Lugu 1
1
Tar gə dɔngɔr gə Lugu pa ar Teopil
Mrk 1.1; Kɗn 1.1-3
1Dəwje bula sangə ɗəw ɗa nee mbede gə a kɔr go neje gə ce horo-sijee gə, 2ɗəw kara baa to gə nje gə d-ar lo kuma kud-e gə d-o gə kəm-je pa nee tar-ɛ d-ar-sijee, ngaɓa təl to nee nje ɗa kul-ɛje tɔ. 3Gəl-e gə nee ɓa, ꞌma ja kara m-sangə ngira neje nee le gərə gə maj-ɛ ɓa gə mba ɗa nee mbede kar-i Teopil, ꞌi gə njemay, 4mba kar-i gərə to gə netɔji gə tɔgərɔ ja inga.
KUJI GƏ BASA̰ LƏ JEJU
Mbərə kuji Ja̰ Njeɗabatɛm
5Dɔ ndɔ gə Erɔdə to nee mbay gə Jude, njekapolo kara ri-a na Jakari, to gə gəl Abiya gə; jene lə-a to gəl ka Aro̰, ri-a na Jabɛd. 6ꞌToje dəwje gə gadə-gadə joo kɛm no Luba gə, ngaɓa d-ila kuji dɔ ndu gə gə torondu gə lə Mbayɓe. 7Ngaa d-uji-je ngon ang mba Jabɛd to kaw kad, ꞌje joo kɛm, ndɔ-ɛ gə əng le, ɓal-je bula ar d-asə kuji ngon ang ngaa. 8Be ɓa, ndɔ kara Jakari aw ɗa kula nepolo no Luba gə mba to ndɔ ɗa kula lə gəl kuji lə Abiya. 9D-ɔr-e gə ꞌya̰ gə go kapolo lə-je gə d-aw ɗa ne ɓa n-aw ne kəy no kɔgə nepolo gə lə Mbayɓe mba ro ngira ne gə əndə le. 10Bula dəwje d-aw dəji Luba ɗaga logə n-aw ro ngira ne gə əndə le. 11Be ɓa, anji lə Mbayɓe ce dɔ Jakari gə, ar taar dɔ ji kɔl no kɔgə, lo gə ro ngira ne gə əndə kəne. 12Lo gə Jakari o anji le ɗaa, njil-e ce ngaɓa ɓəəl ya̰ tɔ. 13Ngaa anji pa ar-ɛ na: ꞌƁəəl ang Jakari, mba Luba o ndu no lə-i. Jabɛd, jene lə-i a kuji ngon gə jingaw kar-i, ɗaa a kunda ri-a na Ja̰. 14N-a to ne rɔləl gə ne tal ꞌmajagəra lə-i, ngaɓa dəwje bula rɔ-je a ləl-je dɔ ndɔ kuji ngon gə nee le. 15Cibi, n-a to dəw gə bo no Mbayɓe gə. N-a kay man bḭyə̰ ang nəm, ngaɓa n-a kay kodo gə ḭ ang mag nəm tɔ. Njil Njerɔsangə a ɗusu m-e mə ko̰-ɛje gə ja baa 16ngaɓa n-a təl tar kəji lə ngan Ijirayɛlje gə rɔ Mbayɓe Luba gə lə-je. 17N-aw no Luba gə njil gə singa lə Eli mba ɗe gə məlom horo bɔ nganje gə nganje gə, mba gɔl kəji lə dəwje gə njembadə tar kar təl to dəwje gə gadə-gadə, ɓa gə mba gɔl-je gə gəl dəwje may kar Mbayɓe. 18Jakari ila anji kəne na: Se ɗi ɓa m-a gərə ne wa? Mba, dɔ ndɔ-ɛ gə nee le, m-buga ya̰, ngaɓa jene lə-m kara to gə ya̰ tɔ. 19Anji le təl pa ar-ɛ na: ꞌMa le m-to anji Gabəriyɛl gə m-ar no Luba gə, Luba ula-m kar-m pa sə-i tar, cibi m-ila mbərə Tar gə May nee gə ɔji dɔ neje nee le mbi-i gə. 20O: Gɔb-i a kudu, ɗaa a pa tar ang saar ndɔ gə ne gə nee a ɗe, mba ta kagə-m ang, tar lə-m nee le a kaw lo-e bərərə gə dɔ kar-ɛ gə Luba ɔji.
21Ɗaa dəw mə ɓeje ngəbə Jakari, kəji jɔgəje mba kor-e əw ya̰ no kɔgə mə kəy nepolo. 22Lo gə n-ce ɗaga ɗaa, n-asə pa gə je tar ang, gərə-je to gə n-o ne no kɔgə nepolo; n-pa tar gə ji-a ngaɓa n-ar to gə mbigi be.
23Logə ndɔ kula lə-a ɗunga ɗaa, n-ɔdə n-aw kəy lə-a. 24Ɗa ndɔ njɛ̰ baa go neje gə nee ɗaa, jene lə-a Jabɛd ḭ kɛm, ɗaa iya rɔ-ɛ kəm nay mi. N-pa na: 25Oje ne gə Mbayɓe ɗa sə-m: N-ɔr ne rɔ kul dɔ-m gə no dəwje gə ɓogəne.
Mbərə kuji Jeju
Mat 1.18-23
26Mə nay gə njekum gə misa̰, Luba ula anji Gabəriyɛl mə ɓebo gə dɔ nangə gə Galile gə ri-a na Najarɛd, 27rɔ ꞌmbakum gə, ri ꞌmbakum le na Məri, n-to njemɔrə lə dəw gə ri-a na Jəjəb, n-to gəl kuji gə lə mbay Dabidi. 28Anji le andə dɔ-ɛ ɗaa pa ar-ɛ na: M-o-i ɓa ɓo, ꞌi gə mənuji lə Luba to dɔ-i gə, Mbayɓe nay sə-i. 29Tar nee le jɔgə Məri ya̰, ngaɓa dəji rɔ-ɛ tar na ko naa gə ban ɓa a nee wa? 30Ɗaa, anji le pa ar-ɛ na: ꞌƁəəl ang, Məri, ndu tɔr lə Luba to dɔ-i gə. 31O, ꞌi a kḭ kɛm, a kuji ngon gə jingaw ɗaa a kunda ri-a na Jeju. 32N-a tɔgə ngaɓa d-a ɓar-ɛ na Ngon gə Dəw gə sam dara gə. Mbayɓe Luba a kar-ɛ ngəndəng mbay lə k-eje Dabidi. 33N-a ko̰ dɔ mə kəy lə Jakobo#1.33 Mə kəy lə Jakobo le to ɓeko̰ lə Dabidi gə dɔbo̰ cibi ngangə ɓeko̰ lə-a a godo 34Məri pa ar anji le na: Se ne nee le a ɗe to gə ban mba m-gərə jingaw ang ɓi? 35Anji le ila-a kəne na: Njil Njerɔsangə a ɗe dɔ-i gə, ngaɓa singamongə gə dara a dəbə-i gə njil. Gəl-e gə nee ɓa, ngon gə a kuj-e le a to ngon gə Njerɔsangə, d-a ɓar-ɛ Ngon lə Luba. 36Jabɛd, njenuji lə-i kara aw kɛm lə ngon gə jingaw dɔ ɓuga-a gə: ꞌNe gə ɓar-ɛ kaw kad lə n-aw gə kɛm nay misa̰ ngaa. 37Mba, ne kara kara dum dɔ Luba ang. 38Məri pa na: M-to ngon njekula lə Mbayɓe, May kar Luba ꞌɗa sə-m to to gə ta-i pa. Ɗaa anji le ḭya̰-a ɔdə aw.
Məri aw mba dɔ Jabɛd gə. No pa lə Məri
39Dɔ ndɔ-ɛje gə əng le, Məri ḭ gə ngɔdə aw ɓeboje gə dɔ ər gə, dɔ nangə gə Juda. 40N-andə kəy gə lə Jakari, ɗaa n-un ji-a n-o ne Jabɛd. 41Logə Jabɛd o ndu Məri le ɗaa, ngon gə m-e gə turu rɔ-ɛ ngaɓa Njil Njerɔsangə kara ɗusu mə Jabɛd tɔ. 42N-pa tar gə ndu-e gə boy na: Luba tɔr ndu-e dɔ-i gə horo jeneje gə tɔ̰y, ngaɓa tɔr ndu-e dɔ ngon gə to mə-i gə əng tɔ. 43Nokarə gə ban ja ko̰ Mbayɓe-je lə-m ce ne dɔ-m gə nee wa? 44A o, logə m-o ndu-i ɗaa, ngon gə to mə-m gə turu rɔ-ɛ gə rɔləl. 45Dəw gə ta kagə tar ne gə Mbayɓe pa gə aw lo-e gə to njenokarə.
46Məri pa na:
Kəm lə-m ɔsə gaji Mbayɓe,
47Njil-m ɗa rɔləl mba Luba, Njekaji-m,
48Mba n-ila kəm-e dɔ ngon njekula lə-a gə to ne gə baa.
Tɔgərɔ, uma kud-e ɓogəne, gəl kuji dəwje tɔ̰y d-a ꞌɓar-m njenokarə.
49Luba gə Njesingamongə ɗa neje to ɓəəl ar-m
Ri-a to gə losang-ɛ.
50 Ngaɓa, məmay lə-a to gə ɓal-ɓal
Dɔ dəwje gə ꞌɓəəl Luba gə
51N-un ji kɔl-ɛ gə taar;
N-ja̰rɛ̰ ne dəwje gə d-aw gə kəji kəsə tar mə-je gə.
52 N-tɔr mbayje dɔ ngəndəng mbay gə lə-je,
N-odo nje gə d-ula dɔ-je, n-unda-je taar,
53 N-ar nekusa dəwje gə d-oso labə,
N-tɔbə njenekingaje ji-je dɔro baa.
54 N-la gə Ijirayɛl, ngon njekula lə-a,
Mə Luba uy dɔ məmay gə lə-a ang,
55Ɗəw kara baa to gə n-pa n-ar bɔ-sijee,
Abəraham je gə gəl kuji lə-a gə ndɔ gə ndɔ.
56Məri ɗa asə ne gə nay munda ɓə lə Jabɛd, ɗaa təl aw ɓee lə-a.
Kuji Ja̰ Njeɗabatɛm No pa lə Jakari
57Ndɔ kuji lə Jabɛd le asə, n-uji ngon gə jingaw. 58Njembɔr kəyje gə njenujije lə-a d-o tar məmay lə Luba gə ɗa sə-a, ɗaa ꞌɗe ꞌɗa sə-a rɔləl. 59Logə ngon le ɗa ndɔ ji nay joo ɗaa, dəwje ɗe mba kuja bər-e, ꞌɓar-ɛ gə ri ɓɔ-ɛje Jakari. 60Ne ko̰ ngon je le un tar pa na: Bənəng ang baa, d-a ɓar-ɛ na Ja̰. 61D-ila-a kəne na: Dəw gə ɗa ɓa o̰ ri gə be gəl kapolo gə lə-i wa? 62ꞌƊa netɔji d-ar bɔ ngon je mba ko se n-a ɓar-ɛ na-na wa? 63Jakari dəji bəgərə, ɗaa ɗa ne kəne na: Ri-a na Ja̰. Dəwje tɔ̰y lo tar igi-je sɛl. 64Lo-e gə nee ja, gɔb-e unja ngaɓa ndo̰-ɛ̰ kara tudu ar-ɛ n-pa tar, cibi n-pidi Luba. 65Njembɔr kəyje tɔ̰y ꞌɓəəl, gə dəwje tɔ̰y gə d-isi mə ɓeboje gə dɔ ər gə dɔ nangə gə Jude. ꞌPa tar neje nee le horo naa gə. 66Dəwje tɔ̰y gə d-o tar nee le ꞌngom mə-je gə, cibi ꞌdəji rɔ-je tar na: Ngon gə nee a to ngon gə ban ja nee wa? Ji Mbayɓe to dɔ-ɛ gə.
67 Njil Njerɔsangə ɗusu mə bɔ-ɛje Jakari, ɗaa ila mbərə na:
68Kɔsə gaji to kar Mbayɓe, Luba lə Ijirayɛl
Mba ɗe gə ɗe o dəwje lə-a ngaɓa uga dɔ-je,
69 N-ar-sijee njekaji-si gə boy
Gəl kuji gə lə Dabidi, ngon njekula lə-a,
70To gə pajambərəje gə njerɔsangəje ꞌpa nee kede ləw baa gə ɓal-ɓal na:
71N-a kɔr-si ji njeba̰a̰je gə lə-si nəm, ngaɓa ji nje gə njigi-si ang gə kɔrɔ nəm tɔ.
72Be ɓa, Luba ɗa ne məmay gə ka-sijee
Cibi m-e ole ne dɔ kone lə-a gə to gə losang-ɛ.
73 Gə go ndu kun gə n-un n-ar ka-sijee Abəraham na:
74M-a kɔr-si ji njeba̰a̰je mba kar-si a polo-mje gə ɓəəl ang.
75A to-je gə losang-ɛ ngaɓa a to-je dana gadə-gadə no-m gə gə ndɔje tɔ̰y gə a ɗa-je dɔ nangə nee.
76Ɗaa ꞌi, ngon gə kasə le, d-a ɓar-i pajambərə lə Nje kisi sam dara gə;
mba ꞌi a nja no Mbayɓe gə mba gɔl ɗəw lə-a,
77Mba tɔji dəwje lə-a to gə d-a kinga kaji ɗəw gə Luba a kɔr ne tar neɗaje gə kṵra̰y lə-je dɔ-je gə.
78Luba lə-si to njemənuji nəm ngaɓa to nje məmay gə bo nəm tɔ.
N-a kar lo kar gə taar ndogo dɔ si to gə ndogo lə kar gə ce be.
79 Lo kar gə a kar dɔ dəwje gə d-isi lo ndul gə gə nje gə d-isi kɔy njil yo gə.
Ngaɓa gə mba kɔr no-si ɗəw ɗɛgɛgɛ gə.
80Be ɓa, ngon le tɔgə ngaɓa uba singa ɗəw njil gə. N-isi ndag lo gə saar ndɔ gə n-tɔji ne rɔ-ɛ no Ijirayɛlje gə.
Currently Selected:
Lugu 1: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
