Hechos 24

Pablo bedꞌeadꞌa Félix kĩrãbita

1Maʉ̃ tẽã ewari juesomane Ananía sacerdote wagꞌauta Cesarea pʉwʉrʉedꞌa edꞌaa zesia nokꞌorã ʉ̃kʉrʉ bawara, dewara zesia zhãrãbari bedꞌeabarita Tértulo abadata. Maʉ̃rãta nokꞌo kĩrãbita zesidꞌa Pablo jidꞌaita. 2Aramaʉ̃ne Pablo trʉ̃bʉdadꞌera Tértulobara nokꞌoa ji mawũãsia: Bʉkꞌareuba daira kꞌãbãẽã sobia adu-a bꞌea, daira ne biodꞌe bia erunʉmʉã bʉara krĩchata erubꞌʉdꞌeba. 3Bʉra zhi zroma Félix, bʉa obꞌʉdꞌebema daibara ewariza baridu maẽ jida bꞌea kꞌãbãẽã sobia. 4Mawũãmina mʉã bʉra dããrã miãsẽã erunʉma ẽbaita, mʉ biata odua dai bedꞌeata kꞌakutua ũrĩdua ibiadꞌe. 5Daibara kꞌawuasidꞌa ũmakĩrã naʉ̃ ne kꞌazhiruata, ẽjũã jõmaʉ̃ maẽ judíorã jõma kĩrũbiga bꞌʉa, Nazaredꞌebema ũrãgꞌadꞌe bꞌe nokꞌoa. 6Maʉ̃sidꞌa mawũãne mitia oi basia Daizeze desidꞌa. Mawũẽ daibara jidadꞌape kꞌawua okrĩñasidꞌa dai ũrãgꞌata bꞌʉdꞌe. 7Mawũãmina soldaorã nokꞌo wagꞌauta Lisiaba zhõne jãrĩsia dai juwuadꞌebara. 8Aramaʉ̃ne jarasia izhi ji bꞌera zedꞌamarẽã bʉma. Sãwũãta bʉa widꞌira bʉara kꞌawuaya maʉ̃ daiba jarabʉda jõmaʉ̃ kꞌarea jirpanʉta daibara.

9Judíorã mama kꞌobꞌebidꞌa jarasidꞌa jõma mawũãta. 10Nokꞌobara juwuaba Pabloa jarasia bedꞌeamarẽã, mawũẽ mawũãsia: Mʉãrã kꞌawua bꞌʉa bʉra año bio bata bedꞌea araa obꞌʉta kꞌãwũã daidꞌebemata, mawũẽ mʉrã wãnigua bedꞌeaya mʉzhikusa zhi kꞌarebaita. 11Bʉa widꞌikara kꞌawuaya ewari doce bata mʉrã Daizeze ibia jaradꞌe wãrĩzedꞌata Jerusalén pʉwʉrʉedꞌa. 12Maʉ̃nerã mʉrã ũdudꞌa ẽbasia bedꞌea kꞌaudꞌa nʉmʉrã zhãrã bawara, kĩrũbiga nʉma ẽbasia kꞌabanata, miã Daizeze dedꞌa, miã de zhi jʉrebadata nʉme maẽ, miã pʉwʉrʉdꞌe. 13Miã naʉ̃rãbara bʉaa kꞌawua jara bꞌedꞌa ẽã mʉ kꞌãrẽã kꞌãwũã jirpanʉrã. 14Mawũãmina mʉã naʉ̃ta bʉaa jaraya: Mʉãrã pẽwã bꞌʉa Jesúsdꞌebema ota ãzha jãpe bꞌʉa abꞌeta, mʉãrã aramaʉ̃ne bedꞌeata aribꞌae bꞌʉa mʉ zhibarirã bꞌeadꞌa Zhibaridꞌeta. Mʉãrã jõma ĩjã bꞌʉa Moisé ũrãgꞌadꞌe bꞌʉ tabꞌeta, Daizezeba bedꞌeata jarabibarirãne bꞌʉ tabꞌeta. 15Mʉãrã ãzhidꞌe kĩrãkꞌa ĩjã bꞌʉa Daizezebara beudꞌapeadꞌara piradrʉbigaita biata bꞌeta bia ẽãta bꞌeta. 16Maʉ̃ kꞌarea mʉrã baridua kĩrãkuita bꞌʉa bedꞌea ne ẽã nʉmaĩta Daizeze kĩrãbita, zhãrã kĩrãbita.

17Mʉrã drua ãĩ año ʉ̃kʉrʉ nimibape plata diadꞌe zesia mʉrãta zuburia bꞌea, dewara Daizezea diadꞌe zesia nendʉwʉrʉta. 18Maʉ̃ kꞌaudꞌa bꞌʉta mʉrã judíorã Asia druadꞌebemaba ũdusidꞌa Daizeze kĩrãbita nene ẽã bꞌaidꞌebemata obꞌʉdꞌe Daizeze dedꞌa ewara maẽ. Maʉ̃nerã mʉrã kꞌabana bawara kꞌobꞌa ẽbasia, miã zhãrã kĩrũbiga nʉma ẽbasia. 19Maʉ̃rã mʉ ũdudꞌapeadꞌata bʉ kĩrãbita zedꞌape mʉrã jidꞌaidꞌe bꞌʉa mʉ ʉ̃rʉ̃ bedꞌeata jaradꞌaita erubꞌebʉrʉ. 20Manebʉrʉ za kꞌobꞌeba jaradꞌaidꞌe bꞌʉa mʉã bia ẽãta odꞌata kꞌawuasidꞌa kꞌawuaita mʉ kꞌobꞌasidꞌe nokꞌorã wagꞌaurã kĩrãbita. 21Awuarabʉrʉ ãzhi maẽ kꞌobꞌasidꞌera mʉãrã nemi jĩgua mawũãsia: Beudꞌapeadꞌata piradrʉdꞌaita mʉã ĩjã bꞌʉ kꞌarea marãbara idꞌi mʉrã kꞌãwũã jirpanʉã.

22Nokꞌo Félixba maʉ̃ta ũrĩbʉrʉdꞌera Jesúsdꞌebema ora bia kꞌawua bꞌʉba mawũãsia: Soldaorã nokꞌo wagꞌau Lisia naĩnu eidꞌu zebʉrʉdꞌe mʉãrã ma kꞌawuaya marãnebema.

23Mawũãpe soldaorã nokꞌoa jarasia Pablo akʉmarẽã. Mawũãmina jarasia ne sãwũãĩrã idaribimarẽã. Idaribimarẽã jarasia ãzhirãba izhi aribꞌaebʉdara o izhima zebʉdara.

24Ewari tẽãne Félix zhi kĩma Drusila ũme zesia, zhi kĩma judía basia. Maʉ̃nerã Pablo trʉ̃pe ũrĩsia Jesucristodꞌebema ĩjã bꞌedꞌebemata. 25Maʉ̃nerã Pablobara jarasia bia ẽãta o ẽbaidꞌebemata kĩrãẽpa bꞌaidꞌebemata, dewara jarasia Daizezeba zhãrã kꞌawua oita ewarita zeita, nokꞌo Félix maʉ̃ba perape mawũãsia: Namabaia wãrũã. Mʉã trʉ̃ bꞌeidꞌe mʉã bʉra trʉ̃ña.

26Aramaʉ̃ne Pabloba plata diamarẽã bꞌasia izha enaĩbari, maʉ̃ kꞌarea zema bio zebi bꞌʉta bedꞌea bꞌasia izhi ũme. 27Aramaʉ̃ne año ũme babʉrʉdꞌera Félix nokꞌota bꞌadꞌara kenabꞌaribʉrʉba chãbꞌarisia Porcio Festoa. Félix judíorã bawara bia bꞌa krĩñaba cárceldꞌe ãmaẽsia Pablora.

Currently Selected:

Hechos 24: cto

Highlight

Copy