1 पतरस 3
3
जननों
1-2हे जननों, अपड़ा स्वामि का इन अधीन रावा। कि जु ऊंमा बट्टी कुई भि पिता परमेश्वर का वचन पर विश्वास कन से इंकार करद, त जन के तुम जीवन ज्यून्दा, उ तुम्हरा कुछ बुल्यां बगैर ही ऊं तैं विश्वास कन मा मदद करलो जब उ तुम्हरा शुद्ध अर ईश्वरीय बरतौ तैं दिखला त उ मसीह पर विश्वास करला। 3उन ही मि चांदु कि विश्वासी जनन भि सै ढंग का कपड़ा पैरून, इन कपड़ा जु समाज मा योग्य हो; अर बनि-बनि किस्मै का बाल बणै के अर सोना अर मोतियों अर मैहंगा-मैहंगा कपड़ोंं से दूसरों तैं आकर्षित नि करुनु। 4तुम्हरी सुंदरता ईं बात पर निर्भर हूंण चयणी च कि तुम हकीकत मा कु छा, यु एक विनम्र अर शान्त बरतौ च, जु कि पिता परमेश्वर कु भौत अनमोल च। 5जु जनन भौत पैली रौंदी छै अर पिता परमेश्वर पर विश्वास करदी छै अर वे पर अपड़ी आस रखदि छै, उ अपड़ा आदिमों की आज्ञाओं तैं मांणी के अपड़ा आप तैं सुन्दर बणांदी छै। 6जन सारा अब्राहम की आज्ञा मणदी छै अर वे तैं स्वामी बुल्दी छै। मतलब कि, जु तुम दूसरों की मदद कैरा अर तुम मा चिन्तापूर्ण डौर नि हो, त तुम सारा की नौंनियों जन होला।
आदिम
7उन ही हे आदिमों, अपड़ी जननों का दगड़ी मिल के रावा, अर ऊंकी मदद कना का बारा मा विचार कैरा, अर तुम तैं याद रखण चयणु च कि उ तुम बट्टी कमजोर च, इलै तुम तैं ऊंको आदर कन चयणु च। किलैकि तुम द्वी ही वे वरदान तैं कठ्ठा करदा जु पिता परमेश्वर ल दया का दगड़ी तुम तैं द्ये, मतलब अनन्त जीवन को वरदान। इन कैरी के जब तुम पिता परमेश्वर बट्टी प्रार्थना कैरा त उ तुम्हरी सुणो।
आशीष का वारिस हूंण कु बुलाहट
8अंत मा, मि तुम बट्टी बुल्णु छो, कि तुम विश्वासी बंणि के आपस मा एकजुट रवा, अर एक-दुसरा की चिन्ता किया कैरा, अर एक ही परिवार का सदस्यों का जन प्रेम कैरा, दूसरों पर दया कैरा, एक दुसरा का दगड़ी नम्र बणा। 9बुरै का बदला मा बुरै नि कैरा अर न गल्ली का बदला मा गल्ली द्या; पर यांका विपरीत आशीष ही द्या; पिता परमेश्वर ल तुम तैं बुलै कि तुम दूसरों तैं आशीष दे साका। जु तुम इन करदा त पिता परमेश्वर भि तुम तैं आशीष दयालो।
10किलैकि पिता परमेश्वर को वचन बुल्दो,
“जु कुई आदिम अपड़ा जीवन कु आनन्द लींण चौ अर अच्छा दिन चौ त वे तैं सावधान रौंण चयणु च कि उ बुरी बात नि बोलु अर वे तैं झूठ बुल्ण बंद कैरी दींण चयणु च।”
11वे तैं निश्चय ही उ कन बंद कैरी दींण चयणु च जु बुरो च। यांका बदला, वे तैं उ ही कन चयणु च जु अच्छो च। दूसरों का दगड़ी शान्ति से रौंणो की कोशिश कैरा।
12किलैकि प्रभु ऊं लुखुं की देखभाल करद जु उ ही करदींनि जु सही च अर उ हमेशा ऊंकी प्रार्थना सुनणु कु तैयार च। पर पिता परमेश्वर ऊं लुखुं का विरुद्ध मा काम करद जु बुरै करदींनि।#3:12 भज. 34:15,16, यूह. 9:31, नीति. 15:29
भलै कना का कारण सताव
13जु तुम हमेशा भला काम कने की कोशिश करदा, त कुई भि हकीकत मा तुम तैं चोट नि पौंछै सकद। 14पर जु हम तैं अपड़ा धर्मी बरतौ का कारण दुःख मिल्दो भि च, त हकीकत मा हम धन्य होला। इलै, जु इन लोग छिनी जु हम तैं डरौंदींनि, त ऊं बट्टी नि डैरा अर नि घबरा। 15-16पर अपड़ा मनों मा मसीह कु आदर-सत्कार रखा, अर प्रभु का रूप मा वे तैं सम्मान द्या, अर हमेशा हर कै तैं जवाब दींणु कु तैयार रावा जु तुम बट्टी वीं आस तैं समझणु कु पुछदींनि जु सैरा विश्वासी कठ्ठा करदींनि, पर यु तुम नम्र अर सम्मान का दगड़ी कैरा। हमेशा उ ही कैरा जु सही च। फिर जु लोग तुम्हरा विरुद्ध बुरो बुल्दींनि, त उ ही शर्मिंदा होला जब उ मसीह का दगड़ी तुम्हरा सम्बंध का कारण तुम्हरो अच्छो बरतौ तैं दिखला। 17कभी-कभी पिता परमेश्वर तुम पर परेशानियां अर दर्द आंण दींद जबकि तुम ल अच्छा काम करिनि। पर यु ऊं परेशानी अर दर्द बट्टी बढ़िया च जु यु कारण औंदींनि किलैकि तुम ल बुरा काम करिनि।
मसीह को दुःख
18मि यु बुल्दो किलैकि मसीह ल भि हमारा पापों का कारण दुःख सै अर मोरि गै। उ भस एक बार मोरि अर दुबरा वे तैं मुरणै की जरूरत नि च। उ एक धर्मी आदिम छो जु पापी लुखुं कु मोरि की उ हम तैं पिता परमेश्वर मा लै साको। ऊंल वेकी देह तैं मारि दींनि पर वे तैं पवित्र आत्मा की सामर्थ बट्टी दुबरा ज्यूँदो किये गै। 19तब वेकी आत्मा ल जै के ऊं आत्माओं मा शुभ संदेश प्रचार कैरी जु वीं जगह पर पिता परमेश्वर का द्वारा कैद किये गै छा, जख मुरयां लुखुं की आत्माएँ छिनी। 20यु ऊं लुखुं की आत्माएँ छिनी जौन भौत बगत पैली पिता परमेश्वर की आज्ञाओं कु उल्लंघन कैरी छो। जब नूह अपड़ो जहाज तैं बनांणु छो, त पिता परमेश्वर धीरज से इन्तेजार कनु छो कि देखो क्य उ लोग पछतौ करला। पर भस जहाज मा प्रवेश कन वला आठ लुखुं तैं वीं भयानक बाड़ मा डुबण से बचये गै। 21पुरणा बगत मा ऊंको उद्धार अब हमारा उद्धार या बचाव कु एक उदाहरण च जै पांणी मा हम बपतिस्मा लीदां, उ हमारी देह बट्टी मैल दूर नि करदो, पर यु एक चिन्ह च कि हम ल पिता परमेश्वर बट्टी माफी मांगी कि अगनैं हमारो मन परेशान नि रौ। हम तैं माफ किये जै सकद किलैकि यीशु मसीह मौत का बाद फिर से ज्यून्दो हवे। 22अर उ स्वर्ग मा चलि गै। अब उ उख पिता परमेश्वर का दैंणा तरपां सबसे बड़ी जगह पर च, अर उ सैरा स्वर्गदूतों अर सैरा अधिकारियों अर सामर्थ पर राज्य करद जौं मा अधिकार अर शक्ति छिनी।#3:22 इफि. 1:20,21, भज. 110:1
Currently Selected:
1 पतरस 3: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
