Lugu 2

Kuji Jeju

Mat 1.18-25

1Dɔ ndɔ-ɛ gə əng le, mbay gə boy Sejar Ogusəd#2.1 Sejar Ogusəd to dɔngɔr mbay gə boy gə o̰ dɔ nangə gə Rɔm mə ɓal gə 31 nam d-uji Kirisi ce nee ɓal 14 go kuji Kirisi. ꞌNe ɓa ɗe gə ɗɛgɛgɛ je gə mə kara dɔ nangə gə Rɔm go ɗɔ gə bo. un ndu mba kar d-unda ri dəwje tɔ̰y mə mbede gə dɔ nangə gə Rɔm tɔ̰y#2.1 Dɔ nangə gə Rɔm tɔ̰y le to dɔ nangə tɔ̰y gə mbay gə boy gə Rɔm o̰.. 2Dɔngɔr tura dəwje nee le to dɔ ndɔ gə Kiriniyus to ne njeko̰ ɓe dɔ nangə gə Siiri. 3Na-na kara aw ar d-unda ri-a mbede gə mə ɓekuji-je gə.

4Jəjəb kara ḭ mə ɓebo gə Najarɛd, dɔ nangə gə Galile, aw dɔ nangə gə Jude mə ɓe gə lə mbay Dabidi gə ri-a na Bɛdəlɛhɛm, mba n-to gə gəl kapolo gə lə mbay Dabidi ngaɓa n-to ngon k-ɛ tɔ, 5mba kunda ri ꞌje gə Məri, njemɔrə lə-a gə aw gə kɛm, mə mbede gə.

6Ngaa, logə ꞌce Bɛdəlɛhɛm ɗaa, kar kuji lə Məri asə, 7ɗaa n-uji ngon dər-e gə jingaw. N-ɓiri-e gə ta kubu ngaɓa n-ila-a mə bəgərə kusa ne gə lə mangəje mba lo to godo mə kəy to mbaje gə.

8Njenekuulje kara ꞌga̰ mə ɓe gə nee le tɔ. D-isi gangə lo gə, d-ɔgə kəm-je ɓi mə cil mba ngom nekuulje lə-je. 9Anji lə Mbayɓe kara ce dɔ-je gə. Ndogo lə Mbayɓe uru dɔ-je gə, ar ɓəəl unda-je bad gangə-je. 10Anji pa ar-je na: ꞌƁəəl-je ang, m-ɗe mba kila mbərə Tar gə May kar-si, Tar gə May gə a to ne rɔləl lə dəwje tɔ̰y. 11Ɓogəne, mə ɓe gə lə mbay Dabidi, d-uji njekaji-si, ꞌne gə n-to Kirisi, Mbayɓe. 12Oje, netɔji gə a gərəje nee ɓa nee: A kingaje ngon tay gə ɓiri-e gə kubu ngaɓa d-ila-a mə bəgərə kusa ne gə lə mangəje.

13Njeɗɔje gə dara bula ꞌɗe gə tɔg-ɛ baa d-ɔr-e naa kara baa gə anjije gə dara d-ɔsə gaji Luba, ꞌpa na:

14Riɓar to dɔ Luba gə mə sam dara gə taar,

Ɗɛgɛgɛ to dɔ nangə nee, horo dəwje gə ꞌta kəm-e!

15Logə anjije d-iya̰ njenekuulje təl d-aw dara ɗaa, njenekuulje ꞌpa tar horo naa gə na: Ar-si j-awje saar mə ɓe gə Bɛdəlɛhɛm, ɓo j-oje ne gə ce kəne əng, ne gə Mbayɓe ula anji ar pa ar-si. 16D-aw gə ngɔdə, d-inga Məri, Jəjəb gə ngon tay gə to mə bəgərə gə le. 17Logə d-o ngon tay le ɗaa, d-ɔr gəl tarje gə anji pa ar-je ɔji dɔ-ɛ. 18Dəwje tɔ̰y gə d-o tar gə njenekuulje d-ɔr gəl-e le, ɗaa lo tar igi-je sɛl. 19Məri ngom tarje gə nee le m-e gə ngaɓa əji kəne ya̰. 20Be ɓa, njenekuulje ꞌtəl d-aw. D-ula rɔnduba dɔ Luba ngaɓa d-ɔsə gaji-ɛ mba neje tɔ̰y gə d-o gə kəm-je gə mbi-je, to gə anji ila nee mbər-e ar-je.

D-aw gə Jeju mə kəy gə lə Luba

21Logə ngon tay le ɗa ndɔ ji nay joo ɗaa, d-unja bər-e ngaɓa d-unda ri-a na Jeju to gə anji pa ne tar-ɛ kede nam ɓa ko̰-ɛje ḭ kɛm lə-a ɓi. 22Cibi, logə ndɔ togo rɔ lə Məri asə gə go torondu lə Moyiji ɗaa, d-aw sə-a mə ɓe gə Jerujalɛm mba tɔj-ɛ no Mbayɓe gə, 23to gə ꞌɗa ne mə torondu gə lə Mbayɓe na: Ngon dər gə njingaw to kar Mbayɓe. 24Məri je gə Jəjəb d-aw mə ɓe gə Jerujalɛm d-un nepolo to gə torondu Mbayɓe pa: Dərje joo ose ngan dər kuulje joo.

25Cibi jingaw kara isi mə ɓe gə Jerujalɛm, ri-a na Simiyo̰. N-to dəw gə gadə-gadə ngaɓa n-ila kuji dɔ ne gə lə Luba ya̰. N-aw ngəbə nekul mə lə ngan Ijirayɛlje. Njil Njerɔsangə ɗe dɔ Simiyo̰ gə, 26ngaɓa Njil Njerɔsangə pa ar-ɛ kede na: ꞌI a ko Kirisi lə Mbayɓe gə kəm-i nam ɓa a kuy bi. 27Njil ɔsə Simiyo̰ aw sə-a mə kəy gə lə Luba. Məri je gə Jəjəb d-aw gə Jeju ngon tay mba kila ne kɔji dɔ torondu gə. 28Simiyo̰ ta ngon le uwa-a kar-ɛ gə sudu, ngaɓa təl gə oyo ar Luba na:

29Mbayɓe, ɓɛɛ ngaa, ḭya̰ ngon njekula lə-i

Ar-ɛ aw gə ɗɛgɛgɛ gə go tar gə ꞌpa.

30Mba kəm-m o kaji lə-i,

31Gə ꞌgɔl no dəw mə ɓeje gə tɔ̰y,

32 Kaji nee le to lokarə gə a tɔji dəwje gə ꞌgərə Luba ang tɔ̰y mba kar gər-i nee

A to ne riɓar lə Ijirayɛl, dəwje lə-i.

33Bɔ-ɛje je gə ko̰-ɛje tar igi-je sɛl mba tar gə ꞌpa ɔji dɔ ngon je. 34Simiyo̰ tɔr ndu-e dɔ-je gə ngaɓa pa ar Məri, ko̰ Jeju-je na: O, ngon gə nee le to ɗəw koso ose ɗəw kḭ taar lə dəwje bula gə Ijirayɛl. Cibi, n-a to netɔji lə Luba, ngaa dəwje d-a mbad-ɛ. 35Be ɓa, ꞌi Məri, n-a to kiya gə a riya njil-i dana, mba kar kəji gə iya rɔ-ɛ mə dəwje kila nee rɔ-ɛ gə ɗaga.

36Ɗaa pajambərə gə jene kara, ri-a na Ana, n-to ngon lə Panuyɛl, gəl kapolo gə lə Ajɛr kara ga̰ kəne to. N-ɓuga ya̰. Logə n-ɗa ɓal siri baa ja ngab-ɛje uy ɗaa, 37n-isi gə jene nduba saar ɓal dɔg gə ji nay joo gə gir-e gə sɔɔ. Ana le ḭya̰ mə kəy gə lə Luba ang ngaɓa polo Luba cil gə kar, ɗəw tɔl mə ɓo gə gə ɗəw dəji gə tɔ. 38ꞌNe kara n-ɗe dɔ kar gə Simiyo̰ ɗe ne le ja, n-ar oyo Luba, cibi n-pa tar lə Jeju n-ar dəwje tɔ̰y gə d-aw ngəbə Luba kar ɔr kula ɓərə gɔbə ɓe gə Jerujalɛm.

39Logə Məri je gə Jəjəb ꞌɗa neje tɔ̰y gə go torondu lə Mbayɓe nam ɗaa, ꞌtəl d-aw dɔ nangə gə Galile, mə ɓe lə-jə gə Najarɛd gugu.

40Be ɓa, ngon le tɔgə ngaɓa uba singa, kəm karə ɗusu m-e, cibi ndu tɔr lə Luba to dɔ-ɛ gə nəm tɔ.

Jeju ar mə kəy gə lə Luba logə ɓal-ɛ dɔg gə gir-e gə joo

41Gə ɓal-ɓal ja, nje kuji Jeju-je d-aw mə ɓe gə Jerujalɛm taar-taar mba ɗa nay Pagə.

42Logə Jeju ɗa ɓal dɔg gə gir-e gə joo ɗaa, aw gə nje kuj-eje lo ɗa nay gə to gə d-aw ꞌɗa ne gə ɓal-ɓal. 43Be ɓa, logə ɗa nay le nday ɗaa, nje kuji Jeju-je ꞌtəl ɓe, ngaa ngon gə Jeju le nay gugu mə ɓebo gə Jerujalɛm, ɗaa mə-je uy dɔ-ɛ sɛl. 44D-əji to gə ngon le ga̰ horo dəwje gə. ꞌNja ndɔ kara asə kula mɛdərɛ dɔg munda ɓa, ꞌtəl ꞌɗe ꞌsang-ɛ horo ngan ko̰je-je gə gə njekuraje gə lə-je. 45Ngaa logə d-o-e ang ɗaa, ꞌtəl gugu mə ɓe gə Jerujalɛm mba sang-ɛ. 46Ndɔ gə njekum gə munda ɓa d-inga ngon le mə kəy gə lə Luba. N-isi horo njekɔr gəl toronduje gə, n-tuga mbi-a n-o tar lə-je ngaɓa n-dəji-je tar tɔ. 47Dəwje tɔ̰y gə d-o tar lə-a le kar-je uwa-je pa̰y ɔji dɔ negərə ngaɓa gə ɗəw kila tarje gə lə-a. 48Logə nje kuj-eje d-o-e ɗaa, lo tar igi-je sɛl, ko̰-ɛje pa ar-ɛ na: Ngon-m, ɗi ɓa ꞌɗa gə si be wa? O, je gə bɔ-ije j-a sang-i gə kar gədə. 49Jeju pa ar-je na: Se ꞌsangə-mje mba ɗi wa? Se gərəje to gə to tar lə-m kar m-a ɗa kula lə Bɔ-mje ang wa? 50Ngaa Məri je gə Jəjəb ꞌgərə mə tar gə Jeju pa gə je le ang. 51Cibi, Jeju təl aw gə je gugu mə ɓe gə Najarɛd, ngaɓa ila kuji dɔ-je gə. Ko̰-ɛje ngom tarje nee le tɔ̰y m-e gə.

52Be ɓa, Jeju tɔgə gə kəm karə nəm, ngaɓa mongə darɔ-ɛ gə nəm, inga ndu tɔr no Luba nəm ngaɓa no dəwje gə nəm tɔ.

Currently Selected:

Lugu 2: lap

Highlight

Copy