Maroko 4
4
Yamata noki‑ya werene
1Karireya‑ka wara webote widi‑ya Yeso tokomatase, mai‑ya kanawatomatasemarine. Mai dama mai yorotokana, mai dama mai ihi kanawa‑ya Yeso foye, itari, mai dama faha widi‑ya mai nahobasamaroni.
2Yeso mai‑ya kanawatobona Deoso tamine‑ya mai‑ya hiyare,
3 # 4:3 Tiriko noki‑ya mai kamabone, wami mese‑ya mai wereteni. “Owati dai mitahi. Ai owa yamata noki‑ya werene,
4hawi fowari‑ya noki one sona, bani bidi mai hikabani.
5Yamata noki one yati dama iti‑kaya sona, yati mese‑ya wami si‑sifina fore ihi noki yana kanibote na,
6yati ihi habi tokara, mahi hewene ene wayatokana, fahi wadamara, abani.
7Atiwa mete‑ya yamata noki one sona, atiwa ene yamata yani amosara, bonorani.
8Bodo‑ya yamata noki one sona, yana, dodama, ade ohare‑ya boni 30 toha, ade one‑ya boni 60 toha, ade one‑ya boni 100 toha nani.
9Owati dai mita, owati dai tokadabahi.” Yeso ati nemarine.
10Mai dama mai toka, mai nowati‑ya Yeso‑ka mai 12 kana, Yeso‑ya mai da‑daba mai one toha na, mai ati yanana,
“Tiwati oda watorini.” Mai ati namaroni.
11“Deoso ai nafi‑ka hidi kitabote tohawahebona tamine dai watowahaboneni. Mai one‑ya ohiyara, owati okahemobisateni.
12Deoso‑ka yama hani ati‑maro‑nima mai nawahani.
‘Owati‑ya mai mita, owa ene‑ya mai awa na, mai narabi hawira, yama‑ya mai wato awiraboneni. Mai narabi hawe‑mani, mai ihi‑maro‑nima mai ihi namariya, mai ihi manakone‑ya Deoso haanamare nane.’ Yama hani ati namaroni.” Yeso ati nemarine.
13Yeso ati yananamatase,
“Ka! Yamata noki tamine‑ya dai wato awirini. Oka hiyara nafi dai wato awiraba awineni.
14Fadara‑ka wami ai atibodi tamine amani. Yamata noki Deoso ati tamine amane.
15Hawi fowari‑ya yamata noki sona ai owa tamine amane. Deoso ati‑ya mai mita, Satanasi ene Deoso ati‑ya mai ati kadamowama kanibote na, mai tamine amani.
16Wami si‑sifina‑ya yamata noki one sona, yana kanibote na, aba kanibote na, fara Deoso ati‑ya mai mita, mai ya‑yai kanibote na, mai tamine amani.
17Deoso ati‑ya mai nofara mai mai weehiniya, mai atibodi kitara, mai maakana kanibote na, Deoso ati‑ya mai tokadabamarani.
18Atiwa mete‑ya yamata noki sona, fara Deoso ati‑ya mai mita,
19makobote yamataha, bora, yinero, yama dama toha na‑ya mai nokotonihe, Deoso ati‑ya mai nokotonimara, yamata atiwa‑ya daba, bonora‑nima mai na, mai ihi amosa‑ba wadarani.
20Bodo‑ya yamata noki sona‑nima mai na, Deoso ati‑ya mai mita, Deoso ati‑ya mai nofa, mai ihi amosani. Mai one ihi amosi bi‑bidi, mai one ihi amosi ba‑basi teni.” Yeso ati nemarine.
Deoso ati yama wahi‑nima ne
21 # 4:21-22 Tamine yokana dai mitahi. Yeso hini ati yokana‑ya kemo kitarematane. Hika mai watowamaboneni. “Nabarina ai towakamiya, nabarina wahi ai barikiterani. Nabarina ai kanawaarikosateni.
22Fara nabarina ihi yama ai watowama‑nima owati dai watora, owati dai watowahaboneni.
23Owati dai mita, owati dai tokadabahi.” Yeso ati nemarine.
24“Owati timita, owati tinofahi. Owati tinofiya, ati tiwato ba‑basi tinabone, ati owa okaminamakitasaboneni.
25Deoso ati‑ya mai mita, ati mai hinofeya, Deoso ati‑ya mai wato ba‑basi naboneni. Deoso ati‑ya mai mita, ati mai hinofareya, yama‑ya mai watoteraboneni.” Yeso ati nemarine.
Ahosi‑nima na tamine
26Yeso ati yananamatase,
“Deoso ai nafi‑ka hidi kitabote tohawahebona tamine okaminaboneni. Fadara‑ya yamata noki‑ya ai owa werene,
27amoni dameya, hika fadara‑ya tokomatase, hika yamata moona, ai owa ene tohi awirene.
28Wami honita ihi yamata noki moona, makobote bonowaha, marafakiteni.
29Marafakanaya, hidi tiihiteni.
Mositada noki tamine
30Deoso ai nafi‑ka hidi kitabote tohawahebona tamine ohiyaramatasaboneni.
31Fara mositada noki‑nima tene. Mositada noki i‑isi teni.
32Mositada noki i‑isi na‑ya fadara‑ya ai owa korotona, noki yana, nafiwaha, ini webote tohawaha, ini‑ka yama sire‑ya bani bidi mai bori‑ya mai wamateni.” Yeso ati nemarine.
33Hiyara haa‑nima na‑ya Yeso hiyare, ati damemarine. Deoso ati‑ya Yeso hiyare, yama bara tamine‑ya hiyarabisemarine. Yama nafi‑ya Yeso kamina kanibote ni awire, yama‑ya mai wato‑ya yama one tamine‑ya kaminamakitasematane.
34Mai dama mai‑ya Yeso hiyare, yama tamine yokana‑ya kaminare, makobote hika mai da‑daba mai‑ya yama tamine yokana‑ya kaminawahematane.
Boni mai‑ya monona
35Mahi toke‑ya Yeso hika mai da‑daba mai‑ya hiyare,
“Hima, faha kowani‑kaya ai tokahi.” Yeso ati nemarine.
36Mai yanana, kanawa‑ya mai foyama, kanawa one‑ya mai one foyama na, mai one dama tonokosamaroni.
37Faha bai‑ya boni kita yanana, faha rike nafe ihi kanawa boki yanatonameteni.
38Kanawa yodi‑kaya kama bide homa‑ya Yeso amone, home‑ya mai mowakana,
“Ayo, ai abi bonehe, ai tikasomara, oda‑ya tinofara awineni.” Mai ati nameteni.
39Yeso dodafi, boni‑ya weene, faha‑ya hiyare,
“Faha rikatiriyahi.” Ati ne,
ati ene boni fawa, faha rike fawa nameteni.
40Mai‑ya hiyare,
“Hini yamata ihi dai kakomeheti? Owa ene kitabote‑ya dai awaterini?” Yeso ati nematane.
41Yeso ene‑ya mai awa, mai habi siitona, mai ibi hiyara,
“Ebeni‑ke tohati? Ai‑nima Yeso ni awire, kitabotebisa amane. Yeso ati‑ya boni mita, fawa, faha rike fai ati‑ya mita, fawa nineni.” Mai ati nameteni.
Currently Selected:
Maroko 4: jaaNT
Highlight
Share
Copy
Want to have your highlights saved across all your devices? Sign up or sign in
