Matéo 2
2
Umi karai arandu oñandu Hesúpe
1Hesu onacékuri Belénpe, Júda departaméntope, Heródes oiko umi árape tetã ruvicha ramo, upérõ og̃uahẽ karaikuéra iñarandúva kuarahyresẽguio Jerusalénpe.
2Ha oporandu hikuái: Moõpa onace Júda retã ruvicha, rohechágui ijasytata kuarahyresẽ gotýo, ha roju romomba’eguasu hag̃ua ichupe.
3Tetã ruvicha Heródes ohendu vove ko’ã mba’e ipy’andýi ha hendive oĩva avei opaite Jerusalenguakuéra.
4Upéramo ha’e ohenói pa’iguasukuérape ha umi kuatia haihárape ha oporandu ichupekuéra: Moõpa onaceva’erã pe Crísto.
5Ha’ekuéra ombohovái: Belen, Júda departaméntope, péicha ojehaiva’ekue pe proféta rupi:
6Ha nde, Belen, Júda retã megua, nde ningo pe imichĩvéva umi táva Judaygua apytépe, ndehegui osẽta peteĩ mburuvichaguasu omboguata porãva’erã che retã Israélpe (Miquéas 5,2).
7Upérõ Heródes ohenoiuka ñemiháme umi karai iñarandúvape oikuaa porã hag̃ua araka’etépa ojehechaukára’e upe jasytata upéva.
8Ha omondóvo ichupekuéra Belen gotýo, he’i: Tapeho upépe ha peporandu kyre’ỹme pe mitã rehe, ha pejohu vove pejevy ko’ápe, peikuaauka chéve, che aha hag̃ua avei amomba’eguasúvo ichupe.
9Ha’ekuéra ohendupa rire Heródes ñe’ẽ, oje’ói hikuái. Ha pe jasytata ohechava’ekue hikuái kuarahyresẽme oho henonderãme ha opyta pe mitã oĩha ári.
10Ha ovy’aiterei hikuái pe jasytata omog̃uahẽ porã haguére ichupekuéra.
11Ha oikévo pe tymba rógape, ohecha pe mitãme, isy María ndive, ha upépe ñesũháme omomba’eguasu hikuái pe mitãme. Uperiremínte oipe’a imba’eita: Óro, inciénso ha mírra (mba’e ryakuã porãva).
12Upéi oñemomarandu iképe ani hag̃ua oho jevy tetã ruvicha Heródes rendápe, upévare oje’óima hetãme ambue tape rupi.
Jose okañy María ha Hesu ndive Egípto retãme
13Ohopa rire hikuái, peteĩ yvága rembiguái ojechauka Josépe, ha he’i ichupe iképe: Epu’ã, tapeho pe mitã ha isy ndive Egíptope. Pepyta upépe che ha’e peve peẽme, tetã ruvicha Heródes ohekaukataguihína pe mitãme ojukauka hag̃ua.
14Ha Jose opáyvo opu’ã pe pyharépe ha ogueraha pe mitãme ha isýpe Egípto retãme.
15Ha upépe opyta hikuái Heródes omano meve, oiko hag̃ua Ñanderuete he’iukava’ekue iproféta rupi: Egíptogui ahenóita che Ra’ýpe, (Oséas 11,1).
Heródes ojukauka mitãkuérape
16Ha Heródes ohechakuaávo umi kuimba’e arandu ombotavy hague ichupe, ipochyeterei ha ojukauka opaite mitãkuimba’épe oguerekóva guive mokõi áño peve ha oikóva guive Belénpe ha ijerekuévo, umi karai arandu omombe’u haguéicha ichupe.
17Upéicha oiko pe proféta Jeremías he’iva’ekue:
18Jahe’o soro ha sapukái ndetuicháva oñehenduva’ekue Ramápe; Raquel hasẽhína imembykuéra rehe ha ndohejái avave omoangapyhy ichupe, ndoikovéima haguére imembykuéra hendive, (Jeremías 31,15).
19Heródes omano rire katu peteĩ yvága rembiguái ojehechauka jevy Josépe, Egípto retãme,
20ha iképe he’i ichupe: Epu’ã, egueraha jevy pe mitãme isy ndive Israel retãme, omanombámagui umi ojukaseva’ekue pe mitãme.
21Upéramo Jose opu’ã ha ogueraha jevy pe mitãme isy ndive Israel retãme.
22Ha Jose ohendúgui tetã ruvicha Arqueláo opytaha itúva Heródes rendaguépe, okyhyje oho hag̃ua Juda departaméntope; upévare Ñanderuete he’iuka ichupe iképe oho hag̃ua Galiléa departaméntope.
23Ha oho pe távape hérava Nazaret, oiko hag̃ua pe proféta he’iva’ekue: Oñemboherava’erã ichupe Nazaretgua (Isaías 11,1; 53,2).
Currently Selected:
Matéo 2: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
