Markus 7

Mege metsehe agəra fəla gà tsir ana akahər ata ya

Mata 15:1-9

1A pat duwa, gà *Farisa nda gà asiŋ gà ɓəzla medzeŋge məpala ahəm Mbulum tə dara i Yeruzalem a. Tə dara ka, tàa le aà gà Yesuw nda gà ɓəzla mazazama ŋgat. Ti yahaba gər a təv ŋgar. 2Tə samata ka, gà asiŋ gà ɓəzla mazazama Yesuw aaha, tə zəmawa ɗaf ka, ze məbàrà ahər. Ta gwa: «Gà ɓəzla mazazama Yesuw ka, tàa nəs à gəzləŋ tar, aɗaba tə zəmawa ɗaf ka, ze məbàrà ahər, kamala ana fəla gà tsir tar a tsik a tsa.» 3Ama gà Yahuda tə zəmawa ɗa ka, say tàa bara ahər lele dzekwiŋ, aɗaba tə dəɗ ka, aka fəla gà tsir tar ana ɗa biybiy a. Ndeyndey ŋa ka, gà Farisa. 4Na bəla tàa màha a ma i kwaskwa ya ka, say ta bere a ba lele dzekwiŋ, na dite ti zim a ɗaf a. Ta ge a gər a gà asiŋ gà fəla gà tsir tar ana ɗa tə zazəɗ dər a ka, hinne. Kərga dukw masà yam a, nda gà dukw yam a, nda gà tasà tar a, say ta bere a ka, lele kamala ana fəla gà tsir tar a tsik a.

5Gà Farisa nda gà ɓəzla medzeŋge məpala ahəm Mbulum ata ɗa ya, tə samata mege dukw tar ata ka, a tsahən aà tar tsa. Ta gwaɗa a Yesuw: «Naha ana, meme na gà ɓəzla mazazama kər aaha ta gəs mege gər a fəla gà tsir mər ana ɗa hwèdwedwe ya tsəna, aàla? Na naha, ti zim a ɗaf ka, ze məbàrà ahər a?» 6Yesuw a tsaraka kataya ka, a gwaɗa a tar aaka: «Kurum ka, gà ɓəzla məbànà mburma nda pàrsa, kamala ana Ezaya, mala məma à guma Mbulum a wetse ya kaɗəŋ, kalkal kamala taŋa ya. A wetse i wakita Mbulum piŋŋe ka, Mbulum a gwa:

<Gà mburma aaha tì zèmbeɗe a à iye ka,

tsàf tsàf tsàf nda bazlam ɗekɗek.

Ama i gəzləŋ tar ka, tàa gəs iye tsa.

7Meheme tar ana ta hemiŋ a ya ka, taf masakəŋa.

Aɗaba ti dzeŋgewa a mburma ka,

məpala ahəm mburma, tsəka,

biy ga tsa.> «*fa*

8Aɗaba taŋa, Yesuw a gwaɗa a tar asa: «Kà miyakum à məpala ahəm Mbulum, dite ki giswim a bazlam mburma ana ti tsik a ya tsəna?»

9I dəba bazlam ata ya ka, Yesuw a gwaɗa a tar asa: «Kà sərum are mimìyàkà à bazlam Mbulum ka, hinne, dite na ki giswim a bazlam gà tsir kurum a tsəna? 10Aɗaba Mbulum a tsik nda ahər Musa, a gwa ka: <Zàmbaɗa à gà dede yak nda mama yak.> A gwa asa: <Wur ana a tsik a dukw ana ŋgwala tsa aà dede ŋgar, kige tsa aà mama ŋgar a ka, ta kəɗ wele ata.>*fb* 11Ama biy kurum ka, pam. Kù gwaɗum: <Na wura aka gwaɗa a dede ŋgar, kige tsa mama ŋgar ka, limana gà ana zləmana i gwa, i zlèk a dər kurum a ka, i gweɗe a, |itkurbaŋ,|re kamala megweɗe ya ka, i vile a taŋa ka, dukw masakəŋana a Mbulum.> 12Kurum kù gwaɗum: <Wur ata ka, ma dzala gà gər aà məvəla duwa a gà dede ŋgar nda mama ŋgar asa tsa. Vatwa ŋgar a riŋ aà mazlàkà tar asa tsa.> 13Kamala taŋa ya, kurum kà nwim à bazlam Mbulum ka, dukw masakəŋa, aɗaba fəla kurum ana ki zezeɗwimibe a dər a ba ya. Dite kurum riŋ ihər ki sekehwime a dər nda gà bazlam ŋgiɗ pampam kamala taŋa ya asa.»*fc*

Gà dukw ana ti nis a à mburma i gəzləŋ a

Mata 15:10-20

14I dəba ŋa ya, Yesuw a zal a gà mburma ata i fataya tserdze, tə daha a təv ŋgar. Tə daha ka, a gwaɗa a tar: «Tsarakum, dzum zləm a dukw ana i tsik a kurum a ya lele: 15Aɗaba dukw ana mburma a zim a a hitwis tserdze ya ka, a sle aà menise a à mburma tsa. Say dukw ana a dere a i ba mburma ndàra i gəzləŋ ŋgar a ivaɗ, na a nis a à mburma ya. 16{Tsarakum lele na gər kurum aka ge aà metsereke ya.»}

17I dəba ŋa ya, Yesuw a hitse i təv gà mburma ata ya, a da a ma. Gà ɓəzla mazazama ŋgat aaha tə zazam ŋgat. Tə daha, ta wiz aà ŋgat bazlam ata ya asa. Ta gwaɗar: «Ɗe a mər à bazlam ata lele te. Maa tsaraka lele tsa.» 18Dite a gwaɗa a tar: «Wànà kurum tekeɗe, metsehe kurum a riŋ tsa mbaŋa ya? Kà ze metserekwim a? Kà sərum tsiye, dukw ana mburma a zim a ndàra a hitwis a ka, a sle aà menise a à mburma tsəna, kà sərum tsiye? 19Aɗaba dukw ana a zim a ka, a de a ka, a gəzləŋ ŋgar tsa. Ama a de a ka, ndàra a hitwis, dite a dere a i ba ŋgar a ndàra a bəɗ a bəra ya.» A sàs a Yesuw aà megweɗe agəra bazlam ata ka, dukw mezime tserdze ka, lele. 20Yesuw a gwaɗa a tar asa: «Ama dukw ana a dere a i gəzləŋ mburma ya ivaɗ, na a nis a à mburma ya. 21Aɗaba na a dere a i gəzləŋ mburma ya ka, madzala gà gər ana ti dzele a ŋgwala tsiye. Taŋa na a peze a za a mburma aà mege mezelme nda təv dukw ana biy metsike tsiye, nda gà mege akəl, nda makə̀ɗà mburma, 22nda mege muva, nda mege are aka dukw mburma, nda məpàzà za a mburma, nda masàsà pàrsa, nda mege aba mandakazləm aka duwa, nda mene are a mburma, nda metsìkè dukw ana ìrih ìrih ìrih ŋgwala tsa aà mburma ya tserdze, nda mege dukw falày ana taf masakəŋa ya. 23Gà dukw ata fit dze tə dara ka, i gəzləŋ a. Gà taŋa na ti nis a à mburma ya.»

Məkəs duwa ŋgat ka, dəm gà Yahuda tsa, a gəs Yesuw

nda gəzləŋ

Mata 15:21-28

24Aləka i dəba ŋa ya, Yesuw a hitse i fataya, a da aka ahəɗ ana bise nda Tirus a. A daha a fata ka, a da a ga a bəra wele duwa. A da a ga ata ka, a sasar na gà mburma tə sər aà ŋgat a riŋ i fataya tsa. Ama a sle a aà makàhà ba ŋgar ɓav tsa, gà mburma ata tə sər aà ŋgat a riŋ i fata tsara. 25-26Zàkwayiya ka, məkəs duwa a riŋ i fata. Ŋgat ka, dəm gà kwite ata, aɗaba tsir ŋgar ka, gwala tar ilik nda gà Yahuda tsa pəra. Dəm ŋgar a riŋ, sitene a gasawa. Məkəs ata a tsaraka maɗə̀và zləm Yesuw ana a riŋ i fataya ka, a da a təv ŋgar. A daha, a kal aba aka miɗ ŋgar. A hamar hinne, dite ka, ma dalawa sitene aà dəm ŋgar aaha ya te. 27Ama Yesuw a gwaɗar: «Wur ana a vile a dukw mezime a gà ɓəza ya ka, say a sle a ter a dzekwiŋ, dite a vile a a gà kəra, ti zimiŋa. Tsəka, aɗaba malàhà à dukw mezime ika gà ɓəza ya a gà kəra ka, lele tsa.» 28Ama məkəs aaha a gwaɗar aaka: «Kaɗəŋ Əbay gà, na gà ɓəza ti zim a ɗaf mbaŋa ka, na aka dzawa aà tar a bəɗ a ka, gà kəra ti dehe a, ta peliŋa.» 29Yesuw a tsaraka kataya ka, a gwaɗar: «Kaɗəŋ, pàrsa tsa. Aɗaba bazlam yak ata kà tsikiŋara ya ka, kàa gìsiŋ dərraha ahəm aà are. Ama i zlèk a kər. Da a ma, sitene ata aka da ika dəm yak a.» 30Məkəs ata a mbəɗ gər a ma tsara. A ta medeha a ma ka, a leha aà dəm ŋgar ata lele kuɗa. Sitene ata aka da ikəka ya.

Yesuw a mbəl à mala mandakazləm duwa

Mata 15:29-31

31I dəba ŋa ya, Yesuw a hitse ika ahəɗ Tirus a asa. A mah ba, a da nda kwite Sidun. A da i fataya ka, ndaà gùva duluv Galile. A da aka ahəɗ kwite kurwa. 32A ndzeha a fata ka, gà mburma tə zlaraha wele duwa mandakazləm ŋa. Ta hamar dər, dite ka, ma tike aakahər ŋgar, mə mbəl à wele ata. 33Yesuw a daha, a gəs wele ata i ahər a. A da dər a zlawak i təv mburma ya. Ti ndzeha a fata ka, Yesuw a dzakayar ɓəza ahər a zləm. A tif tìzle aà kəla ahər, dite a lə̀mar dər aà arah. 34I dəba ŋa ya, Yesuw a fə̀r dər a gəza mbulum, a mà ba à mesife ŋgìk, a gwaɗa a wele ata: |it"Yafata,«|re kamala megweɗe ya ka: Zləm yak mà hə̀ndə̀k ba. 35I dəba bazlam ŋgar ata ya tsara ka, zləm ŋgar a hə̀ndə̀k ba, arah ŋgar ibam, a làmbaɗa ba, a fàfəl lele kuɗa. 36Yesuw a gwaɗa a gà mburma ata i fataya: «Ka ti tsikwim a wura tsidze.» Ama tə tsaraka tsa. Aɗaba Yesuw a gwaɗa a tar, ka ti tsikwim tsa tekeɗe ka, ta mba aba aka metsìkè ŋa ivaɗ. 37Aɗaba dukw ana Yesuw a ge a ka, dukw mene aà mburma hinne. Ta gwaɗawa ahər: «Dukw ana a ge a ya ka, à lèmbeɗe a lele ndzer. Ku mege mandakazləm ibam, à hìndìker a i zləm a, à fèfil a lele.»

Currently Selected:

Markus 7: gnd

Highlight

Copy