uMaaliko 16
16
Kuzyuha ukwa Yeesu
(uMataayi 28:1-8; uLuuka 24:1-12; uYoohani 20:1-10)
1Isiku ilya Sabaato ahavhaliilizyo aha hamazuuvha Pachiyeeluka, uMaliiya uwa ku Magidaala nu Saloome nu Maliiya unyina wa Yaakobu, vhahakala amafuta ge gakununshila nu mulembo uwa kudinda kuuti ishaala shitahanunshe, inga vhawupashe umuvhili uwa Yeesu. 2Isiku ilya Pamulungu, inzanshi nkaani, vhahasogola ku mbiipa, vhahafiha lwe izuvha lyatukula. 3Vhahavhuzilizanyaaga vhahatinji, “Wu naanu we kwe atugalagaasizye ivhwe liila lye lili pa mulyango uwa mbiipa?” 4Ileelo lwe vheenya pa mbiipa, vhahalola ivhwe liila ipiti nkaani vhaligalagasiizye, lili pa luvhazu pa mbiipa. 5Lwe vhinjila mu mbiipa, vhahaaga umujaaha#16:5 Umujaaha áali wu havhizya wa Mulungu. atendiime ku luvhazu ulwa kundiilo, azwaye umwenda umuzelu, vhoope vhahahasamala.
6Ileelo umujaaha ula ahati, “Mutahasamalaje. Imanyile kuuti mukumulondola uYeesu uwa ku Naazaleeti we aahomeliilwe. Ataliipo ipa! UMulungu amuzyusiizye! Yeenyi pe vhaamukasiizye. 7Ishi sogooli, mumuvhuuzye uPeeteli na vhasundikwa avhamwavho vhonti, muti avhalongoleeye kusogola ku Galilaaya. Ukwo kwe kwe mumulole, inza vwe ávhavhuziizye.” 8Pe avhantanda vhaala vhaheepa naluvhiilo pa mbiipa, vhahatetema nu kuhasamala. Vhatahamuvhuuzya umuntu nuumo, mwe pe vháamile ni lyoga.
UYeesu akumuloleshela uMaliiya na vhasundikwa vhavhili
(uMataayi 28:9-10; uLuuka 24:13-35; uYoohani 20:11-18)
9Lwe azyuha inzanshi Pamulungu, uYeesu ahamuloleshela ulwa kwanda uMaliiya uwa ku Magidaala we ámwefwizye impepo inkandamanu 7. 10Woope uMaliiya ula, ahasogola kuvhavhuuzya vhe vhahavhanga nu Yeesu. Ahavhaliilizyo iho vhahavhanga vhakuloosya nu kukuuta. 11Ileelo vhoope lwe vhiivwa kuuti uYeesu mupuuma, havhili kuuti uMaliiya uwa ku Magidaala amuvhwenyi, vhatahiitiha.
12Pisinda, uYeesu ahavhaloleshela avhasundikwa vhavhili vhe vháfumile mu nkaaya kusogola ku mwavho, áali ni sheeni ishinji. 13Vhoope vhahasogola kuvhavhuuzya avhasundikwa avhamwavho, ileelo vhatahiitiha.
UYeesu akuvhatumiilizya avhasundikwa vhaakwe
(uMataayi 28:16-20; uLuuka 24:36-49; uYoohani 20:19-23; iMbombo izya Vhatumwa 1:6-8)
14Isiku ilyamwavho uYeesu ahavhaloleshela vhaala 11, lwe vhakulya ishaakulya. Ahavhapilila, mwe pe amooyo gaavho gáamile magomu, havhili, mwe pe vháhaanile kuvhiitiha vhe vhámuvhwenyi lwe azyuha. 15UYeesu ahavhavhuuzya ahati, “Musogole mu nsi yonti, mukumusye Izwi iLyinza ku vhantu vhonti. 16Umuntu wonti we ayiitiha nu kwozelwa we aliipokwa, ileelo we atakwitiha alilongwa. 17Ivilolesyo ivi, kwe vivhombwaje na vhantu vhe vhakuniitiha. Kwe vhefwaje impepo inkandamanu kwi izina lyane, havhili kwe vhayangaje injango injeni. 18Inga vhaalema injoha, poosye inga vhangamwela vwe vikuhola, te vivhavhombaje naashimo. Havhili kwe vhavhavhishilaje inyoovhe avhavhinu, vhoope kwe vhaponaje.”
UYeesu akunyatulwa kusogola ku mwanya
(uLuuka 24:50-53; iMbombo izya Vhatumwa 1:9-11)
19Pe lwe ayanga navho, uMwene Yeesu ahanyatulwa kusogola ku mwanya, ahatendama ku luvhazu ulwa kundiilo ulwa Mulungu pa vhushindamu uvhupiti nkaani. 20Avhasundikwa vhaheepa, vhahasogola kukumusya kwonti. UMwene ahavhombaga imbombo pooka navho, ahahomeshezyaga izwi lyakwe ku vilolesyo vwe vhahavhombaga.#16:9-20 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 9-20.
Currently Selected:
uMaaliko 16: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
