Hechos 11

Mebẽrãã jaradꞌa Jerusalénne bꞌea

1Jesúsba zokꞌakuadꞌabara mebẽrã Judea druadꞌe bꞌebara ũrĩsidꞌa mawũã judío ẽãta bꞌebidꞌa ĩjãbʉdata Daizeze bedꞌeara. 2Maʉ̃ba Pedro Jerusalénʉẽna wãrĩzebʉrʉdꞌera, izhi bawara bĩ ẽã bedꞌeasidꞌa judíorã kꞌakua eta kꞌõ bꞌeta, 3mawũãsidꞌa: ¿Judío ẽãta kꞌakua eta kꞌõ ẽã bꞌe maẽ bʉra kꞌãrẽã deidꞌu wãpe nekꞌosi ãzhi bawara?

4Mawũãnaĩ Pedrobara sãwũã berabꞌaridꞌata jẽdeba nebʉrʉ mawũãsia: 5Mʉrã Jope pʉwʉrʉdꞌe zhiwidꞌi nʉmasia, maʉ̃ne kꞌãĩmokꞌaradꞌe kĩrãkꞌa mʉã ne ũdusia: Burubꞌa zroma kĩrãkꞌa bꞌʉta i kĩmarẽneba tãjʉ̃ ʉ̃treba uru basia mʉĩnu. 6Mʉã maʉ̃ta akʉbʉrʉdꞌera ũdusia nendʉwʉrʉ jẽrũ kĩmarẽ bꞌeta druadꞌebemata, nendʉwʉrʉrã meũsiata, nendʉwʉrʉ jãne wã bꞌeta, ibanarã ewaradꞌebemata. 7Maʉ̃ne mʉã nemita ũrĩbʉrʉdꞌera mawũãsia: ¡Pedro, piradrʉrua, beape kꞌorua! 8Mawũãĩ mʉãrã mawũãsia: Nokꞌó, mʉãrã kꞌo ẽã, ne mitiata daia kꞌobidꞌa ẽãrã mʉãrã kꞌokꞌa. 9Mʉã mawũãĩ ʉ̃treba mʉãã bedꞌeama ũmeta mawũãsia: Daizezeba nene ẽã obʉrʉta bʉa ne mitia arãrũã. 10Mawũã jarasia jarama ũbea, aramaʉ̃ne wakusa jõma edesia ʉ̃taa. 11Maʉ̃nerã audre ẽãne ũmakĩrãrã ũbea zesidꞌa mʉ bꞌadꞌa dedꞌa, mʉma zokꞌakuadꞌapeadꞌata Cesarea pʉwʉrʉdꞌeba. 12Maʉ̃ne Jawurebiaba mʉãã jarasia ãzhi bawara wãmarẽã ne krĩcha ẽã. Mʉ bawara seis wãsidꞌa mebẽrã naʉ̃rãsidꞌa, daira aramaʉ̃ne deidꞌu wãsidꞌa Cornelio dedꞌa. 13Maʉ̃bara daia nebʉrʉsia ángel izhi dedꞌa sãwũã ũdudꞌata, edau nʉmepe mawũãsibidꞌa: Ũmakĩrãrãta zokꞌakuadua Jope pʉwʉrʉedꞌa, aramaʉ̃ne zebirua Simónta, maʉ̃ abꞌaʉta Pedroa. 14Maʉ̃bara bedꞌeata bʉaa jaraya bʉ ẽdrʉita jõma bʉzhi dedꞌabema bawara. 15Mʉta bedꞌea nʉmebʉrʉdꞌera Jawurebiara ãzhidꞌe zesia dazhirãne zedꞌa kĩrãkꞌa jẽdeuba. 16Mawũẽ mʉãrã bude basia Nokꞌo Jesúsba mawũãnata: Juanbara wãrãnebai zhãrã buru kꞌoesia baniãba, mawũãmina Daizezebara marãã diaya Jawurebiata. 17Aramaʉ̃nerã Daizezebara abꞌaʉta dedꞌekata Nokꞌo Jesucristodꞌebema dazhirãba ĩjã bꞌea diadꞌata dedꞌekasia, ¿mawũẽ mʉrã kꞌaibasi maʉ̃ta idaribi ẽã nʉmaĩrã Daizezea?

18Maʉ̃ta ũrĩbʉdadꞌera chupeadꞌape Daizeze ibia jara mawũãsidꞌa: ¡Mawũẽ Daizezebara idaribibʉrʉa judío ẽãta bꞌebidꞌa kꞌazhiruara ãmape izhita pẽwãnamarẽã, aramaʉ̃ne jidadꞌamarẽã izhi ũme bꞌai jõ ẽãta!

Mebẽrã jũẽkuadꞌa Antioquíaidꞌu

19Esteban beasidꞌadꞌe Jesúsdꞌebema ĩjã bꞌera zuburia odꞌaita pẽwãsidꞌadꞌera zhi jãrãzoabʉrʉra wãsidꞌa Fenicia druaidꞌu, Chipre dodꞌuidꞌu, Antioquía pʉwʉrʉidꞌu. Maʉ̃nerã awʉrʉa jaradꞌa ẽbasia Jesúsdꞌebema bedꞌeara, awuarabʉrʉ jarasidꞌa judíorãta bꞌea. 20Mawũãmina ãzhirãnebema ʉ̃kʉrʉ bꞌeasia Chipredꞌebemata, Cirene druadꞌebemata, maʉ̃rãta Antioquíaidꞌu jũẽkuabʉrʉdꞌera griegorããbidꞌa bedꞌea biata jarasidꞌa Nokꞌo Jesúsdꞌebemata. 21Maʉ̃nerã Nokꞌo Daizeze zareara nʉmasia ãzhi bawara, mawũẽ ne awʉrʉdꞌebemata ĩjã bꞌera ãmanape bioba ĩjãsidꞌa Jesúsdꞌebemata.

22Maʉ̃ta ũrĩsidꞌa mebẽrã Jerusalénne bꞌeba. Mawũẽ Bernabéta zokꞌasidꞌa wãmarẽã Antioquíaidꞌu. 23Maʉ̃ta jũẽbʉrʉdꞌera ũdusia Daizezeba izhi biaba bia edakuata, mawũẽ sobiape jõmaʉ̃ã jarasia soidꞌu bꞌeamarẽã Daizeze ũme. 24Izhira biata bꞌʉta Jawurebiaba bira soidꞌu bꞌasia. Mawũẽ kꞌabanaba ĩjãsidꞌa Nokꞌo Jesúsdꞌebema.

25Maʉ̃ tẽã Bernabé Tarso pʉwʉrʉedꞌa wãsia Saulo jʉrʉdꞌe. Ũdui edesia Antioquíaedꞌa. 26Mama año abꞌa zhi jʉre bꞌeasia mebẽrã bawara, aramaʉ̃ne zhãrã bio ũrãgꞌasidꞌa. Maʉ̃nerã Jesúsdꞌebema ĩjã bꞌera zhi trʉ̃gagꞌaita cristorãta trʉ̃gasidꞌa Antioquíadꞌera.

27Maʉ̃ ewadera Daizezeba bedꞌeata jarabibarirãta ʉ̃kʉrʉ Jerusalénneba edꞌaa wãsidꞌa Antioquíaedꞌa. 28Mobe ãzhidꞌebema abꞌa Agabo abadata piradrʉpe Jawurebiadꞌeba jarasia jarraba zromata zeita drua jõmaʉ̃ne bꞌe maẽ. Mawũã zesia Claudio reyta bꞌadꞌa ewade. 29Maʉ̃nerã Jesúsdꞌebema ĩjã bꞌebara ãzha dia bꞌeita abꞌa abꞌaʉba ne erubꞌera kꞌarebata diabuedꞌaita krĩchasidꞌa mebẽrã bꞌema Judeadꞌe. 30Mawũã obʉdara nokꞌorã mebẽrãnema diabuebʉdata edebisidꞌa Bernabéa, Sauloa.

Currently Selected:

Hechos 11: cto

Highlight

Copy