Romanos 7

Miã ũrãgꞌadꞌa kĩma ãmaĩ ẽã bꞌʉdꞌeba

1Mebẽrã, mʉrã marã Moisé ũrãgꞌa kꞌawua bꞌea bedꞌeaya, ¿marãba kꞌawua bꞌedꞌera dazhira Moisé ũrãgꞌadꞌe bꞌʉ ẽka wadꞌi zokꞌai bꞌʉdꞌera? 2Aramaʉ̃ kĩrãkꞌa wũẽrã miã kꞌãĩpe bꞌʉra Moisé ũrãgꞌadꞌebara zhi kĩma ũme bꞌaibara zhi kĩma wadꞌi zokꞌai bꞌʉdꞌera. Mawũãmina zhi kĩmata beura, maʉ̃ wũẽrã Moisé ũrãgꞌadꞌebara ẽdrʉbʉrʉa zhi kĩma ũme bꞌadꞌara. 3Zhi kĩma wadꞌi zokꞌai bꞌʉdꞌe wũẽrãba awʉrʉta edara kĩma ẽãta erukꞌãĩ bꞌʉa adꞌaya. Mawũãmina zhi kĩmata beura Moisé ũrãgꞌadꞌebara ẽdrʉbʉrʉa, mawũẽ awʉrʉta edara kĩma ẽãta erukꞌãĩ bꞌa ẽã.

4Mebẽrã, marã aramaʉ̃ kĩrãkꞌa Moisé ũrãgꞌaitara ya beusidꞌa Cristota beudꞌadꞌeba. Aramaʉ̃ne awʉrʉdꞌeta bꞌeta Cristo beudꞌata piradrʉdꞌadꞌeta bꞌeba biata odꞌaya Daizezeita. 5Kꞌazhiruadꞌe zharadꞌebemane bꞌeasidꞌera kꞌazhiruara wuaabʉrʉ okrĩñasidꞌa Moisé ũrãgꞌaba o ẽbaita jara bꞌʉta, aramaʉ̃ne dazhi kꞌakuaba obꞌʉbara dazhira aduaita beui basia. 6Mawũãmina idꞌira Moisé ũrãgꞌadꞌebara ẽdrʉsidꞌa, maʉ̃ ũrãgꞌa edre duanu ẽãba dazhira ya beusia maʉ̃ ũrãgꞌaitara. Mawũẽ Daizezeba jara bꞌʉta zhiwidꞌita Jawurebiadꞌeba aribꞌaedꞌaya, aramaʉ̃nerã Moisé ũrãgꞌata zhi zõrã edre duana ẽã.

Kꞌazhiruata bꞌʉdꞌebema mʉne

7¿Mawũẽ kꞌasia adꞌaipe? ¿Moisé ũrãgꞌara kꞌazhiruakꞌa? ¡Mawũã ẽã! Baribʉrʉ mʉãrã kꞌazhiruara sãwũãta kꞌawua ẽãta kꞌawuasia Moisé ũrãgꞌadꞌeba. Miã mʉãrã kꞌawua ẽbakꞌausia ne zhãrãne krĩña bꞌe ẽãrã, maʉ̃ne Moisé ũrãgꞌabara mawũã bꞌʉa: Ne zhãrãne krĩñarãrũã. 8Mawũãmina mawũã jaradꞌadꞌeba kꞌazhiruabara mʉãã wuaabʉrʉ ne jõma krĩñabisia. Moisé ũrãgꞌata ne ẽbasibʉrʉ kꞌazhiruara wuaabʉrʉ okrĩña nʉma ẽbakꞌausia.

9Mʉã Moisé ũrãgꞌa kꞌawua ẽã bꞌasidꞌera mʉrã adu-a bꞌasia. Mawũãmina kꞌawuabʉrʉdꞌera mʉãrã kꞌazhiruara wuaabʉrʉ okrĩñasia, mawũẽ mʉrã aduaita beui basia. 10Moisé ũrãgꞌabara mʉta Daizeze ũme bꞌai jõ ẽã bꞌabiita bꞌʉbara aramaʉ̃ne mʉãã kꞌawuabisia mʉrã aduaita beuita bꞌʉta. 11Kꞌazhiruabara Moisé ũrãgꞌaba jara bꞌʉra obi ẽãba mʉrã sewasia, aramaʉ̃ne mʉrã aduabiita beai basia.

12Wãrãnebai Moisé ũrãgꞌara Daizezedꞌea, ũrãgꞌara biata biga. 13¿Mawũã biata mʉrã aduabiita beai basika? ¡Mawũã ẽã! Awuarabʉrʉ kꞌazhiruata obꞌʉdꞌebara mʉrã aduaita beuita maʉ̃ mawũã biadꞌeba kꞌawuasia, mawũẽ maʉ̃ ũrãgꞌadꞌebara dajada nʉmʉã kꞌazhiruara jipadꞌe kꞌazhiruata.

14Dazhirãbara kꞌawua bꞌea Moisé ũrãgꞌara Jawurebiadꞌebemata. Mawũãmina mʉrã zharadꞌebemane bꞌʉba kꞌazhiruaa zhi nendoma. 15Mʉã kꞌãrẽ obꞌʉra kꞌawua ẽã mʉã krĩñata okꞌaba, awuarabʉrʉ mʉã krĩña ẽãta obaria. 16Mʉã krĩña ẽãta obariba mʉãrã kꞌawua bꞌʉa Moisé ũrãgꞌara biata. 17Mawũẽ mʉ ẽã maʉ̃ mawũã obarira, awuarabʉrʉ obaria kꞌazhiruata bꞌʉba mʉne. 18Mʉãrã kꞌawua bꞌʉa mʉnerã mʉ zharadꞌera ne ẽã biara, biata okrĩñaĩrã mʉne bꞌʉa, mawũãmina o ẽã. 19O ẽã biata mʉã krĩñata, awuarabʉrʉ bia ẽãta mʉã krĩña ẽãta obaria. 20Mʉã krĩña ẽãta obʉrʉra mʉã o ẽã, awuarabʉrʉ obaria kꞌazhiruata bꞌʉba mʉne.

21Mawũẽ mʉã biata okrĩña bꞌʉdꞌera bia ẽãta mʉne bꞌʉba idaribi ẽã. 22Mʉne edꞌaubara mʉma biga Daizeze ũrãgꞌara. 23Mawũãmina ne awʉrʉta mʉne bꞌʉa mʉ krĩchata idaribi ẽãta, maʉ̃bara obi edea kꞌazhiruata mʉne bꞌʉta.

24¡Mʉrã zuburia bꞌʉa! ¿Mʉrã kꞌaiba ẽdrʉbiipe mʉ kꞌakuaba mʉ aduabiita beaita nʉmʉrã? 25Mʉãrã Daizezea zhibia ji bꞌʉa izhabʉrʉ ẽdrʉbiya Jesucristo dazhirã Nokꞌodꞌeba. Mʉãrã krĩchabara aribꞌae krĩña Daizeze ũrãgꞌata, mawũãmina zharabara okrĩña kꞌazhiruata.

Currently Selected:

Romanos 7: cto

Highlight

Copy