ལུ་ཀ་ལེའུ་ 4

བདུད་ཀྱིས་ཡེ་ཤུ་གི་ཐུགས་ཚོད་བལྟ་བའི་སྐོར།

1ཡེ་ཤུ་དམ་པའི་ཐུགས་ཉིད་ཀྱིས་གང་སྟེ་ གཙང་ཆུ་ ཡཱོར་དཱན་ལས་ལོག་འབྱོནམ་ད་ དམ་པའི་ཐུགས་ཉིད་ཀྱིས་རྒྱུད་བསྐུལ་བརྐྱབས་ཏེ་ ཁོ་རི་སྟོང་ནང་ལུ་བྱོན་ཏེ། 2ཉིན་ཞག་བཞི་བཅུ་ཚུན་ཚོད་ རི་སྟོང་ནང་ལུ་བདུད་ཀྱིས་ཁོ་ལུ་ཐུགས་ཚོད་བལྟ་ནུག་ དུས་ཚོད་དེའི་སྐབས་ལུ་ཁོ་གིས་ གསོལཝ་ལ་སོགས་པ་ག་ཅི་ཡང་མ་བཞེས་པས་ དེ་ལས་ཉིན་ཞག་བཞི་བཅུ་ཚངམ་ད་ ཁོ་གསོལཝ་སྨྱུང་སྟེ། 3བདུད་ཀྱིས་ཁོ་ལུ་ ནཱ་དཀོན་མཆོག་གི་སྲས་ཨིན་པ་ཅིན་ རྡོ་འདི་ཏད་ཟས་ལུ་འགྱུར་ནི་གི་བཀའ་གནང་ཟེར་ཞུ་ནུག 4ཡེ་ཤུ་གིས།

མི་དེ་ཚུ་བཞེས་སྒོ་རྐྱངམ་གཅིག་ལུ་བརྟེན་ཏེ་ གསོན་པོ་སྦེ་སྡོདཔ་མེན་ཟེར་#༤:༤། དུ་ཏེ་རོ་ནོ་མི་ ༨:༣།

གསུང་རབ་ནང་བྲིས་ཏེ་ཡོད་ཟེར་གསུངས་ནུག 5ད་རུང་བདུད་ཀྱིས་ཡེ་ཤུ་ལུ་ ས་མཐོ་ས་གཅིག་གི་གུ་འཁྱིད་དེ་ ཡུདཔ་ཐེངས་གཅིག་གི་ནང་ འཛམ་བུ་གླིང་གི་རྒྱལ་ཁབ་ག་ར་བཏོན་ཏེ། 6བདུད་ཀྱིས་ཨ་ནི་འཛམ་བུ་གླིང་གི་དཔལ་འབྱོར་དང་ དབང་ཚད་ག་ར་ནཱ་ལུ་ཕུལ་ནི་ཨིན་ ག་ཅི་སྨོ་ཟེར་བ་ཅིན་ འདི་ངེ་གི་དབང་ཚད་ནང་ཡོད་ ང་གིས་ག་དགའ་མི་དེ་ལུ་བྱིན་ཐག་ཆོག 7ནཱ་གིས་ང་ལུ་ཕྱག་འཚལ་ཏེ་བསྟོད་པ་གནང་པ་ཅིན་ དེ་ག་ར་ནཱ་གིས་ཐོབ་འོང་ཟེར་ཞུ་ནུག 8དེའི་ལན་ལུ་ཡེ་ཤུ་གིས།

ཁྱོད་རང་གི་གཙོ་བོ་དཀོན་མཆོག་རྐྱངམ་གཅིག་ལུ་ བསྟོད་པ་ཕུལ་ཏེ་ཁོ་ལུ་ཕྱག་ཞུ་ཟེར་#༤:༨། དུ་ཏེ་རོ་ནོ་མི་ ༦:༡༣།

གསུང་རབ་ནང་བྲིས་ཏེ་ཡོད་ཟེར་གསུངས་ནུག 9དེ་ལས་ད་རུང་བདུད་དེ་གིས་ཡེ་ཤུ་ ཡེ་རུ་ཤ་ལེམ་ལུ་འཁྱིད་དེ་ མཆོད་ཁང་གི་དབུ་རྩེ་གུ་བཀལ་ཏེ་ ནཱ་དཀོན་མཆོག་གི་སྲས་ཨིན་པ་ཅིན་ ནཱ་ལས་མར་མཆོངས། 10ག་ཅི་སྨོ་ཟེར་བ་ཅིན་གསུང་རབ་ནང་ལུ་དེ་སྦེ་བྲིས་ཏེ་འདུག

དཀོན་མཆོག་ཁོ་རང་གི་ཕོ་ཉ་ཚུ་ལུ་ བཀའ་གནང་སྟེ། 11ཁོང་གིས་ཁྱོད་ལུ་ལག་པར་བཟུང་སྟེ་ རྐངམ་མར་རྡོ་གུ་རྩ་ལས་རང་ ཕོག་མི་བཅུག་ཟེར་#༤:༡༡། མགུར་མ་ ༩༡:༡༡,༡༢།

བདུད་ཀྱིས་ཞུ་ནུག 12དེ་འབདཝ་ད་ཡེ་ཤུ་གིས།

ཁྱོད་ཀྱིས་རང་གི་གཙོ་བོ་དཀོན་མཆོག་ལུ་ ཐུགས་ཚོད་མ་བལྟ་ཟེར་#༤:༡༢། དུ་ཏེ་རོ་ནོ་མི་ ༦:༡༦།

གསུང་རབ་ནང་བྲིས་ཏེ་ཡོད་ ཟེར་གསུངས་ནུག 13བདུད་ཀྱིས་ཡེ་ཤུ་གི་ཐུགས་ཚོད་བལྟ་ཚར་ཞིནམ་ལས་ ཡེ་ཤུ་བཞག་སྟེ་ཡར་སོང་ནུག་ དེ་འབདཝ་ད་ ལོག་གོ་སྐབས་མ་ཐོབ་ཚུན་ཚོད་སྒུག་སྡོད་ནུག།

ཡེ་ཤུ་གིས་ ག་ལི་ལི་ལུང་ཕྱོགས་ལུ་ཕྱག་ལཱ་འགོ་བཙུགས་པའི་སྐོར།

14ཡེ་ཤུ་ཐུགས་ཉིད་ཀྱི་སྟོབས་ཤུགས་དང་ལྡན་ཏེ་ ག་ལི་ལི་ལུང་ཕྱོགས་ལུ་ལོག་འབྱོནམ་ད་ གཡུས་ག་ར་ནང་ཁོ་གི་སྙན་གྲགས་ཁྱབ་ནུག 15སི་ན་གོག་དེ་ཚུ་ནང་ཆོས་སྟོན་གནང་སྟེ་ མི་ག་ར་གིས་ཁོ་ལུ་བསྟོད་པ་ཕུལ་ནུག།

ཡེ་ཤུ་ཁོ་རང་གི་མི་ཚུ་གིས་ཆ་མ་བཞག་པའི་སྐོར།

16ཡེ་ཤུ་ཁོ་རང་གི་ཁྲོམ་ ན་ཟ་རཱེད་ལུ་ལོག་བྱོན་ཏེ་ ཨ་རྟག་རང་ ཁོ་རང་གི་ལུགས་སྲོལ་དེ་སྦེ་ཨིནམ་ལས་ ངལ་འཚོ་བའི་ཉིན་མ་ སི་ན་གོག་ནང་ལུ་བྱོན་ཏེ་ གསུང་རབ་ལྷག་ནིའི་དོན་ལུ་ཡར་བཞེངས་ཏེ། 17ལུང་སྟོན་པ་ ཨའི་ཟ་ཡ་གིས་བྲིས་མི་ དཔེ་ཆ་ཤོག་དྲིལ་ཁོ་ལུ་ཕུལ་ཏེ་ ཁོ་གིས་དཔེ་ཆ་ཤོག་དྲིལ་ཁ་ཕྱེཝ་ད་ ཁོ་གིས་འཚོལ་མི་ཚིག་འདི་ཐོབ་སྟེ་ དེ་སྦེ་ལྷག་གནང་ནུག

18གཙོ་བོ་གིས་ང་ལུ་བཙག་འཐུ་མཛད་གནང་སྟེ་ ཁོ་གི་ཐུགས་ཉིད་ ངེའི་གུ་བཞུགས་ཡོད་ འདི་ག་ར་གཏམ་བཟང་ བཤད་ནི་གི་དོན་ལུ་ཨིན་ གཏམ་བཟང་འདི་བཙོན་པ་ཚུ་ལུ་ ཐར་པ་ཐོབ་ནི་གི་དོན་ལུ་དང་ ཞརཝ་ཚུ་མཐོང་ཚུགསཔ་ བཟོ་ནི་གི་དོན་ལུ་ མར་མནེམ་བཞག་མི་ཚུ་ལུ་ ཐར་གཏང་ནི་གི་དོན་ལུ་ཨིན། 19གཙོ་བོའི་ཐུགས་རྗེ་འདི་གིས་ མི་ཚུ་སྐྱབས་མཛད་པའི་དོན་ལུ་ ང་ལུ་གཏམ་བཟང་འདི་ བཤད་པ་གཏང་གནང་ཡི་ཟེར་#༤:༡༩། ཨའི་ཟ་ཡ་ ༦༡:༡,༢།

དེ་སྦེ་ལྷག་གནང་ནུག 20ཆོས་ལྷག་ཚརཝ་ད་དཔེ་ཆ་དེ་ ད་རུང་ཤོག་དྲིལ་ཡར་ལོག་སྒྲིལ་ཏེ་ ཆོས་གཡོགཔོ་གཅིག་ལུ་གནང་སྦེ་ ཁོ་རང་མར་ས་ཁར་བཞུགས་ནུག་ སི་ན་གོག་ནང་ཡོད་མི་ག་ར་གིས་ ཐད་རི་བ་རི་ཁོ་གི་ཞལ་བལྟ་སྟེ་སྡོདཔ་ད། 21ཁོ་གིས་ཁོང་ལུ་ ད་རིས་ཁྱེད་ཀྱིས་གོ་དོཝ་བཟུམ་སྦེ་རང་ང་གིས་ལྷག་མི་གསུང་རབ་འདི་ ག་ར་དོན་དག་གྲུབ་ཅི་ཟེར་གསུངས་ནུག 22མི་ག་ར་གིས་ ཁོ་གི་སྐོར་ལས་བསྟོད་པ་བརྐྱབས་ནུག་ ཁོ་གི་བློ་སླབ་ཐངས་འདི་ཧན་ཏོང་ཏོ་འདུག་ ཁོ་ ཡོ་སེབ་ཀྱི་བུ་ཨིན་མེན་ན་ འདི་ག་དེ་སྦེ་ཨིན་ན་ཟེར་སླབ་སྟེ་མི་ག་ར་ཧ་ལས་ནུག

23ཡེ་ཤུ་གིས་མི་ཚུ་ལུ་དཔེ་གཏམ་འདི་བཟུམ་སྦེ་ ཐད་རི་བ་རི་ཁྱེད་ཀྱིས་ང་ལུ་སླབ་འོང་ དྲུང་འཚོ་ཁྱོད་རང་ལུ་དྲགཔ་བཟོ་ཞིག་ ཁྱོད་ཀྱིས་ ཀ་ཕཱར་ནུམ་ལུ་མཛད་མི་དེ་ ང་བཅས་ཀྱིས་གོ་ཡི་ འདི་ནཱ་རང་གི་གཡུས་ཁ་ལུ་ཡང་འབད་ཟེར་ ཁྱེད་ཀྱིས་སླབ་འོང་ཟེར་གསུངས་ནུག 24ད་རུང་ཁོ་གིས་མི་ཚུ་ལུ་ ང་གིས་ཁྱེད་ལུ་དོན་ལས་རང་སླབ་དོ་ ལུང་སྟོན་པ་ག་ལུ་རང་འབད་རུང་ རང་གི་གཡུས་ཁ་གི་མི་ཚུ་གིས་ ཁོ་ལུ་དགའ་མི་བཏུབ།

25ང་གིས་ཁྱེད་ལུ་དོན་ལས་རང་སླབ་ཨིན་ ལུང་སྟོན་པ་ ཨེ་ལི་ཡ་གི་སྐབས་ལུ་ ལོ་གསུམ་དང་ཕྱེད་ཆར་ཆུ་མེད་པར་ ས་གཞི་ག་ར་ནང་མུ་གེ་ཤུགས་སྦེ་འབྱུངམ་ད་ ཨཱིས་ར་ཨཱེལ་ལུ་ཨམ་སྲུ་ཡུགས་ས་མོ་ལེ་ཤ་ལུ་ ཆ་རོགས་འབད་དགོཔ་ཡོདཔ་ཨིན་མས། 26དེ་འབདཝ་ད་ ཁོང་གི་དོན་ལུ་ ཨེ་ལི་ཡ་ལུ་མ་གཏང་པར་ སི་དོན་གྱི་ཁྲོམ་ཁར་ ཟ་རེ་ཕཱད་ལུ་སྡོད་མིའི་ཡུགས་ས་མོ་འབད་སར་རྐྱངམ་གཅིག་གཏང་ནུག 27ལུང་སྟོན་པ་ ཨེ་ལི་ཤ་གི་སྐབས་ལུ་ ཨཱིས་ར་ཨཱེལ་ལུ་ མཛེ་ནད་ན་མི་ལེ་ཤ་ཡོདཔ་ཨིན་མས་ མཛེ་ནད་ན་མི་འདི་ཚུ་གཅིག་ཡང་དྲགཔ་མ་བཟོ་བས་ དེ་འབདཝ་ད་ ལུང་ཕྱོགས་ སི་རི་ཡ་ལས་འོང་མིའི་ ནའ་མཱན་ཟེར་མི་དེ་ལུ་རྐྱངམ་གཅིག་ དྲགཔ་བཟོ་ནུག་ཟེར་གསུངས་ནུག 28སི་ན་གོག་ནང་གི་མི་ཚུ་གིས་འདི་གོཝ་ད་ གནམ་མེད་ས་མེད་ཙིགཔ་ཟ་སྟེ། 29ཁོང་ག་ར་གིས་ཡེ་ཤུ་ལུ་ཁྲོམ་ཁར་ལས་ཕྱི་ཁར་བཏོན་ཏེ་ ཁོང་གི་ཁྲོམ་ཆགས་སའི་རི་གུ་འཁྱིད་དེ་ བྱག་གི་གུ་ལས་མར་བཀོ་ནི་འབད་ནུག 30དེ་འབདཝ་ད་ ཡེ་ཤུ་ཁོང་གི་སྦུག་ལས་ཐོན་ཏེ་བྱོན་ནུག།

ཡེ་ཤུ་གིས་འདྲེ་གདོན་བཏོན་བདའ་བའི་སྐོར།

31ཡེ་ཤུ་ ག་ལི་ལི་གི་ཁྲོམ་ ཀ་ཕཱར་ནུམ་ལུ་བྱོན་ཏེ་ ངལ་འཚོ་བའི་ཉིན་མ་མི་ཚུ་ལུ་ཆོས་སྟོན་གནངམ་ད། 32ཁོང་ག་ར་ཧ་ལས་ནུག་ ག་ཅི་སྨོ་ཟེར་བ་ཅིན་ ཁོ་གི་ཆོས་སྟོན་ཐངས་འདི་ དབང་ཚད་ཅན་སྦེ་ཨིན་མས། 33འདིའི་སྐབས་ལུ་ སི་ན་གོག་ནང་འདྲེ་གདོན་འཛུལ་མི་གཅིག་འོངས་ཏེ་ ཁོ་གིས་སྐད་སྦོམ་སྦེ་བརྐྱབས་ཏེ། 34ན་ཟ་རཱེད་ཀྱི་ཡེ་ཤུ་ ནཱ་ང་བཅས་ལས་ག་ཅི་དགོ་ནི་སྨོ་ ནཱ་ང་བཅས་ལུ་རྩ་མེད་གཏང་པ་བྱོནམ་ཨིན་ན་ ནཱ་ག་ཨིན་ན་ང་གིས་ཤེས་ ནཱ་དཀོན་མཆོག་ལས་བྱོན་མིའི་ དམ་པ་གཅིག་ཨིན་མས་ཟེར་ཞུཝ་ད། 35ཡེ་ཤུ་གིས་ ཁྱོད་ཁ་བཙུམ་སྟེ་ཁོ་གི་ནང་ན་ལས་ཐོན་སོང་ཟེར་བཀའ་བཀྱོན་གནང་ནུག་ མི་དམངས་ཀྱི་སྦུག་ལུ་ འདྲེ་དེ་གིས་མི་འདི་མར་བརྡབས་ཏེ་འབད་རུང་ ཁོ་ལུ་གནོད་པ་ག་ནི་ཡང་མ་བྱུང་པར་ འདྲེ་གདོན་འདི་ཐོན་སོང་ནུག 36དེ་ལས་འདི་ཁར་གྱི་མི་ག་ར་ གཅིག་གིས་གཅིག་ལུ་ ག་ཅི་བཟུམ་གྱི་བཏོན་ཐངས་གཅིག་ཨིན་ན་ ཁོ་ནང་དབང་ཚད་དང་ཤུགས་ཡང་འདུག་ ཁོ་གིས་བཀའ་གནང་མིའི་བསྒང་ལས་ འདྲེ་གདོན་འདི་ཚུ་ཡང་འཐོན་འགྱོཝ་ཨིན་མས་ཟེར་སླབ་ནུག 37དེ་ལས་ཡེ་ཤུ་གི་གཏམ་སྙན་གྲགས་དེ་ ལུང་ཕྱོགས་ཀྱི་མཐའ་བསྐོར་ག་ར་ནང་ཁྱབ་སོང་ནུག།

ཡེ་ཤུ་གིས་མི་ལེ་ཤ་ལུ་དྲགཔ་མཛད་པའི་སྐོར།

38ཡེ་ཤུ་ སི་ན་གོག་ནང་ལས་ཐོན་བྱོན་ཏེ་ སི་མཱོན་གྱི་ཁྱིམ་ནང་འབྱོནམ་ད་ སི་མཱོན་གྱི་སྒྱུགམོ་དེ་ དྲོད་འབར་རྐྱབ་ན་སྟེ་ཡོདཔ་ཨིན་མས་ ཡེ་ཤུ་ལུ་དྲགཔ་མཛད་གནང་ཟེར་ཞུཝ་ད། 39ཡེ་ཤུ་མོ་གི་སྦོ་ལོགས་ཁར་བྱོན་ཞིནམ་ད་ མར་གུག་སྟེ་ དྲོད་འབར་འདི་ལུ་བཀའ་གནངམ་ད་ དྲོད་འབར་སངས་ཏེ་ མོ་གིས་ཁོང་གི་ཕྱག་ཞུ་ནུག 40ནམ་སྲོ་པའི་བསྒང་ལས་ ནད་མ་གཅིགཔ་ན་སྡོད་མིའི་ལེ་ཤ་ལུ་ ཡེ་ཤུ་གི་སྐུ་མདུན་ལུ་འཁྱིད་འོངས་ཏེ་ ནདཔ་རེ་རེ་གི་གུ་ལུ་ཕྱག་བཀལ་ཏེ་དྲགཔ་མཛད་ནུག 41མི་ལེ་ཤ་གི་ནང་ལས་འདྲེ་གདོན་དེ་ཚུ་སྐད་བརྐྱབས་ཏེ་ ནཱ་དཀོན་མཆོག་གི་སྲས་ཨིན་མས་ཟེར་ཞུ་སྟེ་ ཕྱི་ཁར་ཐོན་སོང་ནུག་ དེ་འབདཝ་ད་ ཡེ་ཤུ་གིས་ཁོང་ལུ་ བཀའ་གནང་སྟེ་ཁ་སླབ་མ་སྟེར་བས་ ག་ཅི་སྨོ་ཟེར་བ་ཅིན་ཁོང་གིས་ ཁོ་དཀོན་མཆོག་གིས་བཙག་འཐུ་མཛད་མི་ཁིརཱིས་ཨིན་ཟེར་ཤེས་ནུག།

ཡེ་ཤུ་གིས་ སི་ན་གོག་ཚུ་ནང་ཆོས་གསུངས་པའི་སྐོར།

42དྲོ་པ་ཤར་དཀརཝ་ད་ ཡེ་ཤུ་ཁྲོམ་འདི་ཁར་ལས་ རི་ཙག་ས་གཅིག་ནང་བྱོན་ནུག་ དེ་ལས་མི་དམངས་ཀྱིས་ཁོ་འཚོལ་ཏེ་ མཇལཝ་ད་ ང་བཅས་ལུ་བཞག་སྟེ་བྱོན་མ་སོང་ཟེར་ འགོར་བཞག་ནི་འབད་ནུག 43དེ་འབདཝ་ད་ ཁོ་གིས་ཁོང་ལུ་ དཀོན་མཆོག་གི་རྒྱལ་སྲིད་ཀྱི་གཏམ་བཟང་དེ་ གཡུས་གཞན་ཁར་ལུ་ཡང་བཤད་པ་འགྱོ་དགོ་ འདི་གི་དོན་ལས་སྦེ་ ང་ལུ་གཏང་གནང་ཡི་ཟེར་གསུངས་ནུག 44དེ་ལས་ཁོ་གིས་ ཡུ་དེ་ཡ་ལུང་ཕྱོགས་ཀྱི་ སི་ན་གོག་དེ་ཚུ་ནང་བྱོན་ཏེ་ཆོས་གསུངས་ནུག།

Currently Selected:

ལུ་ཀ་ལེའུ་ 4: dzoD

Highlight

Copy