Markus 11

Yesuw a da a Yeruzalem

Mata 21:1-11; Luka 19:28-40; Yuhana 12:12-19

1I dəba ŋa ya, gà Yesuw nda gà ɓəzla mazazama ŋgat ti de a a Yeruzalem. Tàa à mendze a gà kə̀sà Betaniya nda Betfedze bise nda Yeruzalem, aà sik dìyes kwite duwa mayaha gər dizl ɗaf uliviye a riŋ hinne i fata. I fataya ka, Yesuw a slər gà ɓəzla mazazama ŋgat sula aka miɗ. A gwaɗa a tar: 2«Dum a kə̀sà aaka ika miɗ kurum a kwaŋ. Kàa ndzwimaha aà gùva kə̀sà ata ka, ki lwimehe a aà kəla hezweŋe duwa a riŋ madànà ŋa aà dizl, na wura aka tsəl aaka ilik zukw tsiye. Kà pə̀lumara, ka dum dərra a faha ya. 3Na wura aka gwaɗa a kurum: <Aàmala na ki pìlwim a hezweŋe ŋa ya> ka, gwaɗumar: <Əbay na a wiz a, a tsil aakiŋa, dite à me a kurum a dərra kinehe tsara.> «

4Gà ɓəzla mazazama ŋgat ata sula ya, tə da. Tə daha, ti le aà kəla hezweŋe ata madànà ŋa aà dizl aà gùva hərmaga wele duwa ika bàrama. Tə daha, ta pə̀lara. 5Gà mburma ana mehìtsè ŋa riŋ i fataya, ta gwaɗa a tar: «Ki pìlwim a kəla hezweŋe ŋa a ŋga?» 6Ta gwaɗa a tar aaka, kamala ana Yesuw a tsik a taraha ndeɗiŋa ya, dite gà mburma ata ta miyak à tar.

7Ta gəsaha kəla hezweŋe ata a Yesuw. Tə daha, tə dzaya aaka gà petek tar, dite Yesuw a tsəl aaka kuɗa. 8Gà asiŋ gà mburma ana a riŋ i fataya, ta fatala gà petek tar aka bàrama ana Yesuw a de a dər a. Gà asiŋ gà mburma ŋgiɗ ibam, ta haɓaya aaka slàmbah gà ɓəza ahər dizl ɗaf ana i bəɗ a, aà mazlə̀bà à ŋgat mbaŋa. 9Gà na tar riŋ ika miɗ Yesuw a, nda gà na i dəba ŋgar ti zezem a ŋgat tserdze ya ka, tə dza ba aà mazlə̀bà à ŋgat nda Mewideye ŋgəlakəkka. Ta gwaɗawa: «Zlə̀bakwa à ŋgat. Mbulum mi pise ahəm a wele ana a slərra ya.*fa* 10Mbulum mi pise ahəm aka mekwere Əbay tsir kwa Dawda ana a ta kwere a ya bise. Zlə̀bakwa à Mbulum Batsah ŋa ana i gər ŋa ya.»

11Zàkwayiya ka, Yesuw a ndze a Yeruzalem. A daha ka, a pəts a ga Mbulum Batsah ŋana. A fara riŋ ikaba i ga ata ya lele, a ndza riŋ zàkwayiya ka, hawa aka ge. A dara iɗəm a. Ta mah ba, ta mbəɗ gər nda gà ɓəzla mazazama ŋgat a kurwa gəra sula ŋa aaha a Betaniya.

Yesuw a vəl mezelme a dizl ɗaf duwa a ndza kamala gùvùv a

Mata 21:18-19

12I mèkwède ŋana ta mbiɗere a gər i Betaniya ya, ti de a a Yeruzalem a ka, may a wir a aà Yesuw hinne. 13A fə̀r ikaba ya ka, aka ŋgataha a dizl ɗaf duwa ndàhàk aà gər ŋgar, a ndza kamala gùrùv a. A dzala i gər ŋgar ka, a gwa: «Biy tsa mawà ŋa.» A ta medeha aà huɗ dizl ɗaf ata ka, mawà ŋa tsa. A ŋgataha ka, a slàmbah ŋa ɗekɗek pəra. Aɗaba aka ndze ahər mawà dizl ɗaf ata zukw tsa. 14Yesuw a vəl mezelme a dizl ata tsara. A gwaɗar: «Ki ta we a, na dite mburma a zim a ya ilik asa tsidze, daga aà kinehe ya, haa biybiy.» Gà ɓəzla mazazama ŋgat tə tsaraka bazlam ŋgar ata a tsik kataya ya.

Yesuw i ga Mbulum batsah ŋana

Mata 21:12-17; Luka 19:45-48; Yuhana 2:13-17

15Aləka i dəba ŋa ya, gà Yesuw nda gà ɓəzla mazazama ŋgat ti ndze a Yeruzalem ka, Yesuw a daha, a pəts a ga Mbulum Batsah ŋana. A daha aɗəm a fata ka, a leha aɗəm aà gà mburma a riŋ ti sekeme a gà duwa. Gà asiŋ ŋa, ti dzewa a ter a à duwa. Gà asiŋ ŋa ibam, ta mbìrwìɗ a siŋgwe. A ŋgat a tar kamala taŋa ya ka, a daha, a dalawara iɗəm tar a bəra ya. A mbaɗa à gà tabəl gà ɓəzla məmbàruɗwà siŋgwe aaha a bəɗ gwits gwits nda siŋgwe ŋa dze. Dite a ŋguyutswa à gà kwerse gà ɓəzla madzàwà à gà maadagwar aaha. 16A gəs mivile vatwa a wura aà mazla duwa, ma slala dər nda ga Mbulum Batsah ŋa ata tsa. 17I dəba ŋa ya, a tsik a tar guma ŋgar kuɗa. A gwaɗa a tar: «Aɗaba a riŋ mewetse ŋa i wakita, Mbulum a gwa ka: <Ga gà ka, biy gà mburma ana tserdze ya, aà kwite aà kwite, ta hemiŋ a iɗəm a.>*fb* Ama kurum kà nwim dər i kurum ka, sləlak mandza aɗəm dukw gà ɓəzla akəl.»

18Gà Əbay gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum, tə tsaraka bazlam Yesuw ata a tsik a tar a ka, a zla aà tar arəv a hinne. Ti yaha vatwa aà makə̀ɗà ŋgat. Aɗaba guma ŋgar ata a tsik a tar a ka, a gəs gəzləŋ a gà mìsle ŋgiɗ ika magər tar a hinne tsara. A dzik a aà tar mburma ya. 19Aləka hawa a ge ka, gà Yesuw nda gà ɓəzla mazazama ŋgat ta mah ba i kwite ata ya, tə da.

Meɗè à meheme ana nda ndzer ŋa a təv Mbulum a

Mata 6:16; 21:20-22

20Aləka i mèkwède hedwe, i təv ana gà Yesuw nda gà ɓəzla mazazama ŋgat ata ta mbiɗere a gər ndaka vatwa ata ya ka, ta ŋgataha a dizl ɗaf aaha ndeɗiŋa a ndza kamala gùrùv a, aka kula nda zlile ŋa dze. 21Bazlam ana Yesuw a tsik a dizl ɗaf aaha ndeɗiŋa ya ka, aka məts gər a Piyer tsa. A gwaɗa a Yesuw: «Əbay gà, fə̀r kwaŋ, dizl ɗaf aaha kà vəlar mezelme ya ka, aka kula.» 22Yesuw a gwaɗa a gà ɓəzla mazazama ŋgat ata tserdze ya: «Duwa ilik ma ta məts a kurum gər tsa: Gəsum Mbulum nda gəzləŋ kurum lele. 23Kà sərum dər ndzer, kurum tekeɗe, ki slwim aà megweɗe a a kwite aaha: <Hitse i faha ya, da, tə dəɗ a duluv aaka.> Na kàa tsikwimer ka, nda gà gəzləŋ sula tsa, nda gəzləŋ ilik, dukw ata ma ge ba ndzer ka, a ge a ba kamala taŋa ya mbaŋa. 24Aɗaba taŋa, iye ihər i gweɗe a kurum ŋa: Na ki wizwim a duwa i təv Mbulum a, kàa gəsum dukw ata kà wizwim nda gəzləŋ ilik, Mbulum mə vəl a kurum ka, a vile a kurum a kaɗəŋ. 25Ama kəla ka, i təv ana ki hemwim a a Mbulum a, bəla wura aka ge bakal i təv kurum a ka, pə̀lumar dər dzekwiŋ, dite Tsir kurum ana i gər ŋa ya, à pìl a kurum a à bakal kurum mbaŋa. 26{Ama na ki pìlwim a dər a gà na ta gewa a kurum bakal ata ya tsəka, Tsir kurum ata tekeɗe, à pìl a kurum a dər ɓav tsa mbaŋa.»}

Weke na a vəl ndzəɗa a Yesuw aà mege duwa pampam a?

Mata 21:23-27; Luka 20:1-8

27I dəba ŋa ya, gà Yesuw ti ndzeha a Yeruzalem asa ka, a daha, a pəts a ga Mbulum batsah ŋa ata asa mbaŋa. I təv ana ŋgat a riŋ à sìweye a i ga ata ya ka, gà Əbay gà ɓəzla mandəva kuɗa a Mbulum nda gà ɓəzla medzeŋge məpala ahəm Mbulum, dite nda gà bàba gà mburma ana ta kwere a gà Yahuda ya, tə daha a təv ŋgar. 28Ta gwaɗar: «Ki ge a duwa kamala taŋa ya ana, nda ndzəɗa weke? Weke na a slərra kər, a vəlak ndzəɗa aà mege ŋa dze ya?» 29Yesuw a gwaɗa a tar: «Iye tekeɗe, i wiz aà kurum a bazlam ilik mbaŋa te. Na kàa sirwimiŋ aakaha ka, dite i ɗif a kurum a dər, nda ndzəɗa weke na i ge a gà dukw aaha ya.» 30A gwaɗa a tar: «Weke na a slərra Yuhana aà metsìlwìɓè à mburma yam a? Wànà Mbulum a, na a slər ahər ŋgat a, tsəna, mburma ya? Tsikwimiŋara iɗəm a ilik.» 31I dəba ŋa ya, gà mburma ata tə dza akaba bazlam ika magər tar. Ta gwaɗaba: «Na kù gwaɗakwar kinehe ka: <Mbulum na a slərra ŋgat a> ka, a gweɗekwe a: <Dite aàla na kə̀ gəsum bazlam ŋgar tsiye?> 32Ama na kù gwaɗakwar: <Gà mburma na tə slər ahər ŋgat a> ka, a ge a ba tsa asa. Aɗaba gà asiŋ gà mburma hinne ika magər kwa aaha ta gwa, Yuhana ka, mala məma à guma Mbulum ndzer, ta miyek a à kwa tsa asa.» Ta ge magəɗa aà metsìkè ŋa. 33I dəba ŋa ya, ta gwaɗa a Yesuw: «Mì sər tsa.» Dite Yesuw a gwaɗa a tar kuɗa: «Yawwa, iye tekeɗe ka, i tsik a kurum a wur ana a slərra iye ya, a viliŋ ndzəɗa aà megeye gà dukw aaha tserdze ya ɓav tsa mbeete.»

Currently Selected:

Markus 11: gnd

Highlight

Copy