Yuhana 3

Gà Yesuw nda Nikudimus

1Wele duwa a riŋ batsah ŋa i liwiŋ gà na ta kwere a gà Yahuda ya mbaŋa, zləm ŋgar Nikudimus. Ŋgat ka, gà *Farisa. 2A pat duwa a da a təv Yesuw ndaàvəɗ. A daha, a gwaɗar: «Mala medzeŋge a mburma, mì sər ka, Mbulum na a slərra kər aà mesìnìkè à duwa a mburma ya kaɗəŋ, aɗaba wura a sle a aà mege gà dukw mene aà mburma kamala ana ki gewa ya tsa, na ahər Mbulum a riŋ aà ŋgat tsiye.»

3Yesuw a gwaɗar aaka: «Iye ihər i gweɗek a nda ndzer, pàrsa iɗəm tsa: Wura a sle aà mada a təv mekwere Əbay Mbulum tsa, na aka waba masula ŋa tsiye.» 4Nikudimus a gwaɗar: «Meme na wura batsah ŋa ka, a sle aà mewe a ba masula ŋa asa ya? Kù gwa ana, à mbìɗ a gər a hitwis mama ŋgar, dite ta we a ŋgat masula ŋa asa ya?»

5Ama Yesuw a gwaɗar aaka: «Iye ihər i gweɗek a nda ndzer, pàrsa iɗəm tsa: Wura a sle a aà mada a təv mekwere Əbay Mbulum tsa, na aka wa ba nda yam nda Mezite Mesife Mbulum tsiye. 6Dukw ana ta wa kamala mburma ya ka, ŋgat mburma dukw ŋgar. Ama na ta wa ŋgat nda Mezite Mesife Mbulum a ka, aka ŋgat mesife ana a dara i təv Mbulum a. 7Bazlam ana i gwaɗak, say ki wim a ba masula ŋa ya ka, ma ta gik kamala sunwa ya tsa. 8Himbiɗ a de a ka, a təv ana a sasar a. Ki tsereke a ka, miɓizle ŋa fàr fàr fàr, ama kà sər, a dara ana, i ŋga ya ka, kà sər tsa, dite a de a ana, a ŋga ka, wura a sər tsa asa. Kərga taŋa ya, na a ge ba nda wele ana ta wa ŋgat nda ndzəɗa Mezite Mesife Mbulum a mbaŋa.»

9Nikudimus a gwaɗar: «Wànà a ge a ba dze ana, meme?» 10Yesuw a gwaɗar aaka: «kər ka, batsah mala medzeŋge a mburma ana i gwala gà Isərayel a dze ana, meme na kà sər gà dukw ata tsiye? 11Iye ihər i gweɗek a nda ndzer, pàrsa iɗəm tsa: Mìi fèfil a ka, aka gər gà dukw ana mì sər a, ndəna mì ŋgatar a. Ama a sàs a kurum megìsè bazlam ana mər ihər mìi tsik a ya tsa. 12Yàa tsik a kurum ɗa duwa ika gər ahəɗ ka, kàa gəsum aà iye tsəna, dite meme na ki giswim a dukw ana i tsik a kurum a aka gər dukw ana i mbulum i gər ŋa ya? 13Wura aka tsəl a təv Mbulum a gər ŋa ilik tsidze. Say iye, wur ana i dara i təv ŋgar a ilik, na i tarra iɗəm a.

14Kamala ana akahər ata Musa a zla ndzemde duwa ta və̀ɗ kamala mesiwiɗ a, a gə̀law a aram, a hitse dər a magər gà Isərayel ana i kusak i fataya,*fa* iye, wur ana i dara i təv Mbulum a tekeɗe, ta hitse a aà iye aà dizl kamala taŋa ya mbaŋa. 15Dite ku weke na aka gəs iye nda gəzləŋ a ka, ma ŋgat mesife ana à ndìv a tsa aà biybiy a. 16Kərga taŋa ya, Mbulum aka waya gà mburma ana ika gər ahəɗ a hinne. A slərra Kəla ŋgar ana mifèndèz ŋa ilik a, dite ka, ku weke na aka gəs ŋgat nda gəzləŋ ilik a ka, a dzeye a tsa, ama a ŋget a mesife ana à ndìv a tsa aà biybiy a. 17A slərra ŋgat aka gər ahəɗ a ka, aà mege seriye a mburma tsa. Ama a slərra ŋgat aka gər ahəɗ a ka, dite ta mbala nda ahər ŋgar ivaɗ.

18Wele ana aka gəs ŋgat nda gəzləŋ a ka, seriye à gis a ŋgat tsa. Ama wele ana aka gəs ŋgat tsiye ka, seriye aka mbər megìse ŋgat daga kinehe, aɗaba ana aka gəs Kəla Mbulum ata mifèndèz ŋa ilik a tsiye. 19Ama seriye Mbulum à gis a tar ka, aɗaba ana Mbulum a slərra təv dzaydzay ŋa aka gər ahəɗ a ka, ama gà mburma ta waya ka, luvuŋ ivaɗ, tsəka, a sàs a tar təv dzaydzay ŋa ata tsa, aɗaba mege dukw tar ana ta gewa ŋgwal ŋa tsiye. 20Ku weke na a riŋ a ge a dukw ana ŋgwal ŋa tsiye ka, a sasar təv dzaydzay ŋa ata tsidze, dite a ndze a ka, i luvuŋ. Aɗaba a ge a magəɗa a megemir ŋgar ana a ge a ŋgwal ŋa tsa, a pèt aba a ya. 21Ama wele ana a ge a dukw ana ndzer a ka, a dere a a təv dzaydzay ŋa ya. Dite gà mburma ta ŋgat a gà megemir ana a ge a nda magəsa ahəm aà Mbulum a.»

Gà Yesuw nda Yuhana metsìlwìɓè à mburma a yam

22I dəba ŋa ya, gà Yesuw nda gà ɓəzla mazazama ŋgat ta mah ba i fataya, tə da aka ahəɗ Yuda. Tə ndza i fata zaakwa, a tsilwiɓewa à mburma a yam. 23Yuhana tekeɗe, a tsilwiɓewa à mburma a yam i kwite Aynun, bise nda kwite Selim mbaŋa, aɗaba yam a riŋ i fata ka, hinne. Gà mburma tə dawaha a təv ŋgar, dite a tsilwiɓewa à tar a yam. 24Akahər ata ka, tàa gəs Yuhana, tàa tike ŋgat a daŋgay zukw tsa.

25A pat duwa ka, gà asiŋ gà ɓəzla mazazama Yuhana tə dza ba aà mimbètsèba ahəm nda kəla gà Yahuda ŋgiɗ duwa, aka gər məbàrà ba nda gà dukw tar ana ta barawa kamala ana a sàs a fəla tar a ya. 26Aɗaba taŋa, gà ɓəzla mazazama Yuhana ata tə daha a təv ŋgar. Tə daha ka, ta gwaɗar: «Mala medzeŋge a mər, wele ana kà lə̀mum akahər ata ika lìdè dulwa Yurdan, kà ɗe a mər dər a ka, ŋgat a riŋ a tsilwiɓewe a à mburma a yam, dite gà mburma tserdze ti dehe a a təv ŋgar asa ana, meme?»

27Yuhana a gwaɗa a tar aaka: «Wura a sle aà meŋgete a duwa tsa, na Mbulum aka vəlar tsiye. 28Kurum nda gər kurum ka, kurum gà ɓəzla sida gà, na Yàa gwa ka, iye ka, *Kiristi, mala məmbə̀là à mburma ana Mbulum a gwa, i ti slir a kurumehe a ya ya. Ama iye ka, Mbulum na a slərra iye, i làhara aka miɗ a pəra. 29Wele ana a zla daala awiya ŋa ya ka, daala ata ka, biy ŋgar dukw ŋgar. Ama masla zal dəm ata ka, mehìtsè ŋa i təv ŋgar, a riŋ à dze a zləm a mifefile masla ŋgar ata a tsiker a ya. Aka tsaraka kataya ka, a ŋgeye a ba hinne. Kamala taŋa ya, iye tekeɗe, maŋgayaba aka rah a gəzləŋ ga kinehe ka, hinne mbaŋa. 30Ŋgat ka, say à sìkèh a à batsah ŋa aka miɗ aka miɗ, ama biy gà ka, à nìkìɗiŋa.»

Wele ana a dara i mbulum a

31«Wele ana a dara i təv Mbulum i gər ŋa ya ka, a za mburma tserdze. Wele ana ɗa ika gər ahəɗ a ka, mburma gər ahəɗ pəra, dite a tsik a ka, aà gà dukw ana ɗa ika gər ahəɗ a mbaŋa. Ama wele ana a dara i təv Mbulum i gər ŋa ya ka, ŋgat ika gər mburma tserdze. 32A tsik a ka, aà dukw ana a tsaraka ya, ndəna a ŋgatar a. Ama ku mege kataya tekeɗe ka, wura a gəs bazlam ŋgar tsa. 33Ama ku weke na aka gəs bazlam ŋgar a ka, taŋa a ne a mala sida Mbulum, à pèt a à ndzer ŋana kaɗəŋ. 34Aɗaba wele ana Mbulum a slərra ŋgat a ka, a me a ka, à bazlam ŋgar, aɗaba a vəlar Mezite Mesife ŋgar, a ràhar dər tsìsl a gəzləŋ. 35Ŋgat ka, Tsir Kəla, a waya Kəla ŋgar, a dzar gà dukw a ahər tserdze, dite ma kwara. 36Wele ana aka gəs Kəla Mbulum a ka, aka ŋgat mesife ana à ndìv a tsa aà biybiy a. Wele ana aka dzar zləm tsiye ka, a ŋget a mesife ata tsa, ama matsəɓatsəɓ Mbulum a riŋ a ndze a ika gər ŋgar.»

Currently Selected:

Yuhana 3: gnd

Highlight

Copy