Hechos 17

Kĩrũnapeadꞌa Tesalónicadꞌe

1Anfípoli pʉwʉrʉdꞌe, Apolonia pʉwʉrʉdꞌe berabꞌari zesidꞌa Tesalónica pʉwʉrʉedꞌa. Mama nʉmasia de zhi jʉrebadata judíorãneta. 2Pablora izhi kꞌawa bꞌʉdꞌe maʉ̃rãma wã bꞌʉta ewari ẽnaʉ̃bada ũbea bedꞌeasia ãzhi bawara. 3Zhi bꞌʉmaneba bia jarakꞌasia zhãrã Ẽdrʉbira zuburiaidꞌe bꞌasita, beudꞌata piradrʉidꞌe bꞌasita. Maʉ̃nerã mawũãsia: Jesús mʉã marãã jarakꞌa bꞌʉra zhãrã Ẽdrʉbia.

4Aramaʉ̃ne ãzhirãnebema ʉ̃kʉrʉbara ĩjãnape ãba duanesia Pablo bawara Sila bawara. Abꞌarika bioba ĩjãsidꞌa griegorã Daizezeba jara bꞌʉta aribꞌae bꞌeba, dewara bio wũẽrãrã zhi zromarãba. 5Mawũẽ judíorã Jesúsdꞌebema ĩjãna ẽãbara bĩ ẽãbʉdaba ʉ̃kʉrʉ bia ẽãta bꞌeta jʉrʉkua edasidꞌa, mobe maʉ̃rã bawarauba kĩrũbikuasidꞌa zhãrãta. Puerta tegawe Jasón dedꞌa edꞌa wãsidꞌa Pablo Sila ãĩ wedꞌaita zhãrã kꞌobꞌema. 6Mawũãmina ũdudꞌa ẽbaera Jasónta mebẽrã ʉ̃kʉrʉ bawara nokꞌorã pʉwʉrʉdꞌebema kĩrãbita wedꞌape nemi jĩgua mawũãsidꞌa: Naʉ̃rãbara ẽjũãne bꞌera kꞌawua ẽã okua bꞌeta zebʉda naĩnubidꞌa. 7Maʉ̃ta Jasónbara bꞌaribigasia. Naʉ̃rãbara jõmaʉ̃ba aribꞌaedꞌa ẽã aribꞌaemarẽã jara bꞌʉra rey Césarba, aramaʉ̃ne jara bꞌea dewara bꞌʉta Rey Jesústa.

8Maʉ̃ta ũrĩnaĩ zhãrã kꞌobꞌera nokꞌorã pʉwʉrʉdꞌebema bawara bĩ ẽãsidꞌa. 9Mawũãmina ẽdrʉbigaita Jasónba dewaraurã bawarauba plata diata jidadꞌape ẽnekuasidꞌa.

Pablo Sila buedꞌapeadꞌa Bereaidꞌu

10Aramaʉ̃ta mebẽrãbara Pablo, Sila diamase buesidꞌa Berea pʉwʉrʉidꞌu. Jũẽnape edꞌa wãsidꞌa de zhi jʉrebadata judíorãne maẽ. 11Maʉ̃rã audre so borekea bꞌeasia Tesalónica pʉwʉrʉdꞌe bꞌe kꞌãñabara, mawũẽ bedꞌeata Jesúsdꞌebema ũrĩ krĩña ũrĩsidꞌa. Daizeze bedꞌeara ewariza lesidꞌa maʉ̃ jarabʉdara wãrĩnu kꞌawuaita. 12Aramaʉ̃ne judíorã bioba ĩjãsidꞌa, griegorã bioba ĩjãsidꞌa wũẽrãrã zhi zromarãba, zhũmakĩrãrãba. 13Judíorã Tesalónica pʉwʉrʉdꞌebemabara kꞌawuasidꞌa mawũã Berea pʉwʉrʉdꞌebidꞌa Daizeze bedꞌea jara nʉmʉta Pablobara, mawũẽ wãnape maĩnubidꞌa bĩ ẽãbisidꞌa kꞌabanata. 14Mawũẽ mebẽrãbara Pablo aramaʉ̃ta wãbisidꞌa pusaidꞌu. Mawũãmina Silara Timoteora panesia mama. 15Pablo ededꞌapeadꞌabara edesidꞌa Atena pʉwʉrʉedꞌa. Maʉ̃rãta jẽrũya zebʉdadꞌera Pablobara jarabuesia Sila, Timoteo izhima zedꞌamarẽã kꞌadrʉabai.

Pablo bꞌadꞌa Atena pʉwʉrʉdꞌe

16Pabloba ãzhira Atena pʉwʉrʉdꞌe jʉ̃ã bꞌʉdꞌera, pʉwʉrʉdꞌebema bĩ ẽã akʉkua bꞌasia kꞌãrẽ ẽãta zhi zromane erubꞌeba. 17Maʉ̃ kꞌarea de zhi jʉrebada maẽ Jesúsdꞌebemata jara bedꞌeasia judíorãã, judíorã ẽãba Daizeze zhi zromane erubꞌea. Ewariza bedꞌeasia pʉwʉrʉ ẽsadra ãba zebʉdaa. 18Ʉ̃kʉrʉra epicúreo krĩchata pẽwã bꞌeta, estoico krĩchata pẽwã bꞌeta bedꞌeasidꞌa izhi bawara. Maʉ̃nerã ʉ̃kʉrʉbara mawũãsidꞌa: ¿Kꞌãrẽta jara krĩña bꞌʉba naʉ̃ bedꞌeamiãbara?

Waya ʉ̃kʉrʉbara mawũãsidꞌa: Dazhima zhi zromarã eewabemata jarabaria. Mawũã bedꞌeasidꞌa Pabloba bedꞌea biata jarakꞌasi baera Jesús beudꞌata piradrʉdꞌata. 19Aramaʉ̃ne zhi jʉrebadaidꞌu Areópagoidꞌu wedꞌape mawũãsidꞌa: ¿Daibara kꞌawuadꞌaidꞌe bꞌʉka bedꞌeata eewabemata bʉa jara bꞌʉra? 20Bʉara webʉrʉa daiba ũrĩnakꞌata. Daibara kꞌawua krĩña bꞌea kꞌãrẽta jara krĩña bꞌʉta maʉ̃bara. 21Atena pʉwʉrʉdꞌe bꞌebara, ãĩbemata mama bꞌebara jõmaʉ̃ba krĩñade basia ne jaraita o ne zhiwidꞌita ũrĩĩta.

22Aramaʉ̃ne Pablora Areópago ẽsadra ʉ̃ta nʉmepe mawũãsia: Atena bidꞌarã, mʉã ne jõmaʉ̃ne akʉ bꞌʉdꞌera marãbara ne zhi zromarãne erubꞌea. 23Ne zhi zromarãne erubꞌeta akʉkua bʉsidꞌe mʉã ũdusia mongꞌara oma nʉmʉta, maʉ̃ma bedꞌeata bꞌʉ nʉmʉta mawũã bꞌasia: DAIZEZE ŨDUDꞌAKꞌAITABEMA. Ũdudꞌakꞌata marãba mawũã zhi zromane erubꞌeta mʉãrã maʉ̃ta marãã jara bꞌʉa.

24Maʉ̃ta Daizeze ẽjũã odꞌa, ne jõma edꞌa nʉmʉta odꞌa. Izhira ʉ̃tre nʉmʉ Nokꞌoa, druadꞌe nʉmʉ Nokꞌoa, mawũẽ beubari bꞌeba de okuadꞌadꞌe bꞌʉ ẽã. 25Miã beubari bꞌeba diadꞌamarẽã bꞌʉ ẽã izha nesidꞌata. Izhabʉrʉ jõmaʉ̃ã dia bꞌʉa zokꞌai bꞌaita, ĩñabata, aramaʉ̃ne ne jõma dia bꞌʉa.

26Abꞌaʉdꞌeba zhãrã bio eababisia drua jõmaʉ̃ne bꞌeamarẽã. Kꞌãrẽ ewariedꞌa zokꞌai bꞌeaira nʉmʉsia ewari barakua, druasidꞌa zakua nʉmʉsia sãma bꞌeaira. 27Mawũã osia izhi Daizezeta jʉrʉdꞌamarẽã, aramaʉ̃ne tãnakꞌa jʉrʉbʉda kĩrãkꞌa ũdu bꞌedꞌamarẽã. Wãrãnebai izhira wawara bꞌʉ ẽã, awuarabʉrʉ dazhirã abꞌa abꞌaʉ kꞌaita bꞌʉa. 28Izhidꞌeba dazhirã bꞌea, pira bꞌea, aramaʉ̃ne bꞌea. Ʉ̃kʉrʉ marãnebema bedꞌeata bꞌʉbadabara aramaʉ̃ kĩrãkꞌa jarabʉdata mawũãsidꞌa: Dazhirã Daizezedꞌeba urua. 29Mawũã Daizezedꞌeba urudꞌebara krĩchadꞌaidꞌe bꞌʉ ẽã Daizezera oro omata, o plata omata, o mongꞌara omata, maʉ̃ ãzhi krĩchaba odꞌata beubari bꞌeba. 30Mawũãmina Daizezebara nawedꞌara idaribisia izhidꞌebema kꞌawuadꞌa ẽãba kꞌãwũã bꞌera, idꞌibai baridu maẽ zhãrã jõmaʉ̃ã jara bꞌʉa kꞌazhiruara ãmape izhita pẽwãnamarẽã. 31Mawũã jara bꞌʉa izha ewarita nʉmʉkꞌãrĩneba ẽjũãne bꞌera kꞌawua oita sãwũã oi bꞌʉdꞌe, mawũã oya Jesús izha jʉrʉdꞌadꞌeba, mawũã oita jõmaʉ̃ã kꞌawuabibʉrʉta beudꞌata piradrʉbisia.

32Mawũã beudꞌata piradrʉdꞌata ũrĩbʉdadꞌera ʉ̃kʉrʉbara sewakꞌau bꞌʉa asidꞌa, waya dewaraurãbara mawũãsidꞌa: Daibara bʉ bedꞌeara tẽãne ũrĩnaña maʉ̃nebemata wakusa.

33Aramaʉ̃ne Pablora wãsia ãzhi maẽbara. 34Mawũãmina zhi jʉredꞌapeadꞌabara ʉ̃kʉrʉba Jesúsdꞌebema ĩjãsidꞌa. Maʉ̃rãnebema basia Dionisio zhi zromata Areópagodꞌebemata, wũẽrã Dámari abadata, dewara awʉrʉrãta ãzhi bawara.

Currently Selected:

Hechos 17: cto

Highlight

Copy