Génesis 17
17
Pire’i kytĩ’o (circuncisión) opyta ñe’ẽme’ẽtechaukaha ramo
1Abram oguereko ramoguare 99 áño, Ñanderuete ojehechauka ichupe ha he’i: Che ningo nde Ruete, pe Ipu’akapáva, eiko porã che renonderãme ha eñemboheko porãve rehóvo.
2Añemoĩta peteĩ ñe’ẽme nendive, ha ambohetaitereíta ne ñemoñarenguérape ko yvy ári.
3Upéramo Abram ojeity ovapývo, ha Ñanderuete oñe’ẽve hendive he’ívo:
4Eikuaa porãke, añemoĩ nendive peteĩ ñe’ẽme ha reikóta heta tetãnguéra ru ramo.
5Ha ko ára guive nandereramo’ãvéima Abram, nde rératama Abraham (he’iséva tetãnguéra ru), Che romoĩmagui heta tetãnguéra ru ramo.
6Ha rombohetaitereíta ha heta tetã ajapóta ndehegui, ha heta tetã ruvicha osẽta ndehegui.
7Ha añemoĩma peteĩ ñe’ẽme nendive, nde riregua ñemoñarenguéra ndive ha iñemoñarenguerare ndive, ára atyguasukuéra rupi aiko hag̃ua nde Jára ramo, ha nderiregua ñemoñarenguéra Jára ramo avei.
8Ha ame’ẽta ndéve, ha nde riregua ñemoñarenguérape pe yvy nde reikohápe, Canaan yvy tuichakue pene mba’erã opaite árape; ha aikóta pende Jára ramo.
9Ha Ñanderuete he’i jevy Abrahámpe: Nde katu rejapova’erã che ñe’ẽ, nde ha nderiregua ñemoñarenguera avei.
10Kóa ha’e che ñe’ẽme’ẽ nde ha ne ñemoñarenguéra pejapova’erã: Opaite kuimba’e pende apytépe oñekytĩ’ova’erã ipire’i (oñecircuncidava’erã).
11Peikytĩ’ova’erã pene rembo akã pire’i, ha péva oikóta techaukaha ramo (señal ramo), chéve ha peẽme g̃uarã.
12Ha pe ára 8-hápe onace rire, opavave kuimba’e pire’i oñekytĩ’ova’erã ha pene ñemoñarenguéra oñekytĩ’ova’erã avei, oimeraẽ onacéva guive pende rógape, ha opaite esclávo (tembiguái) ojejoguáva guive pirapire rehe tetã ambuégui.
13Ipire’i oñekytĩ’ova’erã onacéva guive nde rogapýpe, ha opaite esclávo nde pirapire rehe rejoguava’ekue; ha che ñe’ẽme’ẽ techaukaha oĩta pende ro’o rehe tapia g̃uarã.
14Ha pe kuimba’e oñekytĩ’o’ỹva’ekue katu, ojepe’ava’erã hetã apytégui; opyrũ haguére che ñe’ẽme’ẽre.
15Ñanderuete he’i avei Abrahámpe: Ne rembireko noñemoheramo’ãvéitama ko ára guive Sarái, hérata Sára (he’iséva tetã ruvicha).
16Ha ahovasáta ichupe, ha ha’e rupive ame’ẽta ndéve peteĩ nde ra’yrã; Che ahovasáta ichupe, ha oikóta ichugui heta tríbu sy ramo; ha heta mburuvichaguasu osẽta ichugui.
17Upémaramo Abraham ojeity ovapývo ha opuka, ha he’i ipy’apýpe: Kuimba’e ombotýmava 100 áñopa ita’yrakuaavéne gueteri. Ha Sára, oguerekóva 90 áño piko hyeguasukuaáne gueteri.
18Ha Abraham he’i Ñanderuetépe: Mba’eichatamora’e Ismael oikove ne renondépe.
19Ha Ñanderuete he’i: Añetehápe ne rembireko Sára imembýta ndehegui peteĩ mitãkuimba’e ha embohéra ichupe Isaac; hendive amoañetéta che ñe’ẽ ame’ẽva’ekue ndéve ha ko jekupyty opytáta avei opaite árape iñemoñarenguérape g̃uarã.
20Ha umi mba’e nde rejeruréva Ismael rehe ajapóta avei; Che ahovasáta avei ichupe, ichugui osẽta avei 12 tríbu ruvicha ha peteĩ tetã ndetuicháva.
21Che ñe’ẽme’ẽ katu ajapóta Isaac ndive, Sára imembýtava ndéve ko áño oúvape.
22Ha oñe’ẽmbávo hendive, Ñanderuete oho Abraham oĩ hágui.
23Upéramo Abraham ohenói ita’ýra Ismaélpe, ha opavave hembiguaikuéra onaceva’ekuépe hógape, ha umi ojoguava’ekuépe ipirapire rehe, ha opaite kuimba’ekuérape Abraham rógape oikóvape guive, ha upe árape ha’e oikytĩ’opaite ipire’i, Ñanderuete he’i haguéicha ichupe.
24Abraham oguereko 99 áño oñekytĩ’o ramoguare ipire’i.
25Ha ita’ýra Ismael oguereko 13 áño oñekytĩ’o ramoguare ipire’i.
26Peteĩ árape oñekytĩ’o Abraham ha ita’ýra Ismael pire’i.
27Ha opaite kuimba’e hoga pegua, hembiguái onaceva’ekue hogapýpe ha upe tetã ambuégui pirapire rehe ojejoguava’ekue, oñekytĩ’o avei hendivekuéra.
Currently Selected:
Génesis 17: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
