isizwur 49

ibark yaɛqub kullu tarwa‑ns

1iġr‑d ilmma yaɛqub i‑tarwa‑ns yini‑asn: «munat‑d ad‑awn‑mlġ ma‑ra‑ywn‑ijrru ġ‑uwssan‑ad‑d‑iftan. 2akmurat‑d ar‑tsflidm a‑tarwa n‑yaɛqub, trarm‑d amẓẓuġ s‑babatun israyil.

3«rawbin, kiyi a‑igan ifh̬ddi n‑jjhd‑inu, tgt lġllt tamzwarut n‑trugza‑inu. tzwurt ġ‑tmuġra ula lquwwa. 4walaynni tgit zund aman, ur‑a‑ttzgat. ur‑sar‑tgit anmġur, ašku tġlit s‑tisi‑nu tndst‑stt, tġlit s‑illiġ a‑iggan babak.

5«šimɛun d‑lawi aytmatn ad‑gan, gn uzzal‑nsn d‑imqlad n‑ṭaẓit. 6a‑ul‑inu, rwl zġ‑tamunt‑nsn, wala sar‑didsn‑tmšawart. ašku s‑lġaḍab a‑s‑nġan mddn, ula s‑taḍṣa a‑s‑rurn izgarn ad‑ssbiḍirn. 7h̬zu lġaḍab‑nsn ašku išqa, th̬zut tanuwwašt‑nsn ašku tqjr. ra‑tn‑aṭṭuġ f‑ayt‑yaɛqub, ssuktġ‑tn ġ‑wakal n‑israyil.

8«yahuda, ra‑k‑ttalġn aytmak, yili‑ufus‑nk f‑umggrḍ n‑inuwwašn‑nk, ar‑knnun tarwa n‑babak ġ‑umnid‑nk. 9yahuda iga yus n‑izm. tumẓt a‑iwi tagʷmrt tasit‑stt. zund izm nġd tizmt a‑isskubbur ar‑imddi. ma‑izɛmn a‑t‑issduyy? 10yahuda a‑ra‑yasi aɛmud n‑tgldit. d‑tarwa‑ns a‑ra‑bdda‑iḥkam, ard‑d‑yašk ġwalli mi tga‑tgldit, skrn ayt‑tmizar s‑wawal‑ns. 11ra‑yass asnus‑ns d‑uṣġar n‑waḍil, ikrf yus n‑tġyult d‑ddilit išwan, isird timlsa‑ns s‑waman n‑waḍil, issli ibrdan‑ns ġ‑idammn n‑ddilit. 12zggʷaġnt‑walln‑ns zund aman n‑waḍil, mlluln uh̬ṣan‑ns zund agʷfay.

13«zabulun ra‑ittrs ġ‑tama n‑umda, ig antal i‑wanawn. awttu‑ns ra‑ig tamdint n‑ṣidun.

14«yassakar iga aġyul iṣḥan, isskubbr ġ‑gr itlsan. 15yaf maniġ a‑ithnna, iẓr tamazirt tfulki. walaynni ra‑n‑ig aġruḍ‑ns i‑uẓaẓu, ig ismg i‑tmmara.

16«dan ra‑iḥkam f‑mddn‑ns, ig taqbilt ġ‑gr ayt‑israyil. 17dan ra‑ig algʷmaḍ ġ‑tama n‑uġaras, ig ablinka ġ‑tama n‑tġarast, ilbi awurz i‑wayyis, iḍr‑n‑umnay tiġurdin. 18ajnjm‑nk a‑ġ‑n‑rjiġ a‑sidi rbbi.

19«gad, ra‑srs‑takʷin‑trubba n‑iqṭṭaɛn, imma ntta ra‑srsn‑iffuġ iẓẓu gisn.

20«ašir, ra‑tmim ṣṣabt‑ns, ra‑yakka timimin i‑igldan.

21«naftali iga zund aznkʷḍ ar‑itazzal s‑inna ira, ar‑itaru izʷnkaḍ fulkinin.

22«yusf iga zund aṣṭṭa yakkan lġllt, ig aṣṭṭa yakkan lġllt ġ‑tama n‑talɛint. knt‑d‑tṣṭṭwin‑ns f‑iggi n‑tabya. 23kurhan‑t id‑bu‑iẓḍkan, akʷin gis ssrfufnn‑t bahra. 24imma nttan, izga lqus‑ns, ifsasn ifassn‑ns, issdus‑t rbbi itjhhdn n‑yaɛqub, ig amksa n‑israyil, ig ajarif‑ns. 25ra‑k‑iɛawn rbbi n‑babak, ibark gik walli iẓḍarn i‑kulši s‑lbarakat n‑ignwan tasawnt ula tin‑tdrut n‑wakal tagsart, s‑lbarakat n‑tibbatin ula tin iḥlgan. 26ha lbarakat n‑babak mqqurnt f‑idrarn lli‑dumnin, utint iwrar lli‑bdda‑llanin, ilint kullu f‑ih̬f n‑yusf, ilint f‑ignzi n‑walli ityawẓlayn ġ‑gr aytmas.

27«bnyamin iga zund uššn, yaġ‑t‑laẓ ar‑igʷmmr. zikk ar‑iqqʷay ma‑ištta, tadggʷat ar‑yaṭṭu tagʷmrt.»

lmut n‑yaɛqub ula timḍlt‑ns

28ġwin a‑igan iqbiln n‑ayt‑israyil s‑sin d‑mraw (12), d‑ġmkan a‑s‑tn‑ibark babatsn, idɛu i‑kraygatt yan s‑lbaraka lli‑as‑igan. 29yuṣṣa‑tn ilmma yini‑asn: «ha‑yyi rad‑tyattayġ s‑dar ayt‑dari. mḍlat‑iyi‑n d‑id‑baba ġ‑ifri lli‑illan ġ‑igr n‑ɛifrun gu‑ḥit. 30illa ifri‑an ġ‑igr lli‑mi‑ttinin ‹makfila›, ġ‑tsga n‑mamra lli‑iwalan asġlay n‑tafukt, ġ‑tmazirt n‑kanɛan. isġa ibrahim igr‑an d‑ifri‑ns dar ɛifrun gu‑ḥit, baš a‑t‑iṭṭaf a‑gis‑iskr amḍḍal. 31ġin a‑ġ‑ityawmḍal ibrahim d‑tmġart‑ns sarah. ġin a‑ġ‑ityawmḍal isḥaq d‑tmġart‑ns rifqa. ġin a‑ġ‑mḍlġ layah. 32ittsġa igr‑an d‑ifri lli‑gis‑illan dar ayt‑ḥit.» 33lliġ ikmml yaɛqub iwaliwn lli‑s‑yuṣṣa tarwa‑ns, issmun‑d iḍarn‑ns s‑iggi n‑tisi. tffuġ‑t rruḥ‑ns, ityattay s‑gr mddn‑ns lli‑zrinin.

Currently Selected:

isizwur 49: SHILOT20

Highlight

Copy