Romanos 1

Saludo diabuedꞌa

1Mʉrã Pabloa, mʉrã Jesucristo nezokꞌa, mʉrã izha jʉrʉpe zokꞌasia bedꞌea biata jaramarẽã Daizezedꞌeta. 2Maʉ̃ẽnabema izha bedꞌeata jarabibari bꞌeadꞌadꞌeba na wedꞌauba jaradꞌata bꞌʉ tabꞌea: 3Maʉ̃ bedꞌea biabara jara bꞌʉa zhi Warrata dazhirã Nokꞌo Jesucristota, izhira rey Davidꞌeba uruta bꞌasia dazhi kꞌãwũnerã. 4Izhira Daizeze Warrata zarea bara bꞌʉta Jawurebiaba kꞌawuabisia, mawũã kꞌawuabisia beudꞌata piradrʉdꞌadꞌeba.

5Jesucristobara mʉrã izhi biaba jʉrʉpe zokꞌasia, aramaʉ̃ne drua jõmaʉ̃nebemaba ĩjãnamarẽã izhidꞌebemata kʉãgꞌa. 6Marã maʉ̃rãnebemata bꞌea, marã jʉrʉkuasia bꞌeamarẽã Jesucristodꞌeta. 7Jõma marã Roma pʉwʉrʉdꞌebemata bꞌera Daizezeba kʉãgꞌata bꞌea, marã jʉrʉkuasia izhidꞌeta bꞌeamarẽã: Mawũẽ izhi biaba marã adu-a bꞌeabiya dazhi Zhibari dazhirã Zezeba dewara Nokꞌo Jesucristoba.

Pablo wã krĩña bꞌadꞌa Romaĩnu

8Mʉã naara jaraira Jesucristodꞌeba mʉãrã Daizezea zhibia ji bꞌʉa marã jõmaʉ̃bari, marãba Jesúsdꞌebema ĩjã bꞌeta trʉ̃poa nʉmʉbari ẽjũã jõmaʉ̃ne. 9Mʉãrã Daizezera soidꞌu aribꞌae bꞌʉba bedꞌea biata jara bꞌʉa zhi Warradꞌeta, izhara kꞌawua bꞌʉa mʉã marã ewariza jara tau ẽãta mʉ zhiwidꞌibʉrʉdꞌera. 10Mʉrã zhiwidꞌi bꞌʉa Daizezeba krĩñabʉrʉ wãbimarẽã marãma. 11Mʉã marã ũdu krĩña bꞌʉa Jawurebiadꞌebemata jaraita, aramaʉ̃ne jipa nʉmeãmarẽã. 12Aramaʉ̃nerã zhiya zareabi nʉmeãña Jesúsdꞌebema ĩjã bꞌedꞌeba marãbidꞌa mʉãbidꞌa.

13Mebẽrã, mʉã marãba kꞌawuadꞌaita krĩñata kꞌawuaudua mʉrã biodꞌe marãma wãza bꞌʉa, aramaʉ̃ne marãnebemabidꞌa Jesúsdꞌebemata ĩjãnamarẽã dewaraurã judíorã ẽãba ĩjãnapeadꞌa kĩrãkꞌa, mawũãmina idꞌi basiidꞌu wã bꞌe ẽã nʉmʉã. 14Estudiadꞌata bꞌea, estudiadꞌa ẽãta bꞌea, krĩcha erubꞌea, krĩcha ne ẽã bꞌea mʉãrã jaraibara bedꞌea biara. 15Mawũẽ mʉãrã Jesúsdꞌe bedꞌea biara marããbidꞌa kꞌadrʉabai jaraya marã bꞌea Romane.

Zareata bedꞌea biadꞌebema

16Mʉrã pera ẽã Jesúsdꞌebema bedꞌea biata jaraira, maʉ̃ Daizeze zareata jõma zhi ĩjãbʉdata ẽdrʉidꞌebema judíorãta judíorã ẽãta. 17Maʉ̃ bedꞌea biadꞌeba Daizezebara kꞌawuabi bꞌʉa izhara bedꞌea ne ẽã bꞌʉbarita ĩjãbʉrʉdꞌeba. Maʉ̃ẽnabemata zhi bꞌʉmata mawũã bꞌʉa: Daizezema bedꞌea ne ẽã bꞌʉra ĩjã bꞌʉdꞌeba izhi ũme bꞌai jõ ẽã bꞌaya.

Bedꞌea bara bꞌea beubari bꞌera

18Daizezebara izhi kĩrũbira ʉ̃treba kꞌawuabi bꞌʉta zhãrã pua kꞌawua obꞌʉa bia ẽãta obꞌeta, bia ẽãta obꞌeba idu kꞌawuabidꞌa ẽã bꞌeta bedꞌea izhidꞌe wãrãta. 19Daizezedꞌebemata kꞌawuadꞌai bꞌʉra bia kꞌawua bꞌea izha kꞌawuabi bꞌʉba. 20Izhidꞌebemata ũdudꞌakꞌara, izhi zareata jõkꞌara, izhira Daizezeta bꞌʉra dajada ũdu nʉmʉã ẽjũã osi wedꞌauba, maʉ̃ta kꞌawuaidꞌe bꞌʉa izha kꞌãrẽ obꞌʉdꞌeba, mawũẽ bia ẽãta obꞌebara kꞌawuadꞌa ẽã abꞌedꞌa ẽã. 21Daizezedꞌebema kꞌawua bꞌeta Daizezera ibia jaradꞌa ẽã, miã zhibia jida ẽã, aramaʉ̃ne sãwũãta kꞌawuadꞌa ẽã, aramaʉ̃ne sodꞌebara kꞌawuadꞌa ẽkĩrãkꞌa bꞌeba so pãrĩgu bꞌea. 22Krĩcha banane bꞌedꞌe krĩcha ne ẽã bꞌea. 23Daizeze beukꞌata zhi zromane edadꞌaikꞌadꞌe, zhi zromarãne erubꞌea ne dazhi zadꞌe nʉme jõbarita, ibanarã zata, nendʉwʉrʉ jẽrũ kĩmarẽ bꞌe zata, nendʉwʉrʉ jãne wã bꞌe zata mawũã erubꞌea.

24Maʉ̃ba Daizezebara idaribisia ãzhikꞌawua ne mitiata odꞌamarẽã, ãzhi soba krĩñata odꞌamarẽã, mawũẽ ãzhirãĩnu dazhi perata obꞌea. 25Daizezedꞌebemata wãrãnebemane nʉmeãĩkꞌadꞌe sewadꞌebemane nʉmeã, aramaʉ̃ne Daizezeba ne okuadꞌa zata zhi zromane ibia jara erubꞌea Daizeze zhi okuadꞌa kꞌãñabara, maʉ̃ne izhitrʉ ibia jaradꞌaidꞌe bꞌʉa ewari nʉmʉ jõma. Amén.

26Maʉ̃ba Daizezebara idaribisia ãzhi kꞌawua odꞌamarẽã dazhi perata. Mawũẽ wũẽrãrã ãzhidꞌera abꞌari wũẽrã ũme dazhi perata obꞌea. 27Zhũmakĩrãrãsidꞌa abꞌarika bꞌeta wũẽrã tõbꞌari ẽã idaribipe abꞌari makĩrã ũme dazhi perata obꞌea. Aramaʉ̃ne abꞌari makĩrã ũme dazhi perata obꞌeba ãzhikusa Daizezea zuburia obi bꞌea jãpe nʉmeba.

28Mawũã bꞌebara Daizezedꞌebema kꞌawua krĩñana ẽãba Daizezebara chãbꞌarikuasia ãzhi krĩchara bia ẽãta nʉmeã, ãzhi kꞌawua odꞌamarẽã kꞌãrẽ o ẽbai bꞌʉta. 29Ne jõmaʉ̃ bia ẽãta obꞌeba kĩma ẽãta erukꞌãĩbada, ne mitiata obada, ne wuaabʉrʉ krĩñabada, bia ẽãta obada, zhãrãba ne erubꞌʉ kꞌarea bĩ ẽãbada, miã beabada, kꞌaikꞌaiabada, zhãrã sewabada, bedꞌeata obada. 30Zhãrã jarabada, Daizezera juradea, zhãrãma mitia bedꞌeabada, zhi zromane bꞌea, bigaudꞌe bꞌea, krĩcha jʉrʉbada bia ẽãta oita, ũrĩna ẽã ãzhi zhibarirã bedꞌeara. 31Krĩchadꞌe duanu ẽã, ãzhi bedꞌeara aribꞌaedꞌa ẽã, zhãrã kʉãgꞌa edadꞌa ẽã, ãzhi bĩ ẽã odꞌara bedꞌea ne ẽãne edadꞌa ẽã, zhãrã sozuburiadꞌa ẽã. 32Mawũã bꞌebara kꞌawua bꞌea Daizezebara pua kꞌawua oita, aramaʉ̃nerã maʉ̃ kꞌaudꞌa bꞌera aduaita beuya. Mawũãsiidꞌu maʉ̃ kꞌaudꞌa bꞌea, aramaʉ̃ne sobia bꞌea maʉ̃ kꞌaudꞌa bꞌe bawara.

Currently Selected:

Romanos 1: cto

Highlight

Copy