Homa 8
8
Deoso‑ka Doni ai‑ya sawi, ati ai tokadababone
1Hibayata Yeso Kirisito ati ai no‑nofa Yeso‑ka ai toha, Deoso ai‑ya yawi awire, ai manakone amosara‑ya daani awirebonane.
2Yeso Kirisito ai manakone‑ya nanahabe ai abamarabone, ai atibodi bote ai‑ya yaditonamaro, Yeso ai‑ya seekane. Yeso‑ka ai tohawaha, ai atibodi yati Deoso daahina, fara‑ya hika Doni sawine, ai ene amosawamawahabonehe. Ai atibodi bote ati ai tokadabarabone, Deoso‑ka Doni ene ai atibodi yati ati ai tokadababoneni.
3Ai atibodi bote‑ya Mose ati namosaterene. Ai tabaro‑ya Deoso hini Bidi‑ya yose, ai abano‑nima Yeso abano ne, ene amose hinama, ai ene towe manakone‑ya nanahabematane. Ai atibodi yati‑ya Mose ati daaterene. Deoso‑ta ai atibodi yati‑ya daane, ai ene amosawama, yama towe ai nokotonimaraboneni.
4Deoso ati‑nima ai nawahabone, Deoso‑ka Doni ai‑ya sawi, ai‑ya kasome, Deoso ati ai tokadababone, ai ene towe tohamaraboneni.
5Mai atibodi bote ati‑ya mai tokadaba, yama towe‑ya mai nokotoniteni. Mai atibodi yati ati‑ya mai tokadaba, Deoso‑ka Doni ya‑yainebona‑ya mai nokotonibisateni.
6Mahi‑nima mai atibodi bote ati‑ya mai tokadaba, mai ababoneni. Deoso‑ka Doni ati‑ya mai nokotonihe, mai hasinabone, mai atibodi ati mai‑ya somateni.
7Mai atibodi bote ati‑ya mai tokadaba, Deoso ati‑ya mai kaka, ati mai hikadabaterene. Mai atibodi bote Deoso ati‑ya tokadabaterani.
8Mai atibodi bote ati‑ya mai tokadaba, mai atibodi bote mai‑ka hidi toha, mai ihi Deoso ya‑yaiterene.
9Deoso‑ka Doni dai‑ya sawi, dai‑ka hidi tohawahe, dai atibodi bote dai‑ka hidi tohami awira, ati dai tokadabamaraboneni. Kirisito ene Deoso‑ka Doni dai atibodi yati‑ya sawitene. Deoso‑ka Doni dai‑ya sawire‑mana, Kirisito‑ka dai tohi awira neni.
10Kirisito dai atibodi yati‑ya sawi, dai abano abiya, Deoso‑ka Doni ene dai atibodi yati abateraboneni. Dai ene amosaramaro ene dai abano ababone, dai yokana‑ta abateraboneni. Deoso dai‑ya ati somawame, dai ene‑maro‑ya kadikamaterebona, hini tabaro‑ya dai winaboneni.
11Deoso‑ka Doni dai atibodi yati‑ya sawi, Yeso Kirisito‑ya Deoso nakitamemata, fare dai‑ya nakitamaharibonane. Deoso‑ka Doni dai‑ya sawi ene dai abano kitamaboneni.
Deoso bidi mai ai tohawaha
12Yeso ati‑ya dai no‑nofa, owati dai mitahi. Dai atibodi bote dai‑ka hidi tohamara, ati dai tokadabamariyahi. Dai atibodi yati ati dai tokadababisahi.
13Dai atibodi bote dai‑ka hidi tohasa niya, Deoso tabaro‑ya dai winateraboneni. Deoso‑ka Doni kite ene dai atibodi bote ati‑ya dai tokadabamariya, dai atibodi bote aba‑nima nawaha, Deoso tabaro‑ya dai winabisaboneni.
14Deoso‑ka hawi‑ya Deoso‑ka Doni mai yofihikana Deoso bidi mai tohateni.
15Mai mai hikanikamaro mai‑ka hidi mai‑ya nofare awane. Mai‑ka hidi‑nima ai‑ka hidi re, Deoso ai‑ya nofe, hika Doni‑ya ai‑ya daane, ai‑ya ewe ne, ati ene ai kakomehera, ai ya‑yainibisa,
“Abi Deoso” ai ati teni.
16Deoso‑ka Doni ai atibodi yati‑ya hiyare,
“Deoso bidi amatini.” Ati tene.
17Deoso bidi ai toha, Deoso‑ka yama ai kayafaboneni. Deoso‑ka yama‑ya Kirisito kayafi‑nima ai kayafahareboneni. Kirisito‑ya mai bisinamete, fare Kirisito ati ai nofe ene ai‑ya mai nofara, ai‑ya mai bisiniya, sibaraboneni. Kirisito eyehe yama amosabote ai kayafaboneni.
Deoso‑ka yama amosa ai kayafabone
18Hibayata ai‑ya mai bisiniya, ai korikasara, makobote yama nafi amosabote‑ya ai kayafa, yama amosi ba‑basi naboneni.
19Yama nafi Deoso wamahinamete Deoso bidi mai one tohabone mai‑ya nimakaneni. Deoso bidi ai nafi tohiya, yama wamani nafi ya‑yainaboneni.
20Hibati‑ya yama Deoso wamahina, nafi amosa. Makobote i‑di Adaho ene yama nafi abi yanatonamete, Deoso ene yama amosawamatasabone, fara hini‑ya nimakaneni.
21Makobote yama nafi‑ya Deoso namosawameya, yama abamateraboneni. Deoso bidi ai toha ai abamaterabone‑nima yama one na, abamateraboneni.
22Yama Deoso wamahinamete Adaho ene komawahamete, mai fanawi naba, dori kome yanana, dori kome‑nima yama komenamete, komasa nineni.
23Ai komaharineni. Bofe‑ya ai winasa na ai abano komateni. Hibati‑ya Deoso ai‑ya ewe ne, hika tabora‑ya ai koboniya, yama ai kayafaboneni. Hibayata ai abano yati ai nimaniya, Deoso‑ka Doni ai‑ya sawi, makobote ai abano yati ai kayafiya, ai komami awiraboneni.
24Yeso ati ai nofawaha Yeso ati‑nima yama nabone ai nimateni. Yama ai kayafamaro‑mani, yama ai nimanamara neni.
25Yama amosa ai kayafabone ai atibodi ati na, yama ai nimana, fara ai habo kita, ai ya‑yaiteni.
26Ai atibodi yama nafi‑ya watora, Deoso‑ka Doni ai‑ya kanawatotene. Deoso‑ya yama‑ya ai atibodi haanabone, yama ai watora‑ya Deoso‑ka Doni Deoso‑ya basane, ati ai mitare, Deoso‑ta ati himitatene.
27Ai atibodi ati‑ya Deoso wato, fara Deoso‑ya ai tamine‑ya Deoso‑ka Doni kaminatene. Deoso atibodi yama kobohina‑nima Deoso‑ka Doni ati tene.
28Deoso ai‑ya kadikematane, Bidi i‑di Yeso‑nima ai nawahabonehe. Deoso‑ya ai nofa yama ai‑ya kobona, ai‑ka awi towe toha, ai‑ka awi amosa toha na, ai‑ya koboniya, Deoso ai‑ya kasome ene ai watoneni.
29Hibati‑ya Deoso ai‑ya awe, ai‑ya kadikematane, Bidi i‑di Yeso‑nima ai nawahabonehe. Deoso Bidi daidi i‑di Yeso tohe, sohori ai damawahaboneni.
30Deoso ai‑ya kadikemata, ai‑ya haane, ai‑ya ati somawamemari, tabaro‑ya ai winiya, yama amosa hinama ai kayafaboneni.
Deoso ai‑ya nofe ai‑ya nofi fawaterebona
31Ai atibodi yama‑ya kadika,
“Deoso kitabote ai‑ya nofe, ai‑ya kasome, ai‑ya nawade, ai‑ya mai ka‑kako mai kiti bi‑bidi na, mai ihi ai korikasariyahi.” Ai atibodi ati teni.
32Deoso ai‑ya nofi nafi, Bidi‑ya kayawi awire, Bidi‑ya yosene, ai manakone‑ya nanahabebonaha. Fare Bidi‑ya daanemata, yama nafi‑ya ai‑ya Deoso daanamakitasebona ai watoneni.
33Deoso ai‑ya kadikemata, ai‑ya mai weena, Deoso noko‑ka mai kitara, mai ihi ai korikasara, ai sibaraboneni. Ai‑ka Abi i‑di Deoso ati ene ai manakone wadamarani.
34Deoso‑ya ai tamine‑ya mai hiyariya,
“Mai ihi amosaramaro, mai abahi.” Mai ati naba awineni.
Deoso‑ka kanika‑ya Yeso itari, ai tamine‑ya kaminamakiya,
“Mai abarabone, mai manakone onahaba, o·aba, okitamamaro, mai manakone amosara wadami awirani.” Ati nebonane.
35Kirisito ai‑ya nofi nafi, ai‑ya nofi fawaterebonane. Ai‑ka yama kome kita, ai‑ya nofa, ai‑ya mai bisina, ai‑ya nofa, ai fimi nafe, ai‑ya nofa, ai‑ka bora wadara, ai‑ya nofa, ai abi yanatona, ai‑ya nofa, ai‑ya mai nanahaba, Kirisito ai‑ya nofatene.
36Ai tamine‑ya Deoso‑ka yama hani‑ya i‑di Dafi kanahanomatane.
“Abi Deoso, tiwa oda nofa, oda‑ya mai kaka, mahi‑nima kaneiro mai‑ya mai nanahabi‑nima oda‑ya mai ati nanahabateni.” Dafi ati nane, Deoso‑ka yama hani‑ya.
37Ai‑ya mai kaka, ai‑ya mai ati nanahaba na, Yeso ai‑ya nofi nafi, ai‑ya kasome, ai habo siitora, ai habo kiti ba‑basi na, ai ya‑yaiteni.
38Yama ai watowaha, Deoso ai‑ya nofe, ai nofi‑ya fawaterebonane. Ai aba, ai‑ya sawi, ai hasina, ai‑ya sawitene. Deoso‑ka yo‑yose mai ati ihi ai‑ya kanakiterene, Satanasi‑ka madi mai kiti bi‑bidi na mai toha, hika madi mai kiti ba‑basi na mai toha mai na, mai ihi Deoso ai‑ya kanakiterene. Hibayata yama toha, makobote yama toha na ihi Deoso ai‑ya kanakiterene. Ai‑ya nofi fawaterebonane.
39Neme‑ya ai toka, wami‑ya ai toka, faha bodi‑ya ai toka na, Deoso ai‑ya sawitene. Ai‑ka Ayo i‑di Yeso Kirisito ai manakone‑ya nanahabemata, Deoso ai‑ya nofi nafi, ai‑ya kanakiterebonane.
Currently Selected:
Homa 8: jaaNT
Highlight
Share
Copy
Want to have your highlights saved across all your devices? Sign up or sign in
