Génesis 18

Ñanderuete he’i Isaac onacetaha

1Uperire Ñanderuete ojehechauka Abrahámpe Mámre encinatýpe, oguapy jave asajembyte hóga hymba pirekueguigua rokẽme.

2Ha ojesaupívo oma’ẽ, ha péina ohecha ijypýpe mbohapy kuimba’e; ha ohechávo ichupekuéra, ha’e osẽ hóga hymba pirekueguigua rokẽgui, ha ñaniháme oho omomaitei hag̃ua ichupekuéra, ha oñakãity yvýre henondepekuéra,

3he’ívo: Che Jára ajohu ramo py’aporã nde resa renondépe, ajerure ndéve ani pehasa ne rembiguái oĩ hágui.

4Tojegueru ymi, pejepyhéi hag̃ua; ha pepytu’umi kuarahy’ãme,

5aguerúta pan peñemombarete hag̃ua ha uperire pehasakuaa; upevarã voi ningo peju pene rembiguái rendápe, ha he’i hikuái ichupe: Ejapo nde ere háicha.

6Upéramo Abraham pya’ete oho Sára rendápe ha he’i ichupe: Pya’e ejapyhy 22 kílo trígo ku’i iporãvéva rejapo hag̃ua pan.

7Ha Abraham pya’e oho ivakakuéra oĩháme, ha ogueru peteĩ tóro ra’yrusu ikyrỹi ha iporãva, ha ome’ẽ hembiguáipe, ombojy pya’e hag̃ua.

8Upéi ogueru avei kamby, mantéca, so’o oñembosako’ipyréva ha omoĩ henondepekuéra; ha Abraham oñembo’y henondepekuéra okaru jave hikuái pe kuarahy’ãme.

9Upéi he’i hikuái ichupe: Mamo piko oime Sára, ne rembireko. Ha ha’e he’i: Amo, che róga rymba pirekueguiguápe.

10Upéramo peteĩ he’i: Añetehápe aju jevýta ne rendápe, ambue añoháme ko’ã ára rupi, ha ne rembireko Sára imembýta peteĩ mitãkuimba’e. Ha Sára ojapysakahína pe óga rokẽ kupe guive.

11Ha Abraham itujáma ha Sára ig̃uaig̃ui avei, heta áñoma oguereko hikuái; ha Sáragui ohasapáma umi mba’e ojehúva kuñakuérape (huguy guejy).

12Ha opuka Sára ipy’apýpe, he’ívo: Cheg̃uaig̃ui rire piko avy’a jevýta, ha che jára itujáma avei.

13Upéramo Ñanderuete he’i Abrahámpe: Mba’érehe piko Sára opuka he’ívo: Ikatúnepa chememby cheg̃uaig̃uieterei riréma.

14Oimenga’u piko peteĩ mba’e pende Ruete ikatu’ỹva ojapo. Hi’araitépe aju jevýta ne rendápe, ha ha’e haguéicha Sára imembýta peteĩ mitãkuimba’e.

15Upéramo Sára okyhyjégui he’i: Che ndapukái. Ha ha’e he’i ichupe: Ndaupéichai, nde repukákuri.

Abraham ojerure Sodóma rehe

16Ha umi kuimba’e opu’ã oho hag̃ua Sodóma gotýo; Abraham oho hendivekuéra omoirũ hag̃ua ichupekuéra.

17Ha Ñanderuete he’i: Añomíta piko Abrahámgui ko’ã mba’e ajapótava:

18Abrahámgui oikóta tetã ndetuicha ha imbaretéva, ha’érupi opaite tetãnguéra ojehovasáta yvy apére.

19Che ningo aikuaa voi ha’e he’itaha iñemoñarenguérape oiko hag̃ua che rape rehe, oiko hag̃ua hekoitépe ha pe añetegua rapére, upévare ajapopáta umi mba’e ha’eva’ekue guive Abrahámpe.

20Upémaramo Ñanderuete he’i: Pe Sodóma ha Gomórra rerakuã vai heta hetavégui, ha hembiapo ivaietereiraságui,

21aguejýta, ahecha hag̃ua hembiapokuéra, añetépa herakuã vai térã nahániri; ha ndaupéichai ramo, aikuaáta.

22Ha opia umi kuimba’e upégui oho hag̃ua Sodóma gotýo; Abraham katu opyta gueteri Ñanderuete renondépe.

23Ha Abraham oñemboja hese ha he’i: Añete piko rehundipáta heko potĩva heko vaíva ndive.

24Oĩ ramo 50 heko potĩva pe táva ryepýpe: Rehundíta piko avei ha nereperdonamo’ãi piko pe táva, umi 50 heko potĩva rayhupápe.

25Taimombyryete ndehegui ko mba’e kóva, rejukáta piko heko potĩva heko vaíva ndive, rembojojáta piko heko potĩva iñañáva ndive; aníkena araka’eve péicha rejapo; ko yvy Mbojovakehára piko ombojovakéta hekope’ỹ.

26Upéramo Ñanderuete he’i: Ajohu ramo Sodómape 50 heko potĩva aperdonáta pe táva umíva rayhupápe.

27Ha Abraham oñe’ẽ jevy ha he’i: Péina ápe añepyrũma añe’ẽ che Járape, che ningo yvytimbo ha tanimbúnte.

28Ikatu oĩ 45 heko potĩva; umi 5 rehe piko rejukapáta ko’ã tavayguápe. Ha he’i: Ndajukapamo’ãi, ajohu ramo upépe 45.

29Ha Abraham oñe’ẽ jevy ichupe, ha he’i: Ha 40-nte oĩrõ, ha he’i jevy: Ndajapomo’ãi mba’e ivaíva umi 40 rayhupápe.

30Ha Abraham he’i: Aníkena ndepochýtei ko’ág̃a che Jára, añe’ẽve ramo: Ha oĩrõ 30-nte. Ha Ha’e he’i jevy: Ndajapomo’ãi mba’eve ajohu ramo upépe 30.

31Ha hé’i: Péina ápe, añepyrũma añe’ẽ che Járape: Ha ojejohúrõpa 20-nte. Nahundimo’ãi, Ha’e he’i, umi 20 rehehápe.

32Ha Abraham he’i jevy: Aníkena nde pochýtei ko’ág̃a che Jára, añe’ẽmi jevyháre peteĩ jevymínte: Ha ojejohúrõpa 10-nte. Nahundimo’ãi, he’i Ñanderuete, umi 10 rehehápe.

33Ha Ñanderuete oho oñe’ẽmba rire Abraham ndive; ha Abraham ojevy hógape.

Currently Selected:

Génesis 18: ÑÑP2015

Highlight

Copy