isizwur 14

abram ijjnjm luṭ

1ġ‑uwssan n‑amrafil agllid n‑šinɛar d‑aryuk agllid n‑alasar d‑kidarlɛumr agllid n‑ɛilam d‑tidɛal agllid n‑guyim, 2mmaġn ntni d‑baraɛ agllid n‑sadum d‑bršaɛ agllid n‑ɛamura d‑šinab agllid n‑adma d‑šmibr agllid n‑ṣabwim d‑ugllid n‑balaɛ lli‑igan ṣuɛar. 3igldan‑ad ssmunn ikabarn‑nsn ġ‑uzaġar n‑siddim. azaġar‑an ġilad illa‑gis‑umda immutn. 4ašku sin d‑mraw (12) n‑usggʷas a‑tqasan ġ‑ddu‑ufus n‑kidarlɛumr, imma wis kraḍ d‑mraw (13) n‑usggʷas ɛṣan‑t.

5iffuġ kidarlɛumr ġ‑wis kkuẓ d‑mraw (14) n‑usggʷas, ntta d‑igldan lli‑dids‑munnin, nrun ayt‑rafaɛ ġ‑tmdint n‑ɛaštarut‑qarnaym, nrun ayt‑zuzi ġ‑ham, nrun ayt‑aymi ġ‑šawa‑qritaym, 6nrun ayt‑ḥur zġ‑iwrar n‑saɛir ar aṣġar n‑igg n‑faran ġ‑tama n‑lh̬la. 7wrrin ilmma f‑uġaras‑nsn s‑ɛin‑mišfaṭ lli‑igan qadaš, nrun kullu tamazirt n‑ayt‑ɛamaliq, nrun ula ayt‑amur lli‑izdġn ġ‑ḥaṣaṣun‑tamar.

8ġakudan ad‑ffuġn igldan n‑sadum d‑ɛamura d‑adma d‑ṣabwim d‑balaɛ lli‑igan ṣuɛar. ssmunn‑d ikabarn‑nsn ġ‑uzaġar n‑siddim 9baš ad‑mmaġn d‑kidarlɛumr agllid n‑ɛilam d‑tidɛal agllid n‑guyim d‑amrafil agllid n‑šinɛar d‑aryuk agllid n‑alasar. smmus igldan a‑d‑iffuġn ad‑mmaġn d‑kkuẓ. 10walaynni ggutn igʷḍyan n‑zzft ġ‑uzaġar n‑siddim. lliġ rwln igldan n‑sadum d‑ɛamura, iḍr kra gisn ġ‑igʷḍyan, rwln wiyyaḍ s‑iwrar. 11aškin‑d kkuẓ igldan‑an yaḍni, amẓn kullu ma‑igan win sadum d‑ɛamura, la ayda wala amššu, munn ilmma d‑uġaras‑nsn. 12awin didsn luṭ lli‑igan yus n‑gʷmas n‑abram ašku izdġ ġ‑sadum, awin‑t ntta ula kullu ma‑iṭṭaf.

13yašk‑id yan injm zġ‑imiġ, yawi‑d lah̬bar i‑abram. iga abram zġ‑ayt‑ɛibr, isrs ġ‑tama n‑uṣġar n‑tasaft n‑mamra n‑ayt‑amur. mamra iga gʷmas n‑aškul d‑ɛanir, ntni kullutn skrn yadlli lɛhd ġ‑gratsn d‑abram.

14lliġ isfld abram is‑ityamaẓ yus n‑gʷmas, issmun‑d irgazn dusnin lli‑iluln ġ‑ih̬iyyamn‑ns. kraḍ id‑miyya d‑mraw d‑tam (318) ad‑gan. ffuġn ġakudan ẓẓun gisn ar tamdint n‑dan. 15ibḍu fllasn abram ih̬ddamn‑ns ġ‑iḍ‑an, yakʷi‑n fllasn inru‑tn, iẓẓu gisn ar ḥuba ġ‑tsga n‑dimašq lli‑iwalan asmmiḍ. 16ikks‑asn‑d ayda kullut, yawi‑d ula luṭ lli‑igan yus n‑gʷmas, ntta d‑wayda‑ns d‑tmġarin ula mddn‑ns kullutn.

malkiṣadq ibark abram

17lliġ‑d‑iwrri abram tigira n‑ma‑inra kidarlɛumr d‑igldan lli‑dids‑illan, iffuġ‑d‑ugllid n‑sadum a‑t‑in‑imnaggar ġ‑talat n‑šawa lli‑igan talat n‑ugllid. 18yašk‑id ula malkiṣadq agllid n‑salim, yawi‑d aġrum d‑waman n‑waḍil iktin. ig nttan amsakmur ġ‑gr mddn d‑rbbi amattuy. 19malkiṣadq ibark abram ġakudan yini: «a‑tili lbaraka f‑abram zġ‑rbbi amattuy lli‑iskrn ignwan d‑wakal. 20a‑yili lḥmd i‑rbbi amattuy lli‑irurn inuwwašn‑nk s‑ddu‑ufus‑nk.» ifk‑as ilmma abram tis mrawt n‑kullu ma‑d‑yumẓ.

21yini‑ugllid n‑sadum ġakudan i‑abram: «rar‑iyi‑d mddn, tasit ayda a‑ig wink.» 22yini abram i‑ugllid n‑sadum: «hati ggulliġ i‑sidi rbbi amattuy lli‑iskrn ignwan d‑wakal, 23ur‑tasiġ ifili ula tassamt ula ḥtta yat‑tġawsa zġ‑ġaylli igan wink, a‑ur‑imil tinit ‹nkki a‑issġnan abram.› 24walu abla maylli ššan iɛyyaln, ula taġamt n‑ɛanir d‑aškul d‑mamra lli‑didi‑imunn, ad‑asn‑tfkt taġamt‑nsn.»

Currently Selected:

isizwur 14: SHILOT20

Highlight

Copy