Yowaho 8
8
Fana towe‑ya Yeso nanahabi nofare
1Orifera adami‑ya Yeso tokomorosemarine.
2Yama wahabisari‑ya Deoso‑ka yobe‑ya Yeso kamatasemarine. Yeso wai‑ya mai dama mai kamakemaroni. Yeso itarisemarine, mai dama mai‑ya kanawatobonaha.
3Ai owa fadi maki bare‑ya dakora‑ya mai wasemaroni. Mose‑ka yama hani ati‑ya mai ka‑kamina mai toha, fariseo mai toha, mai na, fana‑ya mai kakamake, oda noko‑kaya mai hinawaamaroni.
4Yeso‑ya mai hiyara,
“Yeso, fana tiawahi, maki bare‑ya fana dakora‑ya oda owa wasinahone.
5Fana haa‑nima mai ihi na
‘Mai dai nanahabahi, yati‑ya.’ Mose‑ka yama hani ati teni.
Hini yamata‑nima tiwati niti?” Mai ati na,
6“Fara haa‑nima ai ati niya, Yeso ati tosawariya, Yeso ai weenaboneni.” Mai atibodi ati nineni.
Yeso mai‑ya hiyari awire, hini yehe‑ya siki‑ya nahanomarine.
7Fariseo mai ati yananamarimana, Yeso waamise,
“Hehe sibarini, dai owa ene amose hinama tohe yati‑ya hikinari dai hiyahi.” Ati nemarine.
8Moinisamatase, siki‑ya nahanomatasemarine.
9Yeso ati‑ya mai mita mai yamatonama, mai bo‑botena mai toki dai tohama, mai nafi tokomakemaroni. Yeso fana‑ya fame mai yorotonakosamaroni.
10Yeso waamisamatase,
“Fai mai‑ya? Tiwa‑ya mai ati nanahabaro, mai nahoneni?” Ati nemarine.
11“Ayo, owa‑ya mai ati nanahaba, mai awimarini.” Fana ati namaroni.
“Tiwa‑ya owati nanahabaharirani. Tikamahi, tiwa ene towe tohamariyahi.” Yeso ati nemarine.
Deoso ati‑nima Yeso ati ne
12 # 8:12 Yeso ati ai tokadaba, Deoso tabaro‑ya ai kobonabone, ai ya‑yainaboneni. Mai naha mai‑ya hiyare,
“Bofe‑ka mai‑ka yama wahi‑nima ona ama·oni. Deoso hawine yofi·okaneni. Owati‑ya dai tokadaba yama soki‑ya mai ya‑yaka mai‑nima dai ni awira, yama wahi ihi dai abaraboneni.” Yeso ati nemarine.
13“Hini tiwa tamine tihiyarineni. Hini mai tamine‑ya mai hiyara, mai ati oda nofaterani.” Fariseo mai ati namaroni.
14“Owa tamine ohiyara, sibaraboneni. Keyehe‑ya hiri·oterani. Yana·omaro‑ka yama dai watora, owa‑ta owatobisineni. Oki‑bone‑ka dai watora, owa‑ta owatobisineni.
15Mai atibodi ati dai mitara, mai ihi manakone dai haateni. Mai ihi manakone haa·orani.
16Mai ihi manakone haa·ona‑mani, owati sibara neni. Owa hari terani. Owa‑ya yose‑mari oda ati fara kafamateni.
17Mose‑ka yama hani ati dai nokotonihe, ati dai mitahi,
‘Mai fama, fara mai ati kafamiya, mai ati dai nofahi.’ Mose‑ka yama hani ati neni.” Yeso ati nemarine.
18“Owa tamine okamina, Okobi owa‑ya yose owa tamine‑ya kaminahari ne.” Yeso ati nemarine.
19“Ebeni‑kaya abi sawiti?” Mai ati na,
“Owa‑ya dai watora, Okobi‑ya dai watoharirani. Owa‑ya dai wata‑mani, Okobi dai watohare neni.” Yeso ati nemarine.
20Deoso‑ka yobe‑ya yinero weyene wai yowi‑ya Yeso itari, mai‑ya kanawatomarine. Yeso ati‑ya mai mitiya, Yeso‑ya mai waratonabone mai atibodi ati na, Yeso aba‑bona‑ke mahi kobore ene Deoso mai‑ya maakane, Yeso‑ya mai waratoni awiramaroni.
21Mai‑ya Yeso hiyaramatase,
“Okaboneni. Owa‑ya dai sibanabone, owa‑ya dai wasi awiraboneni. Dai ene amosara manakone hasini‑ya dai ababoneni. Oki‑kaya dai tokomakiteraboneni.” Yeso ati nemarine.
22“‘Oki‑kaya dai tokomakiteraboneni.’ Ati ne,
Yeso hini‑ya naboheba awane, yama ai wato awirini.” Oda‑ka hidi mai ati namaroni.
23“Bofe‑ya dai yana, bofe‑ka dai amani. Neme‑ya yana·obisa, bofe‑ka ohi awirini.
24Dai ene amosara manakone hasini‑ya dai ababone, ona, owa‑ya dai nofariya, dai ene amosara manakone hasini‑ya dai ababisaboneni.” Yeso ati nemarine.
25“Ebeni‑ke amatiniti?” Mai ati namaroni.
“Owati‑maro‑nima oneni.
26Dai ene towe dama toha, owa‑ya yose‑mari ene amose, keyehe‑ya hiriterene. Owa‑ya yose‑mari ati mai dami‑ya okaminabisani.” Yeso ati nemarine.
27Yeso hini Badi tamine‑ya hiyare, ati‑ya mai watoramaroni.
28“Dai‑ka Ayo neme‑ke awa‑ya dai nawaaneya, owa‑ya dai watowahaboneni. Hini owati ihi yama ani·oterani. Okobi hikamini baha, okaminamakitasateni.
29Owa hari terani. Owa‑ya yose‑mari owa‑ya famatene. Okobi yama hinofa‑nima oteni.” Yeso ati nemarine.
Yeso mai‑ya seekanebona
30Yeso hiyare, ati‑ya mai dami nofawahamaroni.
31Yeso ati‑ya oda‑ka hidi mai one nofa mai‑ya hiyare,
“Owati dai tokadaba, oka da‑daba yokana dai amani.
32Ati yokana dai watobona, ati yokana dai‑ya seekanebonane.” Yeso ati nemarine.
33Mai ati yanana,
“Abaraho‑ka nodi oda amani. Oda‑ya mai kanikaterani. Hini yamata‑nima yama na oda‑ya seekibati?” Mai ati namaroni.
34“Owati amosabote dai mitahi. Mai ihi amosara yama towe mai‑ya kayafa‑nima mai na, yama towe‑ka ka‑kanika mai tohateni.
35Ai owa‑ya hidi kanikeya, abariko dame‑ya daahinamatasatene. Hidi hini bidi‑ya daaterene.
36Deoso Bidi dai‑ya seekaneya, yama towe dai‑ya kayafamaraboneni.
37Abaraho‑ka nodi dai amani. Owati dai nofara, owa‑ya dai ati nanahabani.
38Okobi oda fama, yama owa tamine okaminabisineni. Dai‑ka idi ati‑nima dai teni.” Yeso ati nemarine.
39“Abaraho oda‑ka idi amane.” Mai ati namaroni.
“Abaraho dai‑ka idi tohe‑mana, Abaraho ene‑nima dai ene na neni.
40Deoso ati omite, ati okamine, owa‑ya dai nanahababone dai ati na, dai ene‑nima i‑di Abaraho ene rematamonane.
41Dai‑ka idi yokana ene‑nima dai ene nibisineni.” Yeso ati nemarine.
“Oda‑ka ami maki mai one‑ya mai siwakiterani. I‑di Abaraho‑ka nodi yokana oda amani. Oda‑ka Abi yokana Deoso amane.” Mai ati namaroni.
42“Dai‑ka Abi Deoso tohe‑mana, owa‑ya dai nofa neni. Deoso oda famamaro, dai tabaro‑ya okemaroni. Hiniya oki awira, owa‑ya Deoso yosemarine.
43Owati dai mita, hini yamata ihi owati dai watorihi? Owati dai nofara ihi amani.
44Dai‑ka abi yokana Diaboro tohe, dai‑ka abi ati‑nima dai nabone dai ati neni. Diaboro ai‑ya nanahaba tene. Satanasi fara yama yokana‑ya kaminatere, keyehe‑ya hirinibisatene. Satanasi hini atibodi ene keyehe‑ya hirini fawaterene. Satanasi ati‑ya mai tokadaba keyehe‑ya mai hiriteni.
45Ati yokana okamine, hiniya keyehe‑ya dai nofabisa, owati dai nofarani.
46Owa ene towe dai awineni? Owa ene towe dai awaterani. Owa ene amosa hinama toha, keyehe‑ya hiri·ora, owati dai nofahi.
47Deoso‑ka mai toha Deoso ati‑ya mai tokadabateni. Deoso‑ka dai tohara, owati dai watorani.” Yeso ati nemarine.
Yeso‑ya madi towe sawimona
48“Samaritano owa amatini. Madi towe tiwa‑ya sawine.” Oda‑ka hidi mai ati namaroni.
49“Madi towe owa‑ya sawi awirane. Okobi okahiyara, owa‑ya dai nofarani.
50Hini owa‑ya noko·onirani. Okobi owa‑ya nokotonibisatene, owa‑ya mai kahiyarabonehe. Ai ene‑ya Okobi kadikatene.
51Owati amosabote dai mitahi. Owati‑ya mai tokadaba, mai abateraboneni.” Yeso ati nemarine.
52“Madi towe tiwa‑ya sawibisane. Abaraho abe, Deoso ati‑ya mai mi‑mita‑mete mai abamakemetemoneni. Tiwati‑ya mai tokadaba mai abaterabone tineni.
53Abaraho amosi bi‑bidi ne‑mona tina, amosabote tiwa‑mone tina awineni. Abaraho abe, Deoso ati‑ya mai mi‑mita‑mete mai abamakemetemoneni. Ebeni‑ke amatiniti?” Mai ati namaroni.
54“Owa‑ya okahiyara‑mani, owati‑ya dai nofariya, yama sibara neni. Okobi owa‑ya kahiyarabisatene. Okobi dai‑ka Deoso‑mona dai ati teni.
55Okobi dai watore, Okobi owatobisineni. Dai watomona dai ati na, keyehe‑ya dai hirinineni. Okobi owatorini ona‑mani, keyehe‑ya hiri·onahare neni. Okobi owato, ati okadabatene.
56Bofe‑ya owinabone, owa tamine‑ya dai‑ka idi i‑di Abaraho mite, ya‑yainemarine. Makobote owa‑ya awe, ya‑yainamatasemarine.” Yeso ati nemarine.
57“Bote tihara, tika ano 50‑ba wadara, ‘Abaraho oawani.’ Tina, tiwadi awisari‑ya Abaraho abematamonane.” Oda‑ka hidi mai ati namaroni.
58“Owati amosabote dai mitahi. I‑di Abaraho‑ba wadare‑ke ama·oni.” Yeso ati nemarine.
59Ati‑ya mai mita, mai yawa, yati‑ya mai yabamaroni, Yeso‑ya mai baanabonehe. Yeso hini‑ya kemo, tokemarine.
Currently Selected:
Yowaho 8: jaaNT
Highlight
Share
Copy
Want to have your highlights saved across all your devices? Sign up or sign in
