uMaaliko 8

UYeesu akuvhaliisya avhantu 4,000

(uMataayi 15:32-39)

1Insiku zyeziila, ivhungaana ipiti nkaani lihavhungaana havhili. Pisinda, avhantu vhaala vhahasililwa ishaakulya. Pe uYeesu ahavhiita avhasundikwa vhaakwe, ahavhavhuuzya ahati, 2“Nkuvhafwila uvhwila avhantu ivha, mwe pe tutendiime navho insiku zitatu, she vhatali ni shaakulya. 3Inga navhalaga kuuti vhasogole mu nkaaya zyavho ni nzala, kwe vhazilishe mwi idala, havhili vhamo vhafumile ukutali.” 4Avhasundikwa vhaakwe vhahamwamula vhahati, “Ipa pe pi ilaala, naawumo umuntu we angashaaga ishaakulya isha kuvhakwila avhantu vhonti ivha.” 5Ahavhavhuziilizya ahati, “Muli na makaati galinga?” Vhahati, “Tuli na makaati 7.”

6Pe uYeesu ahavhalajizya avhantu kuuti vhatendame pansi. Ahanyatula amakaati igo 7, ahamusalifwa uMulungu, ahamensulanya, ahaavhapa avhasundikwa vhaakwe, vhoope vhahavhagavhila avhantu. 7Inswi zyope zyámile nyinsi vhweleele, ahamulaavha uMulungu kuuti aloote, pe ahati, “Muuvhape avhantu.” 8Avhantu vhahalya, vhahiikuta. Pe avhasundikwa vhaakwe vhahavhungaaniha ivwalila, vihiizula ivitundu 7. 9Avhantu vhe vháliiye ishaakulya isho, vháamile 4,000 ishi. Pe uYeesu ahavhalaga. 10Ahalimbila mwi ivhooti pooka na vhasundikwa vhaakwe, vhahasogola ku luvhazu ulwa Dalimanuuta.

AVhafalisaayi vhakwanza ishilolesyo

(uMataayi 12:38-42; 16:1-4)

11AVhafalisaayi vhahiivwa kuuti uYeesu aafiha, vhahasogola ku kwakwe, vhahataliha kudalinkana nu kumulinga. Vhahanzaga avhalolesye ishilolesyo isha kuhomeshezya kuuti afumile kwa Mulungu. 12UYeesu ahaswimiililwa nkaani mu mwoyo waakwe, ahati, “Shooni she avhantu avha havhaliilizyo iha vhakwanza ishilolesyo? Nalyoli nkuvhavhuuzya kuuti, avhantu ivha te mbalolesye ishilolesyo naashimo.” 13Pe uYeesu ahavhaleha aVhafalisaayi, ahinjila havhili mwi ivhooti, ahalamba kwi isyila ilya sumbi.

Umulembo uwa kuluzizya uwa Vhafalisaayi nu wa mwene uHeelodi

(uMataayi 16:5-12)

14Avhasundikwa vháluviilwe kupaya amakaati, ileelo vháali ni ikaati lyoka vhweleele mwi ivhooti. 15Lwe vhaakulamba usumbi, pe uYeesu ahavhasoha ahati, “Muvhanje minso nu mulembo uwa kuluzizya#8:15 Umulembo uwa kuluzizya shintu isha kwenjela amakaati. Mu hansi iha, izwi ilyo kwe kuuti, imbombo imbiivhi izya Vhafalisaayi zye vhakuvhambushizya avhanji. uwa Vhafalisaayi nu wa Heelodi.” 16Avhasundikwa vhaakwe vhahanda kupanzanya vhuuvho vheeka kuuti, “Ayanga vhwevhulo, mwe pe tutali na makaati.” 17UYeesu ahamanya zye vhakupanzanya, ahavhavhuuzya ahati, “Shooni she mukupanzanya kuuti mutali na makaati? Vhuli, mushiili kumanyinsanya nu kuzyaganya? Vhuli, amooyo giinyu magomu? 18Muli na minso, ileelo shooni she mutakulola? Muli na makutwi, ileelo shooni she mutakwivwa?#8:18 uYelemiya 5:21 Mutakukumbuha 19vwe naamensuliinye amakaati gasaano, nu kuuvhapa avhantu vhaala 5,000? Vhuli, mwaasevile ivwalila ivitundu vilinga?” Avhasundikwa vhaakwe vhahamwamula vhahati, “Twásevile ivitundu 12.” 20Pe ahavhavhuziilizya havhili ahati, “Na makaati gaala 7 ge vháliiye avhantu 4,000, mwásevile ivwalila ivitundu vilinga?” Avhasundikwa vhahati, “Twásevile ivitundu 7.” 21UYeesu ahati, “Mushiili kuzyaganya?”

UYeesu akumuponia untonko uwa ku Betisaayida

22UYeesu na vhasundikwa vhaakwe vhahafiha mu nkaaya iya Betisaayida. Avhantu vhamo vhahamuleetela untonko, vhahamulambiilizya kuuti amuleme inga amuponie. 23UYeesu ahamulema inyoovhe untonko ula, ahasogola nawo kunzi ku nkaaya. Ahamuswilila amati mu minso, nu kumuvhiishila inyoovhe, pe ahamuvhuziilizya ahati, “Ukulola ishooni?” 24Untonko ahatalanganya, ahati, “Nkulola avhantu, ileelo ngati makwi ge gakujenda.” 25Ahamuvhiishila inyoovhe havhili ku minso, woope ahatontomela, aminso gahiima minza vhweleele, ahalola vwonti ahinza. 26UYeesu ahamuvhuuzya umuntu ula ahati, “Vhwelaaga kuhaaya, ileelo utahatuushe mu lutala.”

UPeeteli akuhomeshezya kuuti uYeesu wu Chilisiti

(uMataayi 16:13-20; uLuuka 9:18-21)

27UYeesu na vhasundikwa vhaakwe vhaheepa paala, vhahasogola mu ntala zye zili papiipi ni nkaaya iya Kayisaaliya mu Fiilipi. Lwe vhali mwi idala, uYeesu ahavhavhuziilizya avhasundikwa vhaakwe ahati, “Avhantu vhakuti ine ne naanu?” 28Avheene vhahamwamula vhahati, “Vhamo vhakuti we Yoohani uMwozyi, avhamwavho vhakuti we mukuvhwi uEeliya.#8:28 UEeliya áamile mukuvhwi uwa hali. Vhaazya uMaaliko 1:1-3. Havhili avhamwavho vhakuti we wooka mu vhakuvhwi.” 29Ahavhavhuziilizya ahati, “Ileelo imwe mukuti ine ne naanu?” UPeeteli ahamwamula ahati, “Iwe we we Chilisiti!” 30UYeesu ahavhasoha avhasundikwa vhaakwe kuuti vhatahamuvhuuzye naawumo inongwa zyakwe kuuti wu Chilisiti.

UYeesu akuyanga izya kufwa nu kuzyuha kwakwe

(uMataayi 16:21-28; uLuuka 9:22-27)

31UYeesu ahataliha kuvhasambiilizya avhasundikwa vhaakwe kuuti, “Ne Mwana wa Aadamu nkwanzilwa kuyimba nkaani nu kuhaanwa na vhasongo na vhapiti avha vhapuuti na vhasambiilizi avha ndajizyo, havhili kwe vhangoje. Ileelo isiku ilya vhutatu uMulungu alinzyusya.” 32Lwe ayanga apazelu izya mayimba gaakwe, uPeeteli ahasaavhuha nawo ku luvhazu, ahataliha kumupilila. 33UYeesu ahagalunkana, ahavheenya avhasundikwa vhaakwe, ahamupilila uPeeteli, ahati, “Galuuha mwisinda iwe Seetano, mwe pe zye ukusiivha te zya Mulungu, ukusiivha izya vhantu.”

34Pe uYeesu ahiita ivhungaana ilya vhantu pooka na vhasundikwa vhaakwe ahati, “Umuntu wonti we akwanza kundandata ine, yikwanzilwa ayihaane wuuyo weeka, ayikungulaje kundandata insiku zyonti, poosye nu kufwa.#8:34 Ayikungulaje kundandata insiku zyonti, poosye nu kufwa: IShiyunaani shikuti, Avhusyaje ishihovhenkanyo shaakwe nu kundandata. 35Umuntu wonti we akwanza kuvhupoha uvhulanzi vhwakwe, alivhulovwa. Ileelo umuntu wonti we akuvhulovwa uvhulanzi vhwakwe ku zyane na kuzya Izwi iLyinza, alivhupoha. 36Ishi umuntu angalyaga lilonka vhuli, inga avhiiha insi yonti yavha yaakwe, ileelo avhuteezya uvhulanzi vhwakwe? 37Poosye umuntu angaafumwa shintu vhuli, kuvhutavhula uvhulanzi vhwakwe? 38Umuntu wonti we akundolela insoni ine na mazwi gaane ku vhavhembu na vhatalamalandu avha havhaliilizyo iha, niine ne Mwana wa Aadamu, ndimuhaana lwe nkwinza havhili nu vhushindamu uvhwa Taata waane, pooka na vhahavhizya avhafinjile.”

Currently Selected:

uMaaliko 8: nih

Highlight

Copy