Homa 2
2
Deoso mai manakone‑ya daanebona
1“Mai ihi towe toha, hini mai ihi mai abahi.” Dai ati na.
Mai ihi‑nima dai ene nahare, fara dai ene dai abahareboneni.
2Deoso ai atibodi‑ya wato, ai ene‑ya wato ne, ai ene amosara, ai manakone amosarabone ai watoneni. Ai manakone‑ya Deoso daaneya, tosawariterebonane.
3“Bara mai ihi amosara, Deoso ene mai ababoneni. Yodeo oda toha, Deoso oda‑ya ati somawame, oda‑ya nofe, oda‑ya nanahabarebonane.” Yodeo dai toha, dai atibodi ati na awineni.
Dai narabo hawihi. Yama nafi‑ya Deoso wato, mai ihi‑nima dai ene na, dai‑ya Deoso nanahabaharibonane. Dai manakone dai kayafa, kome fawateraboneni.
4Deoso‑ya dai nayawariyahi. Dai‑ya nofi nafi, dai ene‑ya kakatome, dai ene‑ya kadika kanibote re, dai ene‑maro‑nima dai ene namarabone, dai ene‑maro dai nofamarabone‑ya Deoso nimanane.
5Dai narabo hawira, dai‑ya dai kaminara, dai ene towe‑ya dai fawanira, dai manakone amosara tonafe. Makobote Deoso yaweya, mai ihi towe‑ya kadikeya, dai ene‑ya kadika neya, Deoso yawe ene dai awaboneni. Dai manakone amosara‑ya dai‑ya daatonameya, tosawari awirebonane.
6Hini ai ene‑nima ai ene manakone na‑ya ai nafi‑ya daanebonane.
7Deoso ati‑ya mai no‑nofa, Deoso ati‑ya mai tokadaba, mai ihi amosa, Deoso tabaro‑ya mai nokotoni fawara, mai manakone amosa‑ya Deoso daanebonane. Deoso tabaro amosabote‑ya mai winiya, mai ya‑yainaboneni. Deoso ene mai abamateraboneni.
8Mai one hini mai‑ya mai nofabisa, Deoso ati‑ya mai nofara, Satanasi ati‑ya mai nofa, hini mahi‑nima mai ihi towe toha, mai ihi Deoso yawi kiteya, mai‑ya nakomeya, Deoso yawe‑ya mai watowahaboneni.
9Mai ihi amosara, Deoso ene yama towe‑ya mai kayafiya, mai ohinaboneni. Yodeo mai‑ya Deoso kasomi nafimari, mai ihi towe tohasa na, Deoso mai‑ya nakoma, Bara mai ihi amosara mai‑ya nakomahari nebonane.
10Mai one ihi amosa, mai manakone amosa‑ya Deoso daanebonane. Hini tabaro amosabote‑ya mai‑ya nawiniya, mai‑ya kasomebona, mai‑ya kahiyarebona, mai atibodi mai‑ya ati somaboneni. Yodeo mai toha, Bara mai toha na, Deoso eyehe mai winiya, mai ya‑yainaboneni.
11Deoso noko‑ka fara hinama ai nafi toha, ai ene‑ya kadikeya, ai ene‑nima ai manakone naboneni.
12Mose ati‑ya Bara mai watora, mai ihi amosara, mai ihi‑ya Deoso kadikeya, hini mai ihi‑nima mai manakone na, Deoso tabaro‑ya mai winateraboneni. Mai‑ya Deoso yawi fawaterebonane. I‑di Mose ati‑ya Yodeo mai watobisa, Mose ati‑ya mai tokadabara, mai ihi amosara mai manakone‑ya Deoso daaneya, Deoso tabaro‑ya mai winateraboneni. Mai‑ya Deoso yawi fawaterebonane.
13Mose ati‑ya mai mita, ati mai hikadabare, hiniya ati mai himite, mai‑ya Deoso ati somawamarene. Mose ati nafi‑ya mai tokadababisa, mai‑ya Deoso ati somawamane.
14Deoso ati i‑di Mose hikanahanomata, ati‑ya Bara mai mitasa ni awira, mai atibodi yama amosa‑ya wata, fara yama amosa‑ya mai‑ka yama anini toha, Mose ati‑ya mai tokadaba mai‑nima mai nineni.
15Hibati‑ya mai atibodi‑ya Deoso hini ati‑ya kanahanomatane, ati mai hikadabebonaha. Mai atibodi ati‑ya mai tokadabiya, mai ya‑yainaboneni. Mai atibodi ati‑ya mai tokadabariya, mai atibodi hini mai‑ya weenaboneni.
16Ai ene ai kema‑ya ai one watoterani. Deoso‑ta ai ene‑ya watotene. Ai atibodi ati ai one himitara‑ya Deoso mitatene. Makobote yama ai kemamaro‑ya Deoso kadika, ai atibodi ati‑ya kadika nebonane. Deoso ene Yeso Kirisito ai ene‑ya kadikebona tamine okaminateni.
Deoso ati‑ya Yodeo mai wato ba‑basi namone
17Yodeo dai toha, Deoso dai‑ya hiyaremata, Deoso ati i‑di Mose dai‑ya daanemata ene Deoso‑ka dai tohamone, dai‑ya yawamaterebona dai ati na awineni.
18Deoso yama ati kobohina dai wato, Deoso ati amosabote tohe dai wato na, Mose ati‑ya dai‑ya mai kanawatamaroni.
19Deoso ati‑ya dai watamone, yama‑ya mai watora mai‑ya dai kanawatabone dai ati nineni. Yama wahi‑nima dai namone, Deoso hawine‑ya mai awara, mai‑ya dai kanawatoya, Deoso hawine‑ya mai awawahabone dai ati nineni.
20“Deoso ati nafi‑ya oda watoneni.” Dai ati na,
“Yama‑ya mai watora, madehe‑nima mai na, mai oda kanawataboneni.” Dai ati teni.
21Mai dai kanawatabone dai ati na, hini dai‑ya dai kanawato bahi. Mai dai kanawata,
“Yama‑ya dai yabariyahi.” Dai ati na,
dai abano‑ta yama‑ya yababisineni.
22“Mai fanawi one‑ya dai ahariyahi.” Dai ati na,
dai‑ta mai fanawi‑ya dai aha awineni. Mai‑ka deoso bare‑ya mai kahiyari awirabone dai ati na, mai‑ka deoso bare‑ka bani‑bona mai daahine‑ya dai boti na. Haa‑nima dai ene na, towe dai amani.
23“Mose ati oda watoneni.” Dai ati na,
ati dai tokadabare, dai ene Deoso‑ya mai one hahakanineni.
24“Owati‑ya dai tokadabara, dai ene owati‑ya mai one nofaraboneni.” Deoso‑ka yama hani ati na.
Deoso‑ka yama hani ati‑nima yama nawaha, dai ene‑ya Bara mai awa, Deoso‑ya mai kakowaha,
“Deoso towe amane.” Mai ati nawahani.
25Deoso‑ka dai tohabone, dai sowiri tati ataro‑ya mai wisinakosamaro. Deoso ati dai tokadaba‑mani, Deoso dai‑ya kasome nane. Deoso ati dai tokadabara, Deoso‑ka dai tohi awira. Mai sowiri tati atori abara mai‑nima dai nawahani.
26Bara mai sowiri tati atori abara, Deoso ati‑ya mai tokadababisa‑mani, Deoso‑ka mai toha neni.
27Bara mai sowiri tati atori abara Deoso ati‑ya mai tokadababisa, dai ene‑ya mai awiya, dai‑ya mai kasawariya,
“Ka! Yodeo dai toha, Deoso‑ka yama hani dai kayafa, Deoso ati dai tokadabamone dai ati na, dai ene amosara, Deoso dai manakone‑ya daanebonane.” Mai ati teboneni.
28Yodeo yokana mai toha, Deoso‑ka mai tohahari neni. Ai‑ka ami, ai‑ka abi mai na Yodeo mai toha, Yodeo yokana ai toha awineni, Yodeo yokana ai toharihi na awineni. Ai sowiri tati ataro aba, Yodeo yokana ai toha awineni, Yodeo yokana ai toharihi na awineni.
29Yodeo yokana ai tohabone, ai sowiri tati ataro wisina ene tohaterani. Deoso‑ka Doni ai atibodi‑ya sawi, ai atibodi‑ya namose ene Deoso‑ka ai toha, Yodeo yokana ai toha teni. Ai atibodi‑ya mai one awara, Deoso‑ta ai atibodi‑ya awe, ai atibodi amosa ene Deoso ya‑yaitene.
Currently Selected:
Homa 2: jaaNT
Highlight
Share
Copy
Want to have your highlights saved across all your devices? Sign up or sign in
