Lúcas 12

Hesu he’i tova mokõi ivaiha

1Upéramo heta Israelgua oñembyaty opyrũmba peve ojuehe, ha Hesu he’i hemimbo’ekuérape: Cháke, peñeñangarekóke fariséo levadúragui, kóva ningo tova mokõi.

2Ndaipóri mba’eve oñemíva, ojehecha’ỹva’erã, térã okañýva, ojekuaa’ỹva’erã.

3Upévarehe, opaite mba’e peẽ pejéva guive pytũguýpe, tesapehápe oñehendukava’erã, ha opaite mba’e peñe’ẽva apysápe pende koty ruguápe jepe, ojeguerosapukaiva’erã óga ape ári guive.

Mávaguipa ojekyhyjeva’erã

4Che ningo ha’e peẽme, che pohayhúvape, ani pekyhyje umi ikatúva ojuka pende rete, péva rire ndaikatuvéima ojapo mba’eve ivaíva penderehe (ndaikatúi ojuka pende pytu porã).

5Che katu ahechaukáta peẽme mávaguipa pekyhyjeva’erã: Pekyhyjeva’erã pe oporojuka rire ikatúva oporoity avei aña retãme. Ha añetehápe Che ha’e peẽme pévagui pekyhyje (pekyhyjeva’erã Ñanderuetégui).

6Noñeme’ẽi piko 5 guyra’i mokõi monéda rehe, upéicharamo jepe Ñanderuete ndahesaráiri ni peteĩmígui jepe ijapytégui.

7Opaite pene akã rague jepe ojepapáma, upévare ani pekyhyje, peẽ pende repyve (pevaleve) heta guyra’ígui.

8Che ningo ha’e peẽme oimeraẽva otĩ’ỹva omombe’u hag̃ua che réra tetãyguakuéra renondépe, pe yvy arigua Ra’y notĩmo’ãi avei omombe’u hag̃ua héra Ñanderuete angelkuéra renondépe.

9Ha upe chemboykéva hapichakuéra renondépe, Ñanderuete omboykeva’erã avei ichupe hi’angelkuéra renondépe.

10Ha oimeraẽva oñe’ẽvaíva yvyarigua Ra’y rehe, oñeperdonava’erã, upe oñe’evaíva ha oñemoĩva pe Pytu Porãmbáva rehe katu noñeperdonaiva’erã araka’eve.

11Ha’ekuéra pendegueraha ramo mburuvichakuéra ha mbojovakehára renondépe, ani pejepy’apy mba’éichapa peporombohováita térã mba’épa pejéta.

12Katuete pe Pytu Porãmbáva penembo’eva’erã, mba’épa pejeva’erã upe hóra upévape.

Hesu he’i tetãyguakuérape ani hag̃ua ha’éntese

13Upéramo pe aty apytégui peteĩ kuimba’e he’i Hesúpe: Mbo’ehára, eréna che ryke’ýpe omboja’o hag̃ua chéve ore ru ha ore sy mba’ekue.

14Hesu katu he’i ichupe: Nde kuimba’e, mávapa chemoĩ mbojovakehára térã mboja’ohára ramo pende apytépe.

15Ha he’ive ichupekuéra: Pema’ẽke ha peñeñangarekókena opaichagua mba’epota potavégui, avave ndohupitýi pe tekove añeteguáva imba’eita rupi.

16Upérõ Hesu omombe’u ichupekuéra peteĩ ñe’ẽ mbojoja: Oikova’ekue peteĩ kuimba’e imba’eitáva ha ikokueguasúpe oĩ heta mba’e hi’a porãitéva.

17Ha ojepy’amongetávo he’i ijupe: Mba’e piko ajapóta, ndarekói moõpa ikatu añongatupa hag̃ua che ñemitỹnguéra.

18Ha he’ive: Péicha ajapóta, aitypáta che ñemitỹnguéra ñongatuha róga ha amopu’ãta peteĩ óga tuichavéva ijapa hag̃ua.

19Ha upéi che ha’éta che ángape: Nde, che ánga, hetaiterei mba’e añongatúma ndéve g̃uarã, neryg̃uatã hag̃ua heta año pukukue, epytu’u ko’ág̃a, ekaru, emokõ, evy’a ha ehasa porãite.

20Ñanderuete katu he’i ichupe: Ndevýro, ko pyhare kóvape ojejeruréta ndéve ne ánga, ha opaite mba’e rembyatyva’ekue piko, mávape g̃uarã opytáta.

21Upéicha ningo ojehu upe ombyatýva mba’eita ijupe g̃uarãnte, ha Ñanderuete ndive g̃uarã nombyatýi mba’eve.

Ñanderuete oñangareko porã ita’ýra ha itajýra rehe

22Upéi Hesu he’i hemimbo’ekuérape: Upévare, Che ha’e peẽme: Ani pejepy’apy pende rekove ko’ag̃agua rehe, mba’épa pe’úta térã mba’éichapa peñemondéta.

23Pende rekove mba’eguasuve tembi’úgui ha pende rete aógui.

24Pema’ẽnte yryvukuéra rehe, ndaikokuéi oñotỹ térã omono’õ hag̃ua, nahendag̃uái oñongatu hag̃ua hembi’u, ha upeichavéramo jepe Ñanderuete omongaru ichupekuéra. Peẽ ningo pevaleve umi guyrágui.

25Mávapa pende apytégui ojepy’apy haguére ikatu ombopukuve hekove arakuéra peteĩ hórami jepe.

26Upéicharamo peẽ ndaikatúi ramo pejapo mba’e michĩvéva jepe pende jepy’apy rupi, ma’erãpa pejepy’apyse ambue mba’e rehe.

27Pema’ẽnte umi lírio yvoty rehe, mba’éichapa okakuaa, nomba’apói ni noipovãi ramojepe. Che katu ha’e peẽme Salomon opaite ijeguaka reheve jepe noñemondéi peteĩ ko’ãvaicha.

28Ñanderuete omonde porãite ramo umi yvoty umíva, ko ára kóvape ipoty porãitéva, ha ko’ẽrõ katu ipirúgui ojehapypa. Ko’ýteve Ha’e oñangareko porãvéta penderehe, peẽ pejeroviáva rehe.

29Upévare anítei peiko jepy’apy poguýpe, peñeha’ãvo peikuaa hag̃ua mba’épa pe’úta ha mba’épa pey’úta.

30Opaite ko’ã mba’e ko’ãva kuimba’e ha kuña ojerovia’ỹva Ñanderuete rehe ojapo, Ñanderuete katu oikuaa porãmba voi opaite mba’e peẽ peikotevẽva guive peikove hag̃ua.

31Peheka raẽ uvei Ñanderuete retãguasu oñembotuichave ohóvo, ha opaite ambue mba’e peẽ peikotevẽva guive peikove hag̃ua, oñeme’ẽta katuete peẽme.

32Ani pekyhyjétei peẽ, Ñanderuete iglesiayguakuéra napenderetái ramojepe, pende Ruete voi ome’ẽta peẽme hetãguasu.

33 Pevende umi mba’e perekóva peipytyvõ hag̃ua mboriahukuérape, ani pembyaty pende pirapire ko yvy apére oñehundipahápe, pembyaty uvei pende pirapire yvágape, péva he’ise pejapo mba’eporã pende pirapire rupi pende rapicha mboriahu rekovépe. Yvágagui noñemondamo’ãi pende pirapire, ni kupi’i nombyaimo’ãi nde pláta.

34Pene mba’eita térã pirapire oĩháme, upepete oĩva’erã avei pende py’apy (pensamientokuéra).

35Peñembosako’i porãke, pemoĩvo pende ku’áre pende ku’a jokuaha ha pemyendy pene rataindy,

36peiko katu yvy ári umi oha’ãrõvaicha Ijárape ou jey hag̃ua imendahápe, ha Ha’e ombotávo pende róga rokẽre peẽ peipe’a pya’e hag̃ua ichupe.

37Ovy’aite umi tembiguái, oha’ãrõvahína ijárape ojevy hag̃ua. Añetehápe Che ha’e peẽme: Ha’e oñembosako’íta omohenda ha oservi hag̃ua hembiguaikuérape okaru jave imesápe.

38Ha’e ou ramo pyhare pyte térã ko’ẽmbotávo, ovy’aiteva’erã oimeraẽ oha’ãrõva guive ichupe, mála hóra ramojepe, (hóra vai ramojepe).

39Peikuaa porã katu kóva: Pe óga jára oikuaa rire mba’e hórapa oúta pe mondaha hógape ndohejaiva’erãmo’ã ombokua hóga tápia omonda hag̃ua imba’ekuéra.

40Upévare peñembosako’i porãke peẽ avei, pe yvyarigua Ra’y ou jeýta peteĩ hóra peẽ peimo’ã’ỹta jave.

41Upérõ Pédro he’i: Oréve g̃uarãnte piko Nde ere ko ñe’ẽ mbojoja térãpa opavavépe g̃uarã avei.

42Ha Hesu ombohovái ichupe: Máva piko pe capataz heko peguáva ha iñakã porãva omyakã hag̃ua ijára rembiguaikuérape okaru hag̃ua hi’oraitépe.

43Ovy’aite oimeraẽva tembiguái, ijára ojohúva ichupe ojapo jave hekoitépe hembipota.

44Añetehápe Che ha’e peẽme, ijára omoĩva’erã ipoguýpe opaite mba’e.

45Ha upe capataz he’i ramo ipy’apýpe: Che jára hi’aréta gueteri ou hag̃ua, ha upévare oñepyrũ oinupã rei umi tembiguái kuimba’e ha kuñávape, ha okaru porã ha oka’u jave,

46upe capataz jára og̃uahẽ, ha’e oha’ãrõ’ỹre ha pe hóra ha’e oikuaa’ỹ jave, upepete ijára ojukaukáta icapatázpe, omboja’óta hete, ha omondova’erã ichupe umi ojerovia’ỹva oĩháme.

47Upe tembiguái oikuaáva ijára rembipota, ha noñembosako’íriva ni ndojapóiva hekópe hembiapo, heta oñenupãva’erã ichupe.

48Upe tembiguái oikuaa’ỹva (ijára rembipota) ha ojapóva mba’evai oñenupã hag̃uáicha, oñenupãva’erã. Upe oñeme’ẽvape heta, oñeha’ãrõva’erã avei heta ichugui, ha upe oñemoĩva’ekue heta mba’e ipoguýpe, heta ojejerure jeyva’erã ipógui.

Oikova’erã jejuavy Hesu rehe

49Che ningo aju aity hag̃ua tata ko yvy apére, ha mba’épa aipotave hendýma rire.

50Che ajebautiza raẽva’erã peteĩ bautísmope, oĩ ningo umi chejopyetevahína opáguio rei, ha upévagui ajepy’ara’ã’aína.

51Peẽ peimo’ã Che aju ko yvy apére aru hag̃ua py’aguapy, ndaupéichai, Che aju aru hag̃ua juavy.

52Águi rire, 5 oikóva peteĩ ogapýpe ojuavýta oñondive, mbohapy oñemoĩta mokõi rehe, ha mokõi oñemoĩta mbohapy rehe.

53Pe túva oñemoĩta ita’ýrare, ha ita’ýra oñemoĩta itúvare, pe sy oñemoĩta imembykuña rehe, ha kóva oñemoĩta isýre, pe ména sy oñemoĩta imembykuimba’e rembirekóre, ha kóva oñemoĩta iména sy rehe.

54Ha Hesu he’i avei hetãyguakuérape: Pehecha ramo peteĩ arai opu’ãvahína kuarahy reikéguio, peẽ voi peje: Okýta, ha añetehápe péicha oikohína.

55Ha peñandu ramo oipeju pe yvytu (Israel retã) yvýguio, peje: Mbyry’áita, ha añetehápe péicha ojehu.

56Peẽ tova mokõi, pehechakuaa porã umi mba’e ojehútava yvy ha árare, ha mba’éicha piko ndapehechakuaái umi mba’e oikovahína ko ára kóvape pende apytépe.

57Mba’érehe piko peẽ voi ndaikatúi pehechakuaa pe heko peguáva.

58Nde reho aja nderehe ija’e’ỹva ndive mbojovakehára rendápe, eñeha’ãmba tape rupi remyatyrõmba hag̃ua hendive, anítei ha’e nemoĩ vai pe mbojovakehára ndive, kóva nde reitýtagui itahachi rupi cárcelpe.

59Añetehápe, Che ha’e ndéve: Neresẽmo’ãi repagapa mboyve.

Currently Selected:

Lúcas 12: ÑÑP2015

Highlight

Copy