Matiye 26

KUY GƏ NDOL LƏ JEJU

Dəwje d-um mə naa gə mba tɔl Jeju

Mrk 14.1-2; Lug 22.1-2

1Logə Jeju pa tarje nee tɔ̰y ɗaa təl pa ar ngan njenendoje lə-a na:

2ꞌGərəje to gə ndɔ ɗa Pagə#26.2 Pagə to ndɔ gə Jiibije ɗa nay gə ar mə-jə ole ce lə-je mə ɓe ngon njekula gə Ejipətə nay ndɔ joo baa, ngaɓa d-a kun dɔ-m ꞌma gə Ngon lə dəw kar-je d-a ɓərə-m kagə dəsə gə.

3Be ɓa buba njekapoloje gə buba ɓeje ꞌmbo̰ naa ndogo lə Buba njekapolo gə ri-a na Kayip 4ngaɓa d-unda nduje naa gə mba kuwa Jeju gə gusu, gə mba tɔl-ɛ ne. 5ꞌPa tar horo naa gə na: May kuwa-a gə ndɔ ɗa nay gə ang na dəw mə ɓeje d-a kḭ ɗa ne wungu.

Jene kara um ubu gə əndə mbo̰ dɔ Jeju gə

Mrk 14.3-9; Ja̰ 12.1-8; Lug 7.36-50

6Logə Jeju aw Ɓetani ɗaa, isi ta ka nekusa gə mə kəy gə lə Simo gə njebənji, 7jene kara ɗe gə ubu gə əndə mbo̰ gə lar-ɛ ya̰ ja, mə ngon ku gə ꞌɓar-ɛ aləbadə ɗe um dɔ-ɛ gə. 8Logə ngan njenendoje lə-a d-o ɗaa mə-je o̰-je ar-je ꞌpa na: Ngon gə jene gə nee, tuji ubu le bənəng mba ɗi wa? 9Ubu gə kəm ɗabə ndogo mba ta ne lar ya̰ la ne gə njendooje. 10Logə Jeju o ɗaa təl pa ar-je na: To kula gə may ɓa jene le ɗa sə-m nee ngaa ꞌjɔg-ɛje mba ɗi wa? 11Mba njendooje le ɗaa, ꞌga̰ gə si gə ndɔje tɔ̰y, ngaa ꞌma le, m-a ga̰ gə si gə ndɔje tɔ̰y ang baa. 12Ubu gə jene gə nee um dɔ-m gə le, gɔl ne yo-m gə d-a dubu. 13Tɔgərɔ ja, m-pa m-ar-si to gə, loje tɔ̰y gə d-a kila mbərə Tar gə May kəne dɔ nangə nee le, dəwje d-a pa tar ne gə jene ɗa nee le mba kole ne mə-je dɔ-ɛ gə.

Judas un dɔ Jeju

Mrk 14.10-11

14Be ɓa, kara lə nje gə dɔg gə gir-je gə joo, gə ri-a na Judas Isikariyɔdə, aw inga buba njekapoloje, 15dəji-je na: To gə ɓo m-un dɔ Jeju m-ar-si uwa-aje le, a kuga-mje gə ɗi wa? Ɗaa d-uga-aje mbɛl kula munda. 16Un kud-e dɔ ndɔ-ɛ gə əng ja n-sangə mba kinga ɗəw gə may gə n-a kila ne Jeju mə ji-je gə.

Ngan njenendoje gɔl Pagə

Mrk 14.12-17; Lug 22.7-14; Ja̰ 13.1-38

17Dɔngɔr ndɔ ɗa nay mbə gə guway kodo godo kəne le, ngan njenendoje ꞌɗe pa d-ar Jeju na: Lo gə ɗa ɓa ꞌnjigi kar j-a gɔl nekusa pagə kəne j-ar-i wa? 18Jeju ila-je kəne na: Awje mə ɓebo gə kən, kəy lə nday neje, ɗaa ꞌpaje ar-ɛje na: Njenetɔji pa na: Kar lə-m aw asə ngaa, ɗaa mə kəy lə-i ɓa m-a ɗa Pagə kəne gə ngan njenendoje lə-m. 19Be ɓa ngan njenendoje le ꞌɗa gə go ndu Jeju gə un ar-je, ɗaa d-uwa dɔ gɔl Pagə le naa gə jəbə.

20Kar kumatagə ɗaa, n-isi ta ka nekusa gə gə ngan njenendoje gə dɔg gə gir-je gə joo. 21Logə d-aw d-usa ne ɗaa, n-un tar n-pa n-ar-je na: Tar gə tɔgərɔ ja, m-pa m-ar-si to gə dəw kara horo-si gə a kun dɔ-m. 22Mə-je gangə man badə ngaɓa dəw gə ɗa-ɗa kara pa na: To ꞌma wa, Mbayɓe? 23Ɗaa Jeju ila kəne na: Dəw gə ula ji-a sə-m naa gə kara baa mə ka gə nee ja, a kun dɔ-m. 24ꞌMa gə Ngon lə dəw m-a kuy to to gə Mbede lə Luba pa. Ngaa tuji a kuba dəw gə a kun dɔ-m! May kar kuji ja kara d-uji-e ang. 25Judas gə a kun dɔ-ɛ le un tar pa na: To ꞌma wa, Njenetɔji? Jeju ila-a kəne na: ꞌI ja ꞌpa.

26Logə d-aw d-usa ne be ɗaa, Jeju un mbə kara, tɔr ndu-e kəne ɗaa, uwa cɛdə dana ngaɓa ula ar ngan njenendoje lə-a pa ne tar t-ɛ gə naa: ꞌTaje, usaje, ye gə nee le to gə darɔ-m. 27Go-e gə n-un nekay, logə n-ɗa Luba oyo ɗaa n-ar-je n-pa ne tar t-ɛ gə na: Ayje gə kəm-si tɔ̰y, 28ꞌYe gə nee le to məsə-m, məsə kone gə kay nangə mba dəwje bula, mba kar tar neɗa gə kṵra̰y ɔr ne dɔ-je gə. 29M-pa m-ar-si to gə un kud-e ɓogəne le, m-a kay gə si man bḭyə̰ nee ang gə dɔbo̰ ja saar ndɔ gə m-a təl kay gə si ꞌye gə sigi mə ɓeko̰ gə lə Bɔy.

30Logə d-ɔsə paje kar ɗa nay Pagə d-ɔsə ne gaji Luba d-ila nangə ɗaa, d-ɔdə d-aw dɔ ər gə kagə Olibiyeje ar kəne.

31Be ɓa Jeju un tar pa ar-je na: Cil ne ja, m-a təl to jigi tuga lə-si tɔ̰y, mba ꞌpa mə mbede gə na: M-a kunda njekuul daje ɗaa badəmje lə-a d-a jɛ̰rɛ̰ naa#26.31 Jeju pa tar gə mə Jak 13.7. 32Ngaa, logə m-a kuy ɓa m-a ndol ɗaa m-a kaw dɔ nangə gə Galile kede no-si gə. 33Piyɛr təl un tar pa ar Jeju na: A to jigi tuga koso lə-je tɔ̰y ja ɓa ngaa, a to kar ꞌma ɗɔg ang. 34Ngaa, Jeju ila-a kəne na: Tar gə tɔgərɔ ja, m-pa m-ar-i to gə, mə cil gə nee ja, nam ɓa kar kura̰ ila mbərə ɗaa, a ma̰y tar gɔl munda na ꞌgərə-m ang. 35Piyɛr təl ila-a kəne na: Kəm kuy kara kuy ja m-a kuy sə-i ɓo ɗɔg ɓa m-a ma̰y tar mbad-i ne ang. Kɛsə ngan njenendoje tɔ̰y kara ꞌpa to gə be tɔ.

D-aw mə ndɔ gə Gɛɗəsəmane

Mrk 14.32-42

36Go-e gə ɗaa Jeju aw gə ngan njenendoje lə-a lo gə ɓar-ɛ na Gɛɗəsəmane ngaɓa pa ar-je na: Isije nangə nee logə m-a kaw ngangə lo gə nu mba dəji Luba. 37Jeju ɔr Piyɛr je gə ngan lə Jebede gə joo ar d-aw sə-a. M-e un kudu gangə man, ngaɓa ɓəəl gə boy ja unda gang-ɛ. 38N-pa n-ar-je na: Mə-m gangə man saar ce kəm gə lə-m ar m-əndə ba̰y yo; isije nee ɓo ɔgə-je kəm-si ɓi sə-m. 39Cibi n-ɔdə gə kede njɛ̰ ɗaa, n-təl n-dəbə no-ɛ nangə n-dəji Luba to gə be: Bɔy, ɓo ɗəw to nama ɔsə nekay ꞌməsərə gə nee le ta-m gə ngərəng gə ɗangə! Ngaa ꞌɗa mə njigi lə-i ꞌi ja ɓo kar-m ꞌma ang. 40N-təl n-ɗe ɓə lə ngan njenendoje ɗaa, n-inga-je dɔ ɓi gə ngaɓa n-pa n-ar Piyɛr na: Asəje gə mba kɔgəje kəm-si ɓi sə-m kar kara baa ja kara nəm ang wa? 41ꞌCibije dɔ rɔ-si gə ang ɓo ꞌdəjije Luba mba kar-si osoje dan nena gə ang. Kəji lə-si a njigi to njang ja ngaa darɔ mbɔr-ɛ gə mbɔr-ɛ. 42Jeju təl ɔdə aw nganga̰ gə gɔl joo lə-a ja cibi, ɗaa dəji Luba na: Bɔy, to gə ɓo ɗəw gə kar nekay ꞌməsərə nee le a nday ne ta-m gə godo, a ɓo kar-m m-ay gə kay gə no nama, may kar ꞌɗa mə njigi lə-i ja. 43N-təl n-ɗe to gə ɗangə ɗaa, n-inga-je dɔ ɓi gə le ja cibi; mba kəm-je uway njing-njing. 44N-təl n-aw to gə ɗangə n-aw n-dəji Luba gə gɔl munda lə-a to to gə ye gə kede le ja cibi. 45Ngaɓa n-təl n-ɗe n-inga ngan njenendoje lə-a ɗaa n-pa n-ar-je na: Aw ꞌCibije gə uwaje kɔr-si ja dɔro ɓi əng mə! Kar nay dəb baa ngaa; oje ꞌma gə Ngon lə dəw le d-a kila-m mə ji njeneɗaje gə kṵra̰y gə. 46Ḭje taar ar-si j-awje, na nje kun dɔ-m le aw ɗe.

Kuwa gə d-uwa Jeju

Mrk 14.43-50

47Logə n-aw n-pa tar t-ɛ gə baa ɓi ja ɗaa, Judas gə to kara lə ngan njenendoje gə dɔg gə gir-je gə joo le, ce pɔɔ gə bula bo dəwje gə d-uwa kiya bay gə ngal gə guruje ji-je gə. Buba njekapoloje gə buba ɓeje ɓa d-ula-je 48ꞌNe gə njekun dɔ-ɛ le n-tɔji-je kede n-pa na: Dəw gə ɓo m-to mbi-a nama to ꞌne ja əng, ɗaa uwa-aje. 49Gə tɔg-ɛ baa, n-ɗe n-inga Jeju ɗaa, n-pa na: M-o-i ɓa, Njenetɔji, ɗaa n-uwa-a n-to mbi-a. 50Ɗaa Jeju pa ar-ɛ na: Njekura, ne gə ꞌɗe mba ɗa le ꞌɗa gə ɗa ja. Be ɓa bula dəwje nee le d-ila Jeju d-uwa-a.

51Dəw kara gə ar horo nje gə d-ar gə Jeju, ula ji-a, ɔr ne kiya bay lə-a, tuga ne mbi ngon njekula lə buba njekapolo bad gangə. 52Ɗaa, Jeju pa ar-ɛ na: ꞌTəl gə kiya bay lə-i ula lo-e gə; mba dəwje tɔ̰y gə d-ɔr kiya bay dɔ ngan marəje-je gə le d-a kuy yo kiya bay ja tɔ. 53Ose ꞌi əji to gə m-asə dəji Bɔ-mje kar-ɛ ar-m anjije kuduɓe dɔg gə gir-e gə joo gə dɔ-ɛ ɓisine ang wa? 54Tar lə Luba gə ꞌɗa mə mbede le a kaw lo-e gə ang wa? Mba ꞌpa na ne a ɗa ne to to gə be ja ang wa?

55Dɔ kar-ɛ gə əng ja Jeju turu kəm-e pa ar bula dəwje le na: ꞌƊeje gə kiya bayje gə guruje ɓa uwa-mje ne to gə d-uwa ne gayim be. ꞌMa le m-isi mə kəy gə lə Luba gə ndɔje tɔ̰y ja, m-tɔji ne kəne nəm ngaa uwa-mje ang. 56Ngaa neje nee tɔ̰y ɗe to gə be mba kar tarje tɔ̰y gə pajambərəje ꞌpa le aw ne lo-e gə yɛrɛrɛ.

Be ɓa ngan njenendoje lə-a tɔ̰y ja d-a̰y d-iya̰-a.

D-a kaw gə Jeju no ngɔ gangə tar gə lə Jiibije

Mrk 14.53-65

57Nje gə d-uwa Jeju le d-aw sə-a ɓə lə buba njekapolo gə ri-a na Kayip, gə njekɔr gəl toronduje gə buba ɓeje ꞌmbo̰ naa ɓə lə-a. 58Piyɛr uwa go Jeju dɔ ji ndə̰w̰, saar ce ne mə ndogo gə lə buba njekapolo, ɗaa andə aw isi gə njengəm loje mba ko se tar le a kunda ngang-ɛ to gə ban wa?

59Buba njekapoloje gə nje gə no ngɔ gangə tar lə Jiibije tɔ̰y ꞌsangə gə mba kinga tar naji gə gə mbɔr-ɛ, gə a kila tar dɔ Jeju gə gə mba kar ꞌtɔl-ɛ ne. 60Nje pa tar najije gə gə mbɔr-ɛ ꞌɗe bula ya̰ ja ngaa d-inga dəw kara horo-je ang. Ɗaa saar ngaɓa dəwje joo horo-je gə ꞌpa na: 61ꞌNe gə n-ar nee le ɓa n-pa na n-a cḭ kəy lə Luba ɗaa ndɔ munda baa ja n-a təl kunda gugu. 62Buba njekapolo ḭ taar pa ar Jeju na: Tar gə d-ila dɔ-i gə nee le a kila kəne ang wa? 63Jeju ar t-ɛ munduru. Ɗaa buba njekapolo le pa ar-ɛ na: M-un ndu-m m-ar-i gə ri Luba gə nje kisi kəm baa ja, mba kar-i ꞌpa ar-si j-o, ꞌto Kirisi, Ngon lə Luba wa? 64Jeju ila-a kəne na: Ce ta-i ꞌi gə ja, ngaɓa m-pa m-ar-si, a kun kud-e ɓisine ja, a ko-mje ꞌMa gə ngon lə dəw, M-a kisi dɔ ji kɔl Luba gə njesingamongə gə ngaɓa m-a kar dɔ kil lə nji mə dara gə.#26.64 Oje Paj 110.1, Dan 12.7 65Be ɓa buba njekapolo uwa kubuje gə rɔ-ɛ ye gə ja cir ngaɓa pa na: N-taji Luba. J-a sangə njetar najije mba ɗi cibi wa? Sisəy ja oje gə mbi-si taji gə n-taji Luba le nam. Əjije kəne ban wa? 66D-ila kəne na: Kəm tɔl-ɛ gə tɔl ja. 67Be ɓa, ꞌcibi yoro kəm-e gə ngaɓa ꞌɓiri ji-je ꞌkunda ne gə, nje gə kɛm d-unda kambɔr-ɛ paar ɗaa ꞌdəji-e na: 68ꞌI gə na to Kirisi le, na ɓa unda-i nee wa? ꞌGərə ɓo ꞌpa ar-si j-o.

Ma̰y tar ɓəəl yo lə Piyɛr

Mrk 14.66-72

69Ngaa Piyɛr isi tabidi gə ɗaga ɗaa ngon njekula gə jene kara ɗe inga-a ɗaa pa na: ꞌI kara ꞌga̰ gə Jeju gə to dəw gə Galile tɔ lə ma! 70Ngaa Piyɛr ma̰y kəm dəwje gə tɔ̰y na: M-gərə mə tar lə-i gə ꞌnjigi pa le ang. 71Cibi n-ɔdə n-aw ta ɗəw kandə mə ndogo gə be ɗaa, jene gə ɗangə o-e ɗaa pa na: Dəw gə ar nee le to nje kar Jeju dəw gə Najarɛd le ja tɔ. 72Ɗaa Piyɛr təl ma̰y to gə ɗangə naji nee na: Dəw gə nee le m-gər-e ang ja. 73Waga ɗaa, nje gə d-ar lo-e gə ꞌɗe d-inga Piyɛr ꞌpa d-ar-ɛ na: Tɔgərɔ ja, ꞌi kara, ꞌto kara lə dəwje gə nee le tɔ, ndo̰ tar lə-i ja j-a gər-i ne. 74Be ɓa Piyɛr un kudu kuwa naji kum dɔ rɔ-ɛ gə na: Dəw gə ar le m-gər-e ang ja. Ɗaa lo-e gə nee ja kura̰ ila mbərə tɔ. 75Be ɓa mə Piyɛr ole dɔ tar gə Jeju pa kede ar-ɛ na: Nam ɓa kar kura̰ ila mbərə ɗaa a ma̰y tar gɔl munda na ꞌgərə-m ang.#26.75 Tar gə Jeju pa ar Piyɛr kede mə bar-ɛ 34 le aw lo-e gə bɛrɛrɛ N-ɔsə lo n-ce ɗaga ngaɓa n-no ɓəgəgə-ɓəgəgə.

Currently Selected:

Matiye 26: lap

Highlight

Copy