Lúcas 11
11
Hesu ombo’e hemimbo’ekuérape oñembo’e hag̃ua
1Hesu oho peteĩ hendápe oñembo’e hag̃ua, ha oñembo’epávo, peteĩ hemimbo’e he’i ichupe: Ore Jára, orembo’éna ore roñembo’ekuaa hag̃ua, Juan ombo’e haguéicha hemimbo’ekuérape.
2Ha Hesu he’i ichupekuéra: Peñembo’e ramo, péicha peje: Ore Ruete, toñemomba’eguasu nde réra. Ne retãguasu tou.
3Ore rembi’u roikotevẽva ko árape g̃uarã, eme’ẽmi oréve ko árape.
4Ha eperdonami ore angaipa (rembiapo vai), ore roperdona háicha ore rapichápe ojapo vaiva’ekue orerehe. Ha ani oregueraha jepy’ara’ãme.
5Ha upéi he’i ichupekuéra: Oimeraẽva iñirũ añete ramo, ha oho ramo hendápe pyharepyte jepe ha he’i: Che amígo eiporukamína chéve mbohapy pan.
6Og̃uahẽ ningo peteĩ che irũ mombyrygua ha che ndarekói mba’eve amongaru hag̃ua ichupe.
7Ha iñirũ ombohováine ichupe: Che irũ, ani chemyangekõi, okẽnguéra oñembotýma, ha che mitãkuéra oĩmba chendive che rupápe, upévare ndaikatúi che apu’ã ame’ẽ hag̃ua ndéve ne rembijerure.
8Añetehápe ha’e peẽme: Ha’e nome’ẽséi ramojepe ichupe ha’e iñirũ añete haguére, katuete opu’ãva’erã ome’ẽ hag̃ua ichupe hembijerure.
9Che ha’e peẽme: Pejerure ha oñeme’ẽva’erã peẽme, peheka ha pejohuva’erã, pembota ha ojepe’ava’erã peẽme.
10Upe ojeruréva ningo ohupity, ha upe ohekáva ojohu, ha upe ombotávape ojepe’ava’erã.
11Mba’eichagua túva piko pende apytépe ome’ẽ ita’ýrape peteĩ mbói, ha’e ojerure ramo peteĩ pira.
12Térãpa ha’e ojerure ramo itúvape peteĩ ryguasu rupi’a, ha’e ome’ẽnepa ita’ýrape peteĩ alacran.
13Ha peẽ peneñañáva, peme’ẽkuaa ramo mba’eporãva pende ra’y ha pende rajykuérape, ko’yteve Ñanderuete ome’ẽva’erã katuete pe Pytu Porãva umi ojerurévape ichupe.
Umi fariséo he’i Hesu omba’apoha mba’epochy pu’aka rupi
14Ha Hesu omosẽ rire peteĩ mba’epochýpe peteĩ kuimba’e ñe’ẽngúvagui, ha’e oñepyrũ oñe’ẽ ha hetãyguakuéra ohechávo péva ipy’andyipa hikuái opytávo.
15Hetãyguakuéra apytégui oĩ umi he’íva: Hesu omosẽ hague Beelzebu pu’aka rupi pe mba’epochýpe, Beelzebu ningo mba’epochykuéra ruvicha.
16Ambuekuéra katu oipy’ara’ãségui Hesúpe, ojerure ichupe, ojapo hag̃ua peteĩ milágro yvágagui oúva.
17Hesu katu oikuaa porãgui ipy’apykuérape oĩva guive, he’i ichupekuéra: Opaichagua tetãguasu oñemoĩva ojuehe, oñehundiva’erã, ha ogayguakuéra oñemoĩva ojuehe, oñehundiva’erã katuete avei.
18Ha Satana ojuavy ramo heseguágui mba’éichapa oiko aréta hetãguasu, peẽ pejégui Che amosẽ hague Satana rupi umi mba’epochýpe.
19Ha Che amosẽ ramo Beelzebu rupi mba’epochykuérape, máva rupi piko aipóramo pene remimbo’ekuéra omosẽ mba’epochykuérape. Upévare ha’ekuéra voi opytáta pene mbojovakehára ramo.
20Ha Che amosẽ ramo mba’epochykuérape Ñanderuete kuã (pu’aka) rupi, upéicharamo Ñanderuete retãguasu og̃uahẽma pene rendápe.
21Peteĩ imbaretéva opaite iñorãirõ rembiporu reheve oñangareko ramo hóga rehe, avave nomondamo’ãi imba’erepy.
22Og̃uahẽ ramo katu peteĩ imbaretevéva ichugui, ombopoguy ichupe iñorãirõ rembiporu ramojepe ha omondapa avei imba’erepy.
23Upe chendive oĩ’ỹva, oñemoĩ voi cherehe. Ha upe omono’õ’ỹva chendive, oporomosarambipa.
24Pe mba’epochy osẽ ramo peteĩ tapichágui, oho ñu perõ rupi oheka tenda opytu’u hag̃ua. Ha ndojohúimarõ, ha’e ojevy jey hogakueteépe,
25ha ojevývo ojohu hogakue ojetypeipapyre ha ojeguapáva.
26Upémarõ oho ogueru hendive 7 ambue mba’epochy, iñañavéva ichugui, oiko hag̃ua hikuái ipype, ha ipahápe pe kuimba’e péva oiko vaieteve oiko haguégui iñepyrũme.
27Ha Hesu he’ipávo ko’ã mba’e, peteĩ kuñakarai pe atyguasu apytégui osapukái sapy’a he’ívo: Ovy’aite upe tye ndegueruva’ekue ko yvy apére, ha upe kuña nemokambuva’ekue.
28Hesu katu he’i: Ovy’aiteve uvei upe ohendúva ha ojapóva Ñanderuete ñe’ẽ.
29Ha hetãyguakuéra oñembyatyvémarõ Hesu he’i: Ko’ã ñemoñare ko’ãva ningo ñemoñare iñañáva. Ojerurénte milágro, noñeme’ẽmo’ãi katu ichupekuéra, Jónas milágromante oñeme’ẽta ichupekuéra.
30Jónas milágro oiko haguéicha techaukaha ramo Niniveguápe g̃uarã, upeichaite pe yvyarigua Ra’y oikóta avei techaukaha ramo ko’ag̃ayguápe g̃uarã.
31Pe kuñakarai oikova’ekue tetã ruvicha ramo sur gotýo opu’ãta ombojovake hag̃ua ko’ã kuimba’e ko’ãvape pe ñembojovakeha árape. Ha’e ou yvy paha guive Jerusalénpe ohendu hag̃ua Salomon arandu, ha peikuaa porãke ko’ápe oĩveha Salomon arandúgui (1 Réyes 10,1-10).
32Ha umi Niniveygua opu’ãta ombojovake ha ocondena hag̃ua ko’ag̃ayguakuérape. Ha’ekuéra ningo oñembyasyete ojapo vai haguére ohendu rire Jónas ñe’ẽ. Ha péina pene renondépe oñembo’yhína peteĩ ituichavéva Jónasgui.
Ñande rete tesape
33Avave nomyendýi hataindy omoĩ hag̃ua ikoty ruguaietépe térã tupa guýpe, omoĩ uvei koty mbytépe yvate, upe oikéva ohecha porã hag̃ua.
34Nde rete rataindy ningo nde resa, nde resa hesãi porã ramo, opaite nde rete ohesape porãmba avei, nde resa iñaña ramo katu, opaite nde rete iñypytũ.
35Ema’ẽ porãke nde resa ryepy pegua rehe, ani hag̃ua iñypytũtei ndehegui.
36Upéicharõ opaite nde rete ohesape porã, ndaipóri ramo ipype mba’eve iñypytũva, ha opaite mba’e nde rehecha sakã porãmbáta, ku tesape rendy ohesape porãvaicha ndéve.
Hesu oike peteĩ fariséo rógape
37Hesu oñe’ẽmba rire, peteĩ fariséo oconvida ichupe okaru hag̃ua hógape, ha Ha’e oho ha oguapy imesápe.
38Ha pe fariséo ohecharamoite, ohechávo Hesu ndojepoheiriha okaru mboyve.
39Hesu katu he’i ichupe: Peẽ fariséo ningo pemopotĩ porã pende váso ha ña’ẽmbe ijapéguio, pende py’apy katu henyhẽ monda ha ñañágui.
40Peẽ tekove výro. Pe ojapóva pe mba’e ape okapegua ojapo avei pe mba’e hyepy pegua (tete ha pytu porã).
41Peme’ẽ katu pende pirapire mboriahukuérape py’aporã reheve, ha pende py’apy iporã ramo opaite pene rembiapo pejapóva guive pende rete rupi iporãmbáta avei.
42Angái peẽ fariseokuéra, peẽ peme’ẽ pe diézmo opaite pene piménta, pende juky ha opaichagua verdúra peñotỹva guive, opáichavo Ñanderuete justícia ha mborayhu añeteguáva peẽ pemboykete, ko’ãva katu ojejapova’erã, ha umívagui anítei penderesarái.
43Angái peẽ fariseokuéra, peguapyséva Ñanderuete róga guapyha tenondeveguápe ha peipota pene retãyguakuéra penemomaitei tape rupi.
44Angái, peẽ tova mokõi, peẽ peiko ku sepultúra (tyvy) ñemi háicha, tetãyguakuéra oguata hi’ári oikuaa’ỹre.
45Peteĩ oporombo’éva Ñanderuete ñe’ẽ, he’i Hesúpe: Ne ñe’ẽ rupi Nde oremotĩ avei.
46Angái avei peẽ peporombo’éva Ñanderuete ñe’ẽ, peẽ pemoĩva pene retãyguakuéra ári peteĩ cárga ipohýiva, ikatu’ỹva ogueraha hikuái, ha peẽ katu pene kuãmente jepe ndapepokói hese.
47Angái peẽ, pemopu’ãva profetakuéra retekue rendaguasu, pende rukuéra ojukapava’ekue.
48Upéicha peẽ voi pehechauka pejohu porãha pende rukuéra rembiapokue,
49upévare Ñanderuete arandu he’imava’ekue avei: Amondóta hendápe proféta ha apostolkuérape, ha ijapytégui oĩ umi ojeperseguítava ha ambuépe ojejukava’erãva.
50Ñanderuete ojerure jevyva’erã Israel retãgui opaite proféta ruguy oñeñohẽva’ekue, ko múndo kóva ojejapo ypy guive.
51Abel ruguy guive Zacarías ruguy peve, ojejukava’ekue kuave’ẽmby renda ha Ñanderuete rogaguasu pa’ũme. Añetehápe, Che ha’e peẽme ko tetã kóva pógui ajerure jevýta (huguykue).
52Angái peẽ, peporombo’éva Moises rembiapoukapykuéra, peẽ pemboyke pe kuaapy lláve. Peẽ voi ndapeikemo’ãi yvágape ha ndapehejái oike umi oikesévape.
53Ha Hesu osẽ rire upégui, umi oporombo’éva Ñanderuete ñe’ẽ ha fariseokuéra ipochyete ha oñemoĩ hese ha ojopyse ichupe heta porandu ñuhã reheve.
54Oñeha’ãmba omoñuhã hag̃ua ichupe iñe’ẽtee rupi, omoĩ vai hag̃ua ichupe.
Currently Selected:
Lúcas 11: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
