ഊരുഗാറാര് തള്ള്‌ന്റാര്
53ഈ കദെഗാള്‌ന സൊല്ലി തീന്ത പ്‌റ ഏസ്സ് അദ്‌ലിന്ത് പോനാന്. 54പ്‌റ അയാള് തന്ന് സൊന്ത പട്ടണാക്ക് ബന്ത് എഗുദാര് പരേസുവ ബീ്ഡ്‌ല് ആള്‌ഗാള്‌ന പഡ്‌സ്‌നാന്. അദുക്കുള അവാര് അദിസ്യപട്ട്: <<ഈ ബുദ്ദിമ് ഈ അദിസ്യഗാള് ഗേവാദ്‌ക്കുള്ള സക്‌തിമ് ഇയാള്‌ക്ക് ഏദ്‌ലിന്ത് കെ്ഡേത്ത്‌ദ്? 55ഇയാള് ആസാരി മഗാനല്ല? ഇയാള് അവ്വേസി മറിയ എന്റവാളല്ല? ആക്കോവു, ജോസെ, സീമോനു, ജൂദാന് എന്റവാര് ഇയാള് തമ്പ്യാമല്ല? 56ഇയാള് തങ്കേസ്യാമ്‌മ് നമ്മോഡൊപ്പാത്തെ ഇര്‌ക്ക്‌ന്റാരൊ? പിന്നെ ഈ കാര്യഗാളെല്ല ഏദ്‌ലിന്ത് ഇയാള്‌ക്ക് കെ്ഡേത്ത്‌ദ്?>> 57എന്റ് സൊല്ലി അവാര് ഏസ്സ്‌ന ബെലേക്ക് എ്ഡ്‌ക്കാലെ.
ആന ഏസ്സ് അവാര്‌ക്ക്: <<ഒന്റു സാമിദാസ്‌ന തന്ന് സൊന്ത പട്ടണാത്ത്‌ലവാര്‌മ് സൊന്ത ബീ്ഡ്‌ലവാര്‌മ് മദ്‌സുവാദില്ലെ. ആന ഒച്ചാരി എ്ഡേലവാര് അയാള്‌ന മദ്‌സുവാര്>> എന്റ് സൊന്നാന്.
58അവാര് ഏസ്സ്‌ന നമ്പാത്താദ്‌നാലെ ഏസ്സ് അദ്‌ല് മൊത്തന അദിസ്യഗാള് ഗേഗാലെ.
Currently Selected:
മത്തായി 13: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
