uMataayi 9
9
UYeesu ali na maha aga kuvhaswila avhantu uvhutalamalandu
(uMaaliko 2:1-12; uLuuka 5:17-26)
1Pe uYeesu ahalimbila ivhooti, ahalamba usumbi uwa Galilaaya nu kugaluha mu nkaaya yaakwe iya Kapelanawuumu. 2Pe avhantu vhamo vhahamuleeta umuvhinu we áhataliiye kwa Yeesu, she vhamukasiizye pi izagala. Lwe uYeesu aalola ulwitiho lwavho, ahamuvhuuzya we áhataliiye uyo ahati, “We mwana waane, gomaaga umwoyo! Nakuswila uvhutalamalandu vhwaho.” 3Pe avhasambiilizi vhamo avha ndajizyo izya Moose vhe vháliipo paala vhahasiivha mu mooyo gaavho kuuti, “Yeenya, umuntu uno akumusaamula uMulungu!” 4Ileelo uYeesu ahamanya insiivho zyavho, pe ahavhapilila ahati, “Shooni she mukusiivha imbiivhi mu mooyo giinyu? 5Ishi lili kwoshi lye lipupuusu: kumuvhuuzya umuntu uno we ahataliiye kuuti, ‘Nakuswila uvhutalamalandu vhwaho,’ pamo kuuti, ‘Yimiliila ujendaje’? 6Ileelo ishi nkwanza mumanye kuuti ne Mwana wa Aadamu indi na maha aga kuvhaswila avhantu uvhutalamalandu mu nsi.” Pe ahamuvhuuzya ula we áhataliiye ahati, “Nkukuvhuuzya kuuti, yimiliila! Nyatuula izagala lyaho, vhwelaaga kuhaaya.” 7Pe umuntu uyo ahimiilila, ahavhwela kuhaaya. 8Ivhungaana ilya vhantu lwe lyalola izyo, lihoogopa nkaani. Lihamutiima uMulungu we ávhapiiye avhantu amaha igo.
UYeesu akumwita uMataayi kuuti avhe musundikwa waakwe
(uMaaliko 2:13-17; uLuuka 5:27-32)
9Lwe uYeesu ayeepa paala, ahamulola umusonchezya musonko wumo, we izina lyakwe vhahatinji uMataayi, atendiime apa kusonchezezya umusonko. UYeesu ahamuvhuuzya ahati, “Undandate! Uvhe we musundikwa waane.” Woope uMataayi ahimiilila nu kumulandata. 10Pe uYeesu ahasogola kulya ishaakulya kwa Mataayi. Lwe vhali mu nyumba, vhahinjila avhasonchezya musonko na vhatalamalandu avhamwavho avhinji, vhahatendama kulya ishaakulya pooka nu Yeesu na vhasundikwa vhaakwe. 11Lwe aVhafalisaayi vhazilola izyo, vhahavhakwinkwina avhasundikwa vhaakwe vhahati, “Shooni she umusambiilizi wiinyu akulya pooka na vhasonchezya musonko na vhatalamalandu?” 12Ileelo lwe uYeesu ayiivwa amazwi igo, ahavhaamula ahati, “Avhapuuma vhatakumwanza umuganga, nkandi vhe vhavhinile vhe vhakumwanza. 13Ishi sogooli musambiilile amazwi ge gakuti, ‘Nkwanza uvhwila kuluusya kufumwa impuutile.’#9:13 uHoosiya 6:6 Nkuvhavhuuzya vhwevhulo, mwe pe ntinzile kuvhiita avhantu avhagolosu, nkandi kuvhiita avhatalamalandu, inga vhapindushe.”
Vhakumuvhuziilizya uYeesu izya kuyiima kulya
(uMaaliko 2:18-22; uLuuka 5:33-39)
14Pisinda, avhasundikwa avha Yoohani vhahasogola kwa Yeesu, vhahamuvhuziilizya vhahati, “Iswe na Vhafalisaayi tuli na maata aga kuyiima kulya. Shooni she avheene avhasundikwa vhaaho vhatakuyiima kulya?” 15UYeesu ahavhaamula ahati, “Vhe vhalanjiliilwe pa winga vhatangaloosya lwe we akwimala ali pooka navho, nkandi insiku zye vhalivheefwezya we akwimala, pe vhaliyiima kulya.#9:15 UYeesu akuyiholanya na we akwimala na vhasundikwa vhaakwe akuvhaholanya na vhe vhakuvhalanjila. Havhili lwe akutaha ahavhaliilizyo he vhalivheefwezya we akwimala, akupanga ahavhaliilizyo he vhalimugoga. 16Ataliipo umuntu we akugambiha ishigamba ishipwa pa mwenda umukaali, mwe pe ishigamba ishipwa shikuzepulanya nu kunanganya nkaani umwenda umukaali. 17Havhili, ataliipo umuntu we akuvhiiha idivaayi#9:17 Idivaayi: Vhaazya mu Ntantiho izya Mazwi aMajeni. impwa mu mafuuku amakaali aga makwembe. Inga avhomba vhwevhulo, idivaayi iyo yikupunsya amafuuku nu kwitiha, goope amafuuku gakunanjiha. Idivaayi impwa yikwanzilwa kuyivhiiha mu mafuuku amapwa. Pe vwonti vivhili, amafuuku amapwa ni divaayi impwa, vikusyala ahinza ishisita kunanjiha!”#9:17 AVhaisilayeeli vhahasengulaga idivaayi mu mafuuku aga makwembe aga mbuzi. Amafuuku amakaali gahapotwaga kududuha nkaani lwe idivaayi ye yili muumwo yikulula, pe gahapuntaga. Ileelo amafuuku amapwa gahaduduhaga nkaani, ageene gatahapuntaga. Mu miivhi iga, idivaayi impwa, kwe kuuti insambiilizyo impwa izya Yeesu, goope amafuuku amakaali aga makwembe, kwe kuuti amaata aga hali aga Vhaisilayeeli.
UYeesu akumuponia umwantanda nu kumuzyusya umulindu
(uMaaliko 5:21-43; uLuuka 8:40-56)
18Lwe uYeesu akujendeelela kuyanga na vhantu vhaala, umupiti wumo ahinza, ahasugamila pilongolela lyakwe, ahamuvhuuzya ahati, “Umulindu waane aafwa shiniishi. Ileelo tujende umuvhiishile inyoovhe kuuti umuponie, woope kwe avhe mupuuma havhili.” 19Pe uYeesu ahavhuuha pooka na vhasundikwa vhaakwe, vhahamulandata umupiti uyo. 20Ahavhaliilizyo hanaaho, umwantanda wumo we áyimviliilwe nu vhuvhinu uvhwa shamwiho ku havhaliilizyo aha maaha 12, ahasogola kwisinda kwa Yeesu, ahapalamansya ikoopi ilya mwenda waakwe. 21Ávhomvile vhwevhulo, mwe pe ásivhiliiye mu mwoyo waakwe kuuti, “Inga napalamansya umwenda waakwe vhweleele, kwe mpone.” 22Lwe amupalamansya, uYeesu ahagalunkana kwisinda. Pe lwe amulola umwantanda uyo, ahamuvhuuzya ahati, “We mwana waane, gomaaga umwoyo! Waapona, mwe pe waniitiha!” Naluvhiilo, umwantanda uyo ahapona.
23Pisinda, lwe uYeesu aafiha mu nyumba iya mupiti ula, ahaaga ivhungaana ilya vhantu, vhakuloosya. Vhamo vhahahomaga amalonji. 24UYeesu ahavhavhuuzya ahati, “Mwepe ipa! Umulindu uno atafuuye, akaasite tulo!” Avheene vhahanda kumuseha. 25Pe ahavhafumwa panzi, ahinjila muhati, ahamulema inyoovhe umulindu ula, woope ahavhuuha. 26Inongwa izyo zihakumuha mu nsi yiila yonti.
UYeesu akuvhaponia avhantonko vhavhili
27Pisinda, lwe uYeesu ayeepa paala, avhantonko vhavhili vhahamulandata, vhahavhilishila ku maha vhahati, “We Mwana wa Daavhudi,#9:27 UMwana wa Daavhudi: Vhaazya uDaavhudi mu Ntantiho izya Mazwi aMajeni. utufwile uvhwila!” 28Pe uYeesu ahinjila mu nyumba, vhoope avhantonko ivho vhahasogola mwemuula. Pe ahavhavhuziilizya ahati, “Vhuli, mukwitiha kuuti ingavhaponia?” Vhahamwamula vhahati, “Eena Mwene! Tukwitiha.” 29Pe uYeesu ahavhalema aminso gaavho, ahavhavhuuzya ahati, “Zivhombeshe kuli imwe inza vwe ulwitiho lwinyu luli.” 30Pe aminso gaavho gahapona. UYeesu ahavhasoha nkaani ahati, “Mutahaaleshe umuntu wonti amanye inongwa izi!” 31Ileelo avheene vhahasogola, vhahakumusya inongwa zyakwe mu nsi yiila yonti.
UYeesu akumuponia ushinuunu
32Lwe avhantu vhaala vheepa, avhamwavho vhahamuleeta kwa Yeesu umuntu wumo we álemwilwe ni mpepo inkandamanu. Impepo iyo yámuvhiisile kuvha wu shinuunu. 33UYeesu ahayishimbizya impepo iyo, naluvhiilo, umuntu uyo ahataliha kuyanga. Ivhungaana ilya vhantu vhe vháamile paala vhahasukumila nkaani, vhahati, “Mu nsi yonti iya Isilayeeli zitahafumila naalumo inza izi!” 34Ileelo aVhafalisaayi vhahati, “Akushimbizya impepo inkandamanu ku maha aga mupiti uwa mpepo inkandamanu!”
Avhavhomvi vhali vhansi
35UYeesu ahazyunguulaga mu nkaaya zyonti na mu ntala zyonti. Ahinjilaga mu masinagoogi gaavho, umwo ahasambilizyaga avhantu nu kukumusya Izwi iLyinza ilya vhumwene uvhwa Mulungu nu kuvhaponia amavhinu gonti nu vhuyeyevhazu uvhwa mavhiila mu mavhiila. 36Pe lwe avhalola avhantu ivhungaana, ahavhafwila uvhwila, mwe pe vhahatamilwaga, vhatáamile nu wa kuvhaavwa, vháamile ngati ngʼonzi zye zitali nu mudiimi. 37Pe ahavhavhuuzya avhasundikwa vhaakwe ahati, “Nalyoli iviyavho ivwinji vweleeye, ileelo avhahavuna vhali vhansi. 38Ishi mumulaavhe uMwene umuhaata viyavho, avhatume avhahavuna avha viyavho vwakwe.”
Currently Selected:
uMataayi 9: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
