Mata 10
10
Yesuw a pala gà ɓəzla mazazama ŋgat kurwa gəra sula
Markus 3:13-19; 6:7; Luka 6:12-16; 9:1; Gà Ɓəzla Meslire 1:13
1I dəba ŋa ya ka, Yesuw a zal a gà ɓəzla mazazama ŋgat kurwa gəra sula, tə daha a təv ŋgar. Tə daha ka, a vəl a tar ndzəɗa aà madalawa gà sitene aà mburma ya, nda məmbàlà à gà ɓəzla dukw məməta, nda gà ɓəzla magàha a bəɗ fit dze. 2Zləm gà ɓəzla meslire ata a zal a tar kurwa gəra sula ya ka, malahalah ŋa Simun ana ti ɗer Piyer a, nda damər ŋgar Andire, dite gà Zakup ibam, nda damər ŋgar Yuhana, gà ɓəza Zebede. 3I dəba ŋa ya, gà Filip nda Bartelemi, gà Tumas nda Mata mala duwan ata, dite gà Zakup kəla Alfayus nda Tadawas, 4dite gà Simun ana a niw bazlam ŋgumna piŋŋe, a waya makwàrà ba tar i gwala ŋgar a, nda Yudas Iskariyut, wele ana a ta ge a ɗaf aà Yesuw a.
Yesuw a slər gà ɓəzla mazazama ŋgat ata kurwa gəra sula ya
Markus 6:7-13; Luka 9:1-6; 10:3-12
5Aləka Yesuw a slər gà ɓəzla mazazama ŋgat aaha kurwa gəra sula ya. I təv ana ti de a ya ka, a gwaɗa a tar: «Dum, ama na ki dwim a kəla ka, ka tə dum nda təv gà na tar gà Yahuda tsiye tsa. Dite ka ta dum a kə̀sà gà Samariya tsa asa mbaŋa. 6Ama ki dwim a ka, a təv gà gwala gà Isərayel ana ti ne kamala gà təmaŋ ana tàa dzeye ya ivaɗ. 7Na kàa ndzwimaha a təv tar ka, gwaɗum a tar: <Mekwere Əbay Mbulum aka à mendzera a təv kurum a.> 8Dite i dəba ŋa ya, ka mbalum à gà ɓəzla dukw məməta nda gà na ta mata ya, dite nda gà ɓəzla mbəlak ba asa. Ka dalawum gà sitene aà mburma ya. Aɗaba i vəl a kurum ndzəɗa ata ka, dukw taf masakəŋa. Ama kurum tekeɗe, vəlum a tar kataya mbaŋa. 9Ka tə ndzəkum dər siŋgwe tsa, ku mege siysiy ilik tekeɗe ya. 10Ka ndzəkum gà kìywa kurum, kige tsa gà petek sula tsa. Dite ka tə ndzəkum dər gà tsàpà kurum nda gà zəva kurum ɓav tsa asa mbaŋa. Aɗaba mala megemir ka, a sle a aà maŋgata dukw ana kuɗa ŋa a ger a ya.
11Ama na kàa ndzwim a batsah kə̀sà, kige tsa a kəla kə̀sà ka, ki yehwim a ga wur ana a waya kurum, à gis a kurum a a ga a ma ŋgar lele ya. Dite ki ndzwim a i ma ŋgar haa a pat ana ki mèhwim a ba i fataya dukw kurum. 12Na bəla ki dwim a a bəra wura ka, ki gweɗwim a a gà mburma ana i ga ata ya: <Zayzay ma ndza ika gər kurum> dzekwiŋ. 13Dite bəla gà mburma ata i ga ata ya, ta waya kurum, tàa gəs kurum ka, taŋa ka, zayzay kurum ata a ndze a ika gər tar lele kuɗa. Ama na tàa gəs kurum tsəka, zayzay kurum ata a ge a ter a ŋgulum ɓav tsa. 14Na kàa dum a bəra mburma, kige tsa a huɗ kə̀sà ana ta waya kurum tsa, nda gà bəla tàa niw dukw ana ki tsikwim a ter a ya ka, mbə̀ɗumara gər i kwite ata ya dukw kurum. I təv ana ki mèhwimere a ba i fataya ka, takw takw takw tatakum aba à ahəɗ tar aà sik kurum a. Taŋa ka, kàa bwim a tar à ɗaf. 15Aɗaba taŋa, iye ihər i gweɗe a kurum a nda ndzer, pàrsa iɗəm tsa: A pat seriye Mbulum ka, i tar ka, mawùràba ŋa, biy gà Suduma nda gà Gumura duwa i təv a tsa.»
Gà mesewere are ana ti ndzere a mba ya
Markus 13:9-13; Luka 12:11-12; 21:12-19
16Aləka i dəba ŋa ya, Yesuw a gwaɗa a tar asa: «Araha, i slir a kurum ana kà nwim kamala gà təmaŋ, ndzəɗa kurum a riŋ tsa liɓèt a liɓèt a ya. Ama ki dwim a kəla ka, a liwiŋ gà mburma ana ti ne kamala gà də̀var a. Aɗaba taŋa, nwim ka, gà ɓəzla metsehe kamala gà mesiwiɗ ana slìrmiɗ slìrmiɗ ta kesle a ba tar aà gà məmba ya. Ki nwim a asa ka, kamala huɗgum ana a səraha duwa tsa, a ndzebe a tsìkeffe ya. 17Kaslum ba kurum tsireŋŋè i təv gà mburma ya, aɗaba a pat ŋgiɗ ka, ti ta gese a kurum, ti de à kurum a aka miɗ seriye, ti ta gezlere a kurum i ga mahàmà a Mbulum tar a. 18Ta gese a kurum aka miɗ gà ɓəzla makwàrà mburma, nda gà aka miɗ gà Əbay gà bàba ŋana agəra iye. Kamala taŋa ya, ki gwim a sida gà nda ndzer ŋa ika miɗ tar, nda gà aka miɗ gà mburma ana tar gà Yahuda tsiye asa mbaŋa. 19Ama i təv ana ti de à kurum a aka miɗ seriye ya ka, ka tə dzalum gà gər agəra bazlam ana ki ti tsikwim a ter a, meme na mìi ta gweɗe a ter a ya tsa. Aɗaba Mbulum a ti ɗif a kurum a à dukw ana ki tsikwim a ya ka, ika miɗ tar i fata. 20Aɗaba bazlam ana ki ti tsikwim a ya ka, a dere a ka, i madzala gà gər kurum a tsa. Ama na a ti ɗif a kurum a dər ka, Mezite Mesife Mbulum Tsir kurum ana à fèfilere a i ba kurum a ya.
21Gà mburma hə̀ndə̀sl hə̀ndə̀sl ti ti dzèye a à gà damər dìnde tar a ahər a mburma, ta bets a tar. Gà tsir gà ɓəza tekeɗe, ti ti ge a dər kataya mbaŋa. Gà ɓəza ibam, ta hitse a aà gà tsir tar, ta ge aà ter a ɗaf a mburma, ta bets a tar asa mbaŋa. 22Gà mburma tserdze, ku weke tekeɗe, ti ne a kurum a are, aɗaba ana kurum gà mburma gà ya. Ama wur ana ədəts aka gəs gəzləŋ, aka simeraha haa a pat ana mesife ŋgar à ndìv a ya ka, Mbulum a mbil a dər. 23Na bəla ti sèwèr a kurum a are i kwite ata ka, gwidìzl tə̀zum a kwite ŋgiɗ pam. Aɗaba taŋa, iye ihər i gweɗe a kurum a nda ndzer: I huɗ mesewere are kurum ata ya ka, ələk iye *wur ana a dara i təv Mbulum a, i mère a ka, kàa lə̀mum aka gà kwite ana ika ahəɗ Isərayel a fit tsa.»
24Yesuw a gwaɗa a tar asa: «Wur ana ti ɗifer a à metsehe mba ya ka, a sle aà mezè a wele ana a ɗifer a à metsehe ata ya tsa. Mala meslire tekeɗe ibam, a sle aà mezè a mala ga ŋgar tsa. 25Ama aləka wele ana ti ɗifer a à metsehe mba ya, tàa geye akaba nda wele ana a ɗifer à metsehe ya ka, ma ŋgaya ba lele. Na ta ge a dukw ana bəla meme a mala meslire kamala dukw ana ta ge a a mala ga ŋgar a ka, ma ŋgaya ba mbaŋa. Na tàa gwa aà iye ana mala ga ya, *Beldzebul seyiŋ ana, sakwàn gà mburma ana i ma gà ya ya?»
Wele ana biy megèr magəɗa ya
Luka 12:2-7
26«Aɗaba taŋa, ki gwim magəɗa a mburma tsa. Dukw ana makàhà ŋa kinehe ya ka, a ta pèt a aba mba, dite dukw ana ti tsikewa nda akəl a tekeɗe ka, a ti sir a aba. 27Nda gà dukw ana kinehe i tsik a kurum i təv ziŋziŋ ŋa ya ka, ki ti tsikwim a aka miɗ gà mburma tserdze i təv dzaydzay ŋa asa. Dite dukw ana kà tsarakum nda akəl a tekeɗe, ki ti tsikwim a ika tsakal a ŋgarra. 28Ka ta gwim magəɗa a gà na ta bets a slu ba kurum a tsa, aɗaba ti sle a aà medzeye à mesife kurum tsa. Ama gwim magəɗa ka, a Mbulum ana ŋgat a sle a aà medzeye à slu ba kurum, nda mesife kurum fit a akwa ana a mbete a tsa aà biybiy a ivaɗ. 29Wànà kurum ka sərum tsiye, gà ɗiyeŋ ŋgiɗ a riŋ sula ka, tì sìkim a nda siysiy ilik a? Ama i liwiŋ gà ɗiyeŋ ata, na Mbulum Tsir kurum aka waya ka, ku mege ilik tekeɗe, a dzeye a tsa, pìrre a be a nda aà mbulum. 30Ama i təv kurum ka, kamala taŋa ya mbaŋa. Ambəz gər kurum tekeɗe ka, ilik a dzeye a tsa, maɗàmà ŋa ilik ilik tserdze. 31Aɗaba taŋa, kurum ka, ki gwim magəɗa tsa. Na kataya ana, kà zùm gà ɗiyeŋ ana mawùba ŋa tèsìsse ya kweleŋ fìtìte tsiye, na ika miɗ Mbulum a.»
Wur ana a gwa, i sər Yesuw a, ndəna a gwa, i sər tsiye
Markus 8:38; Luka 12:8-9
32Yesuw a gwaɗa a tar asa: «Wur ana a gweɗe a ika miɗ mburma tserdze, i sər Yesuw a ka, iye tekeɗe, i ti ɗif a à ŋgat ika miɗ Mbulum Tsir gà ana i gər ŋa ya. 33Ama wur ana a gweɗe a ika miɗ mburma tserdze, i sər Yesuw tsiye ka, iye tekeɗe, i ti ɗif a à ŋgat ɓav tsa, na ika miɗ Mbulum Tsir gà ana i gər ŋa ya mbeete.»
Yesuw a dzik a ikaba gà mburma ya
Luka 12:51-53; 14:26-27; 17:33; Markus 8:34-35; Yuhana 12:25
34I dəba ŋa ya, Yesuw a gwaɗa a tar: «Ka tə dzalum mede ana i dara a təv kurum aka gər ahəɗ a, i da a kurumara ka, à mandza zayzay a tsa. Awaŋ, mandza zayzay a riŋ tsa. I dara ka, aà maàga ya ivaɗ. 35I dara ka, aà mandzə̀kà ikaba gà mburma ya. Gà kəla asləka ŋa, nda tsir ŋgar ti sir a ba tsa, gà dəm nda mama ŋgar tekeɗe, ti sir a ba tsa mbaŋa. Gà daala kəla nda mama zal ŋgar ibam, ti sir a ba tsa kataya mbaŋa asa. 36Gà na ta ge wùrba tserdze ya, ti ne ba a are ika magər tar, mìsle ŋgiɗ a weye a biy ŋgiɗ tsa.*fa* 37Wur ana a waya tsir ŋgar, kige tsa, mama ŋgar ika iye ya ivaɗ ka, a sle a aà mendze i təv ga tsa. Kige tsa, bəla wur ana a waya kəla ŋgar nda dəm ŋgar ika iye ya ka, a sle a aà mendze i təv ga tsa kataya mbaŋa. 38Dite wur ana a zle a dizl magə̀làwà ŋana kamala ana i ti zle a dər mba ya, à dìɗ a dər aka iye ya tsəka, a sle a aà mendze i təv ga tsa asa mbaŋa. 39Wur ana a zezem a madzala gà gər ŋgar, a gwa ka, i mbil a à mesife gà ya ka, a dzeye a dər seyiŋ ivaɗ. Ama wur ana a dzeye a à mesife ŋgar aɗaba iye ya ka, a ŋget a ivaɗ asa.»
Dukw maya ba
Markus 9:41; Luka 10:16; Yuhana 13:20
40Yesuw a gwaɗa a tar asa: «Ama wur ana aka gəs kurum lele ya ka, a gəs taŋa ka, iye. Dite wur ana aka gəs iye ya tekeɗe, a gəs taŋa ka, wele ana a slərra iye ya mbaŋa. 41Aɗaba ku weke na aka gəs mala məma à guma Mbulum lele, agəra ana wele ata mala meslire Mbulum a ka, a ta ŋget a dukw maya ba ŋgar kamala biy mala məma à guma Mbulum ata ya mbaŋa. Wur ana aka gəs mala ndzer ŋa lele, aɗaba na wele ata mala ndzer ŋa ika miɗ Mbulum a ka, a ta ŋget a dukw maya ba ŋgar kamala wele ata ya mbaŋa asa. 42Iye ihər i gweɗe a kurum a nda ndzer: Ku weke na aka tə̀f yam ana zayya ya, aka vəl a wur ana kəla ŋa i liwiŋ gà mburma gà, aɗaba ana wele ata mala mazazama iye ya, ŋgiɗker aka nde ka, a ta ŋget a dukw maya ba ŋgar ndzer, a dzeye a tsidze.»
Currently Selected:
Mata 10: gnd
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
