Gà Ɓəzla Meslire 4

Gà Piyer nda Yuhana ika miɗ mayahaba gər mburma

1Aləka i təv ana gà Piyer nda Yuhana tar ihər ta fèfil a a mburma mba ya ka, gà ɓəzla mandəva kuɗa a Mbulum nda gà Əbay gà ɓəzla makàslà ga Mbulum batsah ŋa ata nda gà *Saduki, tə daha a təv tar. 2Tə daha ka, ta ge arəv hinne nda təv gà ɓəzla meslire Mbulum ata sula ya, aɗaba ana tar riŋ ti tsik a bazlam a mburma ya, ta gwaɗa a tar ka, Yesuw aka mbəlara i məməta ya a mesife ya, kərga megweɗe a tar a ka, gà məməta ti sle aà məmbə̀lara a mesife ya fit mbaŋa. 3Ama gà mburma ata ta hə̀ndə̀k aà tar a ga, ta hinne a iɗəm, aɗaba həvəɗ aka mbər mege. 4Aɗaba kəla ka, gà mburma hinne i magər gà mburma ata i fataya, ta waya bazlam tar ata gà mburma ata ti tsik a tar a. I dəba ŋa ya, gà ɓəzla magəsa Yesuw nda gəzləŋ tə sə̀kàhəha à mburma fit dze ka, ti sle dəbuw ə̀zləm.

5I mèkwède ŋa na ka, gà Əbay gà Yahuda nda gà bàba ŋa ana i liwiŋ tar ta kwere a mburma ya, dite nda gà ɓəzla medzeŋge məpala ahəm Musa ti yahaba gər a Yeruzalem. 6Gà masak gà mburma ana tar riŋ pam i liwiŋ tar a ka, gà Hanas, *batsah mala mandəva kuɗa a Mbulum, dite nda gà Əbay ŋgiɗ, gà Kayafas nda Yuhana, nda gà Aleksandire, dite nda gà asiŋ gà gwala tar gà bàba gà ɓəzla mandəva kuɗa a Mbulum fit dze. 7Tə zal a gà ɓəzla meslire Mbulum ata, tə ndzəkaha tar aka miɗ tar, dite ta gwaɗar: «Ka ŋgatumara ndzəɗa ata dze ana, i ŋga ya? Kige tsa, nda zləm weke na kà mbəlum à wele aaha ya?»

8Piyer ana maràhà ŋa nda Mezite Mesife Mbulum a, a gwaɗa a tar: «Kurum gà Əbay nda gà bàba ŋa na i liwiŋ kurum ki kwerwim a mburma ya. 9Mər ɗa kinehe ka, i seriye na ika miɗ kurum a, na naha ki wizwim aà mər a bazlam aaha agəra ana mì ge ŋgwal ŋa a mala magàha a bəɗ aaha, mì mbəl à ŋgat a. 10Araha kinehe ka, sərum dər, kurum tserdze nda gà asiŋ gà mburma Isərayel ana ɗa ya: Wele aaha a hitse aka miɗ kurum nda zay lele ka, nda ndzəɗa zləm Yesuw Kiristi ana a dara i Nazaret a. Ŋgat ana kà ndwandwayum ŋgat aà dizl magə̀làwà ŋa ya. Ama ka, Mbulum a mbəl à ŋgat i məməta ya a mesife. 11Ŋgat ka, wur ana Mbulum a live dər aba ya, a tsik ahər i wakita ŋgar a, a gwa:

<Na a ne madəŋ kur ka,

kur ana kurum gà ɓəzla mazlazla ga kà zlum,

kà ywim iɗəm a dala ya ivaɗ.>*fa*

12Ki slekwe a à mimbile ka, say nda təv ŋgar ilik. Aɗaba mege i ŋga ika gər ahəɗ tserdze, Mbulum aka vəl zləm ŋgar a wur a ilik, na dite ki slekwe a aà mimbile nda təv ŋgar a asa tsa.»

13Ama mayahaba gər gà mburma ata tə tsaraka bazlam gà Piyer ata ka, a ge a tar kamala sunwa ya, aɗaba ana ta ŋgat a tar, ta fèfil a parakkà, ta ge magəɗa tsidze ya ya. A ge a tar kamala sunwa ya ndeyndey ka, aɗaba ana tàa sinikeba à gà duwa tsidze ya. Tə sər, tar ka, gà ɓəzla mazazama Yesuw piŋŋe. 14Ama ta fə̀raha ka, wele ana ta mbəl dər a, a riŋ mehitse ŋa i təv tar mbaŋa. I dəba ŋa ya, ta gəs a taraha ahəm aà are, tə sər dukw ana ti tsik a tar aakaha ya asa tsa. 15Ama ka, ta gwaɗa a tar aakaha: «Dum i ga mər ana mì yahawaba aɗəm gər a tə̀ma.» Dite tar ŋa, tə dza akaba bazlam ika magər tar. 16Ta gwaɗaba: «Ki gekwe a dze ana, meme, na à gà mburma aaha ya? Aɗaba gà mburma aaha i Yeruzalem a fit, tə sər ka, dukw mene à mburma aaha ta ŋgatar a ka, tar na ta ge ya. Ama ki slekwe aà megweɗe a ka, pàrsa tsa. 17Ama kəla ka, palakwa a tar ahəm nda mandza aà tar magəɗa nda bazlam kitè, aà ti ti tsik bazlam a mburma nda zləm Yesuw Kiristi tsa, dite ka, gà mburma ŋgiɗ tə tsaraka maɗə̀và zləm dukw mene aà mburma aaha ta ge a ya asa tsa.» 18I dəba ŋa ya, tə zal a tar, ta mbəɗaha gər. Tə daha, ta kwirike akaba tar hinne. Ta gwaɗa a tar: «Ama ka ti tsikwim duwa a wura nda zləm Yesuw asa tsa, kige tsa, ka ti dzeŋgwim bazlam ŋgar a mburma asa tsidze.»

19Ama gà Piyer nda Yuhana ta gwaɗa a tar aaka: «Kurum ŋa dzalum dukw ana a ne ndzer ŋa ika miɗ Mbulum a dzekwiŋ. Wànà ŋgwal ŋa mì gəs ana, bazlam kurum a, tsəna, biy Mbulum a? 20Ama mər ka, mìi sle aà mimiyeke à dukw ana maa ŋgatar a, ndəna maa tsaraka ya tsa, say mìi tsik a pəra.» 21I dəba ŋa ya, mayahaba gər gà mburma ata ti yaha vatwa, waytsà aà mandza aà tar magəɗa hinne asa, dite ta pəl à tar, tə da ba. Ta ŋgat vatwa dukw ana tì sèwèr a ter a dər are ya tsa, aɗaba gà asiŋ gà mburma tserdze tar riŋ tì zèmbeɗe a à Mbulum, agəra dukw mene à mburma ata a ge ba ya. 22Wele ata ta mbəl à ŋgat nda dukw mene à mburma ata ya ka, a za mive dzik faɗ.

Meheme gà ɓəzla magəsa Mbulum

23Ta pəl à gà Piyer nda Yuhana tsara ka, ta mbəɗ gər a təv mayahaba gər gà mburma Mbulum asa. Tə daha, tə ɗama a tar dukw ana gà Əbay gà ɓəzla mandəva kuɗa a Mbulum nda gà bàba ŋa ana ta kwere a mburma ti tsik a. 24Tə tsaraka bazlam ata tsara ka, tar ata tserdze ya, tə dza ba aà meheme a Mbulum. Ta gwa i huɗ meheme tar a ka: «Mbulum BATSAH kwa ŋa, kər na kì ge gəza mbulum nda gər ahəɗ, nda duluv, dite nda gà dukw ana tserdze iɗəm a. 25Kər na kà fàfəl nda Mezite Mesife yak nda bazlam Dawda batsah tsir mər ana mala megemir yak a. Kù gwa ka:

<Aàmala na gà mburma ta ge a swalwa nda magala,

nda zlapa ya? Aàmala na tə dza akaba bazlam

məpapəɗa aà mburma ya məfara ŋa ya?

26Gà bàba gà Əbay gər ahəɗ tə duwayaba à gùvəl.

Dite gà Əbay tə yahaba gər a təv ilik ŋa,

aà magàwà aà gà batsah tar ŋa,

Mbulum nda mala məmbàlà a mburma ana a gwa,

i slir a kurumehe a ya.> «*fb*

27I huɗ meheme tar ata ya hiywe, ta gwa asa: «Kaɗəŋ, ar ka, kamala Mezite Mesife yak ana ka tsik ahər akahər ata ya. Aɗaba gà *Hiridus nda Puntiyus Pilatus ta gaw ba i kwite aaha nda gà slele, dite nda gà Yahuda, aà magàwà aà Kəla yak Yesuw ana kà slərra kamala mala məmbàlà à mər a. 28Ama dukw ana tə ləm dər akaba aà mege ya ka, kamala biy yak ana kà lah metsike, a sàsak aà mege daga piŋŋe ya. 29Ama kinehe ka, Batsah mər ŋa, zlak mər i təv dukw ana ta ge a mər a ŋgwal ŋa tsiye. Dite ka vəl a mər, a mər gà ɓəzla meslire yak, aà metsìkè bazlam yak a mburma nda ndzer ŋa. 30Zlak mər, dite mi mbəl à gà mburma, nda mege gà dukw mene à mburma ata pampam a, nda zləm mala megemir yak Yesuw.»

31Tə ndəv à meheme tar ata tsara ka, təv ata tar iɗəm a, a ɓazla hinne. Mezite Mesife Mbulum a rah a ba tar ilik ilik tserdze. Ti tsikewa bazlam Mbulum a mburma parakkà, hwarwa aà are tar asa tsa.

Gà mburma Mbulum tə dzaya ba dukw ana ta ŋgat a tserdze

32Gà mburma Mbulum ka, tar mandza ŋa i təv ilik ŋa lele. Mawàyà ba tar ibam, nda gəzləŋ ilik ŋa asa. Wura ilik ika magər tar, aka fə̀r aà duwa ŋgar ka, kamala na biy ŋgar à gər ŋgar a tsa. Ama dukw ana tàa ŋgat a ka, ti dzèye ba a ika magər tar tserdze. 33Gà ɓəzla meslire Mbulum ta màwa à bazlam mimbile Yesuw BATSAH kwa ŋana a mbəlara i məməta ya, a mesife ya ka, ta gwaɗawa: «Maa ŋgatar, a mbəlara i məməta ya,« dite Mbulum a pisewa a tar ahəm hinne, a tar ata tserdze ya. 34Matawak duwa a gewa a wura ika magər tar a tsidze. Aɗaba gà mburma ata tə dzawuwa à gà gùvàh tar, kige tsa à gà ga, dite ta yahawa gər a siŋgwe ŋa a təv ilik ŋa. 35Tə dzawa ahər a gà ɓəzla meslire Mbulum. I dəba ŋa ya, tə dzawa ikaba siŋgwe ata ya, a gà mburma ya tserdze. Ku weke kəla hitwis ŋgar ide.

36Kərga Yasufa ana gà Levi, ta wa ŋgat i Kipurus, dite gà ɓəzla meslire Mbulum tə zalar Barnabas a, kərga megweɗe ya ka, «mala məmàha aà arəv a mburma» ya, a ge dər kataya mbaŋa. 37A daha, a kal à gùvàh ŋgar, a ndzək siŋgwe ŋa, a dza a gà ɓəzla meslire Mbulum.

Currently Selected:

Gà Ɓəzla Meslire 4: gnd

Highlight

Copy