Luka 23

Yesuw i sida ika miɗ Pilatus

Mata 27:1-2; 27:11-14; Markus 15:1-5; Yuhana 18:28-38

1Aləka i dəba ŋa ya, tar ata gà bàba ŋa tserdze ya, ta hitse aà mbulum, tə da à Yesuw a təv Pilatus, mala sik Əbay ana a kwere a ahəɗ gà Ruma ya. 2Ti ndze dərraha ka, tə dza ba aà masàsà ahər pàrsa hinne ika miɗ Pilatus. Ta gwa: «Mì le aà wele aaha ka, a beye a à mburma kwa a dala. A gwaɗa a tar ka: <Kà dzum hadam a batsah Əbay gà Ruma tsidze.> Dite a gwa asa ka: <Iye ka, *Kiristi, batsah Əbay ana Mbulum a ti slirre a təv mər a.> « 3Pilatus a tsam aà Yesuw, a gwaɗar: «Kər ana, batsah Əbay gà Yahuda kaɗəŋ a?» Yesuw a gwaɗar aaka: «Haya, iye ka, ŋgat ŋa.» 4I dəba ŋa ya, Pilatus a gwaɗa a gà bàba gà ɓəzla mandəva kuɗa a Mbulum ata, nda gà mburma ana dze ya: «Iye ka, i sər bakal ana wele aaha a ge, dite ka, seriye à gis a dər ŋgat a tsa.» 5Ama ta gwaɗar aaka nda magala hinne asa: «A beye à gà gwala mər a dala nda guma ŋgar tiye wele. A dza ahər ba ka, ika ahəɗ Galile, dite araha, a zazəɗ dərra aka ahəɗ Yuda ya. I dəba ŋa ya ka, a ndze dərra a faha ya asa ana, meme?»

Yesuw i sida ika miɗ *Hiridus

6Pilatus a tsaraka bazlam ata ka, a gwaɗa a tar: «Wele aaha dze ana, gà Galile ya?» 7Ta gwaɗar aaka: «Haya.» A tsaraka, Yesuw a dara i fataya, ika mekwere Hiridus a ka, a zal a mburma, tə da à Yesuw a təv Hiridus. A pat ata ka, Hiridus a riŋ i Yeruzalem mbaŋa. 8Aləka Hiridus a ŋgat a Yesuw ka, a ŋgaya ba hinne, aɗaba a tsarakawa maɗə̀và zləm ŋgar, a waya meŋgeter zləmana daga piŋŋe, ama aka ŋgatar tsa. A sasar ka, Yesuw ma ge dukw mene aà mburma ŋgar ana a gewa ya, i təv ŋgar i fata tsara. 9Aka wiz ahər gà bazlam pampam hinne. Ama Yesuw aka fàfəlar aaka tsidze. 10Gà Əbay gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum tar riŋ i fata mbaŋa, tə daha, tə dza ba aà meŋgewereha gər ŋgəraw ŋgəraw nda ndzəɗa ika miɗ Hiridus i fata hinne. 11Gà Hiridus nda gà sliwdze ŋgar tə tsaraka gà dukw ata ka, tə sawla aà Yesuw hinne. Ta ger matawak. Ti tike aka ŋgat petek ana ŋgwal ŋa ya, aà masàwlà dər ahər. dite ta màha à ŋgat a Pilatus. 12I fataya tsara ka, gà Hiridus nda Pilatus ti ne nda masla, aɗaba piŋŋe ka, tə sər ba tsa, ti ne ba are hinne.

Məvəla vatwa aà makə̀ɗà Yesuw

Mata 27:15-26; Markus 15:6-15; Yuhana 18:38—19:16

13I dəba ŋa ya, Pilatus a yaha gər a gà Əbay gà ɓəzla mandəva kuɗa a Mbulum, nda gà bàba ŋa ana ta kwere a gà Yahuda ya, dite nda gà mburma tserdze. 14A gwaɗa a tar: «Kà zlwimiŋara wele aaha ya ka, kù gwaɗum, a beye a à mburma a dala dze ana, araha, Yàa wiz ahər bazlam ika miɗ kurum a tserdze ka, kwets Yàa le aà bakal i təv ŋgar a, biy na seriye à gis a dər ŋgat a tsa ana, meme? Ki ŋgewimer a gər ka, masakəŋa. 15Dite *Hiridus tekeɗe ka, aka ŋgat bakal i təv ŋgar a ɓav tsa asa. Araha, aka màkwara à ŋgat a ana, meme? Kərga taŋa ya, wele aaha ka, aka ge bakal ana biy mekìɗè dər ŋgat a tsa. 16Ŋgulum ka, i gìzl a ŋgat nda megwiymbiɗ, tsam ka, i pìl a dər, ma daba.» 17{A tsik kataya ka, aɗaba kəla *megirive Paska aka ndzera ka, say a pə̀lawa a tar à gà ɓəzla daŋgay ilik.}

18Ama tə dza ba aà metsìkè ŋa nda magala tar ata tserdze ya, ta gwa: «Say mekìɗe iɗəm wele aka ya. Ŋgulum pə̀lara ka, à Barabas a ivaɗ.» 19Tsa ta gəs Barabas a daŋgay ka, aɗaba ana ŋgat i liwiŋ gà ɓəzla mene are a ŋgumna ana ta ge ahər ɗa maàga, ta kəɗ mburma ya. 20Ama ka, Pilatus a fàfəl a gà mburma ata asa, aɗaba a sasar məpəla à Yesuw pəra. 21Dite gà mburma ata ta gwaɗar aakaha nda magala gər melik tsara: «Ndwandway ŋgat aà dizl magə̀làwà ŋa, aà dizl magə̀làwà ŋa.»

22Pilatus a gwaɗa a tar aaka məmakər ŋa asa: «Wànà a ge dze ana, dukùla na ŋgwal ŋa tsa kataya, dite ka, araha kwets, iye ka, Yàa ŋgat bakal ŋgar ana biy mekìɗe ahər ŋgat a tsiye ya? Ŋgulum ka, i gìzl a ŋgat nda megwiymbiɗ, tsam ka, i pìl a dər, ma daba.» 23Ama tar ka, ta gəs tsa. Tar riŋ aà metsìkè ŋa nda magala sah i ba tar a. Ta gwa: «Say tə ndwandway ŋgat aà dizl magə̀làwà ŋana ndzer pəra.»

Agəra bazlam tar ata huwwa ya ka, aka ge zləm a Pilatus. 24A gəs mifefile tar ata mbaŋa. 25A vəl a tar Yesuw a ahər, aà mege dər dukw ana a sàs a tar a kuɗa. Dite a daha, a pəl a tarra à wele ana ndeɗiŋa, ta gwaɗar, pəl dər i daŋgay, a ne are a ŋgumna, a kəɗ mburma ya.

Yesuw aà dizl magə̀làwà ŋa

Mata 27:31-44; Markus 15:20-32; Yuhana 19:17-27

26Aləka i təv ana tar riŋ ti de a à Yesuw a təv ana ti ndwendwey a ŋgat a ka, tàa lə̀ma aà vatwa nda gà wele duwa, gà Kirene, tə zalar Simun. Ŋgat a riŋ à mère a i dala ya. Gà sliwdze ata ta hitse à ŋgat, ta fàr aaka ndzəɗa aà mazla dizl ata ti ndwendwey ahər a Yesuw a, dite ma zazam dərraha Yesuw i dəba ya.

27Gà mburma hinne tə zazam Yesuw i dəba ya mbaŋa. Gà məkəs ana i magər tar a hinne, tar riŋ ta bets a ba nda gà tuwa. 28Ama Yesuw a mbəɗ aba a təv tar, a gwaɗa a tar: «A kurum gà məkəs aaha ɗa i Yeruzalem a, ka tuwum agəra iye tsa. Tuwum ivaɗ ka, agəra ba kurum, nda gà ɓəza kurum. 29Aɗaba pat mesewere are a dere a ka, ti ta gweɗe a: <Gà məkəs ana gà ɓəza tar a riŋ tsiye, nda gà na tàa ŋgat aà are a kəla ya, tàa vəl awah tar a kəla ilik tsiye ka, ta ŋgaya ba.> 30Dite gà mburma ti ti weye a na gùrum mə mbazla aka tar a te. Dìyes ibam, mə̀ mbə̀s ba aka tar mbaŋa.*fa* 31Na ti ses a dizl ɗaf ana dzìn ŋa ya, aà mede dər duwa kataya ana, dite meme na ti ta ge a nda gà makula ŋana seyiŋ a?»

32Ama tə ndzək akaba gà ɓəzla bakal sula mbaŋa aà mendwendweye tar aà dizl magə̀làwà ŋana nda gà Yesuw dze. 33Ti ndze a tə̀vəməŋa a riŋ tə zalar «Atasl gər» ka, tə ndwandway Yesuw aà dizl magə̀làwà ŋana, dite tə ndwandway ahəraha gà mìsle ŋgiɗ aaha sula ya, a tsaka ŋgar a fata asa mbaŋa. Ilik aka tsèke ahər mezime ŋgar, ilik ŋa aaha aka tsèke ahər gùla ŋgar. 34Yesuw a gwa: «Tsir gà, pəl a tar à bakal tar, aɗaba tə sər dukw ana ta ge a ya tsa.» Gà mburma ana tə ndwandway ŋgat a, tə dzaya ikaba petek ŋa ya ika magər tar, dite ta ge tsetse, ta gwa: «Ŋgada weke na a ŋget a ya?» 35Gà mburma tserdze tar riŋ ta fir aà teriŋa. Gà Əbay gà Yahuda tə sawla ahər, ta gwa: «Aka mbala à gà mburma pampam hinne ka, ama mə mbəl à ba ŋgar ŋa te, na ŋgat ka, *Kiristi, mala məmbàlà à mburma ana Mbulum a zla i liwiŋ mburma ya, a gwa, i slir a kurumaha a ya ya?» 36Gà sliwdze tekeɗe, tə sawla ahər mbaŋa. Ti sìrìkeha a təv ŋgar aà sik ŋa a fata. Dite tə dzakaraha meɗwìtsè mawà dukw ana makwàsà ŋa, a ndza ndùlàkə̀kka ya. 37Ta gwaɗar: «Na kər ka, batsah Əbay gà Yahuda kaɗəŋ ka, mbəl à ba yak kuɗa.» 38Ta wetse bazlam ŋa, ta gwa: «Əbay gà Yahuda na naha ya.» Ndàp ti tike aà maadwa ŋana. 39Mìsle ŋgiɗ ika magər gà ɓəzla bakal ata tə ndwandwayaha tar a tsaka ŋgar a ka, a ndavayar hinne mbaŋa, a gwaɗar: «Naha ana, kər ana kù gwa ka, iye Kiristi, mala məmbàlà à mburma ana Mbulum a gwa, i slir a kurumehe a ya ibam a? Mbəl à ba yak kuɗa tsiye, dite ka mbəl à mər mbaŋa ya.» 40Ama biy ŋgiɗ aaha a mà à bakal a wele ata, a gwaɗar: «Magəɗa Mbulum a gek ti tsiye, ma ana, kinehe ki sèwèreme a are kamala ŋgat ana, meme? 41Aɗaba ma ka, ki sèwèreme a are ka, ndzer ndaka vatwa ŋa, ta gema gà dukw aaha kataya ka, aɗaba ana kàa gema gà dukw ana ŋgwala tsiye kaɗəŋ. Ama ŋgat ka, bakal ŋgar a riŋ tsidze.» 42I dəba ŋa ya, a gwaɗa a Yesuw: «I ta mətsak gər tsa, Yesuw, na i təv ana ki ti ne a batsah Əbay a.» 43Yesuw a gwaɗar aaka: «Iye ihər i tsikik a nda ndzer: Mbakum aaha kinehe ya, ki ti ndzeme a a təv ŋgwal ŋa ana awiya ŋa i mbulum a, nda kər məma.»

Məməta Yesuw

Mata 27:45-56; Markus 15:33-41; Yuhana 19:28-30

44-45Zàkwayiya ka, magər pat a ge. Tìtìktìk həvəɗ a ge ika ahəɗ ata. Are a da aaba ya asa tsa, haa pat a ge metsìɓehe guzum ide. Petek duwa a riŋ i ga Mbulum batsah ŋa ata madànà ŋa aà mbulum, a tayara ba ya kwàŋŋa. 46Yesuw a wideye, a gwa: «Tsir gà, i misek a à mesife gà ka, a ahər yak.»*fb* I dəba bazlam ŋgar ata ya ka, a mət kuɗa. 47Əbay gà sliwdze gà Ruma ana ti tike aà makàslà Yesuw a, a ŋgat a dukw ana a ge ba ya ka, a zàmbaɗa a Mbulum. A gwa: «Wele aaha ka, ŋgwal mburma ndzer kaɗəŋ.» 48Dite gà mburma ana tə daha tserdze aà məfə̀rà aà dukw ana a ge ba ya ka, a zlaŋa tar hinne mbaŋa. Ta mbəɗ gər a dəba nda malàkàyàba dər a gəzləŋ, kamala megweɗe ya: Hey, hey, hey, ta kəɗ naha ka, ŋgwal mburma. 49Gà məkəs ana tə zazamaha ŋgat daga à gər ana ŋgat i Galile mba ya, ta hitse dzìrìk diriŋ nda təv tar ata zaakwa, aà mifìreha aà dukw ana a ge a ba ya, tar nda gà na tə sər Yesuw a tserdze mbaŋa.

Mazla məməta Yesuw a biye

Mata 27:57-61; Markus 15:42-47; Yuhana 19:38-42

50-51Wele duwa a riŋ i fata mbaŋa, zləm ŋgar Yasufa. A dara i kwite gà Yahuda duwa a riŋ tə zalar Arimatiya. Wele ata ka, ŋgwal mburma ndzer, a riŋ a bebe a mekwere Əbay Mbulum ana a kwere a gər ahəɗ mba ya ka, lele. Ŋgat ka, i liwiŋ gà bàba gà mburma ana ta kwere a gà Yahuda ya. Ama ŋgat ka, aka gəs dukw ana gà asiŋ gà bàba gà mburma ŋgiɗ ti tsik aà Yesuw nda dukw ana ta ger a tsa. 52A da a təv Pilatus. A daha, a wiz ahər məməta Yesuw. 53I dəba ŋa ya, a pə̀lara məməta Yesuw aà dizl a kuɗa. A daha, a zla petek tìv, a mbe ahər kuɗa. I dəba ŋa ya, a zla a biye, melè ŋa i giseh a, i təv ana gìrdzìdzìhhe ya. Aɗaba tar ka, ti leyewa aba dive ya. Dite dive ata ka, awiya ŋa, tàa tike aɗəm wura ilik tsa. 54Ama pat ata ka, kwaskwa zləma, a zeha ndzemde hinne asa tsa na mesìfìkà ba gà Yahuda a ndze aɗəm a ya.

55Gà məkəs ana tə zazamara Yesuw daga i Galile ya, tə da nda gà Yasufa. Tə daha, tə samata Yesuw ana ti zle a a biye ya. 56I dəba ŋa ya, ta mbəɗ gər a ma. Tə daha, ti deye gà mal nda gà wirdè ana a ze hwaŋŋà lele ya, ta waya mibehe aà məməta Yesuw. Ama a pat səbədà ka, ti sifik ba kamala ana məpala ahəm Mbulum a tsik a tar a.

Currently Selected:

Luka 23: gnd

Highlight

Copy