uMataayi 27

Vhakumutwala uYeesu kwa Pilaato

(uMaaliko 15:1; uLuuka 23:1-2; uYoohani 18:28-32)

1Lwe kwasha inzanshi, avhapiti avha vhapuuti vhonti pooka na vhasongo avha Vhayuuda vhahapanzanya vwe vhamugoje uYeesu. 2Vhahamukunga nu kumutwala kwa mupiti waavho uMuluumi we izina lyakwe vhahatinji uPilaato.

Kufwa ukwa Yuuda

(iMbombo izya Vhatumwa 1:18-19)

3Pe uYuuda, we ámwaniliiye uYeesu, lwe aalola kuuti uYeesu alongwa kumugoga, umwoyo wuhamuvhavha. Ahanyatula insavhaazya ziila 30 nu kuzigalusya ku vhapiti avha vhapuuti na vhasongo avha Vhayuuda. 4Ahavhavhuuzya ahati, “Mbomvile uvhutalamalandu uvhwa kumuvhiiha mu nyoovhe zyinyu umuntu we atananzile naashimo.” Ileelo avheene vhahati, “Izyo zitakutwavwa naashimo, zyaho weneewe.” 5Pe uYuuda ahazisumba insavhaazya izyo pa Nyumba iMfinjile, aheepa, ahasogola ahayinyonga. 6Avhapiti avha vhapuuti vhahasevha insavhaazya izyo, vhahayanga vhahati, “Indajizyo izya Mulungu zitakwitishila kusangaanya impiiya izi ni zya mu Nyumba iMfinjile, mwe pe izi zyaamile zya malipilo aga kumugoga umuntu.” 7Pe vhahapanzanya kunyatula impiiya izyo nu kukalila umugunda uwa hamata, inga vhavhasyilaje avhajeni mwenemwo. 8Ye nongwa umugunda uwo vhakuwiita kuuti uMugunda uwa Mavhanda kufishila ileelo ili.

9Isho vwe lyálunjisile izwi lye umukuvhwi uYelemiya ásimvile átili, “Vhányatuuye insavhaazya 30, ishipimilo she aVhaisilayeeli vhítinkiine kumulipa. 10Vhahakala umugunda uwa hamata inza vwe uMWENE uMulungu ándajiziizye.”#27:9-10 uYelemiya 19:1-13; 32:6-9; uZakaliya 11:12-13

UYeesu pilongolela ilya Pilaato

(uMaaliko 15:2-15; uLuuka 23:2-3, 18-25; uYoohani 18:29-19:16)

11Pe uYeesu ahimiilila pilongolela ilya mupiti uMuluumi. Umupiti uyo ahamuvhuziilizya ahati, “Vhuli, iwe we Mwene uwa Vhayuuda?” UYeesu ahamwamula ahati, “Iwe we wayanga.” 12Pe avhapiti avha vhapuuti na vhasongo avha Vhayuuda vhahanda kumulonjeelela uYeesu, ileelo uweene atahavhaamula naashimo. 13Pe uPilaato ahamuvhuuzya ahati, “Yeenya zye vhakukulonjeelela vwe zya vhwinji!” 14Ileelo uYeesu atahaamula izwi inga lyoka. Pe uPilaato ahasukumila nkaani.

15Gáamile maata umulongozi uwa nsi, ahavhaliilizyo aha pa shikulukuulu isha Pasaaka, kumusatula umukungwa wooka we ivhungaana ilya vhantu vhahanzaga kuuti asatulwe. 16Ishi ahavhaliilizyo iho, kwáli umukungwa wumo we izina lyakwe vhahatinji uBalaaba. Umukungwa uyo ámanyisile nkaani ku mbiivhi zye ahavhombaga. 17Lwe avhantu vhavhungiine, uPilaato ahavhavhuziilizya ahati, “Mukwanza imbasatulile unaanu mu vhakungwa ivha vhavhili? Vhuli, mukwanza imbasatulile uBalaaba, pamo uYeesu we vhakuti uChilisiti?” 18Ávhavhuziliziizye isho, mwe pe ámanyile kuuti avhalongozi vhaala, vhámutwaye uYeesu ku kwakwe, mwe pe vháali nu mwone.

19Lwe uPilaato atendiime pa shitengo isha vhulonzi, umushi ahatumiilizya intumi ahati, “Utahamuvhombele ivhiivhi naalimo umuntu uyo we mugolosu, mwe pe uvhusiku uvhwa ileelo njimvile nkaani mu njozi ku zyakwe.”

20Avhapiti avha vhapuuti na vhasongo avha Vhayuuda vhahasonzya ivhungaana ilya vhantu, vhoope vhahamulaavha uPilaato avhasatulile uBalaaba, nu kumulonga uYeesu kuuti vhamugoje. 21UPilaato ahavhavhuziilizya havhili ahati, “Mukwanza imbasatulile unaanu mu vhakungwa ivha vhavhili?” Vhahamwamula vhahati, “Tukwanza utusatulile uBalaaba.” 22UPilaato ahavhavhuziilizya havhili ahati, “Ishi imuhonzye vhuli uYeesu we vhakumwita kuuti uChilisiti?” Vhahazuma ahalanga vhahati, “Ahomeelwe pa shihovhenkanyo!” 23UPilaato ahavhuziilizya havhili ahati, “Ananzile ishooni she tumuhomeele?” Ileelo avheene vhahajendeelela kuzuma ahalanga kuuti, “Ahomeelwe!”

24Lwe uPilaato aalola kuuti atangagalulanya insiivho izya vhantu ivho nu kuuti vhatalisile ivho, ahanyatula aminzi nu kugeeza mu nyoovhe zyakwe pilongolela lyavho kulolesya kuuti atali nu vhunanzi naavhumo. Pe ahavhavhuuzya ahati, “Ine ntali nu vhunanzi naavhumo ku vhufwe uvhwa muntu uno umugolosu. Izi zili mu nyoovhe zyinyu mweneemwe!” 25Avhantu vhonti vhahamwamula vhahati, “Uvhunanzi uvhwo uvhwa kumugoga uYeesu, vhuvhe vhwitu na vhaana vhiitu!” 26Pe uPilaato ahavhasatulila uBalaaba inza vwe vhahanzaga, ileelo ahalajizya kuuti uYeesu ahomwe nu muchaapu nu kumutwala kuhomeelwa pa shihovhenkanyo.

Avhasikaali vhakumujevhula uYeesu

(uMaaliko 15:16-20; uYoohani 19:2-3)

27Pe avhasikaali avha mupiti uMuluumi ula vhahamutwala uYeesu mu nyumba yaakwe iya kukonzezya. Vhahavhavhungaaniha avhasikaali avhamwavho vhonti nu kumuzyunguula uYeesu. 28Vhahamuzuula amenda gaakwe nu kumuzwalizya inkanzu ye yáali nu muhoola uwa mafwomfwo ngati wu mwene. 29Vhahatavha ishipambwi isha mimvwa, vhahamuzwalizya kwi itwe nu kumulemeha indiisa ku nyoovhe yaakwe iya kundiilo, inga aloleshe inza umwene. Vhahamusugamilila ngati vhakumupuuta nu kwanda kumujevhula kuuti, “Mwakaata, we Mwene wa Vhayuuda!” 30Pe vhahamuswilila amati, vhahanyatula indiisa ku nyoovhe yaakwe nu kumuhoma nayo pi itwe. 31Lwe avhasikaali ivho vhaamala kumujevhula, vhahamuzuula inkanzu iyo nu kumuzwalizya amenda gaakwe havhili. Pisinda, vhahamutwala kumuhomeela pa shihovhenkanyo.

UYeesu akuhomeelwa pa shihovhenkanyo

(uMaaliko 15:21-32; uLuuka 23:26-43; uYoohani 19:17-27)

32Lwe vhakufuma mu nkaaya iya Yelusaleemu, mwi idala vhahahomaana nu muntu wumo we izina lyakwe vhahatinji uSiimoni, umuhaaya uwa mu nkaaya iya Kileene. Avhasikaali vhahamuvijiilizya umuntu uyo kuuti avhegale ishihovhenkanyo isha Yeesu. 33Pisinda, vhahafiha nu Yeesu pamo pe vhahatinji pa Goligoota, kwe kuuti pi Ipangaawe ilya Itwe. 34Vhahaamupa idivaayi ye vhásangiinye nu mulembo uwa kusheefwa uvhuvhaavi, ileelo lwe alinga, ahahaana kumwela. 35Lwe vhamuhomeela pa shihovhenkanyo, vhahagavhana amenda gaakwe kwi idala ilya kugahomela ulutambu.#27:35 iZabuuli 22:18 Pe lihalunjiha izwi lye umukuvhwi áyanzile kuuti, “Vhágavhiine amenda gaane, ni nkanzu yaane vháyihomeeye ulutambu.”#27:35 Pe lihalunjiha izwi lye umukuvhwi áyanzile kuuti, “Vhágavhiine amenda gaane, ni nkanzu yaane vháyihomeeye ulutambu.” IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga. Zyope iBiibiliya zimo izya manda iga zikugaleha amazwi iga ishisita kusimba. 36Pe vhahatendama paala kumuguulila. 37Pa mwanya kwi itwe lya Yeesu vhahavhiiha amazwi aga kumulonjeelela ge gásimviilwe kuuti, “UNO WU YEESU, UMWENE UWA VHAYUUDA.”

38Ahavhaliilizyo hanaaho kwáli avhapumula vintu vhavhili. Vhoope vhahahomeelwa pa vihovhenkanyo vwavho pooka nu Yeesu, wumo ku luvhazu ulwa kundiilo ulwa Yeesu, uwamwavho ulwa kumongo. 39Avhantu vhe vhahatuuhaga mwi idala liila vhahamuligaga uYeesu nu kuyinzaanya amatwe gaavho kumusuufwa. 40Vhahamujevhulaga vhahatinji, “Te weewe we watinji ungayimongola iNyumba iMfinjile nu kuyizenga havhili ku nsiku zitatu? Ishi, inga nalyoli iwe we Mwana wa Mulungu, uyiposhe weneewe, uyiishe pa shihovhenkanyo ipo!” 41Vhwevhulo, vhoope avhapiti avha vhapuuti na vhasambiilizi avha ndajizyo na vhasongo avha Vhayuuda vhahamujevhula, vhahati, 42“Aavhaposile avhanji, ileelo atangayipoha wuuyo! Inga wu Mwene uwa Vhaisilayeeli, ayiishe pa shihovhenkanyo, pe niiswe kwe tumwitishe. 43Uweene akumusuuvhila uMulungu, pe uMulungu amuposhe shiniishi inga amukunzite, mwe pe aayanzile aatili, ‘Ine ne Mwana wa Mulungu.’” 44Vhoope avhapumula vintu vhe vháhomeliilwe pooka nawo, vhahamuliga inza vwe avhanji.

Kufwa ukwa Yeesu

(uMaaliko 15:33-41; uLuuka 23:44-49; uYoohani 19:28-30)

45Kwandila ahavhaliilizyo aha vhushenzelo ishiisi shihagwa insi yonti kufishila saala 9. 46Lwe yaafiha saala 9, uYeesu ahavhilishila mu njango yaavho kwi izwi ipiti ahati, “Elooyi! Elooyi! Laama sabakitaani?” Amazwi igo kwe kuuti, “We Mulungu waane! We Mulungu waane! Shooni she wandeha?”#27:46 iZabuuli 22:1 47Avhantu vhamo vhe vhímiliiye paala, lwe vhiivwa amazwi igo, vhahati, “Uno akumwita umukuvhwi uEeliya.”#27:47 Uno akumwita umukuvhwi uEeliya: UEeliya akuyangwa ipa, mwe pe aVhayuuda avhinji vhahitihaga kuuti uEeliya atahafwa, ileelo uMulungu ámunyatuuye mu nsi she mupuuma nu kusogola nawo ku mwanya. Havhili vhahasuvhilaga kuuti uEeliya aliyinza havhili mu nsi. Vhaazya 2 aVhamwene 2:11; uMalaaki 4:5. 48Ahavhaliilizyo hanaaho, umuntu wumo mu vhasikaali vhaala ahashimbila uluvhilo, ahanyatula umwepe, ahawutumpiha mu divaayi inkali, ahawuvhiiha kwi ilanzi, ahamumwensya. 49Ileelo avhasikaali avhamwavho vhahati, “Leha twenye inga umukuvhwi uEeliya akwinza kumupoha!” 50Pe uYeesu ahavhilishila havhili kwi izwi ipiti, ahafwa.

51Yeenya, umwenda#27:51 Umwenda: Vhaazya iNyumba iMfinjile mu Ntantiho izya Mazwi aMajeni. we wápituliinye iNyumba iMfinjile#27:51 INyumba iMfinjile: Vhaazya mu Ntantiho izya Mazwi aMajeni. wuhazeepuha pahati kufuma pamwanya kufiha pansi. Insi yihayingaana na mayalaawe gahabazunkana. 52Pe imbiipa zihagubuha na vhafinjile avhinji vhe vháfuuye vhahazyuha. 53Lwe uYeesu azyuha, vhoope vhahafuma mu mbiipa zyavho, vhahinjila mu nkaaya imfinjile iya Yelusaleemu nu kuvhaloleshela avhantu avhinji.

54Lwe umupiti uwa vhasikaali pooka na vhe vhahamuguulaga uYeesu vhaalola ishisumbi, ni zinji inyinji zye zyálolesile vhahoogopa nkaani, vhahayanga vhahati, “Nalyoli umuntu uno aamile Mwana wa Mulungu!”

55Kwáli avhantanda avhinji paala vhe vhahamulandataga uYeesu kufuma mu shigavho isha nsi isha Galilaaya nu kumuvhombela. Avhantanda ivho vhímiliiye ukutali nu kwenya zyonti zye zihavhombehaga. 56Muli ivho, áliipo uMaliiya uwa mu nkaaya iya Magidaala nu Maliiya unyina uwa vha Yaakobu nu Yoosefu nu nyina uwa vhaana vha Zebedaayi.

Kusyilwa ukwa Yeesu

(uMaaliko 15:42-47; uLuuka 23:50-56; uYoohani 19:38-42)

57Lwe haafiha hamazuuvha, ahinza umuntu wumo udumbwe we vhahatinji uYoosefu, uwa mu nkaaya iya Alimataayi, woope áali musundikwa wa Yeesu. 58UYoosefu ahasogola kwa Pilaato, ahamulaavha kuuti anyatule ishaala isha Yeesu, inga ashisyile. Pe uPilaato ahavhalajizya avhasikaali vhaakwe kuuti vhaamupe shenesho. 59UYoosefu ahanyatula ishaala isho nu kushizinga mu mwenda umwinza umuzelu. 60Ahashisyila mu mbiipa yaakwe impwa#27:60 Imbiipa yaakwe impwa: Yáali mwata ku Vhayuuda umuntu kuyibanila imbiipa she ashiili kufwa. ye ábanile nziila mwi iyalaawe. Pe ahaligalagaasizya ivhwe ipiti pa mulyango uwa mbiipa iyo nu kwepa. 61Ahavhaliilizyo iho, uMaliiya uwa ku Magidaala nu Maliiya uwunji vhátendiime kulungamana ni mbiipa.

Avhasikaali vhakuguulila imbiipa

62Isiku lye likulandata, lye lyáli lya Sabaato, avhapiti avha vhapuuti na Vhafalisaayi vhahavhungaana kwa Pilaato. 63Pe vhahamuvhuuzya vhahati, “We mwene, tukukumbuha kuuti lwe we akuhopenkanya ula mupuuma, áyanzile átili, ‘Lwe zyatuuha insiku zitatu, ndizyuha.’ 64Ishi tukulaavha uvhalajizye avhasikaali vhaaho kuuti, vhayiguulile imbiipa kufishila isiku ilya vhutatu. Inga utavhavhiiha avhantu avha kuguulila, avhasundikwa vhaakwe vhanginza vhiivhe ishaala shaakwe nu kuvhahopenkanya avhantu kuuti azyusile. Inga izyo zyavhombeha, ilenga ilyo liliivha lipiti nkaani kuluusya ilya kwanda.” 65UPilaato ahavhaamula ahati, “Nyatuuli avhasikaali. Musogole muguulile imbiipa ku maha gonti.” 66Pe vhahasogola ku mbiipa, vhahavhiiha ishimanyilo pi ivhwe, inga atahaavhe umuntu uwa kulisegusya. Pe avhalongozi ivho vhahavhaleha avhasikaali pepaala, inga vhayigulilaje imbiipa.

Currently Selected:

uMataayi 27: nih

Highlight

Copy