Markus 6

Gà mburma ana i Nazaret a, ta gəs Yesuw nda gəzləŋ tsa

Mata 13:53-58; Luka 4:15-30

1I dəba ŋa ya, Yesuw a hitse i fataya, a da a kwite ana a gəl iɗəm ba ya. 2A pat mesìfìkà ba ka, a da a ga mahàmà a Mbulum. A daha ka, a dza ba aà medzeŋge bazlam Mbulum a mburma. Bazlam ŋgar ata gà mburma tə tsaraka ka, a ge aà tar kamala dukw mene aà mburma ya. Ta gwaɗaba ika magər tar: «Yweh yweh, a ŋgatara madzala gà gər ata dze ana, i ŋga ya? Na naha, a geye a gà dukw mene aà mburma, nda metsehe ŋgiɗ pampam hinne asa ya? Weke na a vəlar metsehe ata dze ya? 3Aɗaba piŋŋe ka, a papazawa ka, dizl. Ŋgat ibam, kəla Mariya ya. Gà damər ŋgar tekeɗe ka, gà Zakup nda Yasufa, nda gà Yudas, nda gà Simun. Gà damər ŋgar gà dəm ŋana tekeɗe, tar ɗa mandza ŋa ika magər kwa i faha ya.» Aɗaba taŋa na gà mburma ata ta gəs ahəm aà Yesuw tsiye. 4I fataya ka, Yesuw a gwaɗa a tar: «Ku weke na tə sər ŋgat, a gəl ba i kwite ata, nda gà mburma ana i ga i ma ŋgar a tserdze, dite ka, à me a ter a à bazlam Mbulum i fata asa ka, ta ger a magəɗa tsa. Ta fir ahər a lele tsa, ku mege i kwite awara tserdze tekeɗe ya. Say i kwite ŋgiɗ, ika magər gà mburma ŋgar asa tsa dzekwiŋ, dite ta ge a magəɗa a bazlam ŋgar kuɗa.» 5Aɗaba bazlam tar ata ka, Yesuw tekeɗe, aka sle aà mege gà dukw mene aà mburma ŋgiɗ hinne i fata asa tsa. A daha, a dzaya ahər aka gər gà ɓəzla dukw məməta ata i fataya zaakwa zaakwa pəra. A mbala à tar i dukw məməta tar a. 6Aɗaba bazlam tar ata ka, a ge ahər kamala dukw mene aà mburma ya hinne, agəra ana ta gəs ŋgat nda gəzləŋ tsiye. A hitse dər i fataya tsara, a da a kwite ana a riŋ bise nda kwite ata ya. A daha, a tsik bazlam ŋgar a mburma i fata.

Yesuw a slər gà ɓəzla mazazama ŋgat aaha kurwa gər sula ya,

sula sula

Mata 10:1-15; Luka 9:1-6

7Aləka i dəba ŋa ya, Yesuw a zal a gà ɓəzla mazazama ŋgat aaha ndeɗiŋa kurwa gəra sula ya. Tə daha a təv ŋgar, a vəl a tar ndzəɗa aà madalawa gà sitene aà mburma ya. A ndzaka ikaba tar a sula sula. A slər tar aà metsìkè bazlam Mbulum nda madalawa gà sitene ata aà mburma ya. 8A gwaɗa a tar: «Na ki dwim a ka, ka tə zlum dər duwa aà ahər tsa, say zəva ilik. Ka tə ndzəkum dər dukw mezime tsa, kige tsa kìywa kurum, bəla siŋgwe tsa. 9Ndzəkum dər tsàpà kurum, ama ka tə ndzəkum dər petek sula tsa, say na ika ba kurum a ɗekɗek.» 10Yesuw a gwaɗa a tar asa: «Kàa dumaha ka, ki ndzwim a ka, i bəra wele ana kà ndislwim ahər i kwite ata ya, haa a pat ana ki mèhwim a ba i fataya dukw kurum. 11Na gà mburma ana i kwite ŋgiɗ a, ta waya kurum tsa, nda gà bəla tàa niw dukw ana ki tsikwim a ter a ya ka, ki tetekwim a aba à gà ahəɗ tar aà sik kurum a, dite ki dwim a aka miɗ dukw kurum. Taŋa ka, kamala megweɗe ya: Maa be a kurum à ɗaf, sida ŋa ika gər kurum.» 12I dəba ŋa ya, gà ɓəzla mazazama Yesuw ata kurwa gəra sula ya, tə da aà kwite aà kwite ika ahəɗ ata, ti tsikewa bazlam ŋgar ata a mburma. Ta gwaɗawa a tar: «Mbəɗum à madzala gà gər metsehe kurum.» 13Tə daha, tə dalawa aà tar gà sitene ya. Ta baha mal aà gà ɓəzla dukw məməta, dite ta mbala à tar.

Makə̀ɗà Yuhana metsìlwìɓè à mburma a yam

Mata 14:1-12; Luka 3:19-20; 9:7-9

14Akahər ata ka, *Hiridus, ŋgat batsah Əbay ana i fataya, aka tsaraka meɗè zləm Yesuw, aɗaba ku mege a ŋga tekeɗe, zləm ŋgar aka ɗe aà mburma hinne. Gà asiŋ gà mburma ŋgiɗ ta gwa ahər: «Ŋgat ka, Yuhana metsìlwìɓè à mburma a yam, aka mbəlara i biye ya. Ŋgat ŋa na a geye a gà dukw mene aà mburma ata kərga taŋa ya.» 15Gà mìsle ŋgiɗ ibam, ta gwa ahər: «Iliya, mala məma à guma Mbulum ana akahər ata ya.» Gà mìsle ŋgiɗ ibam asa, ta gwa ahər: «Wele aka ka, i liwiŋ gà bàba gà ɓəzla məma à guma Mbulum ana akahər ata ya» mbaŋa. 16Hiridus a tsaraka bazlam tar ata ka, a gwa: «Ŋgat ka, Yuhana metsìlwìɓè à mburma a yam kaɗəŋ. Wur ana i sàs ikəka gər a, aka mbəlara i biye ya.»

17Hiridus a tsik kataya ka, aɗaba ana ŋgat na a gəs Yuhana, a kəɗ ŋgat i ga daŋgay a. A tike aɗəm ŋgat ka, agəra ana a palar ahəm aà mazla *Hirudiya, məkəs damər ŋgar Filip ana a zlaba ihər a ya. 18Magəsa ŋgat ata ta gəs a ka, aɗaba ana Yuhana a gwaɗawar ka: Məpala ahəm Mbulum aka vəl vatwa aà mazla məkəs damər yak tsiye. Bazlam ŋgar ata a tsik kataya ya ka, a tsəɓ a gà Hiridus nda Hirudiya hinne. Hiridus a slər gà mburma ŋgar. Tə daha, ta gəs Yuhana. Ti tike ŋgat a daŋgay. 19Ama məkəs aaha ka, a sasar medzeye à mesife Yuhana fit a biye. A sle aà medzeye dər tsəka, agəra Hiridus ana a ge magəɗa a makə̀ɗà Yuhana ya. 20A ger magəɗa ka, aɗaba a sər, Yuhana a gewa ka, dukw ana ŋgwal ŋa ya, bakal ŋgar a riŋ tsa. Aɗaba taŋa, a kaslawa dər akaba ŋgat aà Hirudiya ya, i ga daŋgay. Bazlam Yuhana ana a tsikewa, a dzawar zləm a ka, a tsahən ahər ibam. Ama i huɗ bazlam ŋgar ata ya ka, a ndzə̀kawa ihər metsehe ya. A sər dukw ana a ge a ya tsa.

21Aləka i dəba ŋa ya, məkəs ata zləm ŋgar Hirudiya ya, aka ŋgat vatwa aà magəsa Hiridus a gedzewe, aɗaba makə̀ɗà Yuhana aaha. Hiridus a zal megirive biy pat mawà ŋgat ana a ndze aɗəm a, a gà bàba gà mburma ana ta kwere a mburma ika ahəɗ ata ya, nda gà Əbay gà sliwdze, nda gà asiŋ gà bàba gà mburma ana i Galile ya tserdze. A de a tar ɗaf batsah ŋa. 22Tə dza ba aà megirive hinne.

Aləka i dəba ŋa ya, dəm Hirudiya məkəs aaha a daha a təv gà bàba gà mburma ata a ga. A daha ka, a dza ba aà megirive. Megirive dəm ata ka, a tsahən aà Hiridus nda gà bàba gà mburma aaha a zal a tar à dukw mezime ya hinne. A gwaɗa a dəm ata: «Wiz aà iye dukw ana a sàsak a, i vilekiŋa.» 23I dəba ŋa ya, Hiridus a mbaɗa ika miɗ gà mburma aaha a zal a tar tserdze ya, a gwaɗa a dəm ata: «Yàa mbaɗa i sida ya kərga naha ya ka, dukw ana kàa wiz a ka, i vilek a ndzer, pàrsa iɗəm tsa. Ku mege ahəɗ ana iye ihər i kwere a ya tekeɗe ka, i sèsekiŋa.» 24Dəm ata a dzala gà gər ka, a sər dukw ana a wiz ahər a ya tsa. A dara i təv tar i ga ya. A daha, a gwaɗa a mama ŋgar: «I wiz a dze ana, dukùla, mama gà?» Mama ŋgar a gwaɗar aaka: «Ki wiz a ka, gər Yuhana metsìlwìɓè à mburma a yam. Mà sàsakara ikəka gər a.» 25Dəm ata a mbəɗ gər a təv tar tsara. A daha, a gwaɗar: «A sèsiŋ ka, sèsiŋara gər ika Yuhana ya kinehe tsara, ka tikiŋara aka tasà ya.» 26Əbay aaha a tsaraka kataya tsara ka, arəv a da ihər a, gəzləŋ a wur ahər hinne, agəra makə̀ɗà wele aaha. Ama a sle aà meniwer a dər asa tsa, aɗaba aka mbər mimbeɗe ika miɗ gà bàba gà mburma aaha tə zəm akaba ɗaf ndeɗiŋa tserdze ya. 27I dəba ŋa ya, a slər sliwdze ilik. A gwaɗar: «Da a daŋgay. Kàa daha ka, kà sàsara gər ika Yuhana ya.» Sliwdze aaha a da a ga daŋgay. A daha, a sàsara ikəka gər a. A tikera aka tasà ya. 28A da dərra a təv Əbay nda gà mburma ŋgar aaha ya. A dara, a vəl a dəm aaha kuɗa.

29I dəba ŋa ya, gà ɓəzla mazazama Yuhana, tàa tsaraka ta gwa la, tàa kəɗ ŋgat ka, tə daha, tə zlara məməta ŋana i bəɗ a, tə zla a biye.

Yesuw a vəl dukw mezime a gà mburma hinne, ti sle

dəbuw ə̀zləm

Mata 14:13-21; Luka 9:10-17; Yuhana 6:1-13

30Aləka i dəba ŋa ya, gà ɓəzla meslire Yesuw aaha ndeɗiŋa a slər tar a, tàa mbəɗaha gər a təv ŋgar. Tə daha ka, tə ɗamar dukw ana ta ge riŋ i fataya, nda bazlam ana ti tsik a mburma ya tserdze. 31Yesuw a gwaɗa a tar: «Tàkwa i faha ya, a təv ana mburma a riŋ iɗəm tsiye. Ki ti sìfìkikwe a ba a fata.» A tsik a tar kataya ka, aɗaba gà mburma ana tə dawa i təv ŋgar a hinne ya. Aɗaba taŋa, gà Yesuw nda gà ɓəzla mazazama ŋgat ta ŋgat akaba vatwa aà mazəma akaba dukw mezime tsa. 32Ta mah ba, tə tsala a slə̀làh yam ana ika gər yam ata ya. Tə da dər a təv ana mburma a riŋ iɗəm tsiye. 33Ama gà mburma ata i fataya ka, tə dara i kwite ŋgiɗ a pampam. Ta ŋgat a tar, ti de a ka, tə zazam tar gə̀də̀bəllà ndaà gìgìze ŋana. Tə lah a bəɗ a gà Yesuw a təv ana ti de aɗəm a ya. Ta vava tar i fata. Aləka gà Yesuw nda gà ɓəzla mazazama ŋgat ti ndzeha a fata ka, ti leha aà gà mburma ata a fata.

34I dəba ŋa ya, Yesuw a tarra i slə̀làh yam a, a fə̀r aà gà mburma ata mbə̀rzə̀zza mayahaba gər ŋa ya ka, ti ndzer are tsehe hinne, aɗaba ti ne ka, kamala gà təmaŋ ana mala makəva tar a riŋ tsiye. Agəra taŋa, Yesuw a dza ba aà metsìkè a tar bazlam ŋgar ŋgiɗ pampam hinne. 35Zàkwayiya ka, hawa aka ge. Gà ɓəzla mazazama Yesuw aaha ti sìrìkaha a təv ŋgar. Ta gwaɗar: «Kinehe ka, pat a riŋ mba tsa. Aɗaba naha kwa ɗa ka, i kusak asa ana, meme? 36Ŋgulum ka, gwaɗa a gà mburma aaha, tə daya a huɗ kwite nda gà kə̀sà ana a mbera bise ya, aà masàkàmà dukw mezime tsəna, meme na naha ya?» 37Yesuw a gwaɗa a tar aakaha: «Kurum ŋa vəlum a tar dukw mezime.» Gà ɓəzla mazazama ŋgat aaha, ta gwaɗar aaka: «Gà mburma hinne ŋa aaha ana, mìi zlere a siŋgwe ŋa i ŋga ya?» 38I dəba ŋa ya, Yesuw a gwaɗa a tar: «Ɗaf a riŋ aà kurum dze ana, tapa ndaw? Dumaha, fə̀rum kwaŋ.» Gà ɓəzla mazazama ŋgat aaha tə daha, ta fə̀r ka, ta gwaɗar: «Ɗaf a riŋ ka, tapa ə̀zləm, nda kilif sula.»

39I dəba ŋa ya, Yesuw a gwaɗa a gà ɓəzla mazazama ŋgat ata: «Dumaha, gwaɗum a mburma, tə tarətsa ba ikaba ya zaakwa zaakwa, tə ndzaya a bəɗ aka kwizir.» 40Gà ɓəzla mazazama Yesuw aaha tə daha, ti tsik a tar kataya. Dite gà mburma ata tə tarətsa ba ikaba ya, tə ndzaya a bəɗ. Gà mìsle ŋgiɗ dərməka, gà mìsle ŋgiɗ ibam, dzik ə̀zləm. 41I dəba ŋa ya, Yesuw a ndzək gà ɗaf ata nda kilif aaha sula ya, akahər ŋgar. A fə̀r dər a gəza mbulum, a ge dərraha kəkaaha a Mbulum. Aləka a sasa ikaba ɗaf ata ya. A vəl a gà ɓəzla mazazama ŋgat ata, dite gà mburma ata tə daha, tə dzaya a gà asiŋ gà mburma ata i fataya tserdze. A ndzək kilif aaha, a dzaya a tar aaka tserdze asa mbaŋa. 42Ku weke a zəm ɗaf ata ka, a sler, a zeha aà tar a. 43Aləka gà ɓəzla mazazama Yesuw aaha tə daha, ti yaha gər a maɗaval ŋana ka, a raha a gà tàkwasa kurwa gəra sula. 44Ama gà mala ga na tə zəm ɗaf ata ya, ti sle dəbuw ə̀zləm.

Yesuw a de a ika gər yam a nda sik

Mata 14:22-33; Yuhana 6:16-21

45I dəba ŋa ya tsara ka, Yesuw a gwaɗa a gà ɓəzla mazazama ŋgat: «Tsalum a slə̀làh yam, dum aka miɗ a Betsayida, aka lìdè dùluv, i lehe a aà kurum ŋa.» Gà mburma ata tə daha, tə tsala a slə̀làh yam ata, tə da. I dəba ŋa ya, a gwaɗa a gà asiŋ gà mburma aaha: «Dum a ma kuɗa» mbaŋa. 46Aləka tə da i təv ŋgar a ka, ŋgat ŋa a tsəl a gər kwite. A daha, a hama a Mbulum i fata. 47Gà ɓəzla mazazama ŋgat aaha ndeɗiŋa a slər tar a, ti ndze a magər duluv ka, həvəɗ aka ge. Yesuw ibam, ŋgat a riŋ mandza ŋa i dəba mba à gər ŋgar, aka maharaba ya zukw tsa. 48Yesuw a fə̀raha aà tar ka, gà ɓəzla mazazama ŋgat ata a slər tar a ka, tar riŋ tì sèwèr a are hinne, aɗaba slə̀làh yam tar ata a mba aà mede ika gər yam a tsa. Himbiɗ a riŋ dàrdàr à mère a à tar ndàra a dəba ya. I mèkwède hedwe medzè melìgire aka bur ide ka, Yesuw a màhəha ba. A waya malàhà a tar ndàra aka miɗ. A de a ndaka gər yam tsə̀pàk tsə̀pàk nda sik. 49Gà ɓəzla mazazama ŋgat ata ta ŋgataraha na a dehe a a təv tar ndaka gər yam a ka, tə dzala, ta gwa: «Naha ka, duwa.» I fataya ka, tə dza akaba Mewideye nda gà tuwa hinne. 50Aɗaba tar ata tserdze ya, tàa ŋgatar ka, ta ge magəɗa hinne. Ama Yesuw a gwaɗa a taraha tsara: «Arəv ma da aà kurum a, ki gwim magəɗa tsa, iye na naha ya.»

51Zàmma tsəka, a daha a təv tar, a tsəlaha a slə̀làh yam ata tar iɗəm a. Dite himbiɗ aaha a mət aaka tsara. Gà ɓəzla mazazama ŋgat aaha ndeɗiŋa ya, ta ŋgat a Yesuw ana a ge kataya ya ka, arəv a da aà tar a, ta ge magəɗa. 52Tə sər ka, Yesuw a sle a aà duwa ka, tserdze tsa. Aɗaba dukw ana ndeɗiŋa a ge nda ɗaf aaha ya ka, aka məts a tar gər, tàa tsaraka bise tsa.

Yesuw a mbala à gà ɓəzla dukw məməta ika ahəɗ Genezaret

Mata 14:34-36

53Aləka gà Yesuw nda gà ɓəzla mazazama ŋgat aaha ti ndze aà gìgìze ŋgiɗ ka, tə tsalara i duluv ata ya aka ahəɗ Genezaret a. Tə dàn aba slə̀làh yam tar ata aà gìgìze ya. 54I təv ana tə tsalara iɗəm a ka, gà mburma ana i fataya, tə sər Yesuw tsara. 55Ta valaha a gà kə̀sà ana ika ahəɗ ata ya tserdze. Tə daha, tə ndzakara gà ɓəzla dukw məməta ana i kwite ata ya, nda slə̀làh a fit. Ti yahaba dər gər a təv Yesuw ana iɗəm a. 56Ku mege i batsah kə̀sà, nda gà i kəla kə̀sà ya tekeɗe, gà mburma tə ndzakawaraha gà ɓəzla dukw məməta aka dàlàbə̀rà mayahaba gər mburma ana iɗəm a. Tə zazamawa dər ŋgat a təv ana a de aɗəm a ya. I fataya ka, ta hama a Yesuw hinne, aà mə vəl vatwa a gà ɓəzla dukw məməta ata, tə lama aà gùva petek ŋgar àsla pəra ka, ta mbeliŋa. Gà taŋa tə lama aà petek ŋgar ata tserdze ya ka, ta mbala i dukw məməta tar a tsara.

Currently Selected:

Markus 6: gnd

Highlight

Copy