Gà Ɓəzla Meslire 9

Sawul a mbəɗ à madzala gà gər ŋgar

Gà Ɓəzla Meslire 22:6-16; 26:12-18

1Akahər ata ka, Sawul a riŋ a kwere a akaba gà ɓəzla mazazama Yesuw nda bazlam məməta hiywe nda ndzəɗa. A da a təv mala mandəva kuɗa a Mbulum batsah ŋana, 2a daha, a wiz ihər wakita ana a de a dər a təv gà Yahuda gà bàba ŋa ana i Damas a, dite ka, a gese a dər gà ɓəzla magəsa bazlam awiya ŋa ata ta gwa biy Yesuw a. I huɗ bazlam ata ta wetser a ka, kamala megweɗe ya: Na kàa daha ka, kàa le aà gà na ta gəs Yesuw a ka, ku gà asləka nda gà məkəs tserdze, gasara tar a Yeruzalem a.

3Aləka a mah ba, a ndze aà vatwa, aka à mendze a kwite Damas ka, dzaydzay ŋa wurat a pàtara i gəza mbulum a tsara. A lawara ŋgat tits a fata. 4A dəɗ dər a bəɗ, a tsarakara iɗəm mifefile duwa i fataya. Mifefile ŋa a ɗe à ŋgat ka: «Sawul, Sawul, aàmala na ki sèwèriŋ a are kataya ya?» 5Sawul a gwaɗar aakaha: «Kər ana, weke, Batsah ga ŋa?» A tsarakara asa ka: «Iye ka, Yesuw ana kər riŋ ihər ki sèwèriŋ a are ya. 6Ama hitse aà mbulum, ka tsìmìɗ à ba a kwite ata ki de a ya. Kàa daha ka, ti ti tsikik riŋ dukw ana ki ge a ya.»

7Gà mburma ana ti de a a kwite ata nda gà Sawul tserdze ya ka, a dàn a tar aka bazlam ə̀ndəts, na tə tsaraka mifefile ata ya. Ama ka, tàa ŋgat a wura tsidze. 8Sawul a hitse aà mbulum, a gwa: I zle a ika are ya ka, a ŋgat a vatwa asa tsa. Tə daha, ta gəs i ahər a, ta gasar ahər a Damas. 9A daha a fata ka, pat makər a ndzawa ka, tùtùrkùmma guluf ŋa, kwets aka mə̀ndzər dukw mezime tsidze, ku dukw mese tekeɗe.

10I dəba ŋa ya, mala mazazama Yesuw duwa a riŋ i Damas i fata, zləm ŋgar Ananiyas. BATSAH kwa ŋa a patar aba i sunwa ya, a zalar: «Ananiyas.» Ananiyas ibam, a ŋgamar: «Walaw, iye naha i faha, Batsah ga ŋa.» 11BATSAH kwa ŋa ata a gwaɗar: «Da kinehe aka bàrama ana tə zalawar Bàrama ser lele ya, dite ka da a ga a bəra Yudas, wiz wele gà Tarsus duwa, zləm ŋgar Sawul, a riŋ a heme a a Mbulum i fata. 12I huɗ meheme ŋgar ana a riŋ a heme a ya ka, a ŋgat a wele ata tə zalar Ananiyas a, a riŋ a dehe a a təv ŋgar, a tike aaka a ahər, dite ma ŋgat a vatwa asa.» 13Ama Ananiyas a gwaɗar aakaha: «Batsah ga ŋa, wele ata ka, Yàa tsarakaya mesewere are ŋgar ana a sèwèrewa a gà mburma yak i Yeruzalem a hinne. 14Dite kinehe tekeɗe ka, a dara a faha ya ka, nda ahər gà Əbay gà ɓəzla mandəva kuɗa a Mbulum na ta vəlarra wakita ya, dite ka, aà magàsà gà mburma ana ti zel a a zləm yak Yesuw ana, meme?» 15Ama BATSAH kwa ŋa ata a gwaɗar: «Da pəra, aɗaba Yàa zla wele ata aà ma giŋ megemir gà, ma ɗif à zləm gà ika miɗ gà bàba ŋa ana ta kwere a mburma ya, nda gà asiŋ gà mburma tserdze, dite nda gà Yahuda ya mbaŋa. 16I ti ɗifer a à dukw ana a ti sèwèr a dər are agəra iye ya.»

17Ananiyas a tsaraka kataya tsara ka, a mah ba, a da kuɗa. A daha ka, a pəts a ga ata. A daha, a tike ahər ŋgar aka Sawul, a gwaɗar: «Sawul, damər gà, Yesuw BATSAH kwa ŋa na ndeɗiŋa a pàtak aba ika vatwa ana kà da dərra ya, na a slərra iye a təv yak a. A slərra iye ya ka, dite are yak mà hə̀ndə̀k ba kamala ana kà ndzawa piŋŋe ya, ki rèh a nda Mezite Mesife Mbulum.» 18I dəba bazlam ata ya tsara ka, wurat are ŋgar a hə̀ndə̀k ba. Duwa a də̀ɗarra i are are ya kamala dəba kilif a. A ŋgat a vatwa ndzihndzih lele kuɗa. A hitse aà mbulum, ti tsilwiɓ à ŋgat a yam. 19I dəba ŋa ya, a zəm dukw mezime, dite ba ŋgar a mà aɗəm ɓərɓər lele.

Sawul a tsik a bazlam Mbulum i Damas

Gà Sawul tə ndza akaba nda gà ɓəzla mazazama Yesuw ana i Damas a, i huɗ mehinne zaakwa ya. 20A dza ba aà metsìkè bazlam Mbulum i gà ga mahàmà a Mbulum gà Yahuda ana i fataya tsara. A ɗif à Yesuw a mburma, a gwa: «Ŋgat Kəla Mbulum.» 21A ge a gà mburma ana tə tsaraka bazlam ata ya, kamala sunwa ya, ta gwa: «Aba ya wele aaha ka, wele ana a sèwèrewa are a gà mburma ana i Yeruzalem ta gəs Yesuw a. Dite naha a dara a faha ya asa ana, meme? Waagwa aà magàsà gà asiŋ aaha ɗa i faha ya, dite a dze a tar a ahər gà ɓəzla mandəva kuɗa a Mbulum ana i Yeruzalem a tsiye?»

22Tsaatsa Sawul ivaɗ ka, a tsikewa bazlam Mbulum nda ndzəɗa kəla pat. Gà Yahuda ana tar mandza ŋa i Damas a, tə̀ sər dukw ana ti tsiker a aaka ya asa tsa, aɗaba tə tsaraka dukw ana a ɗif a dər a mburma, a gwa: «Yesuw ka, mala məmbə̀là à mburma ana Mbulum a gwa, i slir a kurumehe a ya.»

23Aləka i dəba ŋa ya, a ndza i fata i huɗ mehinne zaakwa ya ka, gà Yahuda ta mà akaba à bazlam aà makə̀ɗà ŋgat. 24Tə dzawar ba ika biye zlagam ana a dara i huɗ kwite ya, a da a dala ya, ku ndaàvəɗ, ku ndaàpat tserdze, aà makə̀ɗà ŋa. Aɗaba i tar ka, kwite ata mburma iɗəm a tserdze, tàa lawara nda zlagam. Ama Sawul ka, a sər a taraha aka dukw ana ta waya meger a. 25Aləka i dəba ŋa ya, ndaàvəɗ ka, tar nda gà na tə zazam ŋgat a, tə tsala aka gər zlagam. Tə daha, ti tike ŋgat a tàkwasa, ta gasa, tə tar à ŋgat a bəɗ. A daba tsara.

Sawul i Yeruzalem

26Aləka i dəba ŋa ya, Sawul a de a a Yeruzalem. A ndzeha a fata ka, a dzik aba aà mendze i liwiŋ gà ɓəzla mazazama Yesuw Kiristi ana a riŋ i fataya. Ama gà mburma ata ta ger magəɗa hiywe, aɗaba tàa gəs ŋgat kamala mala mazazama Yesuw ana nda ndzer ŋa ya tsa. 27Ama ka, Barnabas a gəs aaba ŋgat, tə da a təv gà ɓəzla meslire Mbulum. Tə daha, a ɗama a tar, meme na Sawul a ŋgat a BATSAH kwa ŋa ika vatwa ata kaɗəŋ a, dite meme na BATSAH kwa ŋa a fàfəlar asa ya. A mà a tar à bazlam Sawul ana a tsik bazlam Yesuw parakkà lele i Damas, magəɗa iɗəm tsidze ya asa mbaŋa. 28Ama pat ata tsara, Sawul a ndza i təv tar, nda gà maŋgayaba. Tə ndzawa akaba hizletstse lele kuɗa, dite a tsikewa a tar bazlam Mbulum nda zləm BATSAH kwa ŋa parakkà lele, a ge a dər hwarwa tsa. 29A waya metsìkè bazlam Mbulum a gà Yahuda ana ti tsikewa ahəm girek a mbaŋa. Ama ka, ta mbetse ba aka ahəm hinne, ta waya makə̀ɗà ŋgat. 30Aləka gà ɓəzla magəsa Mbulum ana ti ne gà damər ŋgar a, tə tsaraka kataya ka, tə zla ŋgat i fataya, ta ŋgəzl à ŋgat a kwite Kaysariya, dite aà ma da a kwite Tarsus.

31Akahər ata ka, gà mburma Mbulum ana i Yuda ya, nda gà na i Galile ya, dite nda gà na i Samariya ya tserdze, tə ndzawa lele kamala megweɗe ya, mesewere are a riŋ tsa. Mbulum a vəlawa a tar ndzəɗa a gəzləŋ lele, aà mazazama ŋgat aka miɗ aka miɗ, dite i dəba ŋa ya, tə sə̀kàhawa agəra Mezite Mesife Mbulum ana a zlàkawa tar a.

Mimbile Iniyas ana a mbəl i dukw məməta ya

32Piyer a sùwayawa riŋ ika gà ahəɗ ata tserdze ya. A pat duwa, a da a təv gà ɓəzla magəsa Yesuw ana mandza ŋa i Lida ya. 33A daha ka, aka le aà wele duwa, zləm ŋgar Iniyas, magàha a bəɗ ŋa. Ar mahə̀nà ŋa. A sle aà mehitse aà mbulum tsa, daga mive tsamakər a i dukw məməta. 34Piyer a gwaɗar: «Iniyas, hitse, Yesuw Kiristi a mbil a à kər, ka məsak à təv mehinne yak.» Iniyas a tsaraka kataya tsara ka, a hitse aà mbulum, a məsak à təv mehinne ŋgar. 35Gà mburma ana i Lida ya, nda gà na ika fàràfàtà Sarun a tserdze, ta ŋgatar kataya tsara ka, ta mbəɗ à madzala gà gər tar a təv BATSAH kwa ŋa.

Məkəs duwa zləm ŋgar Dwarkas, a mbəl i məməta ya

36Məkəs duwa a riŋ, mala mazazama Yesuw i Yafa, zləm ŋgar Tabita. Tə zalar ndaka ahəm girek ka, «Dwarkas», kər megweɗe ya ka, «miyak. » A ndzawa i ŋgar ka, aà mege ŋgwal ŋa a mburma, dite aà mazlàkà gà matawak gà mburma ɗekɗek kəla pat. 37A ta megeha i dəba ŋa ya ka, a dəɗ a dukw məməta, a mət dər. Tə daha, ta bara ŋgat. Tə zla ŋgat, tə tsəl à ŋgat a ga ana ika gər biy ŋgiɗ a. 38Ama gà kwite Yafa nda Lida ka, tar diriŋ aba ya tsa. Gà ɓəzla mazazama Yesuw ana i Yafa ya, tə tsaraka Piyer a riŋ i Lida ka, tə slər gà mburma sula a təv ŋgar, aà ma dara. Ta gwaɗaraha: «Mì gik kamkam, valara tsəma kwaŋ.» 39Piyer a tsaraka kataya tsara ka, ta mah ba nda gà mburma ata. Aləka ti ndzeha a fata ka, tə laka Piyer a təv məməta ata i ga ata ika gər biy ŋgiɗ a. A daha ka, gà madakwa gà məkəs a riŋ i fata. Ta ŋgat a Piyer tsara ka, hə̀rgə̀gə̀z ta hitse aà mbulum, tə daha a təv ŋgar nda gà tuwa aà are. Ta pàtayar à gà petek ana Dwarkas a ŋgarawa aka ana a riŋ nda are mba ya. 40Aləka i dəba ŋa ya, Piyer a slərra iɗəm tar a bəra ya fit. A zeha riŋ i ga à gər ŋgar i təv məməta ata. A dza gurmits a bəɗ, a hama aà Mbulum. Aləka a fə̀r aà məməta aka, a gwaɗar: «Tabita, hitse aà mbulum.» I dəba ŋa ya, Tabita ə̀ndwa a hə̀ndə̀k ika are ya. A ŋgat a Piyer ka, a hitse, a ndza a bəɗ. 41Piyer a daha, a gəs ŋgat i ahər a, a zlak ŋgat, a hitse dər aà mbulum. I dəba ŋa ya ka, Piyer a zalaha a gà ɓəzla magəsa Yesuw nda gəzləŋ, nda gà madakwa gà məkəs ata tserdze ya, ta mbəɗaha gər a təv ŋgar a ga ata. Tə daha ka, a gwaɗa a tar: «Araha, wele kurum aaha ka, aka mbəl.»

42I dəba ŋa ya, dukw mene à mburma ata a ge ba ya, a ɗe i kwite Yafa tserdze, dite gà mburma hinne ta gəs BATSAH kwa ŋa nda gəzləŋ. 43Aləka Piyer a ndza riŋ i fata hinne, i bəra wele duwa, a làmbaɗawa kwiye, zləm ŋgar Simun.

Currently Selected:

Gà Ɓəzla Meslire 9: gnd

Highlight

Copy