Homa 9
9
Isara·eo‑ka mai toha, Kirisito ati‑ya mai dami nofara
1-2 # 9:1-2 Isara·eo‑ka nodi mai oni one Yodeo tohateni. Kirisito‑ka ama·oni. Oka mai one Isara·eo‑ka nodi mai toha, Kirisito ati‑ya mai dami nofara, mai ihi owatibodi komene kita, keyehe‑ya hiri·orani. Owatibodi komene fawara‑ya Deoso‑ka Doni watone.
3Oka mai one Kirisito ati‑ya mai nofara, mai ihi owatibodi yama‑ya kadikani.
“Owa‑ta Deoso tabaro‑ya owinara‑mani, oka mai nafi winabisiya, ya‑yai·ona neni.” Owatibodi ati nineni.
4Isara·eo‑ka nodi oka mai toha, Deoso mai‑ya kadikematane, mai‑ya bidinebonaha. Hibati‑ya kabani‑ya mai yakana, mai hawi‑bone‑ya Deoso wehene mai‑ya yofikanematane. Adami tati‑ya mai‑ya hiyare, ati yokana mai himite, ati i‑di Mose hikanahano‑ya mai kayafa, Deoso ati ene Deoso‑ka yobe‑bona‑ya mai wamanameteni, Deoso‑ya mai kahiyarabonehe. Mai‑ya hiyaramatase,
“Oka Ka‑kadika dai‑ka nodi tohebona, dai‑ya kasomebonane. Owati‑nima yama naboneni.” Deoso ati nematane.
5 # 9:5 I‑di Isaki bidi oni i‑di Yako tohemari, “I‑di Yako oni Isara·eo tohawahebonane.” Deoso ati nematane. I‑di Abaraho, i‑di Isaki, i‑di Yako mai na, ai‑ka idi mai tohamete. I‑di Abaraho‑ka nodi‑bona i‑di Kirisito, yama nafi‑ka hidi tohe, fare Deoso toha ne, Kirisito‑ya ai kahiyari fawateraboneni. Fara amani.
6Deoso ati fawaterebonane. Ati‑nima yama teni. Isara·eo‑ka nodi mai one hika nodi yokana mai tohi awirihi,
7Abaraho‑ka nodi mai one Abaraho‑ka nodi yokana mai tohi awirihi nineni.
“Abaraho, tika dao i‑di Isaki bidi mai‑ta tika nodi yokana mai tohabisaboneni.” Deoso ati nematane.
8Abaraho bidi mai one‑ka madehe Abaraho‑ka nodi yokana mai tohi awira. Isaki ohari bidi i‑di Abaraho‑ka nodi mai tohabisabone Deoso ati nematane.
9Abaraho‑ya Deoso hiyare,
“Ano ohari yanatoniya, okomatasiya, tika yibote i‑di Sara bidi wadawahebonane.” Deoso ati nematane.
10Bidi wadawahemata, ai‑ka idi i‑di Isaki amane. Makobote i‑di Isaki fadi i‑di Habeka naba toha, bidi mai famameteni.
11Mai wadi awisariya, mai ihi amosi awisarihi, mai ihi towe tohi awisarihi niya, Deoso ati‑nima yama nabone ai watabone mai tamine‑bone‑ya Deoso hiyarematane.
12Wadi bahe sohori‑ya narifebona tamine‑ya i‑di Habeka‑ya Deoso hiyarematane. Sohori i‑di Yako‑ya kadike, anidi i‑di Esa‑ya kadikarematane.
13“I‑di Yako onofabisa, i‑di Esa‑ta okakoneni.” Deoso ati ne, yama hani‑ya.
14“Deoso ati kasirone.” Dai atibodi ati na awineni.
Deoso ati kasiro awirane.
15Hibati‑ya i‑di Mose‑ya Deoso hiyare,
“Mai‑ya owati kasoma, mai‑ya okasoma, mai‑ya owati nofa, mai‑ya onofa onaboneni.” Deoso ati nematane.
16Deoso kitabote tohe, ai owa‑ya kasomebona ati ne, ai owa‑ya kasomatene. Deoso‑ya mai yoserihi, Deoso‑ya mai ati baririhi teni. Hini ati koboni‑ka yama‑ya anitene.
17Hibati‑ya Fara·o‑ya Deoso‑ka yama hani hiyara,
“Fara·o, owa ene Eyito‑ka mai‑ka hidi tihawahani, Isara·eo‑ka mai seetikarabone tina, owa ene kitabote tiwiya, mai seetikanaboneni. Mai tabori nafi‑ya owa tamine‑ya mai kaminabone, owa ene kitabote tamine‑ya mai dami mitaboneni.” Ati nematane.
18Deoso hini hinofa‑nima ene ne, mai one‑ya kasoma, mai one‑ya kasomarene. Deoso ene mai one habi kiti ba‑basi nineni.
19Owati ihi owa‑ya dai ati haa‑nima niheba awineni.
“Baoro, Deoso ene ai habo kitamone tina, fara Deoso hinofa‑nima ai ene na, hini yamata ihi ai‑ya Deoso weenabati?” Dai ati na awineni.
20Deoso ai‑ya wamanemata dai weeriyahi.
“Abi Deoso, otaminara. Hini yamata‑ba owa‑ya wamatinamete amatiniti?” Dai ati riyahi.
21Atabo‑ya wa‑wama hini yama hinofa‑ya atabo‑ya wamatene. Atabo kote‑ya yama amosabote‑ya wama, atabo kote‑ya yama amosara‑ya wama tene. Yama hini hinofa‑ya wamatene.
22Fare‑nima Deoso ene ne, ai nafi‑ya wamanematane. Mai one ihi amosarabone‑ya watonemata, mai ihi amosawamabone mai‑ya nimane. Mai ihi amosawami awiriya, Deoso yawi kite‑ya mai awabone ati nematane. Deoso yawe‑ya mai awa, mai‑ya nanahabe, sibarane.
23Deoso yawe‑ya mai kayafiya, mai‑ya ai awa, Deoso ati‑nima yama nabone ai watoneni. Ai‑ya Deoso kadikemata, ati ai nofe, ai‑ya kasomi na‑nafi nebona ati ne, mai one‑ya Deoso ati amosare‑nima‑ya mai kayafa, ai‑ya ati amose‑nima nebona ai watoneni. Deoso tabaro‑ya ai winaboneni.
24Deoso‑ka ai tohabone Yodeo ai one toha, Bara ai one toha na, Deoso ai‑ya kasomebona, ai‑ya kadike, ai‑ya kayafematane.
25Deoso‑ka yama hani i‑di Oseya hikanahanamete, ati dai mitahi.
“Hibati‑ya Bara oka mai tohara, oka mai tohawahaboneni. Hibati‑ya Bara mai onofaramone dai ati na, mai onofa, owa dai watowahaboneni.” Deoso ati nematane.
26Hibati‑ya Bara mai tamine‑ya mai hiyara,
“Deoso‑ka mai tohi awirini.” Mai ati nameteni.
Makobote mai tamine‑ya i‑di Oseya kanahano,
“Deoso kitabote bidi mai tohawahineni.” Oseya ati nematane, Deoso‑ka yama hani‑ya.
27Isara·eo‑ka nodi mai tamine i‑di Isa·iya‑ka yama hani ati dai mitahi.
“Isara·eo‑ka nodi mai dama, siki boni dama‑nima mai na, mai fa‑famaraba na‑ta Deoso tabaro‑ya mai winabisaboneni.” Deoso ati ne, ati‑ya i‑di Isa·iya kanahanomatane.
28“Mai dama mai ihi amosara mai ihi‑ya Deoso kadikeya, hini ati‑nima yama naboneni. Mai ababone ati ne, mai aba kanibote naboneni.
29Deoso kitabote ai‑ya kasomare‑mana, ai nafi aba neni. Sodoma‑ya mai wi‑wina, Komora‑ya mai wi‑wina, mai na, mai abi‑nima ai aba neni.” I‑di Isa·iya ati nematane.
Deoso ati‑ya Isara·eo‑ka nodi mai one nofara
30Hibati‑ya Deoso ati‑ya Bara mai watora, Deoso‑ya mai sibaramete, Yeso ati‑ya mai mitawaha, Yeso ati‑ya mai one nofawaha, Deoso mai‑ya ati somawame, Deoso‑ka mai tohawahani.
31Isara·eo‑ka nodi Deoso ati‑ya mai kayafameteni, mai ihi amosabonehe. Mose ati‑ya mai tokadababone mai ati na, ati mai hikadabarene. Mai ati‑nima mai ni awira, mai ihi Deoso mai‑ya ati somawami awire, Deoso‑ka mai tohi awirani.
32Isara·eo‑ka mai‑ya Deoso nofe, Yeso abe, mai manakone‑ya nanahabane. Yeso ati‑ya mai nofa‑mani, mai manakone wadara neni. Ati mai hinofare,
“Hini oda ene Deoso tabaro‑ya oda kobonibisaboneni.” Isara·eo‑ka mai atibodi ati na,
“Owa tabaro‑ya dai kobonabone Yeso ati dai nofamatahi.” Deoso ati ne.
Deoso‑ka yati‑nima‑ya mai taratokana, Deoso tabaro‑ya mai koboraboneni.
33 # 9:32-33 “Deoso‑ka Ka‑kadika koboneya, abaterebonane. Yeso abe, fare Deoso‑ka Ka‑kadika tohi awirane.” Mai atibodi ati na, Yeso ati‑ya mai nofara, fara‑ya mai taratokaneni. Ai manakone‑ya Yeso nanahabe Deoso‑ka yati‑nima amane, fare tamine‑ya mai kanahanameteni.
“Siyaho‑ya oka yati onawaana, oka yati‑ya mai taratokaniya, owa tabaro‑ya mai koboraboneni. Oka yati ati‑ya mai one nofiya, mai habi siitorabone, owa tabaro‑ya mai kobonibisaboneni.” Deoso ati nematane, yama hani‑ya.
Currently Selected:
Homa 9: jaaNT
Highlight
Share
Copy
Want to have your highlights saved across all your devices? Sign up or sign in
