Yeso‑ka yo‑yose mai tamine 8

Yeso‑ka mai‑ya Saoro kakowahe

1Tefaho abe‑ya i‑di Saoro awe, ya‑yaine. Yerosare‑ya mai wi‑wina Yeso ati‑ya mai no‑nofa mai‑ya mai bisinawaha, mai ihi tabora bide‑kaya mai tokawaha, Yodeya‑kaya mai one toka, Samariya‑kaya mai one toka na, Yeso‑ka yo‑yose mai‑ta mai kanani awirani.

2Deoso ati‑ya mai no‑nofa Tefaho abo‑ya mai kama, mai ohinadineni.

3I‑di Saoro yawe, Yeso ati‑ya mai no‑nofa mai‑ya kako, mai nafi‑ka yobe‑ya toke, mai makidi, mai fanawi na‑ya waratone, mai horokani tokomane, kadeya‑ya mai mookanabonehe.

Deoso ati‑ya Firibi kaminane Samariya‑ya

4Tabora bide‑ya mai toka, Yeso ati‑ya mai kaminamoneni.

5Samariya‑kaya i‑di Firibi toke, Kirisito tamine‑ya mai‑ya hiyarane.

6Firibi ati‑ya mai dama mai mita, ene kite mai hiawa, ati mai atibodi hikadika hine,

7Madi towe mai‑ya mai foya, Firibi ati ene mai eekana mai toka, mai one kiyana, mai kitama, mai one ka‑kakona‑maro, Firibi ati ene mai yakanawaha nani.

8Firibi ene mai ya‑yaini nafineni, Samariya‑karo.

Simaho inawa

9Simaho Samariya‑kaya wi‑wina,

“Inawa oha, oka yama kitateni.” Ati ne.

Ati‑ya mai mita, ene kite mai hiawa hine, mai awatokana,

10Yinero‑ya mai kihara mai toha, yinero nafi‑ya mai kiha mai toha na, Simaho ati‑ya mai nafi nofa, ene mai hiawa hine,

“Deoso kitabote ene‑nima ene nane.” Mai ati nineni.

11Mai amoni damiya, Simaho‑ka yama ihi‑mone‑ya mai awa, ati mai hikadabatene.

12Yeso tamine Deoso ai nafi‑ka hidi‑bona tamine ne‑ya Firibi kamine, ati‑ya mai mita, mai makidi mai fanawi na, Yeso ati‑ya mai nofawaha, Firibi mai‑ya habanirisawahane.

13Makobote i‑di Simaho, Yeso ati‑ya nofawahe, i‑di Firibi habahinirise, i‑di Firibi‑ya sawiwahe, i‑di Firibi ene‑ya awe,

“Ka!” Ati ne,

awatokawahemonane.

14Yerosare‑kaya Yeso‑ka yo‑yose mai wina, Samariya‑kaya mai wi‑wina Deoso ati‑ya mai nofawahamone, mai tamine‑ya Yeso‑ka yo‑yose mai mita, Bedoro, Yowaho mai fama, mai‑ya mai yose,

“Samariya‑ya mai wi‑wina mai dai tonakahi!” Mai ati na,

15Samariya‑ya mai kobokana, Deoso‑ya mai hiyara,

“Abi Deoso, Tika Doni mai‑ya sawiyaho.” Mai ati namoneni.

16Yeso ati‑ya mai nofa, Yeso‑ka mai toha, mai‑ya Firibi habanirise, Deoso‑ka Doni mai‑ya sawi awisare, Deoso‑ya mai tamine‑ya Bedoro mai hiyaramoneni.

17Mai‑ya mai yahi fore, Deoso‑ka Doni mai‑ya sawiwahemonane.

18Mai‑ya Yeso‑ka yo‑yose mai yahi fore, mai ihi Deoso‑ka Doni mai‑ya sawiwahe‑ya Simaho awe, yinero‑ya mai‑ya daanebona ati ne,

19“Bedoro, Yowaho dai ene‑nima owa ene nabone, owa dai kanawatoya, dai‑ka yinero‑ba daa·onabani. Mai‑ya owa yehe foriya, Deoso‑ka Doni mai‑ya sawibonane.” Simaho ati ne.

20Ati‑ya Bedoro mite, ati yanane,

“Yama Deoso‑ka da‑daa tikanikabone tina, tiwati ihi ti·aba, tika yinero aba nebonane. Deoso‑ka yama daahinaya, yinero‑ya ai kanikaterani.

21Haa‑nima tiwa ene teraboneni. Deoso‑ya tiwatibodi amosi awisarani.

22Deoso‑ya tiwatibodi ati amosara tamine tikamini bahiya, tiwa‑ya ati somawameba awane.

23Tiwatibodi bida toha, tiwa ene amosara tiwa‑ya yaditoneni.” Bedoro ati ne.

24“Ai‑ka Ayo‑ya owa tamine dai hiyarahi, dai ati‑nima yama na owa‑ya koborabonehe.” Simaho ati nemonane.

25I‑di Bedoro i‑di Yowaho mai fama, Deoso Ati Amosabote‑ya mai kamini hawa toha, Yerosare‑kaya mai towakamatasa, hawi‑ya mai yakakana, Samaritano mai tabori‑ya mai kobokana, Yeso tamine‑ya mai kaminineni.

Eti·obi‑ke owa‑ya Firibi hiyarane

26Deoso‑ka yo‑yose i‑di Firibi‑ya hiyare,

“Bato‑kaya tikamakihi. Yerosare‑ka hawi‑ya Kasa‑ka hawi waana‑ya tikamakiyahi.” Deoso‑ka yo‑yose ati ne.

Kasa‑ka hawi‑ya mai winaterani.

27Firibi toke, Kasa‑ka hawi‑ya yakaneya, Eti·obi‑ke hidi‑ka yinero‑ya na‑nawada kakamaki‑ya awane. Eti·obi‑ke hidi fana Kadasi toha, Kadasi‑ka yinero‑ya maki na‑nawade‑bona ene dene noko mai hinahabemata. Deoso ati‑ya nofe, hibati‑ya Yerosare‑ya toke, Deoso‑ya hiyare, hiyari hawa tohe, tabora‑ya winitoname, tokomane.

28Kafaro ho‑horokana‑ya itari, Isa·iya‑ka yama hani‑ya kadike,

29“Firibi, kafaro ho‑horokana yakari‑ya yakatinahi.” Deoso‑ka Doni ati ne,

30Firibi kanani tokomaki, Isa·iya‑ka yama hani‑ya maki kadike, ati‑ya mite,

“Yama hani tikadika tiwatoneni?” Firibi ati ne.

31“Yama hani owato awirini. Owa‑ya mai kanawatora, yama owatoterani. Owa tikanawataba, tikamisahi. Owa yowi‑ya tiwitarihi.” Yinero‑ya na‑nawada ati ne.

32Deoso‑ka yama hani ati hikadika eya ati na,

‘Kaneiro mai mai hinahababone, mai‑ya mai towakama, mai‑nima mai hiwakamane. Kaneiro bidi mai kone mai seohina, mai ati yanara, mai‑nima mai hinahabe, ati yanarene.

33Ene amose, noko mai firohine, hidi hikasomare, bidi wadare tamine ai hiyarariyahi. Mai hinahabane.’ Deoso‑ka yama hani ati nineni.

34Firibi‑ya hiyare,

“Ebeni‑ke tamine‑ya yama hani hiyara? Isa·iya hini tamine‑ya kanahano, bare tamine toha nabaya? Yama owato awirini.” Yinero‑ya na‑nawada ati ne.

35“Yeso tamine‑ya Isa·iya kanahanomatane.” Firibi ati ne,

Yeso Ati Amosabote nafi‑ya kaminamakine.

36Kafaro mai‑ya horokane, mai ibi hi‑hiyara tosina, wara widi‑ya mai kobokana,

“A‑ahi‑ya faha ita‑ya owa habatinirisakaribana?” Yinero‑ya na‑nawada ati ne.

37“Yeso ati nafi tinofiya, tiwa haba·onirisabani.” Firibi ati ne.

“Deoso Bidi i‑di Yeso Kirisito ati onofawahani.” Ati ne.

38Ati ene kafaro maatowiti, mai towakifawaha, Firibi habahinirisemonane.

39Mai kakamorosama, Deoso‑ka Doni i‑di Firibi‑ya towakame, Firibi‑ya awamare, kafaro ho‑horokana‑ya foyame, ya‑yaine. Hini tabaro‑ya tokomematane.

40Deoso‑ka Doni ene Asoto‑ya Firibi kobone, yananamatase, hini tabaro Sesareya‑ya tokome, Sesareya‑ka hawi‑ya mai kobohine, Yeso Ati Amosabote‑ya mai‑ya hiyare, tokome, hini tabaro‑ya kobotonamemonane.

Currently Selected:

Yeso‑ka yo‑yose mai tamine 8: jaaNT

Highlight

Copy