Yeso‑ka yo‑yose mai tamine 9
9
Yeso ati‑ya Saoro nofawahe
1I‑di Saoro, Yeso ati‑ya mai no‑nofa, mai‑ya ati nanahabe, Deoso‑ka yama‑bone‑ya mai da‑daa mai‑ka hidi‑ya toke,
2“Damaso‑ya Deoso‑ya mai hi‑hiyara‑ke yobe hidi mai‑ka yama hani‑ba owa‑ya daatinahi.
‘Yeso hawine‑ya mai ya‑yaka mai dai daanahi i‑di Saoro‑ya.’ Tika yama hani ati nahi.
Damaso‑ya owakamiya, mai hikadikiya, Yeso hawine‑ya mai ya‑yaka mai makidi mai fanawi toha na, mai wara·oniya, mai soki·oniya, Yerosare‑kaya mai owakamabani.” Saoro ati nemonane.
3Yama hani‑ya waratone, Damaso‑ya toke, Damaso‑ka hawi bai‑ya yakane, neme‑ya yama wahi kita, fai‑ya kobona,
4Yama wahi kita ihi sone, yama wahi‑ya ati kaki,
“Saoro, Saoro hini yamata‑ba owa‑ya bisitiniti?” Ati ne,
5“Ayo, eme tiwa oni niti?” Saoro ati ne,
“Yeso ama·oni, owa bisitinaro.” Ati ne.
6Saoro wawawakane,
“Hini yamata‑nima ona‑ba ama·oniti?” Saoro ati ne,
“Tiwaamisamiya, Damaso‑kaya tikahi. Tiwa‑ya mai hiyariya, yama tiwatowahaboneni.” Yeso ati nemonane.
7Saoro‑ya mai sawe, ati mai himite, abano mai hiaware, mai ati yanaramoneni.
8I‑di Saoro waamisame, noko weetokane, yama‑ya awami awire, yehe mai damahine, mai hiwakamane Damaso‑kaya.
9Damaso‑kaya amoni 3 tohe, yama‑ya awi awisare, tafarihi, faha‑ya fawarihi nemonane.
10Damaso‑ya Ananiya wine, Deoso ati‑ya nofe, wada‑nima yama na‑ya Yeso ati‑ya mite,
“Ananiya.” Yeso ati ne,
“Ayo, fara ama·oni.” Ananiya ati ne,
11“Hawi oni Hetekana toha‑ya Yoda‑ka yobe waari‑ya i‑di Saoro Taso‑ke wine, haatiyahi. Hibayata Deoso‑ya Saoro hiyarane.
12I‑di Saoro wada‑nima yama na‑ya awe, maki oni Ananiya tohe, koboneya awane. Wada‑ya Saoro tati‑ya yehe fori, yama‑ya awawahebonaha.” Yeso ati nane.
13“Ayo Yeso, Saoro tamine omitani. Yerosare‑ya tika mai dami‑ya i‑di Saoro ene amosarene.
14Damaso‑ya kamaki, tika yama‑bone‑ya mai da‑daa mai‑ka hidi‑ka yama hani ihi, tiwati‑ya oda no‑nofa oda‑ya wateya, Yerosare‑kaya oda‑ya towakamebonane.” Ananiya ati ne.
15“Tikamakihi. Saoro okadike, oka yama‑ya a‑ani tohawahebonane. Bara mai toha, Bara mai‑ka hidi mai toha, Isara·eo‑ka nodi mai toha na, mai‑ya owa tamine‑ya hiyarebonane.
16Owa tamine hiyari ene, mai bisihineya, yama bisini kome‑ya watowahebonane.” Yeso ati nane.
17Ananiya toke, Yoda‑ka yobe‑ya tokiyome, Saoro‑ya yehe fori,
“Soho Saoro, Yeso owa‑ya yosene, hawi‑ya yakatina, tiawemona, fare owa‑ya yose, yama‑ya tiawamatasabone, Deoso‑ka Doni tiwa‑ya sawiwahebonane.” Ananiya ati nemonane.
18Saoro‑ya Ananiya yehe fori, aba ataro‑nima yama na, fai noko‑ka sona, ihi noko amosawame, Saoro waamise, i‑di Ananiya habahinirisawahane.
19I‑di Saoro tafawahe, kitamatase, amoni fa‑famaraba ne‑ya, Damaso‑ya Yeso ati‑ya mai no‑nofa mai‑ya sawiwahe.
Yeso tamine‑ya Saoro kaminawahe
20Deoso‑ya mai hi‑hiyara‑ke yobe‑ya i‑di Saoro Yeso tamine‑ya hiyare,
“I‑di Yeso, Deoso Bidi amane.” Ati ne.
21Saoro ati‑ya mai mita, mai ibi hiyara,
“Ka! Yerosare‑ya Yeso ati‑ya mai no‑nofa mai‑ya Saoro nanahabe, ahi‑ya kamaki, mai‑ya wateya, Deoso‑ka yama‑bone‑ya mai da‑daa mai‑ka hidi mai‑ya mai‑ya towakamebona ati ne, fare amanaraniha?” Mai ati na,
22mahi‑nima Saoro kiti tonafi mai‑ya hiyare,
“Owati dai mita, Deoso‑ka Ka‑kadika i‑di Yeso tohe, dai watowahebonane.” Ati ne,
Ati‑ya Yodeo mai mita, mai ati fawanamoneni.
23Makobote Yodeo mai yorotokana mai ibi hiyara,
“Saoro ai nanahabahi.” Mai ati namoneni.
24Damaso‑ka tabora barikana‑ka nokobi‑kaya i‑di Saoro‑ya mai nimanineni, mai hinahabebonaha. Mai tamine Saoro mite,
25I‑di Saoro‑ya mai daba, yama soki‑ya Saoro‑ya mai towaka, Damaso‑ka awayara nemehe hodi‑ya hisiri‑ya mai hikanakise, tabora one‑kaya tokawahemonane.
Yerosare‑ya Saoro toke
26Makobote Yerosare‑ya toke, Yeso‑ka mai‑ya sibanane, mai‑ya dabawahebonaha. Saoro tamine‑ya mai mita, mai kakomehe.
“Yeso ati‑ya nofe‑mona keyehe‑ya hirine awane.” Mai atibodi ati namoneni.
27Saoro‑ya i‑di Banabe towakamane, Yeso‑ka yo‑yose mai‑ya yofikanebonaha.
“Hibati‑ya Damaso hawi‑ya, ai‑ka Ayo‑ya Saoro awe, ati himita hine, Damaso‑ya Yeso tamine‑ya mai‑ya hiyarane.” Banabe ati nemonane.
28Banabe ati ene, mai‑ya sawiwahe, Yerosare‑ya Yeso tamine‑ya kamine habo siitoremonane.
29Yodeo mai one, Kereko mai ati‑nima mai ati na, mai‑ya Yeso tamine‑ya hiyare ene mai ati yawa, fai‑ya mai ati nanahabamoneni.
30Mai tamine‑ya Yeso ati‑ya mai no‑nofa mai mita, Sesareya‑kaya mai hiwakame, hini tabaro‑ya tokomebona mai hiyose,
“Taso‑ya tikamahi.” Mai ati namoneni.
31Yodeya, Karireya, Samariya na‑ya, mai wi‑wina mai‑ya mai bisinami awira. Yeso ati‑ya mai no‑nofa mai dodamawahani. Deoso‑ka Doni mai‑ya kasome, Deoso ati‑ya mai tokadabamoneni.
Ene·asi, Tabita na, mai kitama
32Mai tabori dami‑ya Bedoro toke, sidadi oni Rida toha‑ya kobone, Yeso ati‑ya mai no‑nofa mai‑ya hiyarane.
33Rida‑ya ka‑kakone wine, oni i‑di Ene·asi tohe, faha fowe 8 kana‑ya yakare‑ya, i‑di Bedoro awe,
34“Ene·asi, Yeso Kirisito tiwa‑ya nakitamane, tiwaamisamiya, tika fo‑fori tinamosahi.” Bedoro ati ne,
Ene·asi waamisame,
35Rida‑ya mai wi‑wina, Sarona‑ya mai wi‑wina, mai na, Ene·asi kitame‑ya mai awa, Yeso ati‑ya mai nofawahamoneni.
36Yabe‑ya Tabita wina, oni one i‑di Doka toha, Yeso ati‑ya nofa, yama‑ya mai kihara, mai dami‑ya kasomateni.
37I‑di Tabita kiyana, abamakineni. Aboi mai sokohina, yobe nemehe‑ya mai hinaforineni.
38Rida‑ya Bedoro wine, tamine‑ya mai mita, mai fama mai‑ya mai yose,
“Yama yakari‑ya Bedoro wine, dai towamaki, dai dabama kanibote nayaho.” Mai ati namoneni.
39Bedoro eyehe mai kama, yobe nemehe‑ya mai tokomisama, mai fanawi honita toha, hibati‑ya mai‑ka yobote mai abamaro, mai‑ya Tabita ka‑kasoma, abawaha, tabiyo mai ohina, mai naha,
“Bedoro, oda‑ka bora i‑di Doka wamahinamaro, tiawahi.” Mai ati na.
40Bedoro mai‑ya yose,
“Dai tokomahi.” Ati ne.
Mai toka, mai nowati‑ya Bedoro yobati‑kaya itarise, Deoso‑ya hiyare, hiyari hawa tohe, Tabita‑ya haane,
“Tabita, tiwaamisamahi!” Ati ne,
Tabita noki weetokana, Bedoro‑ya awa, itarimisamamoneni.
41Bedoro Tabita yahi‑ya waratone, Tabita‑ya nawaamisame, mai fanawi honita‑ya haa, Yeso ati‑ya mai no‑nofa mai‑ya haa ne, mai kamake,
“Tabita kitama, dai awahi.” Ati nemonane.
42Yabe‑ya mai wi‑wina, Tabita kitama tamine‑ya mai mita, Yeso ati‑ya mai dami nofawahineni.
43Yabe‑ya Bedoro wine, amoni dame‑ya bani ataro‑ya wa‑wama‑ka yobe‑ya winane. Bani ataro‑ya wa‑wama oni i‑di Simaho tohane.
Currently Selected:
Yeso‑ka yo‑yose mai tamine 9: jaaNT
Highlight
Share
Copy
Want to have your highlights saved across all your devices? Sign up or sign in
