Hechos 21

Pablo wãna Jerusalénʉẽna

1Daibara mebẽrã ãmaẽnape barcodꞌe jipa wãsidꞌa Cos dodꞌuidꞌu. Nrũẽma wãsidꞌa Roda dodꞌuidꞌu. Mamaʉ̃ba wãsidꞌa Pátara pʉwʉrʉidꞌu. 2Barcota Fenicia druaedꞌa wãta ũdudꞌape jizoasidꞌa. 3Wãne dodꞌu Chipre dajadabʉrʉdꞌera juwua ãkꞌaare ãmaẽbʉdata zesidꞌa Siria druaedꞌa, aramaʉ̃ne Tiro pʉwʉrʉedꞌa jũẽkuasia barcoba mama ne ãĩ jirakuaiba. 4Jesúsdꞌebema ĩjã bꞌeta ũdudꞌape daira mama duanesia ewari siete. Maʉ̃rãbara Jawurebiadꞌeba Pabloa jarasidꞌa wãrĩze ẽbamarẽã Jerusalén pʉwʉrʉedꞌa. 5Ewarita arabai dai wãbʉdadꞌera jõmaʉ̃ba wũẽrãrã ãzhidꞌe bawarauba, ãzhi warrarã bawarauba daira pʉwʉrʉ ãĩ kꞌopayasidꞌa. Aramaʉ̃ne ibudꞌe sãkꞌokꞌodꞌe bꞌadape dai jõma zhiwidꞌisidꞌa. 6Aramaʉ̃ne zhiya zhi burakuape dai barcodꞌe ʉ̃tʉ wãbʉdadꞌera ãzhira jẽrũya wãsidꞌa ãzhi dedꞌaa.

7Daira pusadꞌe wã taubʉdata Tiro pʉwʉrʉdꞌeba jizoasia Tolemaida pʉwʉrʉedꞌa. Mama mebẽrã saludꞌadꞌape ãzhi bawara duanesia ewari abꞌa. 8Nrũẽma Pablo dai izhi bawara bꞌe bawara wãbʉrʉdꞌera daira wãsidꞌa Cesarea pʉwʉrʉedꞌa. Mobe Felipe dedꞌa wãsidꞌa Jesúsdꞌebema bedꞌea biata jarabari maẽ. Izhira mebẽrã kꞌarebaita jʉrʉdꞌapeadꞌata sietedꞌebema basia, daira duanesia izhi maẽ. 9Izhara miã zagꞌairãta kꞌaurãta kĩmarẽ erubꞌasia Daizezeba bedꞌeata jarabibarirãta. 10Daira mama ewari ʉ̃kʉrʉ duanune Judea druadꞌeba edꞌaa zesia Daizezeba bedꞌeata jarabibarita Agabo abadata. 11Maʉ̃bara dai akʉdꞌe zebʉrʉta jidasia correa Pablodꞌeta, mobe izhi jẽrũta izhi juwuata tãjʉ̃pe mawũãsia: Naʉ̃ẽnabemata Jawurebiaba jara kꞌobꞌʉta: Jerusalénne judíorãba kꞌãwũã tãjʉ̃naña naʉ̃ correa zhibarita, mobe chãbꞌaridꞌaya judíorã ẽãta bꞌe juwuadꞌe.

12Maʉ̃ta ũrĩnaĩ daira mama bꞌe bawara zuburia bedꞌeasidꞌa wãrĩze ẽbamarẽã Jerusalén pʉwʉrʉedꞌa. 13Mawũãmina Pablobara panaʉ̃ mawũãsia: ¿Kꞌãrẽta odꞌaipe jẽgabʉdaba mʉ sopuabi kꞌobꞌebara? Mʉrã bari zhi jʉ̃bigaidꞌe bꞌʉ ẽã, awuarabʉrʉ Jerusalénne beuisidꞌa bꞌʉa Nokꞌo Jesús kꞌarea.

14Aramaʉ̃ne daibara tʉ bꞌedꞌa ẽãba idaribibʉdata mawũãsidꞌa: Mobera odua Nokꞌo Daizezeba krĩñata.

15Maʉ̃ ewari tẽã aribꞌaedꞌape daira wãrĩzekuasia Jerusalén pʉwʉrʉedꞌa. 16Dai bawara Jesúsdꞌebema ĩjã bꞌeta ʉ̃kʉrʉ zesidꞌa Cesareadꞌebemata. Ãzhi bawara iabꞌa wesidꞌa Mnasón abadata Chipredꞌebemata, Jesúsdꞌebema ĩjãnata dããrã bꞌasia, daira izhi maẽ duanesia.

Pablo jidadꞌapeadꞌa Daizeze de maẽ

17Jerusalén pʉwʉrʉedꞌa zebʉdadꞌera mebẽrãbara daira bia edasidꞌa sobia. 18Nrũẽma Pablo dai bawara wãsia Jacobo akʉdꞌe. Mama jõma zhi jʉre duanasia nokꞌorã mebẽrãneta. 19Maʉ̃rã saludꞌape abꞌa abꞌaʉdꞌe nebʉrʉsia judíorã ẽãta bꞌedꞌe edꞌa Daizezeba kꞌãrẽ odꞌata izhi miã ũrãgꞌa wãne. 20Maʉ̃ta ãzha ũrĩbʉdadꞌera Daizezera ibia jarasidꞌa. Mobe Pabloa mawũãsidꞌa: Akʉbꞌʉe mebea, judíorãnebema mil bio bꞌʉa Jesúsdꞌebema ĩjãbʉdata, jõmaʉ̃ba aribꞌae bꞌea Moisé ũrãgꞌata. 21Ãzhaara sewata jarasidꞌa bʉdꞌebemata, judíorãta judíorã ẽã maẽ bꞌeta jõma ũrãgꞌa bꞌʉbidꞌa aribꞌaedꞌa ẽbamarẽã ũrãgꞌa Moisédꞌeta, jara bꞌʉbidꞌa ãzhi warrarãne kꞌakua era kꞌõna ẽbamarẽã, miã odꞌa ẽbamarẽã kꞌãrẽ okꞌawa bꞌera. 22¿Maʉ̃ẽnabemanerã sãwũãnaĩpe? Kꞌabanata wãrãne zhi jʉredꞌaya ũrĩbʉdaba bʉ zedꞌata. 23Mawũẽ za daiba jaradꞌaita odua: Daidꞌebemata kĩmarẽ panʉã aribꞌaedꞌai barata Daizezea jaradꞌapeadꞌata kꞌãrẽ odꞌaita. 24Maʉ̃rãta Daizeze deidꞌu bʉzhi bawara ededua, mobe Daizeze kĩrãbita nene ẽã bꞌeaidꞌebemata ãzhi bawarauba odua. Ãzha Daizezea diaira bʉa diadua, aramaʉ̃ne budꞌa wẽnamarẽã. Mawũãrã jõmaʉ̃ba kꞌawuadꞌaya bʉdꞌebemata jaradꞌapeadꞌara sewata, awuarabʉrʉ kꞌawuadꞌaya bʉabidꞌa kĩrãẽpa aribꞌae bꞌʉta Moisé ũrãgꞌara. 25Mawũãmina judíorã ẽãba Jesúsdꞌebema ĩjãpe bꞌeitara krĩchadꞌape daibara jara bꞌʉsidꞌa kꞌãrẽ zhi zromarãne erubꞌeiita ne beabadata kꞌodꞌa ẽbamarẽã, ne wata kꞌodꞌa ẽbamarẽã, ne ojũẽbꞌari bea kꞌodꞌa ẽbamarẽã, kĩma ẽãta erukꞌãĩna ẽbamarẽã.

26Mawũãnaĩ Pablobara maʉ̃rã kĩmarẽta jʉrebʉrʉta, nrũẽmarã Daizeze kĩrãbita nene ẽã bꞌeaidꞌebemata o jʉ̃drʉsidꞌa. Aramaʉ̃ne Daizeze dedꞌa edꞌa wãsia jaraita Daizeze kĩrãbita nene ẽã bꞌaidꞌebema kꞌãrẽ ewade ma aribꞌaeita, sõmbedꞌe Daizezeita nendʉwʉrʉ diadꞌe zedꞌaita ãzhi abꞌa abꞌaʉba.

27Mawũãmina aramaʉ̃ne ewari siete babodꞌodꞌe, judíorã ʉ̃kʉrʉ Asia druadꞌebemaba Pablo Daizeze dedꞌa ewara maẽ ũdudꞌai, kꞌabanata jõma kĩrũbidꞌape jidabʉdata, 28nemi jĩgua mawũãsidꞌa: Israelitarã, daita kꞌarebaudua. Naʉ̃bara baridu maẽ jõmaʉ̃ã ãña jara bꞌʉa dazhirã ʉ̃rʉ̃, Moisé ũrãgꞌa ʉ̃rʉ̃, naʉ̃ Daizeze de ʉ̃rʉ̃. Maʉ̃ awuara griegorãta edꞌa wãbisia Daizeze dedꞌa ewara maẽ, aramaʉ̃ne mitia osia nene ẽãta naʉ̃ Daizeze dera. 29Mawũãsidꞌa naara ãzha pʉwʉrʉdꞌe izhi ũme ũdusidꞌa baera Trófimo Éfeso pʉwʉrʉ dꞌebemata, ãzhara krĩchasidꞌa Pabloba maʉ̃ta edꞌa wãbisita Daizeze dedꞌa ewara maẽ.

30Aramaʉ̃ne pʉwʉrʉdꞌebema jõma kĩrũ bʉredrʉsidꞌa. Pablora jirtopota ãĩ ertasidꞌa Daizeze dedꞌa ewara maẽbara, mobe aramaʉ̃ta serrasidꞌa puerta jirapanʉrã. 31Beadꞌadea jirkꞌopanʉne soldaorã nokꞌota wagꞌaua jarasidꞌa Jerusalén pʉwʉrʉdꞌebema jõma kĩrũ nʉmeta. 32Maʉ̃bara aramaʉ̃ta soldaorãta ãzhi nokꞌorã bawara jʉre edape wãẽbasia ãzhima. Ãzha soldaorã nokꞌo wagꞌauta soldaorã bawara ũdudꞌai jʉ̃ãkꞌaea jirpanʉrã idaribisidꞌa Pablora. 33Aramaʉ̃ne soldaorã nokꞌota wagꞌaubara orrape jidabʉrʉta jarasia jʉ̃namarẽã cadena ũmeba. Mobe zhãrã kꞌobꞌea widꞌisia kꞌai kꞌawuaita, kꞌãrẽ odꞌata. 34Mawũãmina kꞌabanane edꞌara ʉ̃kʉrʉba ne abꞌaʉta jara, waya dewaraurãba ne awʉrʉta jara bꞌikua nʉmasia. Mawũã bꞌʉgadrʉ nʉmʉba miã kꞌãrẽta bia kꞌawua ẽãba jarasia ededꞌamarẽã soldaorã tabꞌʉ dedꞌa. 35Aramaʉ̃ne dume maẽ zebʉdadꞌera soldaorãbara Pablora jirabꞌari ededꞌai bara zesia kĩrũ kꞌobꞌeba kꞌabanata. 36Kꞌabanata kꞌaidꞌu tẽã zebʉdabara nemi jĩgua mawũãsidꞌa: ¡Beuibara!

Pablo bedꞌeadꞌa zhãrã kĩrãbita

37Soldaorã tabꞌʉ dedꞌa edꞌa buedꞌaidꞌe Pablobara soldaorã nokꞌota wagꞌaua mawũãsia: ¿Bʉara mʉrã idaribiika bʉaa bedꞌeata jaraira?

Mawũãĩ jaribara mawũãsia: ¿Bʉara kꞌãwũã kꞌawua bꞌʉka griego bedꞌeara? 38¿Kꞌõbera bʉ ẽka jari Egiptodꞌebema naara naʉ̃ ewade zhãrã bawara zhõ piradrʉpe, drua drudrua tabꞌʉedꞌa cuatro mil jʉre ededꞌara miã beamiãrãta?

39Mawũãĩ Pablobara mawũãsia: Wãrãnebai mʉrã judíota Tarso pʉwʉrʉdꞌebemata pʉwʉrʉ zroma maẽbema, maʉ̃ pʉwʉrʉra Cilicia druadꞌebema. Mʉ biata odua mʉta idu bedꞌeabirua zhãrã kꞌobꞌea.

40Mawũãĩ jaribara idaribibʉrʉba Pablo dume maẽ ʉ̃ta nʉmepe chupeadꞌamarẽã juwuaba jarasia zhãrã kꞌobꞌea. Aramaʉ̃ne chupeadꞌai hebreo bedꞌeadꞌe bedꞌea mawũãsia:

Currently Selected:

Hechos 21: cto

Highlight

Copy