Homa 16

Mai owa‑ta, mai‑ya owa tamine dai hiyarahi

1I‑di Febe ai‑ka asima Yeso ati‑ya nofa, Senekereya‑ya mai wi‑wina mai‑ya kasomateni. Dai‑ka yama hani‑bone okanahanaya, i‑di Febe dai‑ya daanaboneni.

2Dai tabaro‑ya i‑di Febe koboniya, dai kasomahi. Yeso ati‑ya mai no‑nofa ai tabaro‑ya mai kobona, mai ai kasomateni. Dai tabaro‑ya kobona, yama hinofa dai daanahi. Ai owa mai dami‑ya i‑di Febe kasoma, owa‑ya kasomahari nineni.

3I‑di Birisira, maki i‑di Akira‑ya fama Yeso Kirisito‑ka yama oda anina mai dai hiyarahi.

4Owa‑ya mai kasomabone mai abi yanatonamaro, mai ihi ya‑yai·ona, mai ihi Bara mai ya‑yaihari nineni. Yeso ati‑ya mai no‑nofa mai dama mai ihi tamine mai mita, mai ya‑yainamaroni.

5I‑di Birisira, maki i‑di Akira‑ya fama, mai‑ka yobe‑ya Yeso ati‑ya mai no‑nofa mai yorotokana, mai dai hiyarahi. Asiya‑ya mai wi‑wina mai‑ka owa i‑di Ebeneto Yeso ati‑ya nofi daidi, onofi nafi dai hiyara naho.

6Mariya dai‑ya kasomi na‑nafi dai hiyarahi.

7I‑di Anidironiko, fadi i‑di Yoniya‑ya fame, mai dai hiyarahi, oka mai amani. Owa eyehe kadeya‑ya mai foyamaroni. Yeso ati‑ya mai nofi baha, ati onofamakimarine. Yeso‑ka yo‑yose mai mai hinofa hineni.

8I‑di Abiriato onofi nafi, dai hiyarahi. Ai‑ka hidi i‑di Yeso Kirisito‑ya i‑di Abiriato nofane.

9I‑di Oribano Yeso Kirisito‑ka yama‑ya anine, dai hiyara, i‑di Esitaki onofe, dai hiyara dai nahi.

10I‑di Aberesi ene‑ya Kirisito nofe, Aberesi‑ya dai hiyara, i‑di Arisitaboro‑ka mai dai hiyara, dai nahi.

11Oka owa i‑di Erodiaho dai hiyara, Narasiso‑ka mai one Yeso ati‑ya mai no‑nofa mai dai hiyara, dai nahi.

12Ai‑ka Ayo i‑di Yeso‑ka yama‑ya mai anina, i‑di Tirifena, hika kasima i‑di Tirifosa‑ya fama i‑di Bereside ohari na, ai‑ka Ayo‑ka yama‑ya mai anini kita, fara mai onofa, mai dai hiyara, dai nahi.

13I‑di Hofo, madi‑ya fame, mai dai hiyarahi. I‑di Hofo‑ya Deoso kayafematane. Okomi‑nima i‑di Hofo madi na, owa‑ya kasomamaroni.

14I‑di Asinikirito, i‑di Ferekonite, i‑di Eremesi, i‑di Batiroba, i‑di Eremasi, mai na, mai onofa, mai‑ya owa tamine dai hiyara, mai‑ya mai sawe, Yeso‑ka mai toha, mai‑ya dai hiyarahari, dai nahi.

15I‑di Firiroko, fadi i‑di Yoriya‑ya fama, i‑di Nereo hika kasima‑ya fama, i‑di Orimibasi, mai na, mai onofa, mai‑ya owa tamine dai hiyara, mai‑ya mai sawe, Deoso‑ka mai toha, mai‑ya dai hiyarahari, dai nahi.

16Deoso ati dai no‑nofa dai ibi kobona, dai‑ka soho‑ya dai kobona‑nima dai ibi kobona, dai nahi. Yeso Kirisito ati‑ya mai no‑nofa mai tabori dami‑ya mai yorotokana, dai tamine‑ya mai hiyarineni.

Owati dai mitahi

17Oka soho dai toha, owati dai mitamakihi. Dai‑ya mai kanawata mai ati ihi dai ebekanabone, mai ati dai nofariyahi. Yeso ati dai mitamaro, ati‑nima mai ati ni awira, mai ati dai nofariyahi.

18Dai‑ya mai ebekanabone, ai‑ka hidi i‑di Yeso Kirisito mai hiyosera, hiniya mai dai kahiyarabone mai ati amani. Mai ati amosaya, dai‑ya keyehe‑ya mai hirikana, mai ati amosa ihi yama‑ya mai wato bi‑bidi na, mai ati mai hinofateni.

19Dai ene amosa tamine oda dami mita, dai ene ya‑yai·oneni. Dai noko wadahi. Dai ene amosa hinama tohabone, yama towe‑ya dai nofaraboneni.

20Hibayata Satanasi ene ai‑ya mai bisi, ai‑ya mai wee, teni. Hasini bideya, Satanasi‑ya Deoso barikanebonane, ai‑ya mai bisinamarabonehe.

“Ai‑ka Ayo i‑di Yeso dai‑ya sawi, dai‑ya kasomebona.” Oteni.

21I‑di Timoti oda fama Yeso Kirisito‑ka yama oda anina, dai tamine‑ya i‑di Timoti hiyara, i‑di Rosiyo, i‑di Yasoho, i‑di Sosibataro mai na, oka mai toha, dai tamine‑ya mai hiyarateni. Dai‑ya mai nofineni.

22I‑di Tesiyo ama·oni. Baoro owa‑ya hiyare, ati okanahanoneni. Dai onofineni.

23I‑di Kayo dai‑ya nofe, Kayo‑ka yobe‑ya owina, fare yobe‑ya Yeso ati‑ya mai no‑nofa mai yorotokana, dai‑ya mai nofa, i‑di Erasito sidadi‑ke yinero‑ya na‑nawada dai‑ya nofa. Ai‑ka soho i‑di Kowato dai‑ya nofa, mai teni.

24Ai‑ka Ayo i‑di Yeso Kirisito dai‑ya sawi, dai‑ya kasomaho.

25Hibati‑ya yama mai hiwatoramete tamine‑ya Yeso owa‑ya kamine, fara dai‑ya okamina, dai‑ya Yeso kasoma, dai atibodi‑ya nakita, dai habo‑ya nakita nebonane.

26Hibati‑ya Deoso ati‑ya mai mi‑mita‑mete Yeso tamine‑ya mai kanahanamete, tamine yokana‑ya mai watora, tamine mai hikanahanomata tamine ai watowaha, Bara dai toha dai nafi hiwatowahebonane, Deoso ati dai nofabone, ati dai tokadabebonaha.

27Deoso yama nafi‑ya wato, Yeso Kirisito ene Deoso‑ya dai kahiyaranadiya, dai kahiyari fawarayaho. Feye amani.

Currently Selected:

Homa 16: jaaNT

Highlight

Copy