marqus 16
16
tankra l‑lmasiḥ zġ‑lmut
1lliġ izri‑wass n‑usunfu, tnkr maryam ullt‑magdala d‑maryam innas n‑yaɛqub ntnti d‑saluma, sġnt isafarn n‑tujjut baš ad‑ddunt ad‑ẓġurnt ddat n‑yasuɛ. 2zikk ṣbaḥ n‑wass l‑lḥdd, bḥra‑di‑tġli tafukt, ftunt s‑umḍḍal. 3ar‑ttinint i‑ngratsnt: «ma‑rad‑aġ‑issknuki ifir zġ‑imi n‑ifri?» ašku imqqur bahra. 4allnt alln‑nsnt s‑n‑ẓrant ifir yitti zġ‑imi. 5kšmnt s‑umḍḍal afnt‑n yan‑uɛyyal iskiws f‑ufasi, ilsa aslham imlluln. lliġ‑t‑ẓrant ggʷdnt bahra. 6imma ntta isawl yini‑asnt: «ad‑ur‑tiksaḍmt. ar‑tsiggilmt yasuɛ gu‑naṣira lli‑immutn f‑uggjdi. ur‑sul‑illi ġid, hati inkr‑n. ẓramt, ha‑illiġ‑t‑id‑srsn. 7imma ġilad, ddwamt tsslkmmt awal‑ad i‑imḥḍarn‑ns ntni d‑bṭrus, tinimt‑asn: ‹yasuɛ ra‑kʷn‑izwur s‑tmazirt n‑jalil. ġin a‑ġ‑ra‑ti‑tẓrm ġmklli‑s‑awn‑inna.›» 8ffuġnd‑d‑tmġarin zġ‑umḍḍal ar‑srsnti‑tkkat tawda ar‑trgigiynt. rwlnt ur‑nnint yat i‑yan ašku ksuḍnt bahra.
iban lmasiḥ i‑maryam ullt‑magdala
9lliġ‑d‑inkr yasuɛ zikk ṣbaḥ n‑wass l‑lḥdd, iban‑d zwar i‑maryam ullt‑magdala lli‑zġ‑issufġ ssa l‑ljnun, 10tddu tini‑t i‑imḥḍarn‑ns. ntni taġ‑tn‑tguḍi bahra ar‑allan. 11tini‑asn: «iwrri iddr, ẓriġ‑t nkki.» imma ntni ur‑tt‑uminn.
iban lmasiḥ i‑sin zġ‑imḥḍarn‑ns
12tiġurdin n‑mayan iban‑d yasuɛ s‑mamnk yaḍni i‑sin zġ‑gisn lliġ ftan ġ‑uġaras s‑iduran ġ‑brra n‑tmdint. 13wrrin‑d inin‑t i‑wiyyaḍ, walaynni ur‑tn‑uminn ula ntni.
iban lmasiḥ i‑imḥḍarn‑ns s‑yan d‑mraw
14ġ‑isiggʷra iban‑d yasuɛ i‑yan d‑mraw n‑umḥḍar lliġ skiwsn ar‑šttan. iẓi‑tn ašku qqurn ih̬fawn‑nsn ur‑uminn, ula sfldn s‑willi‑t‑ẓranin lliġ‑d‑inkr zġ‑lmut. 15yini‑asn ġakudan: «ffuġat ar‑ttidum s‑ddunit kullutt, ar‑ttbrraḥm s‑lh̬bar‑ad ifulkin i‑kullu mddn. 16wanna yumnn iddm ġ‑waman, hati ra‑injm. wanna ur‑yuminn, ra‑fllas‑yili lḥukm n‑rbbi. 17ra‑ifk rbbi timitar‑ad i‑willi umnnin, rad‑ssufuġn ljnun s‑ism‑inu, rad‑sawaln s‑iwaliwn l‑ljdid. 18iġ‑usin ilgmmaḍn ula iġ‑swan kra inqqan ur‑ra‑tn‑iḍrru. rad‑srasn ifassn‑nsn f‑imuḍan jjin.»
ityalal lmasiḥ s‑ignna
19siditnnġ yasuɛ, tiġurdin n‑ma‑srsn‑isawl, ityalal s‑ignna iskiws f‑ufasi n‑rbbi. 20imma ntni ffuġn ar‑tbrraḥn ġ‑kraygatt mani, ar‑tn‑itɛawan siditnnġ ar‑izzga iwaliwn‑nsn s‑tmitar lli‑iskar f‑ufus‑nsn.
Currently Selected:
marqus 16: SHILNT10
Highlight
Share
Copy
Want to have your highlights saved across all your devices? Sign up or sign in
New Testament in Tashelhayt (Latin script) © United Bible Societies, 1998, 2010.
Robert Bernard Dann.
