Lúcas 22
22
Pa’i ruvichakuéra ha kuatia haihára ojukase Hesúpe
1Ha og̃uahẽmbotáma pe areteguasu, oje’uhápe pan ojejapova’ekue levadura’ỹre, hérava avei páscua areteguasu.
2Ha pa’i ruvichakuéra ha kuatia haihára oñeha’ãmba oheka mba’éichapa ikatu ojuka Hesúpe, okyhyje katu hetãyguakuéragui.
3Satana katu oike Júdas py’apýpe, hérava avei Iscarióte, ha’e ningo avei peteĩ Hesu remimbo’éva umi 12 apytépe.
4Upévare Júdas oho pa’i ruvichakuéra ha mburuvichakuéra rendápe ha omombe’u ichupekuéra mba’éichapa ha’e ikatu omoĩ Hesúpe ipopekuéra.
5Ha vy’apópe oñomoĩ peteĩ ñe’ẽme ome’ẽ hag̃ua Júdaspe pirapire.
6Ha Júdas ohechauka ichupekuéra moõpa oapresakuaa Hesúpe, ambue Judayguakuéra oikuaa’ỹre mba’eve.
7Ha og̃uahẽ pe ára ojejuka hag̃ua pe ovecha ra’y pe páscua aretépe g̃uarã térã pe arete oje’uhápe pan ojejapóva levadura’ỹre.
8Upévare Hesu omondo Pédro ha Juánpe ha he’i ichupekuéra: Tapeho pembosako’i pe páscua rembi’u ja’u hag̃ua.
9Ha’ekuéra oporandu ichupe: Ha moõpa Nde reipota, ore rombosako’i hag̃ua pe páscua.
10Ha Hesu he’i ichupekuéra: Ág̃a peikévo pe távape, pejohúta peteĩ kuimba’e ogueraháva peteĩ kambuchi y reheve, tapeho hapykuéri ha peike avei pe óga ha’e oiketahápe.
11Ha peje pe óga járape: Mbo’ehára he’iuka ndéve: Moõpa oime pe koty ha’u hag̃ua che remimbo’ekuéra ndive pe páscua arete rehegua tembi’u.
12Ha ha’e ohechaukáta peẽme peteĩ koty guasu yvate (2° píso) oĩmbaháme jaguapypa hag̃ua ha upépe pembosako’ipa ñandéve g̃uarã pe páscua arete rembi’urã.
13Oho hikuái ha ojohupa Hesu he’i haguéicha ichupekuéra, ha upepete ombosako’i pe pascua arete.
14Ha og̃uahẽvo pe hóra, Hesu oguapy hemimbo’ekuéra ndive mesápe.
15Ha he’i ichupekuéra: Che py’aite guive ningo ha’use penendive ko páscua rembi’u amano mboyve.
16Che voi ha’e peẽme nda’umo’ãveitaha kóvagui ha’u jevy peve penendive Ñanderuete retãguasúpe.
17Upérõ Hesu ojapyhy pe váso ha oagradece rire ome’ẽ hemimbo’ekuérape he’ívo: Kóina, pe’u joa ichugui.
18Che voi ha’e peẽme nda’umo’ãveitaha parral rykuere ou peve Ñanderuete retãguasu.
19Ha ojapyhy pe pan ha oagradece rire, oipehe’ã ha ome’ẽ ichupekuéra he’ívo: Kóva ningo che rete oñeme’ẽtava penderehe. Pejapóke kóicha peñemomandu’a hag̃ua cherehe.
20Ho’upa rire hikuái pe pan, Hesu ojapyhy avei pe váso ha he’i: Ko váso kóva ningo pe ñembopy’apeteĩ (jekupyty) pyahu yvyariguakuéra ndive, ha upévare oñeñohẽtava che ruguy penderehe.
21Opáichavo, pe chetraicionátava (che py’ajoyvyhára) po katu oĩhína chendive ko mesa kóvape.
22Añetehápe pe yvyarigua Ra’ýpe ojehupáta ojehai haguéicha ichupe g̃uarã, opáichavo angái pe kuimba’e otraicionátava ichupe.
23Ha hemimbo’ekuéra oñepyrũ oporandu ojupe, máva piko upe mba’e ojapótava.
24Hemimbo’ekuéra oñepyrũ oñoñe’ẽjoapi oñondive mávata piko ijapytepekuéra upe tuichavéva.
25Upérõ Hesu he’i ichupekuéra: Umi tetã ruvicha oñemomba’e hetãyguakuéra rehe, ha umi ojopýva hetãyguakuérape oipota ha’ekuéra he’i ichupekuéra mba’eporã apoharaha.
26Pende apytépe katu, ndaupeichaiva’erã, pe tuichavéva toiko imitãvévaicha, ha pe mburuvicha toiko tembiguáicha.
27Mávapa pe ituichavéva, pe oguapýva mesápe okaru hag̃ua, térãpa pe oservíva ichupe. Ndaha’éipa pe oguapýva mesápe. Che ningo aiko avei pende apytépe peteĩ tembiguái ramo.
28Peẽ ningo pepyta chendive, ha chemoirũ opaite che jepy’ara’ã jave.
29Upévare Che ame’ẽ peẽme peteĩ tetãguasu, che Ruete ome’ẽ haguéicha avei chéve.
30Peẽ pekaru ha pey’u hag̃ua che mesápe che retãguasúpe, ha peguapyva’erã guapyhaguasu ári che retãguasúpe, pembojovake hag̃ua umi 12 Israel tríbupe.
Hesu he’i Pédrope ha’e ombotovetaha (onegataha) ichupe
31Simon, Simon, cháke, Satana ojeruréma Ñanderuetépe penderehe ha’e ikatu hag̃ua penembovava, oñembovava háicha pe trígo yrupẽme.
32Che katu ajeruréma nderehe, ani hag̃ua nde jerovia opa. Ha nde reñearrepenti porã (reñembyasy) rire emombarete ne hermanokuérape.
33Pédro katu he’i Hesúpe: Che Jára, che ningo aime aha hag̃uáicha nendive cárcelpe, ha amano hag̃ua nendive jepe.
34Hesu katu he’i ichupe: Cháke Pédro, pe gállo osapukái mboyve ko pyhare kóvape, nde chembotovéta (chenegáta) mbohapy jevy, ha eréta: Che ndaikuaái ichupe.
35Ha Hesu oporandu ichupekuéra: Che pomondo ramoguare vosa’ỹ, pirapire’ỹ ha sapatilla’ỹre, piko pehasa asyete ra’e. Ha ha’ekuéra ombohovái: Nahániri, araka’eve.
36Upérõ Hesu he’i ichupekuéra: Ko’ág̃a katu Che ha’e peẽme: Pe ivosáva, togueraha ivosa, ha pe ipirapiréva togueraha ipirapire, ha upe oguereko’ỹva peteĩ kyse puku katu tovende ipóncho ha tojogua peteĩ kyse puku.
Pe ára paha hi’ag̃uíma
37Che voi ha’éma peẽme ojehuva’erã opaite mba’e oje’éva guive cherehe Ñanderuete kuatiañe’ẽme: Tekove vai apytépe ojejohu ichupe. Opaite mba’e oje’éva guive cherehe oikopatamahína, (Isaías 53,12).
38Upérõ hemimbo’ekuéra he’i ichupe: Ore Jára, péina ápe mokõi kyse puku. Ha Hesu he’i ichupekuéra: Ovaléma.
39Ha osẽ oho hag̃ua ojepokuaa háicha, pe cérro Olivotýpe, ha hemimbo’ekuéra omoirũ ichupe.
40Ha Hesu og̃uahẽvo upépe he’i hemimbo’ekuérape: Peñembo’e ani hag̃ua pe’a og̃uahẽ jave pe jepy’ara’ã vaieta.
41Upérõ Hesu oñemomombyry ichuguikuéra 40 métro rupi, ha oñesũ oñembo’e hag̃ua,
42ha he’i: Che Ru, reipotárõ, embohasa chehegui ko váso kóva, opáichavo ani oiko pe che aipotáva, Nde reipotáva uvei toiko.
43Peteĩ ángel ou yvágagui omombarete hag̃ua ichupe.
44Hesu okyhyjeve ohóvo, oñembo’e hatãve, ha hy’ái tuguýicha otyky yvýre.
45Hesu opu’ã oñembo’ehágui, ou hemimbo’ekuéra rendápe, ha ojohu ichupekuéra okepa, oñembyasýgui.
46Upémarõ Hesu he’i ichupekuéra: Mba’érehe piko pekepeína. Pepu’ã ha peñembo’e ani hag̃ua pe’a jepy’ara’ãme.
47Ha Hesu oñe’ẽrõ gueteri hína, Júdas, umi 12 Hesu remimbo’ekuéra peteĩva, og̃uahẽ peteĩ aty tuicháva reheve, ha ha’e oñemboja Hesu rendápe ha ohetũ ichupe.
48Hesu katu oporandu ichupe: Nde Júdas, peteĩ ñehetũme piko reityuka vaireína (retraiciona) yvyarigua Ra’ýpe.
49Ha umi oĩva Hesu jerére ohechávo umi mba’e ojehuvahína oporandu ichupe, he’ívo: Ore Jára, reipota piko ore roporokutupa kyse pukúpe.
50Ha peteĩ hemimbo’e oikutu pe pa’iguasu rembiguáipe ha oikytĩ’o inambi akatúa.
51Ha Hesu ombohovái ichupekuéra ha he’i: Peheja, ko’apevénte. Upéi opoko pe tembiguái nambíre ha omonguera ichupe.
52Upérõ Hesu he’i umi pa’i ruvichakuérape, Ñanderuete róga tahachikuérape ha umi karai ancianokuérape, ouva’ekue oapresa hag̃ua ichupe: Peapresa hag̃uáicha mondahápe pesẽ kyse puku ha yvyra reheve cheapresa hag̃ua.
53Meme árape ningo aĩva’ekue penendive Ñanderuete rogaguasúpe ha napendepojairiva’ekue cherehe. Ko hóra kóva katu pene mba’e ha pytũnguypegua mba’e.
Pédro ombotove Hesúpe
54Upérõ oapresa hikuái Hesúpe ha ogueraha ichupe omoinge hag̃ua pa’iguasu rógape. Pédro katu oho mombyry guive hapykuéri.
55Ha’ekuéra katu ojatapy pe korapy mbytépe, ha oguapy hikuái pe tata jerekuévo, ha Pédro oguapy avei ijapytepekuéra.
56Peteĩ tembiguái kuñáva oma’ẽ porãvo Pédro rehe, ha’e oguapy jave ijapytepekuéra ojepe’e hag̃ua, he’i: Kóva ningo oĩkuri Hesu ndive avei.
57Pédro katu ombotove (onega) ha he’i: Nde tembiguái kuñáva, che ndaikuaái ichupe.
58Aremive rire ambue tembiguái ohechávo Pédrope he’i: Nde ningo peteĩ heseguakuéra avei, Pédro katu ombotove jevy, ha he’i: Che ndaha’éi pe kuimba’e nde reimo’ãva.
59Ha ohasa rire peteĩ hóra rupi, ambueve he’i: Añetehápe, kóva ningo oĩkuri avei Hesu ndive, ha’égui avei peteĩ Galileaygua.
60Pédro katu ombohovái ichupe, ha he’i: Nde kuimba’e, ndaikuaái pe nde eréva. Ha, Pédro oñe’ẽ jave gueteri, pe gállo osapukái.
61Ha Hesu ojerévo oma’ẽ Pédro rehe. Upérõ ae Pédro imandu’a Hesu ñe’ẽngue rehe, Ha’e he’iva’ekue ichupe: Ange pyhare, pe gállo osapukái mboyve, nde chembotovéta mbohapy jevyve.
62Ha Pédro osẽ okápe ojahe’o soro.
63Ha umi kuimba’e katu oñangarekóva Hesu rehe, oñembohory hese ha oinupã ichupe.
64Ohesajokua ha oporandu ichupe: Eréna, mávapa nenupãra’e.
65Ha heta mba’evai he’i ichupe ñembohoryhápe.
66Ko’ẽmba rire, oñembyaty umi karai ancianokuéra, pa’i ruvichakuéra ha umi kuatia haihára ha ogueraha Hesúpe oñembyatyhápe umi 71 Israel karai anciáno ombojovake hag̃ua Hesúpe.
67Ha he’i hikuái Hesúpe: Nde ha’érõ añetehápe pe Crísto, eréna oréve. Hesu katu he’i ichupekuéra: Ha’érõ peẽme, ndapegueroviamo’ãi.
68Ha Che aporandu ramo peẽme, peẽ napembohovaimo’ãi avei.
69Ko’ág̃a guive pe yvyarigua Ra’y oguapýta Ñanderuete Ipu’akapáva akatúape.
70Upéramo he’i joa hikuái: Nde piko añete Ñanderuete Ra’y. Ha Hesu ombohovái ichupekuéra: Héẽ, Che ha’e.
71Upémaramo he’i joa hikuái: Mba’e piko ñaikotevẽve, ijurúgui voi ñahendupáma, natekotevẽvéi ambue techahare rehe.
Currently Selected:
Lúcas 22: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
