Yowaho 5
5
1Yama one‑ya Yeso oda tokomatasamaroni, Yerosare‑ya, Yodeo oda toha oda‑ka marina‑ya.
2Yerosare‑ka nokobi one oni kaneiro nokobi tohani. Kaneiro nokobi yakari‑ya wara bide ita, oda ati‑ya wara oni Betesida toha, Betesida widi‑ya yobe bidi 5 kane siinarimarine.
3Yobe bidi‑ya mai hi‑hiyana mai dama mai nahoteni. Mai noki wadara mai toha, mai yakara mai toha, mai mani i‑isi na mai toha, mai na, yobe bidi‑ya mai nahamaroni, faha werokanabone‑ya mai nimanaro.
4Deoso‑ka yo‑yose kise, ene faha werokiteni. Faha werokanaya, boki dai tohe kitamatene. Mai amoni dami‑ya Deoso‑ka yo‑yose kamatasatene.
5Wara widi‑ya ai owa hi‑hiyane kafori, faha fowe 38 toha‑ya yakare,
6Yeso kamaki, maki‑ya awe, faha fowe dami‑ya yakare‑ya wato,
“Tiwati yakanamineni?” Yeso ati nemarine.
7“Ayo, faha‑ya owa‑ya mai nabokabone mai wadara, faha werokanaya, obokabone ona, mai boki dai toharimateni.” Hi‑hiyane ati ne,
8“Tiwaamisahi. Tika fo‑fori‑ka yama diwatikaniya, yakatinahi.” Yeso ati nemarine.
9Kitame, waamise, hini fo‑fori‑ka yama‑ya diwanemarine, sabado‑ya.
10Maki kitame‑ya oda‑ka hidi mai hiyara,
“Sabado‑ya ai fo‑fori‑ka yama ai diwaterani. Yama diwatiriyahi.” Mai ati nameteni.
11“Owa‑ya nakitame ati ene oka fo‑fori‑ka yama diwa·okanineni.” Kitame ati ne,
12“Ebeni‑ke ati tohati?” Mai ati nameteni.
13Yeso oni‑ya maki watore, maki‑ya Yeso nakitame, toka kanibote ne, mai dama mai ihi Yeso‑ya watomarematane.
14Makobote Deoso‑ka yobe‑ya maki sawi‑ya Yeso awe,
“Yakatinamawaha, tiwa ene amosaramaro‑nima tiwa ene namariyahi, tiwa komene ba‑basi ni awirabonehe.” Yeso ati nemarine.
15Yeso ati‑ya mite, oda‑ka hidi mai‑ya toke,
“Owa‑ya nakitame oni Yeso amane.” Ati nematane.
16Sabado‑ya mai‑ya Yeso nakitame, Yeso‑ya mai weenamaroni.
17“Okobi yama‑ya aninadi‑nima onabone, yama ani·onadeboneni.” Yeso ati nemarine.
18Yeso ati‑ya mai mita, mai yawi nafemaroni. Sabado‑ya Yeso yama‑ya anine ene mai yawi baha, makobote Deoso‑ya Yeso Abi ne ene mai yawi kitawaha,
“Yeso i‑di Deoso Bidi yokana tohi awirene.” Mai atibodi ati na, Yeso‑ya mai nanahababone mai ati nameteni.
19Yeso mai‑ya hiyare,
“Owati amosabote dai mitahi. Owa ene yama ani·oterani. Okobi ati ene yama ani·obisa, Okobi‑ka yama anini‑nima oka yama aniniteni.
20Okobi owa‑ya nofi nafi, yama nafi‑ya owa‑ya yofikane, owa ene kitamaro, Okobi ene owa ene kitawahabone, dai awiya, dai atibodi yama‑ya kadikawahaboneni.
21Mai aba mai‑ya Okobi nakitame‑nima onabone, mai‑ya owati nakitama mai onakitamabone, owa ene mai abaraboneni.
22Mai ihi‑ya Okobi kadikare, owa‑ya yosemarine, mai ihi okadikabisabonehe.
23Owa‑ya yosemari ene Okobi‑ya mai kahiyari‑nima owa‑ya mai kahiyarahareboneni. Owa‑ya mai kahiyari awira, Okobi owa‑ya yose‑mari‑ya mai kahiyaraharirani.
24Owati amosabote dai mitahi. Okobi owa‑ya yosemarine. Owati‑ya mai mita, Okobi ati‑ya mai nofa, mai abateraboneni. Mai ihi towe manakone oda haarabone, mai kome fawarabone‑ka mai tohami awirini, mai abarabone‑ka mai tohabisineni.
25Owati amosabote dai mitahi. Deoso Bidi ama·oni. Mai aba mai haa·oniya, mai kitamawahaboneni.
26Deoso kite, hini ene mai one kitamabone, mai one abarabone, Deoso hini ene Deoso kiti‑nima Deoso Bidi nane.
27Deoso ati ene dai‑ka Ayo neme‑ke dai ene‑ya kadikebonane. Hini dai ene‑nima dai manakone na daa·onaboneni.
28Dai atibodi yama‑ya kadikariyahi. Mai abamaro, hini mai tame‑ya mai sawe owati‑ya mai mitabone,
29 # 5:29 “Mai wee·obisaboneni.” Yama hani ati na, wara hirini‑ya mai kome fawaterabone tamine amani. owati‑ya mai mitiya, mai nafi kitamawahaboneni. Mai ihi amosamaro mai abaraboneni. Mai ihi amosaramaro mai wee·obisaboneni.
30Hini owati ihi tohara, Deoso ati ene mai ihi okadikabisaboneni. Owa‑ya yose‑mari ati‑nima mai‑ya wee·owahaboneni.
31Hini owa hare owa tamine okamina‑mani, owati dai nofariya, sibara neni.
32Owa tamine‑ya kaminahari, ati amosemarine.
33Yowaho Batita ati dai mitebona dai one‑ya dai yose, owa tamine yokana‑ya Yowaho kaminemarine.
34Ai owa ati noko·onira, Yowaho ati dai nokotonibisineni. Yowaho ati tamine okaminineni, ai komene fawaterabone‑kaya dai sawirabonehe.
35Nabarina wahi ai hawine‑ya yofikana‑nima Yowaho ne, Deoso hawine‑ya yofikanane. Faha fowe fa‑famaraba niya Yowaho dai‑ya yofikane ene dai ya‑yainamaroni.
36Yowaho ati amosi bi‑bidi nane. Okobi ene owa ene kitabote, owa ene dai awiya, Okobi owa‑ya yose‑mari dai watowahaboneni.
37Okobi owa‑ya yosemari, owa tamine‑ya hiyaremari, abano dai awarihi, ati dai mitarihi, dai teni.
38Owa‑ya yose‑mari ati dai atibodi‑ya foyaterene. Dai atibodi‑ya ati foye‑mana, owati dai nofa neni.
39Deoso‑ka yama hani dai kadika,
‘Ai abaterabone tamine oda mitaboneni.’ Dai ati na,
Deoso‑ka yama hani owa tamine‑ya kaminateni.
40Owa dai nofarani. Owa dai nofa‑mani, dai abara neni.
41Owa‑ya dai kahiyarabone bofe‑ya dai wi‑wina dai‑ya noko·onirani.
42Dai atibodi ati owatoni. Deoso dai nofarani.
43Okobi owa‑ya yosemari, owati dai nofara, bare hini ati‑ya kaminabiseya, ati dai nofabisebonane.
44Hini dai hinama dai ibi kahiyarabisa, Deoso dai‑ya kahiyarebona‑ya dai nokotonirani. Fara ihi owati dai nofarani.
45Okobi‑ya dai‑ya okahabanaraboneni. Mose‑ka yama hani dai‑ya kasomabone dai ati na, Mose‑ka yama hani ati dai tokadabara, Mose‑ka yama hani dai‑ya kahabanabisaboneni.
46Mose ati‑ya dai nofa‑mani, owati dai nofahare neni. Owa tamine‑ya i‑di Mose kanahanomarine.
47Mose‑ka yama hani ati‑ya dai nofara, owati‑ya dai nofaharirineni.” Yeso ati nemarine.
Currently Selected:
Yowaho 5: jaaNT
Highlight
Share
Copy
Want to have your highlights saved across all your devices? Sign up or sign in
