Hechos 28

Pablo kꞌobꞌadꞌa dodꞌu Maltadꞌe

1Ẽdrʉbʉdadꞌera daibara kꞌawuasidꞌa dodꞌura Malta abadata. 2Mama bꞌebara daira kꞌãbãẽã bia edabʉdata tebʉ puadꞌape daira jõma bʉredrʉbisidꞌa kue ze nʉmʉba kũrãsãba. 3Pablobara tebʉ jarra põta jʉrepe edape pepekuasia tebʉdꞌe. Maʉ̃ne dãmata tebʉ jʉ̃wʉ̃rʉ̃ãba wãẽbabʉrʉba kꞌa jirabꞌesia juwuadꞌe. 4Zhãrã mama bꞌebara mawũã dãmata juwuadꞌe jirabꞌidꞌata ũdudꞌai mawũãsidꞌa: Naʉ̃ wãrãne miã beamiãta pusadꞌebara ẽdrʉbʉrʉa. Mawũãmina ne zhi zromane erubꞌera zhãrã kꞌawua obariba idu bꞌabi ẽã.

5Pablobara dãma jĩãwesia tebʉdꞌe, aramaʉ̃ne kꞌãrẽ sãwũã ẽbasia. 6Jarirãbara jʉ̃ã kꞌobꞌeasia izhira oroita, o aritiaudꞌe beu bꞌaeita. Mawũãmina dããrã jʉ̃ã kꞌobꞌedꞌe kꞌãrẽ sãwũã ẽbaera awuara krĩchadꞌape jarasidꞌa ãzha ne zhi zromane erubꞌeta kꞌobꞌʉta.

7Mama druata bꞌasia maʉ̃ dodꞌudꞌebema nokꞌota Publio abadadꞌeta, maʉ̃bara daira bia edasia ewari ũbea. 8Maʉ̃nerã Publio zezera kʉdꞌadꞌe tabꞌasia kʉwamiãba ãmiba. Pablo edꞌa wãsia akʉdꞌe, mobe zhiwidꞌipe juwua ʉ̃rʉ̃ bꞌʉpe bꞌebisia. 9Maʉ̃ta ũdudꞌape awʉrʉrã dodꞌudꞌe kꞌaya bꞌera zebʉdaba bꞌesidꞌa. 10Maʉ̃rãbara daira bia aribꞌaesidꞌa. Barcodꞌe dai jizoasidꞌera jõma diasidꞌa odꞌe nesidꞌara.

Pablo jũẽna Romaĩnu

11Jedꞌekꞌo ũbea babʉrʉdꞌera daira bꞌarikuasia barco Alejandría pʉwʉrʉdꞌebemane, maʉ̃ kue ewarita berabꞌariyeedꞌa nʉmasia maʉ̃ dodꞌudꞌe. Maʉ̃ma budeare bꞌasia ne zhi zromane erubꞌe Cástor zata, Pólux zata. 12Pʉwʉrʉ Siracusa maẽ jũẽkuape mama duanesia ewari ũbea. 13Mamaʉ̃ba pusa kꞌaawa wãnane jũẽkuasia Regio pʉwʉrʉedꞌa. Nrũẽma dai wãma ãbʉdeba pʉ̃ãdrʉ nʉmʉba ewari ũmene jũẽkuasia Puteoli pʉwʉrʉedꞌa. 14Mama mebẽrã ʉ̃kʉrʉ ũdusidꞌa, maʉ̃rã zuburia bedꞌeasidꞌa dai ãzhi bawara duanemarẽã ewari siete. Mobebʉrʉ wãsidꞌa Roma pʉwʉrʉedꞌa. 15Maĩnuba mebẽrãbara dai uruta ũrĩnape kĩrãzhu zesidꞌa Foro de Apio pʉwʉrʉidꞌu, Tres Tabernas pʉwʉrʉidꞌu. Pabloba ũdukuai Daizezea zhibia ji sobiasia. 16Romaĩnu jũẽkuabʉdadꞌera soldaorã nokꞌobara jidakua erubꞌera chãbꞌarisia soldaorã nokꞌota wagꞌaua. Mawũãmina Pablora awuara bꞌabibʉrʉta soldao abꞌaʉa akʉbi bꞌʉsia.

Pabloba Jesúsdꞌebema jaradꞌa Romane

17Jũẽnata ewari ũbeadꞌe Pablobara trʉ̃bisia nokꞌorã judíorãneta, aramaʉ̃ne ãba zebʉdadꞌera mawũãsia: Mʉ ʉrerã, mʉãrã dazhirãta bꞌera bĩ ẽã o ẽbasia, miã mʉãrã bĩ ẽã o ẽbasia dazhirã zhibarirã bꞌeadꞌaba okꞌawa bꞌeadꞌara, maʉ̃ta mʉrã jidadꞌape Jerusalénne chãbꞌarisidꞌa Roma bidꞌarã juwuadꞌe. 18Maʉ̃rãbara mʉnebema sãwũãta kꞌawuadꞌape mʉrã ẽna krĩñasidꞌa ne ẽãba mʉ kꞌãrẽã beadꞌaira. 19Mawũãmina judíorãba idaribidꞌa ẽãba mʉãrã jarai bara zesia mʉãrã krĩñata mʉrã kꞌawua omarẽã rey Césarba. Mawũã jarasia mʉã kꞌãrẽã ji nʉmaĩrã ne ẽmina mʉrãta bꞌera. 20Maʉ̃ kꞌarea mʉãrã marãta trʉ̃kuasia marã ũduita, marã bawara bedꞌeaita. Zhãrã Ẽdrʉbita Israel bꞌeba jʉ̃ã bꞌedꞌebema kꞌarea mʉrã kꞌãwũã jʉ̃ bꞌʉa naʉ̃ cadenaba.

21Mawũãĩ jarirãbara mawũãsidꞌa: Daibara Judea druadꞌebara kꞌarta jidadꞌa ẽã bʉdꞌebema. Miã mebẽrã iabꞌabidꞌa ze ẽã bʉ jidꞌera o bʉ bĩ ẽã jaradꞌera. 22Mawũãmina daibara ũrĩ krĩña kꞌobꞌea bʉ sãwũã krĩcha bꞌʉta. Jesús ũrãgꞌadꞌe bꞌera daibara kꞌawua bꞌea baridu maẽ bĩ ẽã jara bꞌeta.

23Sõmbedꞌe zedꞌaita ewarita bꞌʉdꞌape zhãrã bio Pabloma zesidꞌa izhi bꞌʉ maẽ. Daizezeta Nokꞌodꞌebemata maʉ̃rãã bia jarasia diapedꞌauba kewaraedꞌa. Aramaʉ̃ne Jesúsdꞌebemata ĩjãbigayidꞌe bꞌasia Moisé ũrãgꞌadꞌe jara bꞌʉdꞌeba, Daizezeba bedꞌeata jarabibarirãba jaradꞌapeadꞌadꞌeba. 24Ʉ̃kʉrʉbara ĩjãsidꞌa maʉ̃ jarabʉrʉra, mawũãmina ʉ̃kʉrʉbara ĩjãna ẽbasia. 25Ãzhirãĩnu krĩcha abꞌarika zedꞌa ẽãba wãbʉsidꞌe Pablobara mawũãsia: Bia kꞌãʉ̃neba Jawurebiara bedꞌeabʉrʉta, Daizezeba bedꞌeata jarabibarita Isaíadꞌeba dazhirã zhibarirã bꞌeadꞌata jara mawũãsia:

26Israel bꞌema wãpe mawũãdua: Mʉ bedꞌeara ũrĩ bꞌeidꞌu sãwũãta kꞌawuadꞌa ẽbaya, akʉ bꞌeidꞌu sãwũãta kꞌawuadꞌa ẽbaya.

27Marã za bꞌebara sodꞌebara sãwũãta kꞌawuadꞌa ẽbaya, ũrĩ bꞌeidꞌu ũrĩ bꞌedꞌa ẽbaya, dabʉ ãna bꞌeba dabʉbara akʉdꞌa ẽbaya, ũrĩ bꞌeidꞌu sodꞌebara sãwũãta kꞌawuadꞌa ẽbaya, kꞌazhiruara ãmape Daizezera pẽwãna ẽbaya mʉã ẽdrʉbigaira. (Isaías 6:9-10)

28Mawũẽ kꞌawuaudua, judíorã ẽãta bꞌea jaradꞌe zokꞌasia ẽdrʉidꞌebemata Daizezedꞌera. Aramaʉ̃ne maʉ̃rãbara ũrĩnaña.

29Pabloba maʉ̃ta ma jarabʉrʉdꞌera judíorã wãsidꞌa ãzhirãĩnu kꞌaikꞌaia.

30Pablo año ũme de arrenda bꞌasia. Maʉ̃nerã jõma bia eda bꞌasia izhima zebʉdara. 31Daizezeta Nokꞌodꞌebemata jara bꞌʉta Nokꞌo Jesucristodꞌebemata dajada jara bꞌasia, maʉ̃nerã miõba sãwũã ẽbasia.

Currently Selected:

Hechos 28: cto

Highlight

Copy