Yeso‑ka yo‑yose mai tamine 21
21
Yerosare‑ya Baoro tokawahe
1Mai‑ya oda haana,
“Oda tokini, oda tokini.” Oda ati na.
Maboro‑ya oda foya, Kosi‑ya oda towaka, Kosi oda fiyakana, mahi owa‑ya Hode‑ya oda kobokana, oda towakatasa, Batara‑ya oda kobokana,
2Batara‑ya maboro owa‑ya oda foya, Fenisiya‑ya maboro tokebona, oda foyawaha, oda towaka,
3Sibe yakari‑ya oda kobokana, oda‑ka sayo‑kaya Sibe itaya, oda fiyakana, Siriya‑ya oda towakabone, Siriya‑ka tabora oni Tiro toha, Tiro‑ya oda kobokana, maboro‑ka yama‑ya mai daanabone, yama‑ya mai yama tokamorosa oda tokomorosamake,
4Tiro‑ya Yeso‑ka mai one wina, mai tabori‑ya oda amoni 7 toha, Baoro‑ya mai hiyara,
“Baoro, Yerosare‑ya tikarabone Deoso‑ka Doni ati nene.” Mai ati namaroni.
5Oda yananama, faha widi‑ya oda tokoma, oda‑ya mai sawineni. Mai makidi, mai fanawi, madehe na, faha widi‑ya oda kobona, Deoso oda hiyarabone, oda yobati‑kaya oda naha, Deoso oda hiyaramatasineni.
6“Oda tokini. Oda tokini.” Oda ati na,
Maboro‑ya oda foya, mai tabori‑ya mai tokomabisani.
7Maboro‑ya oda towaka, Toremaida‑ya oda kobokana, Yeso‑ka mai one‑ya oda hiyara, mai tabori‑ya oda amoni ohareni.
8Mahi owa‑ya oda towakatasa, Sesareya‑ya oda kobokana, Firibi‑ka yobe‑ya oda wina, hibati‑ya mai 7 tohabone mai i‑di Bedoro mai hikadikamaro, fare i‑di Firibi ohari Yeso tamine‑ya hiyaratene.
9Firibi‑ka fana atona mai 4 kana mai fani awira, Deoso tamine‑ya mai hiyarateni.
10Firibi‑ka yobe‑ya oda wina, oda amoni dami‑ya Yodeya‑ya Deoso ati‑ya mi‑mita i‑di Akabo kame,
11I‑di Baoro‑ka sitaraho‑ya waratone, hini teme‑ya soki, mano‑ya soki ne, ati yanane,
“Deoso‑ka Doni ati dai mitahi.
‘Haa‑nima sitaraho hidi‑ya mai sokini naboneni. Yerosare‑ya tokeya, mai sokihineya, Bara mai‑ya mai daahinebonane.’ Ati ne.” Akabo ati nemarine.
12Akabo ati oda mita, Baoro‑ya oda ati barina,
“Yerosare‑ya tikariyahi.” Oda ati namaroni.
13“Hini yamata ihi dai ohina? Dai ati ene owatibodi koma, Yerosare‑ya owa‑ya mai sokiniya, sibaraboneni. Yeso tamine ene owa‑ya mai nanahabiya, o·abiya, sibaraboneni.” Baoro ati nemarine.
14Oda ati‑ya Baoro nofare,
“Sibarini. Yeso ati‑nima tinahi.” Oda ati na.
Oda ati fawanamaroni.
15Makobote oda‑ka yama oda teena, Yerosare‑kaya oda tokatema,
16Sesareya‑ka mai one oda‑ya daba, Yerosare‑ya oda toka, i‑di Manaso‑ka yobe‑ya oda‑ya mai towakamamaroni, oda winabonehe. Hibati‑ya Sibe‑ya i‑di Manaso winemari, Yerosare‑ya winawahe, hika yobe‑ya oda winawahamaroni. Yeso ati‑ya i‑di Manaso nofane.
Tiyako‑ya Baoro hiyarane
17Yerosare‑ya oda kobona, Yeso‑ka mai ya‑yainineni.
18Mahi owa‑ya Baoro oda toka, i‑di Tiyako oda hiyarabone, I‑di Tiyako oda hiyara, Yeso‑ka bote mai toha na,
19Mai nafi‑ya Baoro hiyare,
“Bara mai‑ya oka, Deoso tamine okamine, mai‑ya ohiyara, Deoso ene kite damemarine.” Ati ne.
Deoso ene kite dame tamine‑ya Baoro kadikemarine.
20Baoro ati‑ya mai mita, Deoso‑ya mai kahiyara, Baoro‑ya mai hiyara,
“Soho, oda ati timitahi. Yodeo mai dama Yeso ati‑ya mai nofawaha, Mose ati‑ya mai nofahari na, Mose ati‑nima mai teni.
21Tiwa tamine‑mone‑ya mai mita, Bara mai tabori‑ya tisawiya, Yodeo mai one‑ya tihiyaramone,
‘Dai‑ka madehe sowiri tati atori dai wisinakosariyahi. Mose ati‑nima dai riyahi.’ Titemone mai ati teni.
22Tikama, tiwa tamine‑ya mai mitibaka amani. Hini yamata‑nima ai nibati?
23Baoro, oda ati‑nima tiyahi. Ai‑ka mai 4 toha, Deoso ati ene hini mai‑ya mai ati barinineni.
24Mose ati‑mata‑nima mai afinaboneni. Mai tati kone nafi ababone, mai‑nima tiyahi. Tiwa tati kone aba, mai tati kone aba na, manakone tinahaba tiyahi. Tiwa ene‑ya mai awiya,
‘Mose ati‑nima i‑di Baoro ene nane.’ Mai ati naboneni.
Tiwa ene‑ya mai awiya, yama‑ya mai watowahaboneni.
25Mose ati‑ya Bara mai tokadabara, mai sibarineni. Hibati‑ya mai tamine oda kanahanamaroni. Mai‑ka deoso bare tefe‑ya mai kabarihi, ama‑ya mai kabarihi, bani emene abi awire‑ya mai kabarihi, mai fanawi one‑ya mai aharihi, haa‑nima mai niya, mai sibaraboneni. Yodeo mai‑ta Mose ati‑nima mai teboneni.” Tiyako ati nemarine.
26Mahi owa‑ya Baoro mai eyehe afine, mai afini hawa toha, Deoso‑ka yobe‑ya mai toka, mai tamine‑ya Baoro hiyare,
“Makobote oda afinamatasiya, oda kamabani. Oda kamatasiya, Deoso‑ka yama‑ba oda daanaboneni.” Ati nemarine.
Baoro‑ya mai waratona
27Oda amoni 7 tohi yananiya, Deoso‑ka yobe‑ya Baoro waiya, Asiya‑ka Yodeo mai one kamake, mai ati yawa, mai ihi mai one nafi ati yawawaha, Baoro‑ya mai waratoneni.
28Mai ibi haana,
“Isara·eo‑ka nodi dai toha, oda dai kasomahi. Hai, mai tabori dami‑ya toke, mai‑ya hiyare,
‘Mose ati‑nima dai rihi, Yodeo mai‑nima dai rihi, Deoso tabaro‑ya dai tokarihi dai nahi.’ Ati tene.
Fare ahi‑ya Deoso‑ka yobe‑ya Kereko mai‑ya kakame ene Deoso ati yawawahane.” Mai ati namaroni.
29Hibati‑ya Yerosare bai‑ya Efesiyo‑ka owa i‑di Tirofimo, Baoro‑ya fame‑ya mai awa, Deoso‑ka yobe‑ya i‑di Tirofimo‑ya kakame awane, mai atibodi ati namoneni.
30Mai ati ihi mai nafi yorotokana, mai yawa, Baoro‑ya mai waratona, Deoso‑ka yobe yowi‑ya Baoro horoniya mai tokoma, Deoso‑ka yobe nokobiri‑ya mai barikaneni.
31Baoro‑ya mai nabohabone, mai tamine‑ya sodado mai‑ka hidi mite,
“Yerosare‑ka mai nafi yorotokana, mai yawi kitamoneni.” Mai ati namoneni.
32Hika sodado mai eyehe kanani tokomaki, sodado mai‑ya mai awa, Baoro‑ya mai bisinami awirani.
33Sodado mai‑ka hidi Baoro‑ya damane, sodado mai‑ya haane,
“Koheti fame‑ya dai sokinaho.” Ati nane.
Mai yorotokana mai‑ya haane,
“Oni emenati?
Hini yamata ihi dai waratonati?” Ati nemarine.
34Hini ene tohene, mai one ati nihi, yama bara ihi amani, mai one ati nihi na, yama‑ya mai watora. Mai ati dama mai ati ihi sodado mai‑ka hidi mai ati‑ya mitare, sodado mai‑ya yose,
“Hini dai wi‑wina‑kaya dai towakamaho.” Ati nemarine.
35Sodado hini mai‑ka yobe‑ya Baoro‑ya mai towakamaboneni. Mai dama mai yawa, mai ihi Baoro‑ya sodado mai diwanineni.
36Baoro‑ya Sodado mai towakama, mai nowati‑ya mai dama mai tokomake,
“Abaho, abaho.” Mai ati namaroni.
Baoro mai‑ya hiyare
37Yobe‑ya mai hiwakamebona, sodado mai‑ka hidi‑ya hiyare,
“Owati timitahi.” Ati ne.
“Kereko mai ati tiwatoneni?
38Eyito‑ka mai‑ka owa amatini? Hibati‑ya 4000 mai kana mai one‑ya mai nanahaba, kabani‑kaya mai tokoma, fara mai‑ka hidi amatiraniha?” Sodado mai‑ka hidi ati nemarine.
39“Yodeo ama·oni. Tabora webote Sirisiya‑ka tabora ba‑basi na oni Taso‑ya owadamaroni. Tiwati sibariya, mai ohiyaraboneni.” Baoro ati nemarine.
40“Sibarini. Mai tihiyarahi.” Sodado mai‑ka hidi ati nemarine.
Yobe nokobiri‑ya Baoro wai,
“Dai ati fawanahi.” Baoro yehe ati ne.
Mai ati fawana, mai‑ya hiyaremarine. Ebereo mai ati‑ya mai‑ya hiyaremarine.
Currently Selected:
Yeso‑ka yo‑yose mai tamine 21: jaaNT
Highlight
Share
Copy
Want to have your highlights saved across all your devices? Sign up or sign in
